Matarong nga Pagkatinugyanan—Mga Disipulo ni Jesukristo

Minahal nga mga higala sa tibuok kalibotan, welcome! Naghinam-hinam ko niini nga oportunidad nga ikauban mo—sa pagpakigbahin sa akong gugma alang kaninyo sa akong mga tinguha alang kaninyo. Labing importante, manghinaot ko nga makabaton kamo og kasinatian niining gabhiona—nga kamo mobati sa gugma sa Dios ug madasig sa pagkab-ot sa Iyang labing taas nga mga tinguha alang kaninyo!

Ania kita dinhi sa makasaysayanong Tabernakulo sa Temple Square sa Siyudad sa Salt Lake. Gisugdan ang konstruksyon niining halangdong bilding usa ka gatos ka tuig sa wala pa ako matawo. Panahon kadto nga ang mga materyal sa pagtukod mahal kaayo sa Teritoryo sa Utah, walay riles sa tren nga modala sa mga suplay, ug, gani kon aduna man, ang kwarta limitado. Apan kadtong nagtrabaho niining halangdon nga estraktura mapaninguhaon ug migamit pag-usab sa lahi nga paagi sa mga materyal nga anaa. Ang pipila ka kahoy nga gigamit mga ginamit gikan sa gitukod kaniadto nga mga kapuy-an. Ang mga lansang ug mga tsapa gipanday gikan sa guba nga mga sapatos sa baka. Ug ang plaster gisagolan og buhok sa hayop aron malig-on. “Bag-ohon ang kagamitan,” “mogamit pag-usab sa samang paagi,” ug “mogamit pag-usab sa lahi nga paagi” mao ang ilang importante nga pulong kaniadto sa wala kini mahimong kabahin sa atong pinulongan.

Ang akong ikaduha ug ikatulo nga mga apohang lalaki sa tuhod, mga langyaw gikan sa England, nagtrabaho sa dagko kaayo nga mga pultahan niini nga Tabernakulo. Nakahanduraw ba kaha sila sa ilang kaliwat, usa ka apo nga babaye, mamulong gikan niining makasaysayong pulpito?

Mga kaigsoonan, nasabtan ba ninyo ang epekto sa inyong gibarogan nga himoon?

Ang kalibotan nga atong gipuy-an daghan og mga hagit. Ug kamo mao ang henerasyon sa mga babaye ug mga lalaki nga giandam alang niining adlawa—kamo adunay kapasidad, sa mga hiyas, sa tinguha, ug sa oportunidad sa paggamit sa gahom sa Dios aron sa pagtubag niadtong mga hagit ug sa pagsulbad niini. Ang inyong potensiyal balaanon.

Ako nagtuo kaninyo. Ang mga propeta, mga manalagna, ug mga tigpadayag mipadayag og pagsalig diha kaninyo. Ang ilang gipamulong, ingon og gipamulong sa Ginoo Mismo.

Palihog ayaw paghunong sa pagpaningkamot sa pagsulbad sa mga hagit niining panahona. Nagkinahanglan kami kaninyo!

Nakasabot ko nga mahimong malimitahan ang pagsabot tungod sa pagkanegatibo , ug sa pagtutok sa mga kalisod sa pagkakaron nga gipadayag sa kalibotan. Mga gubat, mga panagbingkil sa politika, pagdominar, natural nga mga katalagman, pag-antos sa tawo—nga lisod kaayo iproseso. Mobati ka nga walay gahom aron matuman ang dugay nang nahimo nga mga kasulbaran.

Uban sa pagsalig, ako mopahayag nga nabulahan sa kusog ug gahom sa Dios nga anaa kaninyo samtang kamo mohimo ug motuman sa mga pakigsaad ngadto Kaniya, kamo makasumbalik sa negatibo ug modan-ag sa kahayag sa matag suok sa kangitngit.

“[Kita] mao ang kahayag sa kalibotan,” gipahayag sa Manluluwas. Ug ang “kahayag mounong sa kahayag.” Ang paghimo sa kahayag sa atong pagkadisipulo ngadto ni Jesukristo nga mosanag sa labing maayong matang sa enerhiya—enerhiya gikan sa usa ka tinubdan nga kanunay nga gipuno. Ako mopamatuod nga pinaagi sa pagdala sa Iyang kahupayan ug kahayag ngadto sa uban, makaplagan nato ang atong kaugalingong kahupayan diha Kaniya.

Mao nga magmahimong tigpasiugda og kalinaw sa inyong kaugalingong panimalay, komunidad, ug sa inyong presensya sa online. Hupaya ang pag-antos sa inyong kaugalingong kasilinganan.

Ang tumong ni Satanas mao nga kita pagaaghaton. Sa pagtandi, ang plano sa Amahan sa kalipay naghatag nato og oportunidad sa paglihok, nga mahimong mga tinugyanan alang sa kaayohan, alang sa kalinaw, alang sa paglaom.

Atong mabatokan ang sayop nga impormasyon pinaagi sa pagpakigbahin og makabayaw, malaumon, ug eksakto nga impormasyon—mahimong mga manlalaban sa kamatuoran kaysa sa tiggamit lamang sa impormasyon. Atong matubag ang negatibo pinaagi sa pagtubag og positibo inubanan sa kahayag ug maayong mga balita sa ebanghelyo ni Jesukristo.

Sama sa gipasabot sa atong minahal nga propeta nga si Presidente Russell M. Nelson, “Ang tubag sa kanunay mao si Jesukristo.” “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo.”

Si Presidente Nelson midapit nato nga himoon ang atong pagkadisipulo nga atong “kinatas-an nga prayoridad.” Mapalawman nato ang atong pagkadisipulo kon kita makat-on gikan ug mahitungod ni Jesukristo. Mao nga atong suhiron ang mga pagtulun-an sa Manluluwas.

Ang Mateo kapitulo 25 naglakip sa tulo ka sambingay, ang kataposang mga sambingay ni Mateo nagrekord nga gitudloan sa Manluluwas sa Iyang mortal nga pangalagad. Sa pag-andam sa akong bag-o nga pakigpulong sa kinatibuk-ang komperensiya, ug sa pag-andam alang niini nga debosyonal, ang Espiritu miaghat nako sa pagbalik ug sa pagkat-on gikan niini nga mga istorya.

Alang sa atong mga katuyoan, buot nakong hatagan og gibug-aton ang mga aspeto sa pagpangandam ug pagkatinugyanan niini nga mga sambingay. Si Presidente Nelson midapit nato sa paghimo “karon … ang panahon … sa pag-andam alang sa Ikaduhang Pag-anhi ni … Jesukristo.” Ang pagkatinugyanan mao ang mabinantayon ug responsable nga pagdumala sa pipila ka butang nga gisalig nga ampingan sa usa ka tawo. Sa atong mga paningkamot sa pagkatinugyanan, sundon nato si Jesukristo. Mao nga paminaw sa mga leksiyon sa pagpangandam ug pagkatinugyanan nga atong makuha gikan niini nga mga istorya.

