Ilabi na alang sa mga Bag-ong Minyo
Pagbalanse sa Kultural nga mga Kalahian sa Atong Kaminyoon
Ang pagtutok kang Kristo nakatabang nako sa pagkahibalo kon kinsa ako ug kon unsay kausaban nga akong maabot sa akong kaugalingon diha sa akong kaminyoon.
Ang akong bana ug ako nagdako sa lahi-lahi nga mga nasod. Bitaw, lahi-lahi nga kontinente.
Mao nga, tingali matag-an ninyo, nga sa among relasyon matag usa namo nagdala og managlahing naandan dihang nagsugod mi sa among kaminyoon: mga kinaiya, mga pamatasan, panglantaw sa kinabuhi. Bisan pa gani sa among kalainan sa kultura, medyo managlahi usab kami sa ubang mga paagi. Samtang usahay medyo makaluya kini, kaming duha nasayod nga kana nga mga kalainan layo ra kaayo kon ikompara sa unsay parehas namong duha: ang among gugma sa ebanghelyo ni Jesukristo.
Samtang nagplano mi sa among kasal, naghisgot mi og medyo lawom kon unsa ang angay nga mga kahimtang sa among kaminyoon. Nahibaloan namo nga managlahi ang among gidahoman kon unsaon namo sa pagdala sa among mga tahas isip bana ug asawa—ug labing importante isip mga ginikanan—ug kana nakapaluya nako.
Ang Pamilya: Usa ka Pamahayag ngadto sa Kalibotan nag-ingon, "Ang bana ug asawa adunay ligdong nga responsibilidad sa paghigugma ug pag-amuma sa usag usa."
Adunay daghang pang mga paagi sa pagtuman sa atong mga tahas isip magkapikas sumala sa atong personalidad ug indibiduwal nga mga kasinatian. Apan samtang nangandam sa kaminyoon ug sa pagmugna og akong kaugalingong pamilya, kinahanglan kong makat-on kon kinsa ang gikinahanglan sa Dios nga mahimong ako sa umaabot—isip usa ka kapikas ug isip usa ka tawo.
Kinsa man Ako isip usa ka Kapikas?
Samtang nagplano para sa among kasal, sa kasagaran naghunahuna ko kon unsa kahay impluwensiya sa managlahi nga kultura ug kasinatian nako ug sa akong bana ngadto sa among kaminyoon, sa pagkakaron ug sa umaabot.
Apan samtang nagsige ko og pamalandong, ang usa ka pakigpulong sa kinatibuk-ang komperensiya nagsigeg balik-balik sa akong hunahuna: "Ang Kultura ni Kristo" ni Elder William K. Jackson sa Seventy. Sa iyang pakigpulong, iyang gihulagway kon sa unsang paagi nga makamugna kita og Kristohanon nga kultura sa atong mga panimalay, taliwala sa atong mga higala, ug sa bisan asa kita maadto, kon puy-an nato ang ebanghelyo sa Manluluwas ug maningkamot nga mahisama Kaniya. Miingon siya, "Ang kultura ni Kristo makatabang nato nga makakita sa atong kaugalingon sa tinuod nga pagka-kita, ug kon makita pinaagi sa panglantaw sa kahangtoran, nabalanse sa pagkamatarong, makapadugang kini sa atong abilidad sa pagtuman sa mahinungdanong plano sa kalipay."
"Kinsa ako isip asawa?" Nangutana ko sa akong kaugalingon isip bag-ong minyo. Apan ang pangutana nga angaygayod nakong ipangutana mao ang “Kinsa man ang gusto sa Langitnong Amahan nga mahimong ako sa umaabot?” Ganahan ko nga maningkamot nga makapakita sa labing maayo nga bersiyon sa akong kaugalingon, pinaagi sa tabang sa Dios, ngadto sa among kaminyoon ug magmugna og kaminyoon nga nakatutok ni Jesukristo.
