Genesis 1–2; Moises 2–3; Abraham 4–5

Bisan wala nato mahibaloi ang tanan mahitungod kon giunsa paglalang ang kalibotan, kini makapa-interes ang pagtimaan kon unsay napili sa Dios nga ipadayag mahitungod sa Paglalang. Unsa ang gitudlo sa Dios kanimo mahitungod niini diha sa Genesis 1:1–25; Moises 2:1–25; ug Abraham 4:1–25? Nganong Siya gusto kanimo nga mahibalo niining mga butanga? Sa imong pagpamalandong niini nga mga asoy, mahimo usab nga imong hunahunaon kon unsa ang gitudlo kanimo mahitungod sa Langitnong Amahan, ni Jesukristo, sa kalibotan, ug sa imong kaugalingon.

Aron mapalambo ang imong pagtuon, hunahunaa ang pagbasa niini nga mga bersikulo samtang ikaw anaa taliwala sa mga nilalang sa Dios o samtang nagpaminaw ngadto sa usa ka awit sama sa “Tanan nga Nilalang sa Atong Dios” (Mga Himno, nu. 31). Makapangita ka og mga hulagway sa iyang mga nilalang nga motabang kanimo nga mobati og kaligdong nga pagtahod alang sa Tiglalang. Hunahunaa ang pagpakigbahin niini nga mga hulagway, uban sa imong pagpamatuod, ngadto sa uban.

Tan-awa usab diha sa Doktrina ug mga Pakigsaad 101:32–34.

Samtang ikaw nagbasa sa Genesis 1:26–27; Moises 2:26–27; ug Abraham 4:26–27, pamalandonga kon unsa ang kahulogan sa gilalang diha sa “imahe” o “pagkasama” sa Dios, lalaki ug babaye. Nganong importante nganha kanimo nga mahibaloan ang mga kamatuoran dinhi niini nga mga bersikulo? Sama pananglit, sa unsang paagi nga kini nga mga kamatuoran nakaapekto sa paagi sa imong pagtan-aw sa imong kaugalingon, sa uban, ug sa Dios? Unsaon niini sa pagtabang kanimo kon ikaw adunay negatibo nga mga pagbati mahitungod sa imong kaugalingon?

Aron ikaw matabangan sa paghunahuna mahitungod niini nga mga pangutana, sulayi ang pagkompleto og usa ka kapahayag sama niining usa: “Tungod kay ako nahibalo nga gilalang ako diha sa imahe sa Dios, nagpili ako sa …” Pagrebyo sa “Sagrado ang imong lawas” diha sa Alang sa Kalig-on sa Kabatan-onan: Usa ka Giya alang sa Paghimo og mga Pagpili (mga pahina 22–29) makatabang. Hunahunaa ang pagpili og usa ka butang nga imong himoon sa pagpakita sa Dios nga ikaw nahibalo nga sagrado ang imong lawas.

Diha sa video “God’s Greatest Creation” (Gospel Library), nagpamatuod si Presidente Russell M. Nelson sa milagrosong lawas sa tawo. Sa imong pagtan-aw sa video, pangutan-a ang imong kaugalingon, “Sa unsang paagi ang Langitnong Amahan gusto kanakong mobati bahin sa akong lawas?” Sa unsang paagi kini lahi gikan sa mga mensahe nga tingali imong nadungog gikan sa uban?

2:48

Ang uban tingali moingon nga ang pagkalalang diha sa imahe sa Dios nagpasabot nga ang tanan natong mga hunahuna, pagbati, ug mga tinguha Iyang gitugotan ug nga kita wala magkinahanglan (o dili makahimo) sa pag-usab. Unsay imong isulti ngadto niana? Unsa nga mga panabot ang imong naangkon gikan sa Mosiah 3:19 ug sa Ether 12:27?

Tan-awa usab sa Russell M. Nelson, “Ang Inyong Lawas: Usa ka Talagsaong Gasa nga Angay Mahalon,” Liahona, Ago. 2019, 50–55.

“Si Adan ug si Eva gihiusa diha sa kaminyoon alang sa karon ug alang sa tanang kahangtoran pinaagi sa gahom sa [ang] mahangturong pagkapari” (Russell M. Nelson, “Lessons from Eve,” Ensign, Nov. 1987, 87). Pamalandonga kini samtang ikaw magbasa sa Genesis 1:27–28; 2:18–25; Moises 3:18, 21–25; ug Abraham 5:14–19. Unsaon nimo pagtagad ang kaminyoon uban sa pagkabalaan nga gihatag sa Dios niini?

Tan-awa usab sa 1 Mga Taga-Corinto 11:11; “Ang Pamilya: Usa ka Pamahayag ngadto sa Kalibotan,” Librarya sa Ebanghelyo.