Una, ang sambingay sa napulo ka dalaga—lima kinsa malaamon ug ang lima nga gihulagway nga danghag.

Diha sa sambingay, ang tanang napulo ka dalaga anaa sa eksaktong dapit, naghulat sa pamanhonon. Matag usa kanila miabot nga nagdala og suga. Kana sama kaninyong tanan. Kamo ania dinhi, naggamit sa inyong hugot nga pagtuo ug naglig-on sa inyong pagpamatuod.

Sa dihang ang pamanhonon—representante sa Manluluwas—miabot sa wala damha nga takna sa tungang gabii, lima sa dalaga walay igong lana sa ilang mga suga. Tingali wala sila maghunahuna nga ang pagdala og dugang nga lana importante o gikinahanglan. O sila dili madaginoton nga mga tinugyanan sa lana nga naa nila. Tingali nalinga, sila napakyas sa pag-andam og igo aron magpadayon og siga ang ilang mga suga.

Ug busa, isip tubag sa ilang hangyo nga tugotan sa pagsulod sa panihapon sa kasal, ang pamanhonon mitubag, “Wala kamo makaila kanako.” Nagpasabot nga, pinaagi sa ilang pagpangandam ug maalamon nga pagkatinugyanan, ang lima ka maalamon nga dalaga nakaila gayod Kaniya.

Ang bililhon nga lana, nagrepresentar sa personal nga pagkakabig, nakapahimo sa maalamon nga mga dalaga sa pagpasiga sa ilang mga suga ug misulod sa kasaulogan sa kasal uban sa pamanhonon. Ang lana dili mahimong ipakigbahin sa ilang mga higala tungod kay ang personal nga pagkakabig ingon gyod niana—personal. Kita makahimo ug kinahanglan nga ipataas ang kahayag sa atong mga suga aron sa pagbayaw ug pagpalig-on sa uban, apan ang matag usa nato mao ang tinugyanan sa atong kaugalingong pagkakabig.

Sama sa gipdayag sa Manluluwas, “Pagmatinud-anon, pag-ampo kanunay, nga ang inyong mga lampara maandam ug magsiga, ug may dala kamo nga lana, nga kamo andam sa pag-anhi sa Pamanhonon.”

Kita sa samang paagi makaila sa Manluluwas ug makabaton og “pagsalig diha sa presensya sa Dios karon dayon” kon kita moandam nga pun-on ang atong mga suga sa lana sa pagkakabig ug dayon mohimo sa kahayag niana nga pagkakabig nga mosanag. Ug, sama sa gihulagway sa talagsaong kinulit sa Temple Square, kita makahimo ug kinahanglan nga mosuporta ug molig-on sa uban sama sa atong gibuhat—manawag sa uban nga moduol ngadto sa kahayag—ang Kahayag sa Kalibotan, nga si Jesukristo.

Ang ikaduhang sambingay nga giistorya ni Mateo mao ang sa mga salapi. Niana nga istorya, ang agalon, nga nagpaabot nga mobiyahe og layo, mihatag sa iyang tulo ka sulogoon og puntil nga salapi. Sa mga panahon sa Bag-ong Tugon ang usa ka puntil nga salapi nagrepresentar og kwarta. Apan akong panghinaot nga kamo maghunahuna sa puntil nga salapi isip mga gasa, mga abilidad, ug mga panalangin nga gihatag kanato sa atong Langitnong Amahan. Ngadto sa usa ka sulugoon ang agalon mihatag og lima ka salapi, ngadto sa usa duha ka salapi, ug ngadto sa lain usa. Ug dayon ang agalon mibiyahe.

Sa dihang siya mibalik, iyang nadiskobrehan nga ang mga sulugoon nga iyang gihatagan og lima ka puntil nga salapi ug duha ka puntil nga salapi nagmatinud-anon ug mabungahon nga mga tinugyanan ug mihimo og maayo sa mga puntil nga salapi. Ang matag usa midoble sa mga puntil sa salapi nga gisalig ngadto kanila. Ug nga nagmatinud-anon sa gamay, ang Agalon mihatag kanila og daghan pa, mipahayag, “Maayo! Buotan ka ug matinumanon nga sulugoon: kay kasaligan ka man sa diyutay, piyalan ko ikaw sa daghan. Dali, sulod ngari ug ambit sa akong kalipay.”

Sa pagtandi, ang sulugoon nga gihatagan og usa ka puntil nga salapi milubong niini—tingali tungod kay siya nalinga ug naglangay-langay sa paghimo og maayong kagamitan sa iyang puntil nga salapi. O tingali siya napakyas sa pagkahibalo unsaon sa pagsugod o nahadlok nga siya mapakyas. Tingali gitandi niya ang iyang kaugalingon ngadto sa ubang sulugoon, ug ang iyang mga pagduha-duha mahitungod sa iyang kaugalingong kapasidad nakapugong niya sa pagsulay. Wala siya makaandam sa pagbalik sa agalon, wala niya masinati ang hingpit nga kalipay sa matinud-anong pagkatinugyan, ug nawala niya ang iyang puntil nga salapi.

Ang sambingay sa napulo ka dalaga ug ang sambingay sa puntil nga salapi adunay susama nga mga tumong. Ang duha naghatag og gibug-aton nga kita adunay personal nga resposibilidad alang sa atong kaugalingong pagkakabig ug kinahanglan nga moandam sa atong kaugalingon sa pagdawat sa gasa sa Ginoo nga kahimayaan—ug nga kita adunay pagkatinugyanan ug personal nga tulubagon alang nianang gipanalangin kanato.

Sa kataposan, ang Mateo 25 nagsaysay og istorya niadtong kinsa adunay “pagsalig diha sa presensya sa Dios.” Gihulagway nga karnero sa Maayong Magbalantay, nga nakita sa Iyang tuong bahin, nagtagamtam sa kasaulogan sa kasal uban Kaniya, ug napanalanginan nga mahimong mga tigmando sa daghang butang, miingon Siya:

“Kay gigutom ako ug inyo akong gipakaon; giuhaw ako ug inyo akong gipainom; dili [ninyo] ako kaila apan inyo akong gidawat sa inyong mga balay; hubo [ako] ug [inyo] akong gibistihan; nagmasakiton ako ug [inyo] akong giatiman; nabilanggo ako ug [inyo] akong giduaw.”

Kini nga bidyo nindot nga mipadayag niini.

