Gikan sa YA Matag Semana
Unsay Natudlo ngari Kanako sa Usa ka Katalagman sa Pasko Mahitungod sa Akong Relasyon sa Pakigsaad
Ang gikawat nga mga gasa ug usa ka bag-o nga tradisyon sa pamilya ang mitabang nako nga makaamgo sa bili sa pag-amuma sa akong relasyon sa pakigsaad uban sa Langitnong Amahan.
Paghulagway pinaagi ni Stephen Neilsen
Nagdako ko sa American Samoa isip usa sa 13 ka managsoon. Kaming tanan nagpuyo sa usa ka gamay nga panimalay nga adunay tulo ka kwarto sa baryo sa Leone. Ang Pasko kanunay nga espesyal alang sa among pamilya—kini ang panahon sa pagpamalandong sa pagkatawo ug Pag-ula ni Jesukristo ug ang panahon sa pagserbisyo ug paghatag.
Usa ka panahon sa Pasko, human motrabaho og maayo ug nagtigom, ang akong mga ginikanan nagpalit alang sa matag usa kanamo og gasa ug gibutang kini ilawom sa Christmas tree. Naghinam-hinam kaayo mi!
Apan sa wala pa moabot ang Pasko, ang akong magulang nga lalaki mipukaw kanamo usa ka buntag sa usa ka makasubo kaayo nga balita: Ang matag usa ka gasa gikawat. Usa ka tawo ang nakasulod sa balay pagka gabii ug gikuha ang tanan.
Gikan niana nga sakit kaayo nga kasinatian, usa ka bag-o nga tradisyon ang gisugdan. Matag Pasko human niana, kami matulog palibot sa Christmas tree aron maprotektahan ang among mga gasa.
Sa ingon niana kakataw-anan ug kamasulub-on nga panumdoman, kini nagtudlo kanako og labaw pa kay sa pagkamabinantayon mahitungod sa mga gasa sa Pasko—kini nagpahinumdom kanako kon unsa kamahinungdanon ang pagpanalipod ug paghatag og prayoridad sa atong relasyon sa pakigsaad uban sa Langitnong Amahan.
Usa ka Pahinumdom sa Atong Relasyon sa Pakigsaad
Si Presidente Russell M. Nelson kanunay nga nagtudlo kanato mahitungod sa kaimportante sa mga pakigsaad. Siya miingon: “Ang paghimo og usa ka pakigsaad sa Dios mousab sa atong relasyon uban Kaniya hangtod sa kahangtoran. Kini mopanalangin kanato sa naghingapin nga gugma ug kaluoy. Kini makaapekto kon si kinsa kita karon ug sa unsang paagi ang Dios motabang kanato nga mamahimong unsa ang atong sangpotan.”
Sama nga ang akong pamilya mipanalipod sa among mga gasa, ang atong relasyon sa pakigsaad uban sa Langitnong Amahan mao ang labing bililhon nga relasyon nga maangkon nato. Kinahanglan nato kini nga ampingan. Apan unsaon nato kana pagbuhat diha sa kalibotan nga puno sa panglingla? Ania ang pipila ka ideya nga nakatabang kanako:
1. Barogi ang Unsay Dili Gayod Nimo Usbon
Isip usa ka young adult nga gidungan ang pag-eskwela, football, ug pakig-date diha sa Brigham Young University, gibati nako nga naglibog na kaayo. Diha nako naamgohan nga kinahanglan nako nga magtakda og “mga dili usbon”—mga prayoridad nga mao gayod ang akong buhaton bisan unsa pa ang mahitabo.
Ang paggahin og panahon alang sa Ginoo ug pagtutok ngadto ni Jesukristo nahimong usa sa mga dili nako usbon. Matag buntag ako adunay gi-eskedyul nga oras alang sa Ginoo diin akong susihon ug hinuktokan ang mga kasulatan ug ang labing bag-o nga mga mensahe sa kinatibuk-ang komperensiya. Kining inadlaw nga naandang buluhaton naghatag kanako og gamay nga espirituhanong mga kasinatian ug nagmugna sa kinaiya nga moimpluwensya sa akong adlaw.
Si Presidente Nelson miingon, “Karon mao ang panahon nga atong himoon ang atong pagkadisipulo nga atong kinatas-an nga prayoridad.” Ang paghimong prayoridad sa panahon sa Ginoo dili motangtang sa mga hagit o mga panglingla sa kinabuhi—apan kini makatabang nako nga maatubang kini uban sa Iyang kalig-on.
