Mga Pangutana ug mga Tubag
Ako bang Gibutang ang Akong Pagtuo diha sa mga Sangpotanan o diha ni Jesukristo?
Nagtuo ko nga ang pag-ampo kay mahitungod sa pag-angkon sa unsay akong gusto.
Samtang nagdako ko, wala gyod ko maghunahuna kon unsay paagi sa akong pag-ampo. Akong gihunahuna nga ang pag-ampo kanunay nga makahatag nako sa akong gusto.
Kon mawad-an ko og duwaan, mag-ampo ko aron makit-an kini.
Kon ang mga tawo nga akong kaila masakit, mag-ampo ko para nila aron sila mamaayo.
Ug sa dihang naghunahuna ko nga panahon na para maminyo ko, nag-ampo ko nga motunga ang akong pamanhonon.
Karong bag-ohay lang ako namalandong mahitungod sa kalainan sa pagbaton og pagtuo sa mga sangpotanan ug pagbaton og pagtuo kang Jesukristo. Apan sa dihang nakamatikod ko nga sa kasagaran akong gibutang ang akong pagtuo sa akong gitinguha nga mga mahitabo, nakaamgo ko nga kinahanglan ko nga mag-usab. Akong gitun-an ang Isangyaw ang Akong Ebanghelyo, nga nagpasabot sa pagtuo kang Jesukristo: "Ang hugot nga pagtuo maoy usa ka baroganan sa gahom. Samtang magpakita ka og hugot nga pagtuo diha ni Jesukristo, mapanalanginan ka sa Iyang gahom nga gipahaom sa imong kahimtang. Makasinati ka og mga milagro sumala sa kabubut-on sa Ginoo.”
Mao nga, kon atong ipakita ang atong pagtuo kang Jesukristo, Siya mohatag kanato og gahom sa pag-atubang kon unsa ang nanghitabo karon sa atong kinabuhi. Apan sa unsang tukma nga paagi nga ako dili makabaton og pagtuo sa piho nga mga sangpotanan nga ganahan man kaayo ako niini?
Aron mausab ang akong paagi sa pag-ampo, nagsugod ko sa pagbuhat og tulo ka butang nga nakatabang nako sa pagbutang sa akong pagtuo ug sa akong kasingkasing sa insakto nga lugar.
1. Pagpalig-on sa akong pagtuo kang Jesukristo
Ang pagtuo kang Jesukristo dili lang kay mahitabo sa iyang kaugalingon. Nagkinahanglan kini sa atong mga paningkamot aron molambo ug motubo. Samtang nag-ampo ko aron molig-on ang akong pagtuo ngadto Kaniya, nakakaplag ko og mga paagi aron mas madugangan pa ang akong pagdapit kang Kristo ngadto sa akong personal nga kinabuhi. Misangpot kini sa mas lig-on nga relasyon ngadto Kaniya ug mas makahuloganong mga pag-ampo. Ang akong pagtuo Kaniya mitubo, bisan unsa pa ang akong nasinati.
2. Makanunayon nga Pagtambong sa Templo
Nabati nako ang kabug-at sa hagit sa pagminyo. Sa dihang nauli ko gikan sa akong misyon ug nadismaya kay walay daghang date nga nakalinya, usa ka higala mihagit nako sa pagtambong sa templo kausa sa usa ka semana. Bisan og wala pa gihapon koy nakit-an nga tawo nga gusto nakong minyoan, nakakaplag ko og laing butang: gahom ug kalig-on aron mahimong mas maisog ug adunay tumong sa akong pag-pakigdate.
Sama sa gitudlo ni Presidente Russell M. Nelson: “Diha sa balay sa Ginoo, kita motutok ngadto ni Jesukristo. Kita magkat-on Kaniya. Kita mohimo og mga pakigsaad aron mosunod Kaniya. Kita mahimong makaila Kaniya. Kon kita motuman sa atong mga pakigsaad sa templo, kita makabaton og mas dakong akses ngadto sa makapalig-on nga gahom sa Ginoo.” Ang pagtambong sa templo nakatabang nako sa pagdirekta sa akong pagtuo ngadto ni Kristo ug sa Iyang gahom, dili ngadto sa akong paglaom nga maminyo.
3. Mag-ampo aron Makasabot ug Mosalig sa Tukmang Panahon sa Langitnong Amahan
Paminaw nako komon kini ang maglisod sa pagsabot sa tukmang panahon nga giandam sa Langitnong Amahan alang sa atong matarong nga mga tinguha. Usa ka butang nga nakatabang nako sa pagsabot sa mga panalangin nga Iyang giandam alang kanako mao ang pagtuon sa akong patriyarkal nga panalangin.
Bisan og wala kini maghatag kanako sa tanang tubag nga akong gipaabot, nakahupay kini kanako pinaagi sa pagkahibalo nga ako pinalangga nga anak sa Langitnong Amahan ug Siya mogiya kanako ngadto sa makahingangha nga mga panalangin. Mogiya usab Siya kaninyo! Samtang nagpadayon ko sa pag-ampo ug sa pagsabot sa Iyang kinaiya ug sa Iyang mga saad ngari kanako, ako napuno sa kalinaw nga nagagikan lamang kang Jesukristo—kalinaw gikan Kaniya, dili gikan sa mga sangpotanan nga akong gilaoman.
Sayop ba nga molaom nga mahitabo ang piho nga mga butang sa akong kinabuhi? Dili. Apan ang pagbaton og pagtuo niana nga mga sangpotanan lamang dili makapahitabo niini o dili makahatag kanako og kalinaw. Hinuon, ang pagdugang sa akong pagtuo ni Jesukristo mitudlo kanako nga mosalig Kaniya ug sa Langitnong Amahan.
Sama sa gitudlo ni Elder Shayne M. Bowen sa Seventy, “Samtang dili ang tanang sirkumstansiya moresulta sama sa atong gilaoman ug giampo, ang mga milagro sa Dios kanunay nga moabot sumala sa Iyang kabubut-on, sa Iyang tukmang panahon, ug sa Iyang plano alang kanato.”
Nakaseguro ko nga samtang magsunod ko ni Jesukristo, ako mamahimong matang sa tawo nga gusto Niya nga mahimong ako sa umaabot.