[video (subtitles)]

“Gipakita ni Jesus kanato unsaon sa paghigugma sa atong silingan. Kita mosunod sa Iyang ehemplo kon [kita mobayaw] sa gikapoy[,] moamuma sa mga bata[,] mohupay niadtong anaa sa atong palibot[,] mopakaon sa gigutom[,] mangita niadtong nanginahanglan. Ang matag adlaw mao ang usa ka oportunidad nga mahimong sama Kaniya[,] moserbisyo sama Kaniya[,] moatiman sama Kaniya. Ang matag adlaw, nga pag-atiman nagsugod kanimo. Bisitaha ang CaringSummary.ChurchofJesusChrist.org.”

[kataposan sa bidyo]

Mao kini ang unsay gipangayo kanato. Isip Iyang mga disipulo, andamon nato ang atong kaugalingon alang sa Iyang Ikaduhang Pag-anhi ug kita sa matinud-anon ug sa mabungahon nga paagi mopakita og pagkatinugyanan nianang gipanalangin kanato. Kaluoy, gugma nga putli, hiyas, ug matinud-anong pagkatinugyanan mopasarang nato sa pagpuyo uban Kaniya ug magbaton og pagsalig diiha sa presensya sa Dios karon. Sama sa gitudlo ni Mormon, kadtong kinsa napuno sa gugma nga putli—ang tiunay nga gugma ni Kristo—“kini makaayo [kanila].” sa kataposan nga adlaw. Sila mahimong sama sa Manluluwas, nga makakita Kaniya ingon nga Siya mao ug mapuno sa paglaom ug mahimong putli sama nga Siya putli. Si Presidente Nelson mipahayag, “Ang gugma nga putli ug hiyas moabli sa dalan sa pagbaton og pagsalig sa atubangan sa Dios!”

Kining tanang tulo ka sambingay nagtudlo sa unsa nga paagi nga ang Iyang mga disipulo—sa unsa nga paagi kita—mangandam sa mga panahon sa katalagman nga mag-una sa Ikaduhang Pag-anhi sa Manluluwas. Mao kini ang mga panahon nga kita nagpuyo! Kinahanglan natong padayonon nga magsiga nga hayag ang atong mga suga sa pagkakabig, mopadan-ag sa atong kahayag, mogamit ug mopalambo sa atong mga talento, moatiman niadtong nanginahanglan—mao kana, nga naghupot sa gugma nga putli—ang tiunay nga gugma ni Kristo.

Kining tanang tulo ka sambingay nagtudlo nato mahitungod sa pagkatinugyanan:

Ang pagkatinugyanan alang sa atong kaugalingong pagkakabig.

Ang pagkatinugyanan alang sa mga gasa , mga talento, mga kabtangan, ug pagtabang gamit niadtong gipanalangin kanato, lakip sa yuta mismo.

Ang pagkatinugyanan alang sa atong mga silingan kinsa gigutom, walay balay, gisakit, ug gikapoy.

Isip mga disipulo ni Jesukristo, unsaon nato sa paghimo ang maayong pagkatinugyanan?

Tingali ang usa ka mas ganid nga panaghisgotan sa pagkatinugyanan makatabang. Unahon nato sa pagpasabot ang pagkatinugyanan. Ug unsa ang usa ka tinugyanan?

Ang usa ka tinugyanan magdumala sa mga kabtangan sa usa ka dako nga panimalay o kayutaan. Ang tinugyanan dili mao ang tag-iya sa mga kabtangan apan gisaligan sa pagdumala niini alang sa tag-iya. Ang usa ka mabungahon nga tinugyanan matinud-anon ngadto sa mga kabtangan sa tag-iya, moatiman sa mga kapanguhaan sa maalamon ug mahatagon nga paagi. Nan ang pagkatinugyanan, mao ang pagkamabinantayon ug responsable sa pagdumala niadtong mga butang nga gisalig ngari kanato.

Si Bishop Gérald Caussé sa Tigdumalang Bishopric mitudlo unsay gipasabot nga mahimong yutan-ong tinugyanan. Siya miingon, “Sa mga pinulongan sa ebanghelyo, ang pulong pagkatinugyanan naghatag og sagradong espirituwal ug temporal nga responsibilidad sa pag-amuma sa usa ka butang nga gipanag-iya sa Dios diin kita adunay tulubagon.”

Ikonsiderar kon unsa ka talagsaon kini nga ideya! Kita ang mga tinugyanan sa mga butang nga gisalig sa atong Amahan sa Langit kanato. Mao kana, usa ka sagrado nga pagsalig alang sa yuta; sa mga kapanguhaan niini; Iyang mga anak; atong mga gasa, mga talento, ug mga panalangin. Ug usa ka sagrado nga responsibilidad nga ampingan ang Iyang mga butang.

Alang sa unsa o alang kang kinsa kamo adunay pagkatinugyanan?

Sa tinuod alang sa tanang nilalang sa Dios niini nga yuta. Kamo adunay pagkatinugyanan alang sa inyong kaugalingon nga lawas ug hunahuna. Kamo adunay pagkatinugyanan alang sa mga abilidad, mga talento, espirituwal nga mga gasa, ug sa tabang nga gipanalangin kaninyo. Kamo adunay pagkatinugyanan alang sa yuta. Ug kamo adunay pagkatinugyanan alang sa usag usa.

Gipasabot ni Bishop Caussé: “Ang atong pagkatinugyanan ibabaw sa mga linalang … naglakip usab, sa kinatas-an niini, usa ka sagrado nga katungdanan sa paghigugma, pagrespeto, ug pag-amuma alang sa tanang katawhan kinsa atong kasalo sa yuta. Sila mga anak nga lalaki ug mga anak nga babaye sa Dios, atong mga igsoon, ug ang ilang mahangtorong kalipay mao gayod ang katuyoan sa buhat sa paglalang.”

Magmahimo ba kamong mabungahon nga tinguyanan? Buot pasabot, atimanon ba ninyo ang mga nilalang sa Dios sa maalamon ug mahatagon nga paagi?

Gusto nako nga atong hisgotan sa detalye ang pagkatinugyanan alang sa mga gasa ug mga talento nga gipanalangin kanato, ang atong pagkatinugyanan alang sa yuta, ug ang pagkatinugyanan alang sa atong silingan. Hinumdomi, ang matarong nga pagkatinugyanan mao ang ebidensya sa atong pagkadisipulo.

Una, ang pagkatinugyanan alang sa atong mga gasa ug mga talento.

Gikan sa Doktrina ug mga Pakigsaad 46:11–12 nakat-onan nato kini nga kamatuoran:

“Kay dili tanan ang aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios.

“Ngadto sa uban gihatag ang usa, ug ngadto sa uban gihatag ang lain, aron ang tanan makaangkon og kaayohan pinaagi niana.”

