Gikan sa YA Matag Semana
Samtang anaa ang Among mga Anak sa NICU, Midangop Kami ni Kristo alang sa Kalinaw
Ang tagsulat nagpuyo sa Idaho, USA.
Ang labing makahahadlok nga hugna sa among kinabuhi mitudlo kanamo sa hilom nga gahom sa kalinaw pinaagi ni Jesukristo.
Litrato sa maayong kabubut-on sa tagsulat
Ang labing nindot nga gasa sa Pasko nga nadawat sa akong asawa, si Hedie, ug nako sukad mao ang pagdala sa among kaluha nga mga anak nga lalaki pauli sa among panimalay gikan sa neonatal intensive care unit (NICU).
Si Heidi ug ako nagkaila samtang mga estudyante pa mi sa unibersidad, ug wala madugay human naminyo didto sa Rexburg Idaho Temple, nahibaloan namo nga duna mi umaabot nga kaluha. Malipayon kaayo mi—apan pipila ka bulan sa pagsabak, adunay wala dahomi nga mga kausaban. Ang among mga bata natawo 27 pa lang ka semana, ang matag usa nagtimbang og duha ka libra. Gideretso sila og dala ngadto sa NICU, diin gigahin nila ang misunod nga upat ka bulan sa pagpakigbisog alang sa ilang kinabuhi.
Nagasalig Latas sa mga Luha
Kadtong unang mga adlaw mao ang labing malisod nga among giatubang. Nakadawat mi sunod-sunod nga tawag gikan sa mga doktor—ang matag usa niini nagdala og balita mahitungod sa dugang nga mga komplikasyon o dugang nga mga pag-opera. Bug-at ra kaayo kadto. Dihay mga gabii nga wala mi makatulog nga puno sa mga pag-ampo, mga luha, ug lawom nga pagduhaduha.
Taliwala sa tanang niana nga kaguliyang, mihimo kami og desisyon nga gihunahuna og maayo nga mosalig sa Langitnong Amahan. Dili kadto sayon. Wala mi mahibalo kon unsay mahitabo sa umaabot, apan misandig mi sa pagtuo nga among gitukod sa tibuok namong kinabuhi. Ang usa ka kasulatan nga nakahatag namo og dakong kalig-on mao ang Helaman 5:12, nga nag-ingon nga itukod ang inyong pundasyon diha "sa bato nga mao ang atong Manunubos, nga si Kristo.”
Kana nga bersikulo nakatabang sa pagpahinumdom namo nga wala kami mag-inusara. Si Jesukristo nakaagi na sa dalan sa kasakit ug kawalay kasegurohan. Nakasabot gayod Siya unsay among gibati. Samtang amo Siyang gipahiluna sa sentro sa among kinabuhi, hinay-hinay kaming nakamatikod og hilom nga mga pahinumdom nga ang Dios nag-uban kanamo.
Nagpadayon sa Paglaom
Ang pag-adto sa templo ug ang paglingkod sulod sa celestial room nakahatag namo og mga takna sa kalinaw nga labihan namong gikinahanglan. Wala mi mahibalo kon unsay mahitabo sa umaabot, apan mibati mi og kahupay. Wala kadto magpasabot nga ang tanan mahitabo sumala sa among gilaoman, apan nagpasabot kadto nga wala kami mag-inusara sa pagpas-an niini.
Ang usa ka bersikulo nga nagpabilin sa akong hunahuna atol niini nga panahon mao ang Doktrina ug mga Pakigsaad 121:7: “Kalinaw nganha sa imong kalag; ang imong kalisdanan ug ang imong mga kasakitan sulod lamang sa mubo nga higayon.” Kana nga bersikulo nakapausab sa akong panglantaw. Ang among mga pagsulay dagko man niadtong panahona, apan sa mahangtoron nga panglantaw, sulod lamang kadto sa mubo nga panahon.
Ang pagtutok ngadto ni Jesukristo nakatabang namo sa paglantaw lapas sa diha-diha nga kasakit ug nagsugod mi sa pagmatikod sa mga panalangin—ang among mga anak nga lalaki nag-anam og kahimsog, mas diyotay na lang ang mga tawag sa telepono gikan sa mga doktor, ug gibuboan kami sa gugma ug mga pag-ampo gikan sa pamilya ug mga higala.
Pagbaton og Mahangtoron nga Panglantaw
Sa kataposan, sa adlaw sa Pasko, ang among mga batang lalaki miabot ra gayod sa panimalay uban namo. Sa paglantaw sa nangagi, mapasalamaton lang kaayo ko. Ang among mga anak nga lalaki malamboon, ug samtang wala ko mangandoy niadto nga mga bulan nga mahitabo sa uban, dili nako ibaylo ang mga pagtulun-an nga akong nakat-onan. Among nasabtan unsay ipasabot sa mosalig sa Dios ug magpadayon sa paglaom diha ni Jesukristo.
Dili tanang istorya sa kada tawo matapos sa samang paagi. Apan kon ang resulta lahi, si Jesukristo nagtanyag og kalinaw, kahupay, ug kalig-on sa paglahotay hangtod sa kalamposan. Kon anaa kamo sa taliwala sa butang nga malisod karon, palihog hinumdomi nga kining kinabuhia dili mao ang kataposan. Ang Langitnong Amahan nahigugma kaninyo. Siya adunay plano alang kaninyo. Ug uban sa Iyang tabang, bisan ang labing malisod nga mga takna mahimong kabahin sa usa ka butang nga matahom.
Si Elder Gerrit W. Gong sa Korum sa Napulog Duha ka Apostoles sa makausa miingon, “Kon kita mosalig sa Dios ug sa Iyang gugma alang nato, bisan ang atong hilabihan nga mga kasakit, sa kataposan, magkahiusa sa paglihok alang sa atong kaayohan.” Nakita ko kana nga kamatuoran sa akong kaugalingong kinabuhi.
Busa, kon ang kinabuhi mag-anam og kalisod, kon ang dalan sa unahan daw walay kasegurohan—duol kang Kristo. Tugoti Siya nga mopas-an sa inyong mga palas-anon. Uban Kaniya, makapadayon kita. Uban Kaniya, makakaplag kita og paglaom. Ug inubanan sa mahangtorong panglantaw, makasalig kita nga bisan unsa pa ang atong giagian karon dili mao ang kataposan sa istorya.