Gikan sa YA Matag Semana
4 ka Paagi sa Pagsaulog kang Kristo sa Tibuok Tuig
Sa Pasko, atong gisaulog ang pagkatawo ni Kristo. Unsaon man nato sa pagsaulog ang ubang bahin sa Iyang kinabuhi?
Dili ba nindot nga saulogon ang Pasko sa tibuok tuig?
Ang lamian nga pagkaon, ang maanindot nga mga dekorasyon, ang makalingaw nga mga tradisyon, ug labing importante, ang oportunidad sa pagtutok kang Jesukristo.
Ang maayong balita: Tungod lamang kay ang Pasko moabot ug molabay wala magpasabot nga dili ka kanunay nga makasaulog sa Manluluwas. Ang mga buhat ug mga pagtulun-an ni Kristo mahimong pasidunggan sa tibuok tuig! Ania ang upat ka paagi nga makatutok sa kanunay nga paghinumdom Kaniya, lapas sa kapanahonan sa Pasko.
1. Tinguhaa ang Pagkaila Kaniya
Ang pagkatawo ni Jesukristo maoy usa ka sagrado nga pagpamatuod sa gugma sa Dios alang sa Iyang mga anak, ug sama sa mga tigbalantay sa karnero sa Betlehem, angay gayod kita nga motahod nianang balaanon nga gabii.
Apan ang usa ka grupo sa mga tawo diha sa sugilanon sa Pasko—ang Maalamon nga mga Tawo—wala moabot sa gabii sa pagkatawo ni Kristo. Sila nakakaplag Kaniya sa kadugayan na. Ang ilang panaw tingali milungtad og mga bulan o mga tuig! Apan determinado sila nga mosimba sa ilang Hari, bisan unsa pa ka dugay ang abton. Kita usab makapangita sa Manluluwas lapas sa Kapaskohan.
Si Presidente Russell M. Nelson mitudlo, “Kon magkat-on kamo og mas daghan mahitungod sa Manluluwas, mas sayon ang pagsalig sa Iyang kaluoy, sa Iyang walay kinutoban nga gugma.” Makatinguha kamo sa pagkat-on pa mahitungod ni Jesukristo pinaagi sa pag-ampo aron mobati sa Iyang gugma, sa pagtuon sa Iyang kinabuhi diha sa mga kasulatan, ug sa paghimo og mga pakigsaad ngadto Kaniya.
2. Magbaton og Espirituwal nga Kalig-on pinaagi sa Pagpuasa
Sa wala pa magsugod sa Iyang pagpangalagad, si Jesus nagpuasa og 40 ka adlaw didto sa kamingawan. Kini nga panahon miandam Kaniya sa pagsukol sa mga tentasyon nga gipahamtang diha Kaniya ug nagtudlo "pinaagi sa gahom sa Espiritu” (Lucas 4:14) didto sa Galilea.
Dili ka kinahanglan nga magpuasa og 40 ka adlaw nga walay hunong aron makasunod sa Iyang panig-ingnan, apan ang baroganan mao ra gihapon: Ang Pagsalikway sa kalibotanong mga tinguha ug mga kinaiya mohatag og mas dakong luna alang sa Manluluwas ug sa Espiritu sa imong kinabuhi.
Si Presidente Henry B. Eyring, Ikaduhang Magtatambag sa Unang Kapangulohan, mipasabot nga ang pagpuasa magdala kanato og “gahom nga makadawat og inspirasyon ug mas dakong kapasidad sa pagbatok sa tintasyon.” Ang pagtuman sa sugo sa pagpuasa kanunay makatabang kanimo sa pagtutok kang Jesukristo ug motugot Niya sa pagpanalangin kanimo ug sa mga tawo nga imong gipahinungdan sa imong pagpuasa.
3. Mangandam sa Iyang Pagbalik
Si Jesus nangalagad ngadto sa Iyang mga disipulo sulod sa 40 ka adlaw human sa Iyang Pagkabanhaw, dayon misaka ngadto sa kalangitanan, uban sa saad nga mobalik Siya (tan-awa sa Mga Buhat 1:2–11).
Bag-ohay lang, ang mga propeta ug apostoles naghatag og importansiya sa panginahanglan sa pagpangandam alang niana nga pagbalik. Sama pananglit, si Presidente Nelson mitudlo nga “ang pagdugang og panahon diha sa templo makatabang kanato nga maandam alang sa Ikaduhang Pag-anhi" ug miawhag sa matag usa sa pagsimba diha sa templo kutob sa mahimo. Makalantaw ka sa Ikaduhang Pag-anhi ni Kristo uban sa kalipay ug pagtuo pinaagi sa pagpaningkamot nga magmatarong ug magmalig-on sa espirituwal, lakip na pinaagi sa pagsimba sa templo.
4. Magkat-on sa Pagpaminaw Kaniya
Wala madugay human sa iyang Pagsaka sa Langit, ang Apostoles ni Jesus nakadawat sa gasa sa Espiritu Santo samtang nagpundok alang sa kumbira (tan-awa sa Mga Buhat 2). Kini nga gasa mitugot kanila nga makabaton sa giya ni Kristo bisan tuod og wala na Siya sa kalibotan kuyog kanila.
Pinaagi sa gipahiuli nga awtoridad sa pagkapari sa Dios, kita makaangkon sa gasa sa Espiritu Santo—ug sa tingog sa Manluluwas! Si Presidente Nelson miawhag sa tanan nga “buhaton ang bisan unsa nga makapadugang sa inyong espirituhanong kapasidad sa pagdawat og personal nga pagpadayag.”
Samtang magtinguha kamo ni Jesus atol niining espesyal nga panahon ug motutok ngadto Kaniya sa tibuok tuig, ang inyong kinabuhi mapuno sa giya, paglaom, ug kalig-on nga Iyang gisaad. Igo na kana nga rason sa pagsaulog−dili lamang niini nga panahon apan sa kanunay.