Ang atong espirituwal nga mga gasa mao ang mga kapasidad nga gihatag sa Dios sa matag usa nato. Gihatag kini sumala sa Iyang kabubut-on ug sa tukma nga panahon, pinaagi sa gahom sa Espiritu Santo, ug gitumong alang sa panalangin ug kaayohan sa tanang anak sa Dios.

Ang matinud-anong mga tinugyanan magtinguha ug modapit og espirituwal nga mga gasa ngadto sa ilang mga kinabuhi ug mogamit niadtong gipanalangin kanila sa pagbayaw ug pag-alagad sa uban. Matag usa ninyo, mga anak sa Dios, gihatagan og mga gasa ug espesyal nga mga talento.

Si Elder Marvin J. Ashton, usa ka sakop sa Korum sa Napulog Duha ka Apostoles, mihulagway og pipila ka klaro nga mga gasa, mga hiyas, ug mga abilidad nga tingali wala ninyo mahunahunai. Samtang gilista nako kini, mahimo bang mamalandong mo sa inyong kaugalingon ug paningkamoti ang pag-ila og usa o duha nga gipanalangin kaninyo? Dayon, anaa niana nga gasa, ikonsiderar unsaon ninyo sa paggamit niini isip usa ka matinud-anon nga tinugyanan sa pagpanalangin sa uban.

“Ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panagbingkil; ang gasa nga dali rang mouyon; ang gasa sa paglikay sa kawang nga pagbalik-balik; ang gasa sa pagpangita nianang unsay matarong; ang gasa nga dili dayon mohukom; ang gasa sa pagpangayo sa Dios og giya; ang gasa sa pagkadisipulo; [ang gasa sa pagkakalmado;] ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og … pagpamatuod; ug ang gasa sa pagkadawat sa Espiritu Santo”

Sa inyong pagpadayon sa pagpamalandong sa inyong mga gasa, mahimo bang motanyag ko og pasidaan? Ayaw itandi o isukod ang inyong mga gasa batok sa mga gasa sa uban. Ayaw paghimo og “makapaubos nga pagtimbang-timbang sa kaugalingon.” “Ang pagtandi makapawala sa atong kalipay.” Dawata ang inyong mga gasa ug sauloga kadtong gipanag-iya sa uban. Hinumdomi, ang espirituhanong mga gasa gihatag sa Dios pinaagi sa Espiritu alang sa atong kaayohan aron ang tanan mahatag og kaayohan tungod niana.

Ang akong lola usa ka magtutudlo sa Iningles ug mabinantayong mipili sa iyang mga pulong. Ganahan siya nga mosulti, “Ang mga pagtandi daotan.” Ang daotan usa ka dili maayo nga pulong. Nagpasabot kini nga “law-ay ug dili gayod angay.” Ngano nga ang akong lola migamit man og mahinuklogong pulong kon magtambag nako mahitungod sa risgo sa paghimo og mga pagtandi? Tungod kini kay ang pagtandi sa atong kaugalingon ngadto sa uban panagsa ra nga makaayo. Sa pagtandi sa atong kaugalingon ngadto sa uban, gibulag nato ang atong kaugalingon gikan kanila. Imbes mobati nga kabahin sa tibuok lawas ni Kristo, akong gidala ang tahas sa gamay nga tudlo ug misukod sa akong bili batok sa usa ka tawo nga sa akong hunahuna mao ang mga abaga, mga bukton, ug lawas. Sa kinatibuk-an, kon atong itandi ang atong mga kaugalingon ngadto sa uban, mobati kita nga nalupig o kaha superyor, ug kini dili mao ang sitwasyon. Kitang tanan minahal nga mga anak sa atong langitnong mga ginikanan, napanalanginan og personal nga gihatag nga espirituwal nga mga gasa, mga hiyas, mga talento, ug mga kalig-on.

Mao nga modapit ako kaninyo nga ugmara ang gasa sa pagbiya sa mga pagtandi. Hangyoa ang Langitnong Amahan sa pagtabang kaninyo sa pag-ila sa inyong espirituwal nga mga gasa ug mga talento ug unsaon ninyo sa paggamit niini isip usa ka matinud-anong tinugyanan.

Aniay usa ka ehemplo.

Pipila ka tuig ang nakalabay, si Jean, usa ka young adult nga nagpuyo sa Netherlands, namalandong sa sugo nga unang gihatag ngadto ni Adan ug Eva sa pagdaghan ug pagpuno sa yuta. Samtang siya ug ang iyang bana nakasinati nga dili makaanak, nagtinguha sila nga makasabot sa unsa nga paagi nga kana nga sugo alang usab kanila. Nakaamgo siya nga atol sa panahon sa dihang si Adan ug Eva walay mga anak, giugmad nila ug giatiman ang tanaman nga gitugyan sa Dios kanila. Samtang iyang gikonsiderar ang iyang mga sirkumstansiya, naghunahuna siya mahitungod sa mga tanaman nga iyang gipuy-an—ang tanaman sa yuta, ang tanaman sa iyang nasod, ang tanaman sa iyang pamilya, ug ang tanaman sa iyang ward.

Nakaamgo siya nga samtang siya wala magpuyo sa Tanaman sa Eden, kini mao ang mga tanaman nga gibutangan sa Dios kaniya. Mahimo niyang padaghanon ug pun-on kanang gitugyan kaniya. Namalandong si Jean:

• “Sa unsang paagi ako makapasanay sa mga gasa nga gihatag sa Ginoo kanako ug sa uban?

• Sa unsang paagi ako makapadaghan og gugma ngadto sa mga anak sa Dios?

• Sa unsang paagi ako makapadaghan sa akong panahon ug paningkamot sa pagserbisyo sa uban?

• Sa unsang paagi ako makapuno sa akong kaugalingong espirituwal nga tinubdan?

• Sa unsang paagi ako makapuno unsa ang nawala sa uban, temporal man o espirituwal?

• Sa unsang paagi ako makapuno og paglaom ug hugot nga pagtuo nga daw nawala na alang sa kadaghanan dinhi sa kalibotan?”

Samtang si Jean nakatutok niini nga mga pangutana, napanalanginan siya sa pag-ila og mga oportunidad sa pagpadaghan ug pagpuno gamit ang iyang mga gasa ug mga talento. Mitudlo siya og teyatro ngadto sa mga batan-on gikan sa tibuok kalibotan. Miserbisyo siya sa mga batan-ong babaye. Gipahimuslan niya ang mausab-usab niyang kaugalingon nga propesyonal nga kinabuhi aron sa pagtabang sa pag-atiman sa mga anak sa iyang mga higala. Migahin siya og dugang panahon sa pagtuon sa ebanghelyo ug mibati nga napanalanginan nga mas makasabot unsaon sa pagdala sa mga salagubangon sa uban ug mohupay niadtong nagkinahanglan og kahupayan. Kana nakapadugang sa iyang pagpamatuod ug hugot nga pagtuo diha ni Jesukristo ug sa Iyang ebanghelyo. Labaw nga importante, nakaangkon siya og personal nga pagsabot sa plano sa Dios alang kaniya.

