Gikan sa YA Matag Semana
Pagkahibalo nga ang Akong Bili Walay Kalambigitan sa Pagkaperpekto
Sa dihang wala na ko maghunahuna nga ang pagkamasulundon mao ang bili, hingpit nakong nasabtan ang grasya.
Mibati ka ba nga murag ang Dios gikapoy na nimo sa pagsigeg balik-balik nga paghimo sa samang sala? O sama nga ang imong bili nag-agad kon unsa ka maayo ang imong pagtuman ug pagsunod sa mga lagda?
Kon mibati ka niini, hibaloi nga wala ka mag-inusara.
Sukad sa bata pa ko, akong gilambigit ang akong bili sa kaugalingon ngadto sa “pagkabuotan” nga anak—o gani anak nga wala nakahimo og mga sayop. Ganahan ko nga mauoyonan, mao nga naningkamot ko kutob sa akong mahimo nga mahimong labing maayo nga estudyante, labing maayo nga anak nga nbabaye—usa ka tawo nga nagbinuotan kanunay.
Apan ang mga bata makahimo og mga sayop. Ang mga estudyante nagkinahanglan og koreksiyon. Ang pagdako nagpasabot og pagkat-on, usahay pinaagi sa kapakyasan o mga hagit o mga sayop. Sa gihapon, bisan kon nahibalo ko nga tinuod kini, ang matag sayop murag usa ka tipak sa akong bili. Nakita nako ang akong kaugalingon nga dili na kaayo bililhon sa akong pamilya, mga magtutudlo, ug mga kaedad sa higayon nga dili nako hingpit nga mahimo ang mga gilaoman.
Paghinumdom Ngano nga si Kristo Mianhi
Kining pagkamahingpiton nga panghunahuna nadala dayon ngadto sa akong tinuohan sa dihang nagpasakop ko sa Ang Simbahan ni Jesukristo sa mga Santos sa Ulahing mga Adlaw sa edad nga 18. Nagtuo ko nga ang pagkahimong labing masulundon nga miyembro nakahimo nakong bililhon sa mga mata sa Langitnong Amahan. Makausa pa, akong gisukod ang akong bili pinaagi sa kon unsa ka maayo ang akong pagsunod sa mga lagda.
Bisan kon ang akong mga tinguha sinsero, sayop diay ko. Kini nga panghunahuna hinay-hinay nga mipakunhod sa akong pagsalig.
Mao nga, unsay nakapausab?
Alang nako, kadto ang Abril 2025 nga kinatibuk-ang komperensiya—labi na ang pakigpulong nga gihatag ni Sister Tamara W. Runia, Unang Magtatambag sa Kinatibuk-ang Kapangulohan sa Young Women. Siya miingon, “Ako mopamatuod nga samtang ang Dios naghunahuna mahitungod sa atong mga sayop, Siya labaw nga nagpakabana sa unsay mahitabo human kita nakahimo og sayop.”
Samtang nagbarog ko sa among sala, ang mga luha miagas sa akong nawong. Ang Espiritu namulong sa akong kasingkasing, nagpahinumdom nako nga nasayop ko sa paglambigit sa akong pagkamasulundon ngadto sa akong bili ug kinahanglan ko nga motan-aw sa mga butang sa lahi nga paagi.
Ang Dios wala mopamenos sa akong bili sa higayon nga nakahimo ko og mga sayop. Nasayop kaayo ko sa pagtuo niana. Si Sister Runia mipadayon pinaagi sa pagtudlo nga kon kita maghinulsol, ang Dios magmaya. Matag semana nga moambit ko sa sakramento, ako adunay oportunidad nga mobag-o sa akong mga pakigsaad, magsugod og bag-o, ug mosulay pag-usab.
Ang Bili Walay Kausaban—Kanunay
Ang bahin sa pakigpulong nga nakapatandog gyod nako mao kadtong higayon nga si Sister Runia mihulagway sa atong bili isip mga anak sa Dios pinaagi sa iyang mga kamot.
Giisa niya ang iyang wala nga kamot sa pagrepresentar sa kinaiyanhong bili, unya migamit sa iyang tuo nga kamot aron ipakita ang mga maayo ug dili maayo sa kinabuhi—mga sayop, mga kalamposan, mga pakigbisog, ug paglambo. Samtang ang “pagkamasulundon” nga kamot misaka ug miubos, ang “bili” nga kamot nagpabiling makanunayon.
Si Sister Runia mipamatuod: “Ang imong bili wala mahigot sa imong pagkamasulundon. Ang imong bili kanunayng magpabilin, ug kini dili mausab. Gihatag kini sa Dios kanimo, ug ikaw o si bisan kinsa walay mahimo sa pag-usab niini. Ang pagkamasulundon magdala og mga panalangin; tinuod kana. Apan ang bili wala niana. Ang imong bili kanunay nga ‘mahinungdanon sa panan-aw sa Dios’ [Doktrina ug mga Pakigsaad 18:10], bisag unsa pa ang nahitabo tungod sa mga sangpotanan sa imong mga desisyon.”
Kini ang gamhanang kamatuoran nga gikinahanglan nako nga makat-onan.
Pagpadayag alang sa Akong Kalag
Atol niana nga kinatibuk-ang komperensiya, ang Langitnong Amahan mitubag sa pangutana nga wala nako mahibaloi nga nakatago sa kinahiladman sa akong kalag. Pagpadayag kadto alang sa akong kasingkasing, dili na buhaton ang dugay nang gihimo nga ubos ang pagtan-aw sa kaugalingon ug kakulang sa pagsalig kondili pun-on ang akong kaugalingon sa Iyang putli nga gugma ug kaluoy.
Ang ebanghelyo ni Jesukristo usa ka paglaom tungod kay nagtudlo kini og paghinulsol. Pinaagi sa atong Manluluwas, si Jesukristo, kita mahimong mabag-o, malimpyohan, ug mabalaan. Siya malipayon gayod nga mopasaylo kanato. Kana ang hinungdan nganong Siya andam nga miantos alang sa atong mga sala ug mga kasakitan. Samtang maghinumdom ko niini nga kamatuoran ug nagtutok sa walay kinutoban nga kaluoy nga Iyang itanyag sa matag higayon nga ako modangop ngadto Kaniya, gibati nako nga ang akong bili sa kaugalingon nadugangan ug ang akong kawalay kasegurohan nahanaw.
Kon ikaw mibati nga ang imong bili nag-agad sa imong pagkamasulundon, hinumdomi kon sa unsang paagi nga ang Langitnong Amahan ug si Jesukristo hingpit nga nahigugma nimo. Sila mihatag og paagi aron ka matubos. Pangutan-a ang Langitnong Amahan kon unsay tan-aw Niya nimo—ug dayon tugoti nga kana nga kamatuoran matisok sa kinahiladman sa imong kalag.
Paghupot niini. Ayaw na gayod pagduhaduha niini pag-usab.