“Nahadlok Kong Makigsulti sa Akong Bishop—Unsa Kahay Iyang Reaksiyon?” Liahona, Ene. 2026.
Gikan sa YA Matag Semana
Nahadlok Kong Makigsulti sa Akong Bishop—Unsa Kahay Iyang Reaksiyon?
Nakahimo ko og dili maayong mga pagpili. Apan dihang nakigsulti ko sa akong bishop, tanan nakong gibati mao ang kahupayan.
Dihang nagkinabuhi ko nga ako ra sa unang higayon, mibati ko og bag-ong pagbati sa kagawasan.
Mibalhin ko sa Pilipinas aron sa pagsugod og eskwela, ug ang pagsakay sa eroplano pauli dako og gasto, mao nga mouli lang ko og kausa sa usa ka tuig sa pag-renew sa akong visa. Kay wala sa akong duol ang matinud-anong impluwensiya sa akong pamilya, anam-anam akong nahilayo sa ebanghelyo.
Nagsugod ko sa pagpanigarilyo, pag-inom, ug paghimo sa mga butang nga gitudlo kanako nga supak sa mga sugo sa Dios.
Paghinumdom kon si Kinsa Ako
Sa sinugdanan, wala kadtoy bale kanako. Gitan-aw nako ang mga balaod sa Simbahan nga usa ka restriksiyon. Mosimba gihapon ko, apan sa kahiladman mibati ko nga dili takos ug mihunong sa pag-ambit sa sakramento sulod sa mga bulan.
Dayon ang COVID-19 miabot, mipahunong sa tanan nga akong mga gitinguha. Sulod sa mao gihapon nga panahon, nahibaloan nako ang butang nga makapakurat: Ako sinagop diay. Wala gyod ko sultihi sa akong mga ginikanan, ug daw naglibog ko sa akong pagka-ako.
Mibati ko nga nahilayo gikan sa tanan nga kausa akong gituohan. Nasayod ko nga kinahanglan nakong susihon og usab kon kinsa gayod ako. Dihang sa kataposan nakauli na ako, akong gisulti sa akong mga ginikanan ang mahitungod sa tanan—lakip ang mga pagpili nga akong gipanghimo. Imbis nga kasab-an nila ako, misanong sila uban sa gugma. Gipahinumdoman nila ako kon si kinsa gayod ako: ilang anak ug usa ka pinalangga nga anak sa Dios.
Tabang sa Pag-usab
Gusto ko nga mag-usab. Giawhag ako sa akong mga ginikanan nga makigsulti sa akong bsihop, magsugod sa proseso sa paghinulsol, ug mosalig sa makatubos nga gahom sa Manluluwas.
Apan nahadlok ko! Nabalaka ko nga masilotan o mahukman sa akong mga pagpili. Sa kasagaran walay bale kanako kon unsay hunahuna sa uban ngari kanako, apan ang akong bishop labihan katalagsaon nga tawo, ug dili ko gustong masagmuyo siya pinaagi sa pagsulti kaniya sa unsay akong nahimo.
Apan sigon sa gitudlo sa Seventy nga si Elder Scott D. Whiting: “Ayaw pagtago gikan niadtong kinsa mohigugma ug mosuporta kaninyo; hinuon, dagan ngadto kanila. Ang maayong mga bishop, mga presidente sa branch, ug mga lider makatabang kaninyo sa paggamit sa makaayo nga gahom sa Pag-ula ni Jesukristo.”
Ang mga bishop “naghupot sa mga yawe sa pagkapari sa pagrepresentar sa Ginoo sa pagtabang sa mga miyembro sa Simbahan nga maghinulsol.” Imbes mag-atubang og ngil-ad nga paghukom dihang nakigsulti ko kaniya, ang tanan nakong gibati mao ang kahupayan. Akong naamgohan nga ang Ginoo misalig kaniya sa pagtabang kanako, ug mibati ko nga ako usab makasalig kaniya.
Giawhag ako sa akong bishop sa pagkat-on mahitungod sa Manluluwas ug sa Iyang Pag-ula pinaagi sa pagtukod og espirituhanong mga kinaiya. Nakigkita ko sa akong bishop kanunay, ug manawag siya kanako matag semana aron sa pagsusi. Mibati ko nga gihigugma sa hilabihan sa matag higayon nga makigsulti ko kaniya.
Ang Gasa sa Paghinulsol
Sa kadugayan, pinaagi sa tabang sa akong bishop, nabiyaan nako ang mga bisyo sa akong kinabuhi. Sa gihapon, gikulbaan ko mahitungod sa pag-ambit og usab sa sakramento. Takos na ba gayod ako—bisan human sa tanang buhat nga akong nahimo?
Apan ang akong bishop mipaneguro kanako. Gipahinumdoman niya ako nga wala kinahanglana nga perpekto ako—basta andam lamang sa pagsunod sa mga kasugoan. Naghimo ako sa akong labing maayo, ug ang Manluluwas nasayod niana ug magpadayon sa pagpasaylo kanako samtang mosalig ko sa Iyang gasa sa paghinulsol.
Si Sister Tamara W. Runia, Unang Magtatambag sa Kinatibuk-ang Kapangulohan sa Young Women, bag-o lang mitudlo, “Ang pagduol ngadto ni Kristo sama ra sa pagsulti nga,‘Mahimo ba nga tabangan [mo] ako?’ uban sa paglaom, usa ka gipadayag nga kaseguroan nga ang Iyang mga bukton gitanyag kanimo kanunay.”
Human niini nga kasinatian, akong gisugdan ang pagbag-o sa akong mga pakigsaad pinaagi sa sakramento uban sa kamasaligon. Mibati ko nga usa ka bag-ong tawo, nga adunay bag-ong pagbati kon si kinsa gayod ako ug kon unsay mahimo nakong mabuhat uban sa tabang sa Ginoo. Gani nakaserbisyo ako og usa ka misyon tungod kay human makasaksi unsa kadako ang gasa sa pagtubos sa Manluluwas nakausab sa akong kinabuhi, gusto kong motabang sa uban nga makakaplag sa paglaom nga Iyang gihatag kanako sa matag adlaw.
Ang mga sugo dili usa ka restriksiyon—anaa kini tungod kay gusto sa Dios nga kita molampos, motubo, ug makalikay sa lit-ag sa sala. Ang sentro sa ebanghelyo ni Jesukristo mao ang gugma nga anaa Kaniya ug sa Langitnong Amahan alang kanato. Tungod kay nakasinati ako nianang hingpit nga gugma, naningkamot ko nga mas mahisama Kanila.
Ang Ilang gasa sa paghinulsol mipuno og kalipay sa akong kinabuhi.