Ang maayong mga tinugyanan kanunay nga mopadaghan ug mopuno sa mga kabtangan sa Agalon.

Bisan og dili mao ang gihunahuna ni Jean sa una, ang kasinatian ni Jean mao ang maanindot nga ebidensya sa usa ka saad gikan ni propeta Jeremias, kinsa miingon:

“Bulahan ang tawo nga nagsalig sa Ginoo nga ang pagsalig mao ang Ginoo.

“Siya sama sa kahoy nga gitanom sa daplin sa tubig, nga nagpakatay sa mga gamot niini sa daplin sa suba. Ug dili mahadlok kon moabot ang kainit; kay ang mga dahon niini nagpabilin nga lunhaw. Dili mabalaka sa tubig nga hulaw, kay dili kini mohunong sa pagpamunga.”

Ikaduha, ang pagkatinugyanan alang sa yuta ug alang sa tanang anak sa Dios.

Si Presidente Russell M. Nelson mitudlo: “Isip mga benepisyaryo sa balaan nga Paglalang, unsa may atong buhaton? Kinahanglan nga atimanon nato ang yuta, magmaalamon nga mga tinugyanan niini, ug mopatunhay niini alang sa umaabot nga mga henerasyon.”

Nasayod ko nga kini mahitungod sa usa ka hilisgotan kon unsa nga henerasyon ninyo ang moatiman pag-ayo. Kamo nagdala og dako nga determinasyon, ug pipila kaninyo nagdala og kabalaka. Ipaneguro nako kaninyo nga ang Dios nag-andam og paagi alang sa mahimsog nga pagpuyo alang sa tanan niini nga planeta kon kita andam nga mogamit sa atong mga gasa ug mga talento alang niini nga kaayohan, magpabillin nga takos nga modawat og pagpadayag, ug maalamong mogamit sa kabuhong sa mga kapanguhaan sa yuta aron atimanon ang usag usa.

Ang Ginoo miingon:

“Ako … mipakaylap sa mga kalangitan, ug mibuhat sa yuta, nga kaugalingon nakong binuhat; ug ang tanang butang nga anaa niini akoa.

“Kay ang yuta puno, ug adunay igo ug sobra pa; oo, akong giandam ang tanan nga butang, ug mihatag sa katawhan og gahom nga mahimong mga tinugyanan sa ilang kaugalingon.”

Unsaon ninyo sa paggamit sa kabubut-on nga gipanalangin kaninyo, inyong pagkatinugyanan, alang sa mahimayaong panalangin sa yuta?

Ang Ginoo miklaro sa sunod nga bersikulo nga kita kinahanglan nga “ang kabuhong nga [Iyang] gibuhat gamiton sa iyang kaugalingon, ug mohatag [atong] bahin, sumala sa balaod sa [Iyang] ebanghelyo, ngadto sa mga kabos ug mga timawa,.” Adunay igo kon kita mopakigbahin sa atong kaabunda sa mga panalangin ug mogamit sa atong kabubut-on isip Kristohanon nga mga tinugyanan sa yuta.

Balikan nato ang kinutlo gikan ni Presidente Nelson mahitungod sa atong pagkatinugyanan alang sa yuta. Siya miingon: “Isip mga benepisyaryo sa balaan nga Paglalang, unsa may atong buhaton? Kinahanglan nga atimanon nato ang yuta, magmaalamon nga mga tinugyanan niini, ug mopatunhay niini alang sa umaabot nga mga henerasyon.”

Unya si Presidente Nelson mipadayon, “Ug kinahanglan natong higugmaon ug atimanon ang usag usa.”

Importante nga kita makaila sa koneksiyon tali sa pag-atiman alang sa yuta ug sa pag-atiman alang sa atong silingan. Sa pag-atiman alang sa yuta, pagpaanindot sa atong lokal nga kalikopan, ug pagtabang sa atong mga komunidad nga mas makalahutay, naglihok kita isip maalamon nga mga tinugyanan sa yuta sa pagpanalangin sa mga kinabuhi sa atong mga silingan. Sila mao ang gisugo nato nga higugmaon. Sama sa karnero sa sambingay, atong pakan-on ang gigutom, mohatag og tubig sa giuhaw, mosinina sa hubo, ug mobisita sa masakiton ug sa gikapoy. Atong “[tabangan] ang maluyahon, ipataas ang mga kamot sa nawad-an og paglaom, ug [lig-onon] ang nahuyang nga mga tuhod.”

Ang inyong mga igsoon nga babaye ug mga igsoon nga lalaki sa tibuok kalibotan naghimo niini. Si Eritai nagdako sa hilit nga isla sa Marakei, Kiribati. Human makabalik gikan sa iyang misyon, mieskwela siya sa BYU–Hawaii, diin siya nakaapil sa SWAT, ang Sustainable World Action Technology nga team, ug nakat-on mahitungod sa pagpananom pinaagi sa hydroponic, usa ka paagi sa pagpatubo og mga tanom nga walay yuta gamit ang mineral nga mga nutrina diha sa solusyon sa tubig. Human sa gradwasyon, si Eritai miuli ngadto sa Kiribati aron tabangan ang iyang kaugalingong katawhan.

Ang Kiribati mao ang usa ka isla nga nasod nga naglangkob og 32 ka isla sa coral nga porma og lingin nga adunay mga lanaw sa tunga-tunga, nga gitawag og mga atoll, ug usa ka isla sa coral nga mituybo. Tungod sa nahimutangan niini nga duol sa ekwador, ang kondisyon sa klima dili maayo. Init, parat nga huyohoy sa dagat ug ang pagsulod sa tubig sa dagat makadaot sa mga lagutmon ug makadaot sa tubig. Mao nga kulang sa yuta ug luna sa pagpatubo og masustansyang pagkaon. Ang malnutrisyon ug sakit mikatap sa mga taga isla sa Kiribati tungod kay nagsalig sila hapit tanan sa imported ug giproseso nga pagkaon.

Apan si Eritai adunay kalagsik ug panan-awon, mga talento nga iyang gigamit aron makahimo og makalahutay nga programa sa pagtudlo sa lokal nga mga pamilya sa Kiribati unsaon sa pagpatubo og mg prutas ug mga utanon gamit ang hydroponic. Ang usa ka hydroponic nga tanaman madala-dala, anaa na ang tanang gikinahanglan, ug dali nga motubo, makaani sulod sa 30 ka adlaw.

