Gikan sa YA Matag Semana: Mga Pagtulun-an sa mga Lider sa Simbahan gikan sa Social Media
Pagpakigbahin sa Kahayag sa Gugma ni Kristo Niining Kapanahonan sa Pasko ug Human sa Pasko
Unsa ang gitudlo sa buhing mga propeta ug ubang mga lider sa Simbahan diha sa social media mahitungod sa panig-ingnan sa gugma ug serbisyo ni Jesukristo?
Gentle Shepherd [Malumo nga Magbalantay], ni Yongsung Kim
Ang kapanahonan sa Pasko kanunay nga adunay daghang madungog nga mga pamahayag mahitungod sa impluwensiya ni Jesukristo sa kalibotan:
“Sa yuta panagdait sa mga tawo nga iyang gikahimut-an” (Lucas 2:14).
“Balita alang Kaninyo nga Makalipay Kaayo” (Lucas 2:10).
Gipasa gikan sa usa ka henerasyon ngadto sa laing henerasyon, kini nga mga hugpong sa mga pulong nagpadayag og dili masukod nga kalinaw, kalipay, ug kahayag nga gitanyag sa Manluluwas.
Sa tibuok Niya nga mortal nga kinabuhi, si Kristo mipakita kon unsaon sa pagpakigbahin sa Iyang gugma ngadto sa uban. Gitudloan kita nga si Kristo “dili mohimo og bisan unsa gawas lang kon kini alang sa kaayohan sa kalibotan,” (2 Nephi 26:24).
Samtang magsaulog kita sa pagkatawo ni Kristo, kita makapangayo og tabang aron makasabot sa Iyang gugma alang sa matag usa sa mga anak sa Dios ug motanyag nianang sama nga gugma.
Ang mga lider sa Simbahan namulong mahitungod sa Iyang mga pagtulun-an diha sa social media. Ang mosunod nga mga mensahe mogiya kanato sa pagpakigbahin sa gugma ni Kristo ngadto sa uban niini nga Pasko ug human sa Pasko:
Pagtabang Ngadto “sa Usa”
“Bisan kon ang 99 sa iyang panon luwas nga anaa sa iyang kiliran, ang magbalantay milakaw og nangita sa 1 nga nawala. …
“… ako modapit kaninyo sa pagkonsiderar sa mainampoong paagi: kinsa ang inyong nailhan nga tingali nawad-an og kadasig? Kinsa kaha ang gikinahanglan ninyo nga pakig-ulian o pangayoan og pasaylo? Adunay bay usa ka ngalan nga anaa sa inyong hunahuna bag-ohay lang, bisan kon wala gayod kamo makahibalo kon ngano? Samtang inyong hisgotan kini nga mga pangutana ngadto sa Ginoo, Siya modasig kaninyo nga makahibalo unsaon ninyo pagtabang ug pagsapnay sa usa nga nanginahanglan og tabang.
“… Pinaagi sa matag usa nato nga pagpangalagad bisan ngadto sa usa nga atong matabangan, atong masabwag ang gugma ni Jesukristo sa tibuok kalibotan.”
Presidente Russell M. Nelson, Facebook, June 1, 2024, facebook.com/russell.m.nelson.
Mopasaylo, Moayo sa Daang mga Samad, Mopahiuli sa mga Relasyon
“Ang langitnon nga mga panon mipahayag og panagdait ngadto sa tanang tawo—ngadto sa yano nga managhigala ug ngadto sa mga estranghero.
“Ang Manluluwas mitudlo, ‘Higugmaa ang imong isigkatawo sama sa imong kaugalingon’ (Mateo 22:39). Gani mitudlo Siya nga angay kitang mohigugma sa atong mga kaaway, mopanalangin kanila nga nagtunglo kanato, mobuhat og maayo ngadto kanila nga nasilag kanato, ug mag-ampo alang kanila nga nagpasipala kanato.
“Samtang maningkamot kita sa pagkab-ot sa tumong nga gipadayag niana nga mga pagtulun-an, ang Pasko angay nga mahimong panahon sa pagpasaylo, panahon sa pag-ayo sa dugay nang mga samad ug pagpahiuli sa mga relasyon nga nahisalaag.”