Sama sa gitudlo usab ni Presidente Nelson, “Ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.” Kon inyong barogan ang inyong kaugalingon nga mga dili usbon ug himoong prayoridad ang inyong relasyon sa pakigsaad uban sa Ginoo, ang inyong mga hagit mahimong mas madumala ug maangkon ninyo ang makapalig-on, espirituhanong mga kasinatian kada adlaw.
Busa unsa man ang inyong mga dili usbon? Unsaon ninyo pagseguro nga maprayoridad ang inyong relasyon ngadto sa Dios kada adlaw, kada adlaw, kada adlaw?
2. Himoa ang Espirituhanong Buhat
Ang pagtakda og mga dili usbon mao lamang ang sinugdanan; kinahanglan usab nato nga buhaton ang espirituhanong buhat. Usahay kahibalo kita unsa ang buhaton—magbasa sa mga kasulatan, mag-ampo, motambong sa simbahan—apan kulang sa kadasig. Mibati usab ako niana.
Si Elder David A. Bednar sa Korum sa Napulog Duha ka Apostoles mitudlo, “Ang hugot nga pagtuo diha ni Kristo mogiya ngadto sa matarong nga aksiyon, nga modugang sa atong espirituhanon nga kapasidad ug gahom.”
Kon makita nako ang akong kaugalingon nga nagkulang sa kadasig nga mobuhat sa espirituhanong buhat, mag-ampo ko alang sa tinguha ug kalig-on sa paglihok. Ug kon buhaton nako kini, akong mabantayan nga ako mas mapaduol sa espirituhanong paagi ngadto sa Ginoo. Ang akong relasyon sa pakigsaad uban sa Langitnong Amahan, sama sa bisan unsang relasyon, nagkinahanglan og pagkugi. Dili kini listahan apan usa ka proseso nga akong amumahon sa tibuok nakong kinabuhi.
3. Pangita og mga Oportunidad sa Pagserbisyo
Samtang akong gipalig-on ang akong relasyon sa pakigsaad uban sa Langitnong Amahan ug ni Jesukristo, ang Espiritu kanunay nga mogiya nako aron sa pagserbisyo sa uban. Kana nga paggiya mas mipalawom sa akong koneksiyon ngadto sa Dios. Ang Espiritu dili maghulat sa Pasko—kita makaserbisyo matag adlaw diha sa atong mga panimalay, mga simbahan, ug mga komunidad.
Sa kalibotan nga puno sa pag-inusara ug pagpalayo, usa sa labing maayo nga paagi aron mobati nga mas konektado mao ang pagtan-aw lapas sa atong kaugalingon ug pagserbisyo sa uban. Sama sa gipamatuod ni Hari Benjamin, kon kita nagserbisyo sa uban, kita nagserbisyo sa Langitnong Amahan (tan-awa sa Mosiah 2:17).
Kon dili kita seryoso sa atong relasyon sa pakigsaad, mawala ang atong abilidad sa tinud-anay nga paghimo og kalainan sa kalibotan. Sama sa gitudlo ni Elder Bednar, “Ang matag buhat sa dili hinakog nga pagserbisyo nga atong gihatag makatabang kanato nga mahimong mas makaila sa Agalon nga atong girepresentaran ug ang matag buhat mas makapaduol nato ngadto Kaniya.” Samtang kita aktibo nga mangita og mga paagi nga makaserbisyo, kita dili lamang mopanalangin sa uban apan usab mopalig-on sa atong kaugalingong koneksiyon uban sa Langitnong Amahan, nagpalig-on sa atong pasalig ngadto sa atong mga pakigsaad.
Himoa ang Inyong mga Pakigsaad nga Mogiya sa Inyong Kinabuhi
Sama nga among gipanalipdan ang among mga gasa, kinahanglan nato nga panalipdan ug iprayoridad ang atong relasyon sa pakigsaad.
Daghan nato nag-atubang og dagko nga mga desisyon—mahitungod sa pag-eskwela, pakig-date, mga karera, o mga misyon. Sayon ra nga mobati nga dili segurado o dili paigo. Kon mobati ko og ingon niana, akong tugotan ang akong mga pakigsaad nga mogiya kanako.
Unsa ang giingon sa inyong mga pakigsaad sa bunyag ug sa templo nga buhaton? Unsa nga mga panalangin ang gisaad sa Dios kaninyo?
Kon inyong iprayoridad ang inyong relasyon sa pakigsaad, ang tanan magsugod ra sa pagkahimutang. Si Presidente Nelson mipakigbahin, “Ang kalipay nga atong gibati dili kaayo konektado sa mga sirkumstansiya sa atong kinabuhi apan konektado kaayo sa gitutokan sa atong kinabuhi.” Ug ang pagbati sa gugma ug hingpit nga kalipay sa Manluluwas mao ang seguradong labing nindot nga gasa sa Pasko nga atong madawat.