“Ang Pagbinayloay Mopatigbabaw alang sa Kabalaan Niini nga Kapaskohan,” Liahona, Dis. 2025
Gikan sa YA Matag Semana
Ang Pagbinayloay Mopatigbabaw alang sa Kabalaan Niini nga Kapaskohan
Unsa kaha kon hunongon nato ang pagpaningkamot nga mahimong hingpit ang Pasko ug hinoon pun-on kini sa kabalaan?
Paghulagway pinaagi Nicole Choi
Nakasulay na ba kamo nga nakahilak tungod sa usa ka Christmas tree?
Ako nakasulay na. Ipasangil nga mga epekto kini sa mga hormones sa pagmabdos, apan ang mga luha mitulo dihang ang akong bana mipahibalo nako nga ang among bag-ong christmas tree tingali angayang iuli tungod sa gubaon nga mga suga.
Dihang gipahibalo niya ang balita, ang tanan nakong mahunahuna mao ang gatosan ka mga tawo sa social media nga nagbutang og sayo sa ilang mga christmas tree, sa ilang mga eskedyul sa Pasko.
Kini nga sugilanon tingali kataw-anan para nimo ug kanako usab. Apan unsa ka sagad nga lisodlisoiron nato ang atong kaugalingon tungod kay gusto kitang mahisama sa uban, bisan og dili nato makaya sa pinansiyal, emosyonal, o pisikal?
Dili ikatingala nga daghan kanato mobati og kaluya.
Apan imbes pun-on ang atong Kapaskohan sa makaluya nga pagkab-ot sa dili reyalistik nga mga ekpektasyon, mahimo natong pun-on kini og kabalaan.
Ang Balaan nga Kagabhion
Ang unang Pasko tingali ingon og layo ra sa kahingpit.
Sa unang dapit, ang pagpahimugso ni Jesukristo sa usa ka pasungan seguradong dili maoy plano ni Maria.
Wala niya ipakatawo si Jesus sa iyang lungsod nga natawhan. Wala usab didto sa daghan og tawo nga abtanan. Kondili, gipahimugso niya ang bata sa usa ka pasungan, lagmit kauban sa mga baka o mga nating kabayo sa duol.
Si Sister Bonnie H. Cordon, kanhi Kinatibuk-ang Presidente sa Young Women, miingon: “Misunod sa pagdapit sa anghel nga ‘ayaw kamog kahadlok’ ug karon nag-andam alang sa pagkatawo ni Jesus, [si Maria ug Jose] nakahimo sa pagbiya sa bisan unsang mga gilaoman alang sa usa ka komportable nga puy-anan ug hinuon mipahimutang diha sa hilom, gamay nga kuwadra. Apan ang mora og hawan nga kahimtang dili magpabilin nga ingon niini. Ang Ginoo sa dili madugay mopuno niana nga kahaw-ang ngadto sa kabalaan.”
Tingali naghunahuna si Maria nga kining gabhiona layo sa pagkahingpit—ilabi na alang sa pagkahimugso sa ingon nga importante nga bata. Apan hunahunaa ang kabalaan nga unta mopuno sa pasungan ug sa iyang kasingkasing samtang iyang giabi-abi ang Anak sa Dios.
Atong masag-ulo kon giunsa ni Maria sa “pagpangangak ang iyang panganay nga usa ka lalaki, ug kini iyang giputos sa mga bakbak ug gipahigda sa pasongan, kay wala na may luna alang kanila sa balay nga abotanan” (Lucas 2:7).
Ang dili hingpit nga mga bahin nianang gabhiona nahimo nga balaan pinaagi sa Balaan nga Bata.
Puno sa Kabalaan
Busa unsa may mahimo niini sa gibati nga kaluya gikan sa paningkamot nga magpadayon ang usa ka ideyal nga Pasko nga unta atong masinati?
Sama ni Jose ug Maria, mahimo usab natong wagtangon ang mga ekspektasyon nga atong gipabug-at sa atong mga kaugalingon ug tugotan nga si Kristo mopuno kanato sa Iyang kabalaan.
Dili ngil-ad ang pagpangadorno alang sa Pasko, pagbinayloay og mga regalo, o paghimo og mga party. Apan kon atong pugson ang atong kaugalingon sa pagkab-ot sa gihanduraw nga mga ekspektasyon alang sa gilarawan nga hingpit nga Pasko, nawala ang atong panan-aw sa unsay labing maayo.
Kon magbutang ka og bitoon sa christmas tree, mahinumdom ka ba sa bag-ong bitoon nga misanag sa pagkatawo ni Kristo? Kon magbitay ka og mga sinumpay-sumpay nga mga christmas light, makahinumdom ka ba sa Kahayag sa Kalibotan? Kon magputos ka og mga regalo sa sinaw nga putos, mahinumdom ka ba nga si Jesukristo mao ang labing talagsaon nga gasa nga nahatag?
Si Elder Gerrit W. Gong sa Korum sa Napulog Duha ka Apostoles nagdapit kanato sa pagdala og dugang nga kabalaan sa atong kinabuhi—ug ang Kapaskohan maoy hingpit nga panahon sa pagsugod. Mitudlo siya nga, “Ang pagkabalaan ngadto sa Ginoo nag-ingon og oo ngadto sa sagrado ug ngadto sa balaan nga pagtahod, oo ngadto sa atong pagkahimong labing gawasnon, labing malipayon, labing matinud-anon, labing maayo sa atong kaugalingon samtang magsunod kita Kaniya inubanan sa pagtuo.”
Pinaagi sa paghimo og lawak alang sa dugang nga kabalaan sa akong kapaskohan, nahimo akong gawasnon gikan sa mga pagsulay sa panahon. Isip resulta, akong mahalad ang labing maayo sa akong kaugalingon ngadto ni Kristo niining Pasko ug tinuoray nga mamalandong sa kabalaan ug kalinaw nga Iyang gidala sa akong kinabuhi.
Busa tingali oras na nga timbang-timbangon ang imong lista sa buhatonon ug ipahimutang sa ibabaw ang kabalaan.
Wala ka magkinahanglan og terno nga mga sinina, mga pangdekorasyon, o hinimong mga garland. Ok ra kon dili ka magdala og dagkong mga pamasko sa balay, kon dili ka makatambong sa pipila ka mga selebrasyon tungod kay nag-eskwela ka, o kon wala nimo maplano ang imong kinabuhi.
Ug OK ra kon ang imong Christmas tree dili kaayo maayo.
Ang tanan nimong gikinahanglan mao Siya.