Para namo, kinahanglan namong ipahiangay ang among panag-uban sumala sa mga kalainan sa kultura ug sa paagi nga kami gipadako. Nabantayan sab namo nga ang mga sirkumstansiya kanunay nga mausab-usab, ug kinahanglang namong ipahiangay ang among mga kalahian ngadto sa matag sitwasyon.
Pagpahiangay sa Usag-Usa
Wala lang kami nagkinanglan sa pag-adjust ngadto sa among kanunay nga mausab-usab nga sitwasyon—gikinahanglang usab nga mopahiangay kami sa usag-usa. Ug sa pagkakaron nagpahiangay gihapon mi! Samtang ang among kinabuhi nagpadayon sa pagkausab, mao usab kami.
Isip usa ka tawo nga dako og pagmahal sa iyang pagkabata ug pamilya, sa una naglisod ko sa pagpahiangay sa mga tradisyon sa akong bana. Ug mao usab ang iyang kasinatian. Usahay maglalis mi kon kinsay mas “sakto”—usahay gani maglalis mi kon unsaon paglimpyo sa banggira.
Sa wala madugay nakaamgo ko, hinuon, nga ang pagkasakto dili gayod mas importante kay sa pagbaton og maayong kabubut-on kauban sa imong kapikas. Ang panagbangi ug dili maayo nga mga pagbati nga misangpot human sa panaglalis dili gayod nindot nga ganti sa akong pagpamugos sa akong kaugalingong pamaagi. Gikinahanglan ko nga mopahiangay dili lamang aron magpuyo uban sa akong bana apan sa pagmugna og bag-ong kinabuhi—nga kaming duha magkauban. Gisugdan namo ang pagsagol sa among duha ka kultura (among nasodnon ug mga kultura sa pamilya) aron magmugna og among kaugalingon.
Giunsa namo pagmugna og among kaugalingong kultura sa pamilya nga nakasentro sa Manluluwas? Giunsa namo sa pagmugna gihapon niini karon?
Among gisakripisyo ang among garbo. Among gibuhat ang pagsinabtanay ug pagbinatiay imbis maningkamot sa "pagdaog" sa panaglalis. Among gihinumdoman kon unsa ang among mga prayoridad: ang paghigugma ug pagrespeto sa usag-usa sa Kristohanong pamaagi, ug ang pagdapit kanunay sa Espiritu nga magpabilin sa among panimalay pinaagi sa paglikay sa panagbangi.
Ang akong bana ug ako nagkat-on pa gihapon kada adlaw kon si kinsa kami isip mga indibiduwal ug isip managtiayon. Samtang ang among lahi-lahi nga mga kasinatian ug mga kultura sa wala pa ang kaminyoon mga sakto, ang labing importante nga kultura nga makatabang namo nga makasabot kon kinsa kami mao ang kultura nga nakatutok kang Jesukristo.
Ang Kultura ni Kristo diha sa Kaminyoon
Ug unsa man gayod ang kultura ni Kristo? Si Elder Jackson miingon nga "makapadugang kini sa atong abilidad sa pagtuman sa mahinungdanong plano sa kalipay," apan unsay kahulogan niana?
Para nako, ang kultura ni Kristo maoy usa ka kultura sa proseso sa pagkahimong lahi nga tawo sa umaabot. Nagpasabot kini sa pagkakita sa akong kaugalingong potensiyal ug sa uban, ilabi na sa akong kaminyoon. Dili pa ko dugay nga naminyo, apan igo na ang gidugayon niini aron masayod nga ang kaminyoon maoy usa sa labing maayong paagi sa pagtabang sa Langitnong Amahan kanako aron mahimong mas maayo nga tawo ug disipulo ni Kristo.
Bisan unsa pa ang bag-ong mga sitwasyon ug mga sirkumstansiya nga inyong gikat-onan sa pag maneobra sa inyong kaminyoon, hibaloi nga kon huptan ninyo ang inyong mga pakigsaad ug motugyan og gugmang putli, pagpasaylo, ug suporta sa inyong kapikas, makaplagan ninyo si Jesukristo sa inyong relasyon.