Gikan sa YA Matag Semana
Nasukarap sa Kangitngit? Tugoti ang Kahayag ni Kristo nga Mogiya Kanimo
Ang pagpangita sa Langitnong Amahan dili magkinahanglan nga mahimong mahisama sa dula nga tago-tago diha sa kangitngit.
Akong gibuka ang akong mga mata ngadto sa lunlon nga kangitngit. Nag-inusara ko. Ug kinahanglan ko nga magpadayon.
Bag-ohay lang sa wala pa kini nga panghitabo, ang akong mga igsoon ug ako nagtapok didto sa among kamalig. Kadto ang sakto kaayong dapit alang sa among paborito nga dula: tago-tago sa ngitngit.
Ako ang gidimalas nga nahimong unang tigpangita. Midagan ang akong mga igsoon nga nagdala og mga espat, ug ako rang usa ang nahabilin nga walay magamit nga iwag. Human sa duha ka minutos nga paghulat, panahon na aron modagan aron sa pagpangita sa akong mga igsoon.
Apan wala ko makalihok.
Migahi ko sa kahadlok basin unsay nagpaluyo diha sa kangitngit. Sa kataposan, ang akong kahadlok sa pag-inusara mipatigbabaw. Mihinay-hinay ko og lakang paabante ug …
Nadagma ko nga nag-una ang nawong.
Mibangon ko ug padayong nagkadagma-dagma bisan asa diha sa kangitngit.
Usahay, ang kinabuhi sama gayod sa pag-inusara diha sa kangitngit, magkadagma-dagma sa atong pagpadulong balik sa Langitnong Amahan. Unsaon nato pagpangita Kaniya kon gilibotan kita sa mga impluwensiya sa kalibotan?
Ang tubag? Wala kamo mag-inusara. Dili sama nako sa akong dula kauban sa akong mga igsoon, kamo adunay espirituwal nga espat nga mogiya sa inyong kinabuhi.
Ang Inyong Espirituwal nga Espat
Dili sulagma nga ang mga kasulatan nagtumbok ni Jesukristo isip “ang kahayag ug ang kinabuhi sa kalibotan” (3 Nephi 9:18). Siya mohatag og kahayag sa panaw ngadto sa atong mahigugmaon Langitnong Amahan, kinsa naghandom nga kita mobalik ngadto Kaniya. Sa dihang gipili ninyo nga mosalig sa Manluluwas ug mopalambo og lig-on nga relasyon sa pakigsaad ngadto Kaniya, gihangop ninyo ang Iyang giya ngadto sa inyong kinabuhi.
Sa samang paagi, kon gipili ninyo nga magpasiga og usa ka espat, inyong gidapit ang kahayag niini aron mopalibot kaninyo. Dili sama sa akong dula didto sa kamalig, ang matag usa kanato makahimo sa paggamit sa impluwensiya sa Espiritu Santo, ang atong espirituwal nga espat nga maggiya kanato sa atong panaw balik ngadto sa Langitnong Amahan pinaagi sa paghimo ug pagtuman og mga pakigsaad.
Kita kinahanglan nga mohimo sa gihunahuna og maayo nga desisyon sa pagpasiga sa suga pinaagi sa pagpakabuhi sa pamaagi nga mokonekta kanato ngadto sa Manluluwas. Dihang gipalong ang kahayag, atong gipili nga magpalayo sa atong kaugalingon gikan sa Manluluwas nga si Jesukristo. Ang kahayag nga Iyang gitanyag pinaagi sa Espiritu Santo makaimpluwensiya sa atong kada adlaw nga mga desisyon, mga hunahuna, ug mga aksiyon, magdugang sa atong abilidad sa paggamit sa upat ka mahinungdanong mga gasa sa Espiritu.
1. Kalinaw
Isip usa ka tawo nga adunay makapakaging nga kahadlok sa kangitngit, akong gibati ang kahuyang ug kawalay proteksiyon sulod sa akong nag-itom sa kangitngit nga kamalig. Kon wala pa unta ko makatutok sa akong kahadlok, tingali mas andam unta ko sa mga babag nga nagpaabot nako.
Kon mosunod kita ni Kristo, motugot sa Iyang kahayag nga molibot kanato, protektado kita gikan sa daghang posibleng makadaot nga mga babag sa atong dalan. Si Kristo mitudlo, “Ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi” (Juan 8:12). Samtang mosunod kamo Kaniya, Siya mohangop kaninyo diha sa kahupay sa kahayag sa kinabuhi. Ug human niana, kamo makasunod Kaniya sa mas hingpit nga paagi.