Alang sa iyang kabag-ohan ug makaluwas sa kinabuhi nga trabaho, si Eritai nakadawat og ganti sa United Nations Champion of the Earth alang sa Asia Pacific.

Si Eritai usa ka talagsaon kaayo nga ehemplo sa maayo nga paggamit nga mga gasa ug mga talento sa iyang pagkatinugyanan sa yuta ug sa iyang silingan. Ang pagpakaon sa gigutom, kita giihap uban sa karnero diha sa tuong kamot sa Dios.

Ug kita kinahanglan nga mohatag og mainom ngadto sa giuhaw. Ang pagpanalangin sa atong mga silingan sa magamit nga limpyo nga tubig, sanitasyon, ug hygiene importante sa paglambo sa tawo. Aron matuman kini nga buhat, ang Simbahan nakig-alayon sa ubang organisasyon ug sa lokal nga mga komunidad sa tibuok kalibotan aron mapalambo ang paggamit niini nga mga serbisyo ug mapalig-on ang kinatibuk-ang mga paagi, nagseguro nga ang mga sulbad molungtad og dugay ug mapasiugdahan ang pagbarog pinaagi sa kinaugalingong paningkamot. Kini importante nga buhat! Ug nagkaimportante kini samtang ang huwaw midagsang sa tibuok yuta ug ang populasyon nagpadayon sa pagdaghan.

Si Alejandra, usa ka young adult sa Cascas, Peru, nangutana sa iyang kaugalingon, “Unsay kulang nato dinhi?” Si Alejandra nasayod nga labing menos 20 porsiyento sa mga pamilya sa iyang komunidad kulang sa mga serbisyo sa luwas nga sanitasyon, paingon ngadto sa risgo sa mga sakit tungod sa tubig sama sa cholera. Aron sa pagsulbad niini nga hagit, si Alejandra miapil sa pagbansay sa negosyo sa sanitasyon nga gipasiugdahan sa lokal nga pundok sa Tubig alang sa Katawhan sa Peru.

Gisugdan niya ang usa ka negosyo ug gipundohan ang iyang gamay nga tindahan og mga butang sama sa mga lababo, mga gripo, mga kasilyas, mga tile, ug ubang mga materyal nga gikinahanglan sa mga pamilya sa pagkompleto sa ilang mga banyo. Karon ang mga pamilya sa Cascas aduna nay magamit nga mga materyal nga ilang gikinahanglan sa pagtukod og mga kasilyas sa balay.

Kamo, usab, makatudlo sa limpyo nga tubig ug sanitasyon sa inyong komunidad ug unsaon ninyo sa pag-apil.

Si propeta Isaias misubli sa iyang kadungan nga higala nga si Jeremias sa dihang misulti siya kanato:

“Kon ibubo nimo ang imong kalag ngadto sa gigutom, ug tagbawon ang tinguha sa mga sinakit, ang imong kahayag mosubang sa kangitngitan. …

“Ug ang Ginoo maggiya kanimo sa kanunay, magtagbaw sa imong tinguha, … ug ikaw mahimong sama sa usa ka tanaman nga gipatubigan, sama sa usa ka tubod sa tubig, nga ang mga katubigan walay paghubas.”

Dayag lang, si Jesukristo mao ang tinubdan sa buhing tubig. Ako mopamatuod nga kon kita mohatag og mainom ngadto sa giuhaw, kita panalanginan sa pag-inom sa Iyang buhing tubig —“usa ka tubod sa tubig nga mobul-og ngadto sa kinabuhing dayon.” Samtang atong atimanon ang yuta ug ang atong mga silingan, magkaduol kita ngadto sa Manluluwas ug magtinguha og relasyon sa pakigsaad uban Kaniya nga nagtugot nato nga mahimong mas sama Kaniya. Kita mahimong responsable nga mga tinugyanan—ug malipayon usab nga mga tinugyanan. Kita mabag-o pag-usab ug sila manglupad pinaagi sa mga pako sama sa mga agila, managan ug dili kapoyon.

Sa miaging tuig, ang Kintibuk-ang Kapangulohan sa Relief Society mipahibalo sa pagpalapad sa usa ka tibuok kalibotan nga inisyatibo aron mapalambo ang kahimsog ug kaayohan sa kababayen-an ug kabataan. Sa hangyo sa Unang Kapangulohan, ang Relief Society naggiya niini nga paningkamot.

Gusto namong hatagan og gahom ang mga babaye ug mga pamilya og mas dakong pagsabot ug mga kapanguhaan aron sila mas maayong makaandam sa paghimo og mga kausaban nga adunay malungtarong epekto sa ilang mga pamilya, mga komunidad, ug mga nasod. Kon ang usa ka babaye hatagan og gahom tungod kay siya himsog ug edukada, ang mga pamilya mapanalanginan, mga komunidad mabayaw, ug ang mga nasod malig-on. Kon mopanalangin kamo og usa ka bata, namuhonan kamo sa umaabot. Mao nga ang atong trabaho nagtutok sa nutrisyon sa nga bata nga wala pay singko, pag-atiman sa mga nanagsabak ug sa mga bata nga bag-ong natawo, mga pagbakuna, ug edukasyon.

Si Alaina usa ka young adult nga nagpuyo sa Georgia, USA. Nagpadayon siya og doctorate degree sa occupational therapy nga adunay tumong nga motrabaho sa usa ka ospital sa neonatal intensive care unit (NICU) alang sa mga masuso nga nagkinahanglan og dugang nga pag-atiman human sa pagkatawo, ilabi na niadtong naahat sa pagkatawo. Ang tibuok kalibotan nga inisyatibo sa Relief Society alang sa mga kababayen-an ug kabataan nakaapekto ni Alaina. Nadasig sa imbitasyon nga moapil sa tibuok kalibotan nga inisyatibo, si Alaina naghimo og “kangaroo care,” o ang panit ngadto sa panit nga pagkontak sa mga masuso nga naahat sa pagkatawo, ang tun-anan sa iyang komprehensibo nga proyekto sa graduate nga programa.

Adunay dul-an sa 15 ka milyon nga masuso nga naahat sa pagkatawo matag tuig sa tibuok kalibotan. Ug sa Atlanta, Georgia, diin magpuyo si Alaina, ang gidaghanon sa natawo sa wala pa moabot sa saktong termino ug gidaghanon sa namatay nga gagmay nga bata mas taas ang tanan kay sa nasyonal nga kasarangan sa US.