Presidente Dallin H. Oaks, Unang Magtatambag sa Unang Kapangulohan, Facebook, Dec. 8, 2024, facebook.com/dallin.h.oaks.
Ayaw Kini Himoang Komplikado
“Ang mga pagtulun-an sa Manluluwas mahitungod sa atong relasyon ngadto sa atong Langitnong Amahan ug sa usag-usa direkta: Higugmaon ang Dios ug serbisyohan Siya, dayon higugmaon ang atong mga silingan ug serbisyohan sila.
“Ayaw kini himoang komplikado. Nakadawat kita og katungdanan sa paghigugma sa tanang anak sa Dios ug dapiton ang tanan sa pagduol ug pagtan-aw—aron makakat-on pa og dugang mahitungod sa gipahiuli nga ebanghelyo ni Jesukristo. … Ipabilin kini nga yano. Kita mohigugma, mopakigbahin, ug modapit.
Elder Dieter F. Uchtdorf, Korum sa Napulog Duha ka Apostoles, Facebook, Jan. 31, 2025, facebook.com/dieterf.uchtdorf.
Himoa ang Putling Gugma ni Kristo nga Maoy Pangontra sa Panagbangi
“Nahinumdom ko sa usa ka maanindot nga tradisyon sa Pasko nga mipahiangay sa karaang Aprikano nga kustombre ngadto sa Kristiyano nga mga pagtulun-an. Kini nga tradisyon gipalambo didto sa ubang mga baranggay sa West ug Central Africa.
“Usa ka tawo gikan sa usa niini nga mga barangay misulti nako nga sa iyang gamay nga barangay adunay usa ka tradisyon sa Pasko diin ang tanan nga adunay kaaway nga laing taga barangay makigtagbo sa pangulo sa barangay inig ka buntag sa Bisperas sa Pasko. Ang pangulo maminaw ug magtinguha sa pagsulbad sa panag-away alang sa katagbawan sa parehong habig.
“Kini nga proseso sa pagsulbad sa panag-away magpadayon sa tibuok adlaw apan sa kataposan sa adlaw, walay taga-barangay nga adunay wala masulbad nga panag-away sa laing taga-barangay. Ang katuyoan sa maong tradisyon mao ang paghatag sa mga taga-barangay og gahom nga mahimong andam sa sunod adlaw sa pagsaulog sa pagkatawo sa Prinsipe sa Kalinaw. …
“Tingali usa ka paagi nga atong matahod ang Manluluwas niini nga Pasko mao ang pagkalimot sa mga kalagot, pagpangayo og kapasayloan, ug paghatag og kapasayloan. Atong matugotan ang putli nga gugma ni Kristo aron mahimong pangontra sa panagbangi.”
Elder Dale G. Renlund, Korum sa Napulog Duha ka Apostoles, Facebook, Dec. 24, 2024, facebook.com/DaleGRenlund.
Mahimong mga Anghel sa mga Kinabuhi sa Usag-Usa
“Diha sa 2 Nephi 32:3 atong makat-onan nga ang mga anghel mopahayag sa mga pulong ni Kristo: ‘Ang mga anghel mamulong pinaagi sa gahom sa Espiritu Santo; mao nga, mamulong sila sa mga pulong ni Kristo. Mao nga, gisultihan ko kamo nga, pagbusog sa mga pulong ni Kristo; kay tan-awa, ang mga pulong ni Kristo motug-an kaninyo sa tanang butang unsay inyong angay nga buhaton.’
“Ang anghel mao si bisan kinsa nga mamulong sa mga pulong ni Kristo ug mangalagad sumala sa pamaagi ni Kristo sa pagpangalagad.
“Kita mahimong mga angel sa mga kinabuhi sa usag-usa!
Sister Amy A. Wright, Unang Magtatambag sa Kinatibuk-ang Kapangulohan sa Primary, Facebook, Dec. 9, 2024, facebook.com/Primary1stCounselor.