Pagbasa sa Daang Tugon

Bisan unsa nga mga hagit ang atubangon nimo ug sa imong pamilya, ang kanunay nga tubag mao si Jesukristo. Busa sa pagkaplag sa mga tubag diha sa Daang Tugon, pangita Kaniya. Kini dili kanunay nga sayon. Ikaw mahimong magkinahanglan sa pagpamalandong nga mapailubon ug mangita og espirituhanon nga giya. Usahay ang mga pakisayran kabahin Kaniya ingon og direkta kaayo, sama sa pamahayag ni Isaias “Alang kanato ang usa ka bata natawo, alang kanato ang usa ka anak nga lalaki gihatag: … ug ang iyang ngalan pagatawgon … Ang Prinsipe sa Pakigdait” (Isaias 9:6). Sa ubang mga dapit, ang Manluluwas girepresentar sa mas hanap nga paagi, pinaagi sa mga simbolo ug mga pagkasama—sama pananglit, pinaagi sa mga paghulagway sa mga pagsakripisyo og hayop o sa asoy kabahin ni Jose nga nagpasaylo sa iyang igsoong mga lalaki ug nagluwas kanila gikan sa kagutom.

Kon ikaw nagtinguha og mas dakong hugot nga pagtuo diha sa Manluluwas samtang ikaw nagtuon sa Daang Tugon, imong makaplagan kini. Tingali kini ang mahimo nga tumong sa imong pagtuon niini nga tuig. Pag-ampo nga ang Espiritu mogiya kanimo sa pagpangita ug sa pagtutok diha sa mga tudling, mga istorya, ug mga panagna nga modala kanimo nga mas duol ngadto ni Jesukristo.

Ayaw pagdahom sa Daang Tugon nga mopresentar og usa ka hingpit ug tukma nga kasaysayan sa mga katawhan. Dili kana maoy unsa ang gitinguha sa orihinal nga mga tigsulat ug mga tigtigom nga naninguha sa pagmugna. Ang ilang mas dako nga kabalaka mao ang pagtudlo og usa ka butang mahitungod sa Dios—mahitungod sa Iyang plano alang sa Iyang mga anak, mahitungod sa unsay kahulogan sa mahimong Iyang mga tawo sa pakigsaad, ug mahitungod kon unsaon sa pagpangita og kaluwasan kon kita nagkulang. Usahay sila mihimo niini pinaagi sa pagpangilabot og makasaysayanong mga hitabo ingon sa ilang pagsabot niini, lakip ang mga istorya gikan sa mga kinabuhi sa halangdong mga propeta. Ang Genesis usa ka ehemplo niini, ingon man sa mga basahon sama sa Josue, Mga Maghuhukom, ug 1 ug 2 Mga Hari. Apan ang ubang mga tigsulat sa Daang Tugon wala magtumong nga mahimo gayod nga makasaysayanon. Hinoon, sila mitudlo pinaagi sa buhat sa arte sama sa balak ug literatura. Ang Mga Salmo ug ang Mga Proverbio haom niini nga kategoriya. Ug unya anaa ang bililhong mga pulong sa mga propeta, sama ni Isaias ug ni Malaquias, kinsa namulong sa pulong sa Dios ngadto sa karaang Israel—ug, pinaagi sa milagro sa Biblia, namulong gihapon ngari kanato karon.

Ang tanan ba niini nga mga propeta, mga mambabalak, ug mga tigtigom nahibalo nga ang ilang mga pulong pagabasahon sa mga tawo sa tibuok kalibotan liboan ka mga tuig ang molabay? Wala kita mahibalo. Apan kita natingala nga kini gayod ang unsay eksakto nga nahitabo. Mga nasod nahimong mga gamhanan ug nabuntog, mga siyudad nabihag, mga hari nabuhi ug namatay; apan ang Daang Tugon milungtad kanilang tanan, gikan sa henerasyon ngadto sa henerasyon, gikan sa manunulat ngadto sa manunulat, gikan sa hubad ngadto sa hubad. Sa tinuod pipila ka butang nawala o nausab, ug bisan pa man sa laing paagi daghan kaayo sa milagroso nga paagi napatunhay.

Kini pipila lamang sa mga butang nga hinumdoman samtang ikaw magbasa sa Daang Tugon niini nga tuig. Gipatunhay sa Dios kini nga karaang mga sinulat tungod kay Siya nakaila kanimo ug sa unsay imong gisinati. Siya nag-andam og usa ka espirituhanon nga mensahe alang kanimo niini nga mga pulong, nga modala kanimo nga mas maduol ngadto Kaniya ug motukod sa imong hugot nga pagtuo diha sa Iyang plano ug sa Iyang Hinigugmang Anak. Tingali Siya mogiya Kanimo ngadto sa usa ka tudling o usa ka panabot nga mopanalangin sa usa ka tawo nga imong kaila—usa ka mensahe nga imong ikapakigbahin ngadto sa usa ka higala, usa ka sakop sa pamilya, o kauban nga Santos. Adunay daghan kaayo nga mga posibilidad. Dili ba kana makapaukyab nga hunahunaon?

Miingon si Nephi, “Kay ang akong kalag nalipay sa mga kasulatan” (2 Nephi 4:15). Tingali ikaw mobati sa samang paagi samtang imong gibasa ang sama nga mga pulong nga gibasa ni Nephi—unsay atong gitawag karon og ang Daang Tugon.