Si Alaina naghimo og programa sa edukasyon aron ang mga tawo mas makahibalo sa mga benepisyo sa panit ngadto sa panit nga pagkontak tali sa naahat og pagkatawo nga mga masuso ug sa ilang mga inahan. Ang mga masuso, nagsul-ob lang og diaper, direkta nga ibutang sa panit sa dughan sa inahan, dayon tabonan silang duha. Kini nga pagkontak nagmintenar sa temperatura, makapakunhod sa kabudlay, makakontrol sa mga hormone, makapadugang og koneksiyon, makapasiugda sa pagpatotoy, makapalambo sa pagkatulog, ug daghan pang laing benepisyo. Apan kini dili kanunay nga gihimo diha sa mga NICU isip sumbanan sa pag-atiman. Ang proyekto ni Alaina nagtumong sa pagpalambo sa pag-implementar.

Iyang gibati ang iyang pagsiksik nga espirituwal ngadto kaniya. “Pagbasa sa siyensiya … ug … pagkat-on sa atong mga lawas nga gilalang aron sa paghimo niining mga butanga” iyang nasabtan tungod sa unsay iyang nahibaloan mahitungod sa plano sa kaluwasan.

Ang panit ngadto sa panit nga pag-atiman alang sa naahat nga mga masuso makapatandog kaayo nako, tungod kay duna koy apo nga natawo og sayo niadtong Pebreo og dul-an sa pito ka semana. Sa tulo ka libra lang, lima ka onsa, ang among gamay nga sundalo diha sa NICU sulod sa dul-an og usa ka bulan. Ug sa tanan niadtong mga adlaw, ang akong umagad nga babaye ug anak mibutang niya sa ilang dughan, panit ngadto sa panit. Abi ninyo, ang “kangaroo care” alang usab sa mga amahan. Ang makapakugang nga matang sa kalit nga pagkatawo sa among apong lalaki, ug ang kasakit sa panagbulag kalabot sa pagbiya niya diha sa ospital, nakalma niadtong mga gutloa.

Si Alaina mihimo sa kahayag sa iyang pagkakabig nga mosanag; gigamit niya ang mga talento nga gipanalangin kaniya, ug siya nag-atiman niadtong nanginahanglan pinaagi sa pagtuon ug pagpahibalo niining importante nga buluhaton. Ang iyang mga paningkamot maoy tubag sa tawag sa Manluluwas—“Nasakit ako, ug inyo akong giduaw.”

Si Eritai, Alejandra, ug Alaina mga disipulo ni Jeukristo nga nag-andam sa ilang mga kaugalingon alang sa Iyang Ikaduhang Pag-anhi samtang sila matinud-anon ug mabungahong gituman ang pagkatinugyanan nianang gipanalangin sa Ginoo kanila.

Ang Manluluwas miingon, “Sultihan ko kamo nga sa matag higayon nga maghimo kamo niini alang sa usa sa labing ubos niining akong mga igsoon, gihimo ninyo kini alang kanako!” Sa pagkatinuod kini nga mga young adult mao ang mga representante niadtong gihulagway sa Manluluwas nga Iyang karnero, kinsa maanaa sa Iyang tuo, kwalipikado sa pagtagamtam sa Iyang presensya.

Kita nahisakop sa usa ka simbahan nga naghimo og talagsaong kaayohan sa tibuok kalibotan, nanalangin sa mga kinabuhi sa atong mga silingan, dili lamang sa atong mga miyembro. Niadtong 2024, dihay 6.6 ka milyon ka oras nga giboluntaryo. 1.45 ka bilyon nga US dolyares nga gasto. 192 ka nasod ug mga teritoryo nga giserbisyohan. Ang tibuok kalibotan sa makitawhanon nga mga inisyatibo sa Simbahan naglakip sa mga proyekto sa limpyo nga tubig, hygiene ug sanitasyon, emerhensiya nga tabang, pag-atiman sa panglawas, ug mga proyekto sa seguridad sa pagkaon. Ang Simbahan ni Jesukristo sa mga Santos sa Ulahing mga Adlaw ug ang mga miyembro niini mipakita sa ilang kahayag nga mosanag aron sa paghimaya sa atong Amahan sa Langit.

Samtang ang Simbahan ug ang Relief Society makagamit ug mogamit sa ilang tibuok kalibotan nga impluwensya aron masukod ang dinasig nga mga paningkamot sa pagpakaon sa gigutom, paghatag og mainom sa giuhaw, pagsinina sa hubo, ug sa pag-atiman sa masakiton, ang labing importante ug dakong epekto nga buhat magpadayon nga himoon tagsa-tagsa.

Sa pagpaningkamot sa pagsunod ni Jesukristo, kita nagtinguha sa pag-ila sa dinalian nga mga panginahanglan libot kanato ug pagtubag inubanan sa gugma. Kita maningkamot nga magmatinud-anon nga mga tinugyanan sa Iyang mga kabtangan —nga naglakip sa mga talento ug mga oportunidad nga gipanalangin kanato, sa yuta sa tanang katahom niini, ug sa mga tawo nga direkta natong maimpluwensya.

Sama ni Naaman gikan sa Daang Tugon, tingali naghulat kamo nga sultihan sa “pagbuhat og dakong butang” nga himoon—naghunahuna unsaon nga kamo makaadto nianang hilit nga bahin sa Africa o sa usa ka isla sa dagat aron sa pag-atiman sa inyong silingan sa kalibotan.

Mga kaigsoonan, modapit ko kaninyo sa paggamit sa inyong mga gasa ug mga talento sa paghimo og pipila ka gagmay ug yanong mga butang sa mga tawo nga inyong maimpluwensyahan. Bisan asa kamo magpuyo, adunay mga bata nga walay maayong nutrisyon. Bisan asa kamo magpuyo, adunay mga tawo nga dilli makabasa. Bisan asa kamo magpuyo, adunay mga babag sa pag-atiman sa kahimsog. Bisan asa kamo magpuyo, adunay mga tawo nga gigutom, giuhaw, hubo, masakiton, ug anaa sa prisohan, sa literal ug dili literal nga paagi.

Mga higala, kami nagkinahanglan kaninyo! Ako manghinaot nga kamo maikagon nga magtinguha og pagpadayag ug mogamit sa inyong mga gasa ug mga talento sa pagpangita og mamugnaon nga mga kasulbaran sa pagtabang sa pagpanalangin sa umaabot sa tanang anak sa Dios. Kini sa pagkatinuod kabahin sa inyong balaan nga pagkatinugyanan.

[video (subtitles)]

“Ang uniberso lapad kaayo. Trilyon ka galaksiya nga adunay binilyon ka bituon, kayutaan, katubigan, mga tanom, kahayopan. Ug bisan pa, … ang Dios nakaila ug nahigugma sa Iyang tanang gilalang sa ngalan. Lakip ninyo.”