2. Pag-ila sa Maayo ug sa Daotan
Napandol ug nadagma ko sa akong kamalig tungod kay dili ko makakita og bisan unsang mga babag. Ang usa ka espat makapasidaan unta nako sa pilegro ug moluwas nako gikan sa dagkong kasakit.
Sa samang paagi, ang Espiritu Santo makasilsil diha kanato og lawom nga pagsabot sa maayo ug sa daotan (tan-awa sa Alma 32:35). Samtang mohimo kita og mga pakigsaad ngadto sa Ginoo ug modawat sa gasa sa Espiritu Santo, ang Espiritu makaimpluwensiya sa atong mga aksiyon ug mopalig-on sa atong abilidad sa pag-ila sa maayo ug sa daotan.
Kini mopanalipod kanato gikan sa sala nga makadaot sa kalag ug magmugna og gilay-on gikan sa atong Langitnong Amahan. Ang pagpadayon nga konektado ngadto ni Jesukristo ug sa kahayag nga Iyang gitanyag makatabang nato sa pagsuhid sa komplikado nga kalibotan nga naglibot kanato.
3. Paghinulsol
Adunay mga higayon nga makahimo kamo og sayop nga pagpili bisan kon adunay kahayag nga naggiya kaninyo. Apan si Kristo makatabang ninyo sa pag-ila sa inyong mga sayop, sa pagbalik, ug sa pagsunod sa saktong direksiyon.
Sama sa gitudlo ni Sister Tamara W. Runia, Unang Magtatambag sa Kinatibuk-ang Kapangulohan sa Young Women: “Dili kita makapabilin sa dalan sa pakigsaad pinaagi sa dili paghimo og sayop. Makapabilin kita sa dalan pinaagi sa paghinulsol sa matag adlaw.”
Kita mahisalaag gikan sa dalan ngadto sa Langitnong Amahan. Kini ang dili kalikayan nga bahin sa mortalidad. Apan pinaagi sa pagtutok ngadto ni Jesukristo ug pagtuman sa atong mga pakigsaad, kita makabalik ngadto sa dalan.
4. Gugmang putli
Tingali adunay daghan sa mga anak sa Dios nga gikapoy na sa pagtago sa kangitngit. Gamit ang inyong dala nga espat, andam na kamo nga makakita kanila diha inyong dalan ug dalhon sila ngadto sa mahigugmaon ug makadapit nga kahayag sa Manluluwas.
Samtang makugihon kita nga mosunod sa Manluluwas, kita magsilbe nga mga kahayag. Si Presidente Camille N. Johnson, Kinatibuk-ang Pangulo sa Relief Society, mitudlo, “Kon kita mopakigbahin sa atong kahayag, atong gidala ang kahupayan ni Jesukristo ngadto sa uban, ang atong pagkakabig ngadto Kaniya mapalawman, ug kita mahimo na usab nga hingpit bisan kon kita naghulat pa nga maayo.”
Walay tawo nga angayng mopanaw nga mag-inusara. Adunay kalipay sa pagdala sa uban ngadto ni Jesukristo Ang pagpangalagad ug gugmang putli motugot sa matag usa kanato sa pagdapit sa uban aron mopakigbahin sa gugma sa Dios ug maglakaw sa dalan sa pakigsaad.
Pagpanggunit ngadto sa Inyong Espirituwal nga Espat
Ang akong igsoong babaye mao ang akong bayani niana nga adlaw didto sa kamalig. Puwede ra unta niya nga ibalewala ang akong mga hangyo sa panabang samtang naagian nako siya. Apan hinuon, iyang gipasiga ang iyang espat ug gitabangan ako. Ang iyang kaluoy mipabati nako nga wala na kaayo ko mag-inusara. Ug miggunit ko niana nga kaluoy hangtod nga natapos ang akong pagpangita sa akong mga igsoong lalaki.
Ang dalan pabalik ngadto sa Langitnong Amahan dili kinahanglan nga mangitngit. Iyang gihatag si Jesukristo aron mogiya kaninyo balik ngadto Kaniya. Ayaw usiki ang Iyang bililhon nga gasa pinaagi sa pagbaliwala sa kahayag nga Iyang gitanyag.
Samtang mogunit kamo ni Jesukristo ug sa Iyang kahayag, kamo makakaplag sa inyong dalan aron makapauli ngadto sa inyong Langitnong Amahan.