Pasiuna sa Daang Tugon

Usa ka paagi sa pagkaplag og buhong nga espirituhanon nga pag-amuma diha sa Daang Tugon mao ang pagpangita alang sa Pan sa Kinabuhi, si Jesukristo (tan-awa sa Juan 6:48). Pananglitan, giunsa nimo pagtan-aw ang Manluluwas sa mosunod?

• Mana (Exodo 16:4, 11–15; Juan 6:35)

• Ang gihalad nga nating karnero (Exodo 12:3–5; Juan 1:29)

• Ang bitin nga tumbaga (Numeros 21:4–10; Juan 3:14)

• Jonas (Jonas 1:4–17; Mateo 12:38–41)

Unsa ang gitudlo niini nga mga ehemplo mahitungod Kaniya? Unsa ang ubang mga pakisayran ni Jesukristo diha sa Daang Tugon nga kamo pamilyar na?

Diha sa iyang mensahe “Si Jesukristo mao ang Bahandi,” miawhag si Elder Dale G. Renlund kanato sa “paghinumdom ug sa kanunay mopunting diha ni Jesukristo” (Liahona, Nob. 2023, 98). Hunahunaa ang pagbasa sa iyang mensahe, mangita alang sa mga butang nga ikaw makahimo sa pagpangita ni Jesukristo dili lamang diha sa Daang Tugon apan usab sa imong kinabuhi.

Tan-awa usab sa “Mga Matang o mga Simbolo ni Kristo,” diha sa Giya ngadto sa mga Kasulatan, “Jesukristo,” Librarya sa Ebanghelyo; “Sayo kong Mangita sa Ginoo,” Songbook sa mga Bata, 67.

Gitudlo ni Presidente Dallin H. Oaks: “Gipaila sa Amahan ang Iyang Bugtong nga Anak, si Jesukristo, isip atong Manluluwas ug Manunubos ug mimando kanato nga ‘maminaw Kaniya.’ Gikan niini nga direksiyon kita makaingon nga ang mga rekord sa kasulatan bahin sa mga pulong nga gisulti sa ‘Dios’ o sa ‘Ginoo’ hapit sa kanunay ang mga pulong ni Jehova, ang atong nabanhaw nga Ginoo, si Jesukristo” (“Ang mga Pagtulun-an ni Jesukristo,” Liahona, Mayo 2023, 102).

14:7

Sa dihang ang mga lider sa mga Judeo mihagit ni Jesus mahitungod sa Iyang pagkatawo, Siya mipahayag, “Sa wala pa si Abraham, mao na ako.” Kini nga mga pulong nakapakurat sa mga tawo kinsa nakadungog ni Jesus, ug sila andam sa pagbato Kaniya (tan-awa sa Juan 8:58–59). Hunahunaa ang pagbasa sa Exodo 3:13–15; 6:3–5 sa pag-ila kon nganong pipila sa mga Judeo nasilo pag-ayo sa unsay gisulti ni Jesus.

Nganong mahinungdanon nganha kanimo ang mahibalo nga si Jesukristo mao si Jehova?

Diha sa usa ka panan-awon, ang Ginoo mipakita ni Nephi sa pagtungha sa Biblia, nagpasabot nga “daghang yano ug bililhong mga butang” pagakuhaon gikan niini. Hunahunaa ang pagbasa sa 1 Nephi 13:21–29, 38–42, mangita alang sa giunsa sa Ginoo pagplano ang “pagpahibalo sa yano ug bililhong mga butang.” Sumala sa 2 Nephi 3:12, giunsa sa Biblia ug sa Basahon ni Mormon sa pag-uban og trabaho?

Samtang imong tun-an ang Daang Tugon niini nga tuig, imo usab nga tun-an ang pipila sa “ubang mga basahon” nga nakita ni Nephi. Kini naglakip sa:

• Ang basahon ni Moises, bahin sa hubad ni Joseph Smith sa Biblia. Kini nagpahiuli sa mga kamatuoran ug mga asoy nga wala makita diha sa karon nga teksto sa Genesis 1–6.

• Ang basahon ni Abraham, nga gipadayag ngadto ni Joseph Smith samtang siya nagsusi sa karaang Ehiptohanong papyri (tan-awa sa Mga Hilisgotan ug mga Pangutana, “Basahon ni Abraham,” Librarya sa Ebanghelyo).

• Lainlaing mga tudling gikan sa Hubad ni Joseph Smith, ang pipila makita diha sa mga footnote, sa apendiks sa Biblia, ug sa Giya ngadto sa mga Kasulatan.