[kataposan sa bidyo]

Akong taposon uban sa personal nga istorya, mahitungod sa akong minahal nga higala nga si Lydia, nga mihatag sa pangbukas nga pag-ampo niining gabhiona. Ako nakaila ni Lydia sa dihang nagserbisyo siya sa Relief Society Building isip usa ka pang-serbisyo nga misyonaryo pipila ka tuig na ang milabay. Si Lydia kanunay nga magsul-ob og denorado tungod kay ang babaye nga gihulagway nga unang nakabig ni Pablo mao si Lydia, kinsa namaligya og denorado nga panapton.

Si Lydia nadayagnos og arthritis sa dihang nag-edad siya og kwatro anyos pa lang. Ug samtang nag-antos siya sa kasakit matag adlaw, malipayon niyang gipakita ang kahayag sa iyang pagkakabig ngadto ni Jesukristo. Kon adunay bisan unsa nga mahiyason, matahom, o maayo og dungog—anaa niya kanang tanan!

Isip kabahin sa niini nga buluhaton, sa pagpamulong ninyong tanan, ako gidapit sa pagpili niadtong mga tawo nga mohatag og pag-ampo karong gabhiona. Si Lydia miabot dayon sa hunahuna. Nakompleto niya ang iyang misyon, misugod sa pag-eskwela sa BYU, ug gidawat ngadto sa College of Nursing. Ug tungod kay siya akong minahal nga higala, nagpadayon kami sa pagkontak sa usag usa. Gimahal nako si Lydia.

Gisugo ko sa paghangyo niya nga mag-ampo, apan wala gyod ko makahigayon sa pagtawag. Dayon niadtong Marso 31, nakadawat ko niini nga text gikan ni Lydia:

“Maayong buntag Presidente Johnson!!!

“Gihigugma ko ikaw og maayo!

“Kagabii diha ka sa akong damgo. Gikulbaan ako pag-ayo ug wala mahimutang bahin sa butang nga kinahanglan nakong buhaton, ug nakamatikod ka. Imo akong giagbayan, ug gibira [paduol] sa imong ulo diha sa akong ulo ug mihunghong sa akong dunggan, ‘Okay ra, Lydia[;] makahimo ka niini. Buhata lang ang gamay nga mga butang.’ Ang imong malumo nga pag-awhag ug pahinumdom sa paghinay-hinay mao gayod unsay akong gikinahanglan nga madunggan karon. Ug gikinahanglan gyod nako ang gakos ni Presidente Johnson! Sa akong hunahuna ang Langitnong Amahan mopadala nato usahay og gamay nga mga mensahe pinaagi sa mga tawo nga atong gimahal ug gisaligan sama kanimo.

“Manghinaot ko nga imong gibati ang mga anghel nga nagbayaw nimo niining semanaha. Ania ang hugot nga gakos alang nimo, mahal nga higala.”

Mibalos ko sa pag-text, “Dili ko makahulat nga mosulti ngano nga ikaw nagdamgo niana!”

Gitawgan nako si Lydia nianang gabhiona aron sa paghangyo kon andam ba siya nga mag-ampo niining tibuok kalibotan nga debosyonal sa young adult. Dayag lang, miingon siya og oo—ug mipadayon sa pagsulti nako unsay iyang gipakigbahin sa iyang mensahe sa text. Usa kadto ka detalye nga sa iyang hunahuna dili importante sa dihang siya misulat nako. Sa iyang damgo, gikulbaan siya mahitungod sa pag-ampo atubangan sa dako nga grupo.

Ah, pagkalumo sa mga kaluoy sa Ginoo! Gilangan nako ang paghangyo ni Lydia sa pag-ampo sa walay maayong rason—gawas nga si Lydia nagkinahanglan sa iyang damgo. Usa ka kaseguroan nga ang Ginoo nakahibalo kaniya ug gusto nga siya aduna niini nga oportunidad.

Oo, ang uniberso lapad. Tinrilyon ka galaksiya. Adunay binilyon ka bituon. Kayutaan, katubigan, mga tanom, kahayopan nga Iyang gihatag nato aron kita mao ang tinugyanan. Ug ang Dios nakaila sa ngalan ug nahigugma sa tanan nga Iyang gilalang. Lakip ninyo.

Ang Manluluwas mipaila sa Iyang mortal nga pangalagad pinaagi sa pag-ingon nga Siya gipadala “aron sa pagsangyaw sa maayong balita ngadto sa mga kabos; … gipadala ako niya aron pagsangyaw sa kagawasan ngadto sa mga binihag ug pagpahiuli sa panan-aw sa mga buta, pagpagawas sa mga dinaugdaog.” Kon kana mao ang Iyang misyon ug kita Iyang mg disipulo, giambitan nato ang Iyang tumong.

Kamo, akong mga higala, talasaong giandam ug giordinahan sa pagtabang Kaniya. Kamo mga anak nga mga lalaki ug mga babaye sa Dios. Siya nakaila kaninyo. Kamo anaa sa relasyon sa pakigsaad uban Kaniya. Dili gayod ninyo mahurot ang Iyang maluluy-on nga pailob alang ninyo. Ug samtang tumanon ninyo ang mga pakigsaad nga inyong gihimo uban Kaniya, kamo mapanalanginan uban sa “Iyang makaayo, makapalig-on nga gahom.” Ang gahom sa Dios mopalambo sa inyong mga kapasidad, mopadako sa inyong mga talento nga gipanalangin nganha kaninyo, ug motabang ninyo nga makakita Kaniya diha sa gigutom, sa giuhaw, sa nahimulag, ug sa masakiton.

Isip Iyang mga tinun-an, andamon nato ang atong mga kaugalingon alang sa Iyang Ikaduhang Pag-anhi pinaagi sa matinud-anon ug sa mabungahon nga paggamit sa pagkatinugyanan nianang gipanalangin kanato. Ako mopamatuod nga samtang inyong dad-on ang kahupayan ni Jesukristo ngadto sa uban, kamo mapanalanginan aron madiskobrehan ang inyong kaugalingong kahupayan diha Kaniya.

Ako nakaseguro nga si Jesukristo buhi. Iyang gigiyahan ang Iyang Simbahan pinaagi sa Iyang mga propeta, mga manalagna, ug mga tigpadayag. Ako nakaseguro nga si Russell M. Nelson mao ang Iyang gamhanan nga tigpamaba dinhi sa yuta karon.

Ang buhat ug himaya sa atong Amahan sa Langit ug ni Jesukristo mao nga makita kita nga makapauli, andam ug kwalipikado nga magpabilin sa Ilang presensya diin wala nay gigutom, giuhaw, nahimulag, nagsakit, o kimpang—kay sila ayohon ug naayo. Kamo mao ang ilang importante nga mga kauban. Gimahal ko kamo. Nahigugma Sila kaninyo.

Sa sagradong ngalan sa atong Manunubos, nga si Jesukristo, amen.