Gikan sa Nataran sa Misyon
Giunsa sa Akong Misyon Pagtudlo Kanako bahin sa Kalipay sa Pasko
Sa wala pa ko mopasakop sa Simbahan, ang Pasko dili kaayo makahuloganon para nako. Karon nahibaloan nako nga kini ang panahon sa pagdawat—ug pagpakigbahin—sa maayong mga balita sa akong Manluluwas.
Ang pagkadawat og tawag sa misyon aron moserbisyo sa China Hongkong Mission espesyal kaayo para nako—kay taga Hongkong ko!
Ang pagserbisyo isip tigtudlo nga misyonaryo sa akong kaugalingong nasod nagpasabot nga dili ko kinahanglang magkat-on og bag-ong pinulongan o kultura. Apan bisan kon dili na kinahanglan nga mag-adjust ko sa bag-ong mga tradisyon, ang akong misyon nakatabang nako sa paglantaw sa usa ka kapistahan—Pasko—sa laing pamaagi.
Pagpakigbahin og Bag-ong mga Balita
Mipasakop ko sa Ang Simbahan ni Jesukristo sa mga Santos sa Ulahing mga Adlaw upat na ka tuig ang milabay, ug ako rang usa ang miyembro sa akong pamilya. Ang akong mga ginikanan, akong mga igsoong lalaki, ug ako wala nagdako isip mga Kristiyano, mao nga samtang ang Pasko maoy usa ka maayong paagi nga makabiyahe mi ug makapahimulos og lamian nga pagkaon, wala kaayo kini kahulogan para namo.
Apan ang Langitnong Amahan miandam og dalan para nako aron makakat-on sa Iyang ebanghelyo ug mopasakop sa Iyang Simbahan. Isip usa ka misyonaryo, ang akong katuyoan mao ang pagtabang sa uban nga moduol ni Kristo. Usa kadto ka talagsaong oportunidad alang kanako aron makat-onan ang tinuod nga kahulogan sa Pasko.
Daghan kaayong mga tawo nga naghunahuna mahitungod sa Pasko sa paagi nga sama sa akong gihunahuna sa una. Nahibalo tingali sila nga usa kini ka kapistahan, apan wala sila mahibalo sa kahulogan niini. Wala gani seguro sila mahibalo kon kinsa si Jesukristo. Apan para nako, ang Kapaskohan nahimong panahon sa pagpakigbahin ngadto sa tanan sa maayong mga balita nga kita adunay Manluluwas.
Si Elder S. Mark Palmer sa seventy mitudlo, “Mas bililhon kaysa bulawan, insenso, o mira, ang putli nga pagpamatuod diha ni Jesukristo isip atong personal nga Manluluwas ug Manunubos mao ang labing sentro sa tanan nianang atong gisaulog sa Pasko.”
Malipayon kaayo ko isip usa ka misyonaryo nga akong magahin ang akong Pasko dili lamang sa pagsaulog sa akong pagpamatuod ni Jesukristo apan sa pagpakigbahin sa akong pagpamatuod ngadto sa uban.
Ang Kalipay sa Paghunahuna sa Uban
Atol sa misyon, dili kaayo ka makatutok sa imong kaugalingon apan sa pagserbisyo sa uban. Gibati nako nga mas naghunahuna ko mahitungod sa ubang tawo karon. Kana ang hinungdan nga ang Pasko nahimong malipayon kaayo para nako.
Ang ubang tawo tingali nagmagul-anon, nagkinahanglan og tabang, o basta walay espirituwal nga kadasig niini nga panahon sa tuig. Apan tungod ni Jesukristo, ako adunay madasigon nga pagbati sa kalipay ug gugma sa akong kasingkasing. Ang pagkamisyonaryo naghatag nako og mga oportunidad sa pagtabang sa uban aron mobati sama sa akong gibati mahitungod sa Manluluwas.
Sa miaging Pasko, ang akong kompanyon ug ako mibisita sa Giving Machine sa Simbahan diha sa Hong Kong. Ang kampanya sa pagserbisyo nga Dan-agi ang Kalibotan [Light the World] maoy usa ka maanindot kaayo nga oportunidad sa paghunahuna mahitungod sa uban ug sa pagpakigbahin sa kalipay sa Manluluwas ngadto nila.
Si Elder Gerrit W. Gong sa Korum sa Napulog Duha ka Apostoles sa makausa miingon, “Ang Pasko nagsaulog sa pagkahimong kabahin sa pakigsaad, pagpakig-ambit, ug komunidad diha ni Jesukristo ug sa usag usa.” Atong gisaulog ang Pasko aron sa paghinumdom ni Jesukristo, kinsa nagkonekta natong tanan. Kon moserbisyo kita sa uban, mas masuod kita sa usag-usa ug mas masuod kita ngadto Kaniya.
Pagsunod sa Panig-ingnan sa Manluluwas
Bisan pa sa tanang kalipay sa panahon sa Kapaskohan ug sa kalipay nga nagagikan sa pagpakigbahin sa ebanghelyo, ang mga kapistahan mahimong malisod samtang nagserbisyo og misyon. Ang kamingaw sa pamilya o ang kahadlok nga dili makaapil sa pagpakig-uban sa mga higala ug pamilya tinuod gyod nga mga pagbati.
Apan ang Ginoo naghangyo kaninyo sa pagbuhat sa Iyang buluhaton. Kon gibati nimo ang kaguol atol sa mga pasko sa imong pagkamisyonaryo, ang akong tambag mao ang paghunahuna ni Jesukristo.
Ang Manluluwas mapainubsanon nga mianhi sa kalibotan. Mibiya Siya sa Iyang langitnong panimalay ug mianhi sa kalibotan aron sa pagbuhat sa buluhaton sa Iyang Amahan. Iyang gisakripisyo ang Iyang Kaugalingon aron sa pagtubos natong tanan. Maingon ta nga makaguol kana, apan ang Langitnong Amahan nag-uban Kaniya.
Ug parehas ra kana sa higayon nga nag-alagad ka og misyon Ikaw wala gayod mag-inusara. Bisan tuod layo ka sa imong pamilya, nag-uban gihapon kanimo ang Amahan sa Langit ug ang Manluluwas. Pinaagi Kanila, makadawat ka og kalig-on sa pagbuntog sa imong mga hagit.
Sa akong pagserbisyo og misyon, gibati nako ang dakong gugma. Ang akong relasyon ngadto sa Dios ug ni Jesukristo nahimong mas suod na karon. Nasayod ko nga mapasergarbohon kaayo sila nako sa pagbuhat sa Ilang buluhaton. Kana ang labing mahinungdanong buhat sa kalibotan.