Ania ang pipila ka ehemplo sa mga asoy sa Daang Tugon nga gipahiuli pinaagi ni Joseph Smith: kang Enoch nga siyudad sa Zion (Moises 7:18–19), kang Abraham nga panan-awon sa konseho sa langit (Abraham 3:22–28), ug ang pangalagad ni Melchizedek (Hubad ni Joseph Smith, Genesis 14:25–40). Nganong kini nga mga asoy “yano ug bililhon” nganha kanimo?

Ang Daang Tugon mao ang istorya sa Dios nga naninguha sa paghimo kanato nga Iyang “kaugalingong bahandi” pinaagi sa pakigsaad (Exodo 19:5). Tungod niana nga rason, usa ka maayong paagi sa pag-andam sa pagbasa sa Daang Tugon mao ang pagkat-on mahitungod sa mga pakigsaad—sa piho ang walay kataposang pakigsaad nga gitanyag sa Dios ngadto sa karaang mga propeta sama ni Abraham, Isaac, Jacob, ug sa ilang mga kaliwatan. Ug usa ka importanting paagi sa pagkat-on mahitungod sa mga pakigsaad mao ang pagtuon sa mensahe ni Presidente Russell M. Nelson “Ang Walay Kataposan nga Pakigsaad” (Liahona, Oktubre 2022, 4–11).

Samtang ikaw nagbasa, pangutan-a ang imong kaugalingon: Ngano nga ang mga pakigsaad importante ngari kanako? Unsa nga “espesyal nga matang sa gugma ug kalooy” ang akong madawat gikan sa Dios samtang ako nagsunod sa akong mga pakigsaad ngadto Kaniya? Samtang ikaw magbasa sa Daang Tugon niini nga tuig, pagbantay alang sa mga butang nga gusto sa Dios nga itudlo kanimo mahitungod sa imong pakigsaad nga relasyon ngadto Kaniya.

Tan-awa usab sa Jeremias 31:31–34.

• Ang mga pulong ug kultura sa Daang Tugon mahimong malisod alang sa pagsabot sa mga bata, apan ikaw makatabang kanila sa pagkakita ni Jesukristo diha sa mga simbolo ug sa mga istorya. Tingali ikaw ug ang imong mga bata makatan-aw diha sa imahe sa ubos, Ang Propeta Isaias Nanagna sa Pagkatawo ni Kristo. Ipatudlo sa imong mga bata ang mga detalye nga ilang nakita. Daniha ang ilang pagtagad, sa piho, ngadto sa batang gamay nga si Jesus. Dayon ikaw makabasa uban kanila kon unsa ang gisulat ni Isaias mahitungod sa pagkatawo sa Manluluwas diha sa Isaias 7:14; 9:6. Pakigbahin uban sa imong mga bata kon unsay imong gibati mahitungod sa pagpangita sa Manluluwas diha sa Daang Tugon niini nga tuig.

  

• Ikaw ug ang imong mga bata makabasa usab sa Salmo 23 o Isaias 53:3–9 ug pangita og mga pulong nga nagpahinumdom kaninyo ni Jesukristo. Unsay gitudlo niini nga mga pulong kanato mahitungod sa Iyang kinabuhi ug Pag-ula?

• Ang pakigsaad usa ka dako kaayo nga tema diha sa Daang Tugon. Sa pagpaila niini nga tema ngadto sa imong mga bata, ikaw makasulti ngadto kanila mahitungod sa mga saad nga sila naghimo ug nagsunod uban ang pamilya o mga higala ug nganong ang pagsunod niini nga mga saad importante. Kamo dayon makatan-aw sa usa ka hulagway sa bunyag ug mamulong mahitungod sa saad, o pakigsaad, nga kita naghimo uban sa Dios sa dihang kita gibunyagan (tan-awa sa Mosiah 18:10, 13). Makapakita ka usab og hulagway sa templo ug makigbahin sa imong mga pagbati mahitungod sa mga pakigsaad nga atong gihimo didto.

• Ang pahina sa kalihokan niini nga semana makatabang sa imong mga bata nga maghinam-hinam sa paghimo ug pagsunod sa mga pakigsaad uban sa Langitnong Amahan. Mahimo usab nga manganta kamo og usa ka awit mahitungod sa paghimo og mga pakigsaad sama sa “Kon Ako Bunyagan” (Songbook sa mga Bata, 37).

• May nailhan ba ang imong mga bata og usa ka tawo nga lainlain ang mga ngalan diha sa lainlaing mga lugar? Tingali usa ka ginikanan o magtutudlo gitawag sa lahi nga paagi sa trabaho, sa panimalay, ug sa simbahan. Pag-istorya mahitungod niadto nga mga ngalan, dayon basaha ang Exodo 6:3 og dungan ug dapita ang imong mga bata sa pagpangita sa mga ngalan nga si Jesukristo nailhan sa wala pa siya matawo (tan-awa usab ang Hubad ni Joseph Smith diha sa footnote c).