Unsa ang gisugyot sa Genesis 1:28; Moises 2:28; ug Abraham 4:28 mahitungod sa atong responsibilidad ngadto sa mga nilalang sa Dios? Unsa ang gidugang sa Doktrina ug mga Pakigsaad 59:16–21 ug 104:13–18 ngadto sa imong pagsabot?

Tan-awa usab si Gérald Caussé, “Ang Atong Yutan-ong Pagkatinugyanan,” Liahona, Nob. 2022, 57–59; Mga Hilisgotan ug mga Pangutana, “Environmental Stewardship and Conservation [Pagkatinugyanan ug Pagpatunhay sa Kalikopan],” Librarya sa Ebanghelyo.

Gihimo sa Dios ang Igpapahulay nga adlaw nga balaan, ug Siya naghangyo kanato sa paghupot niini nga balaan. Sa imong pagbasa sa Genesis 2:2–3; Moises 3:2–3; ug Abraham 5:2–3, hunahunaa ang mahitungod sa unsay naghimo sa Igpapahulay nga “balaan” nganha kanimo.

Tan-awa usab ang Doktrina ug mga Pakigsaad 59:9–13; “The Sabbath Is a Delight” (video), Gospel Library.

0:50

• Unsaon nimo paghimo nga ang pagkat-on mahitungod sa Paglalang makalingaw alang sa imong mga bata? Mahimo kang modala kanila sa usa ka pagpangita sa gawas alang sa mga matang sa mga butang nga gihimo sa matag panahon sa Paglalang. Ang imong mga bata mahimo usab nga motan-aw sa mga hulagway sa mga butang nga gilalang ni Jesus (tan-awa ang “Paglalang sa Yuta” diha sa Mga Sugilanon sa Daang Tugon, 8–12). Dayon ikaw ug ang imong mga bata makaistorya mahitungod kon unsa ang inyong gibati mahitungod ni Jesukristo human mabasa ang mahitungod sa Paglalang.

• Hunahunaa ang pagkanta og dungan sa usa ka awit mahitungod sa atong matahom nga kalibotan, sama sa “Gihigugma Ako sa Langitnong Amahan” (Songbook sa mga Bata, 12). Tingali mahimo sa imong mga bata nga makadugang ngadto sa awit og ubang mga butang nga gilalang sa Dios nga nagtabang kanila nga mabati ang Iyang gugma.

• Ang imong mga bata makapalambo og pagbati nga balaang pagtahod ug pagrespeto alang sa ilang kaugalingon ug sa lawas sa uban samtang sila nagkat-on nga kitang tanan gilalang sa imahe sa Dios. Aron matabangan sila sa pagsabot kon unsa ang kahulogan niini, mahimo nimong ipatan-aw sa imong mga bata ang ilang imahe sa salamin o litrato samtang gibasa nimo ang Moises 2:26–27 ngadto kanila. Mahimo usab nimong ipakita kanila kon unsa ka “sama” kasagaran ang gagmay nga mga anak sa hayop sa ilang mga ginikanan (tan-awa ang hulagway dinhi niini nga latid, sama pananglitan). Kini makagiya ngadto sa usa ka panagsultihanay mahitungod kon nganong kini importante kanimo nga mahibaloan nga ikaw gilalang diha sa imahe sa imong Langitnong Amahan.

  

• Ikaw ug ang imong mga bata mahimong malingaw sa pagdrowing og lawas sa tawo ug sa pagputol-putol sa mga drowing ngadto sa mga puzzle. Samtang ang imong mga bata magsumpay sa ilang mga puzzle nga magkahiusa, makahimo sila sa pagsultihanay mahitungod sa mga paagi nga sila makapakita sa Langitnong Amahan nga sila mapasalamaton alang sa ilang mga lawas.

• Samtang imong gibasa ang Moises 3:2–3, hangyoa ang imong mga bata sa pagpaminaw alang sa unsay gibuhat sa Dios sa ikapito nga adlaw. Tabangi ang imong mga bata sa pagpangita o pagdrowing og mga hulagway sa mga butang nga sila makahimo sa pagbuhat inig ka Domingo aron sa paghimo niini nga usa ka balaang adlaw ug lahi gikan sa ubang mga adlaw. Pakigbahin ngadto sa usag usa kon nganong kini importante nganha kanimo sa pagsunod sa Igpapahulay nga adlaw nga balaan.

• Tabangi ang imong mga bata sa pag-role-play nga magpasabot ngadto sa usa ka higala kon nganong gipili nila ang pagbuhat sa mga butang inig ka Dominggo nga nagpasidungog sa Langitnong Amahan ug ni Jesus. Isugyot nga ilang gamiton ang Genesis 2:2–3 sa ilang mga pagpasabot. Sa unsang paagi nga ang pagbalaan sa Igpapahulay nga adlaw magpakita sa atong gugma sa Langitnong Amahan ug ni Jesukristo?