Gikan sa YA Matag Semana
6 ka Pamaagi sa Pagpangalagad Sama sa Manluluwas Niini nga Panahon sa Kapaskohan
Sa paghimo og mga milagro, si Jesus nakatutok sa mga individual.
Atol sa panahon sa Pasko, sa kasagaran mobati kita og dugang tinguha—tingale obligasyon pa gani—sa pagserbisyo ug sa paghimo niini sama sa buhaton sa Manluluwas. Nga mahimong sobra ra kaayo! Ang Ginoo mihimo og ubang dagko nga mga milagro atol sa Iyang mortal nga pagpangalagad! Unsaon kaha nga ang atong mapaubsanon nga mga buhat matandi ngadto sa Iyang gibuhat?
Dili kini kinahanglan nga makapaluya. Gawas sa klaro nga mga milagro sama sa paghimo sa tubig ngadto sa bino, ang atong Sulundon naghimo usab og dili kaayo makita nga mga milagro sama sa pagtandog sa mga kasingkasing sa katawhan ug pagpauswag sa ilang kinabuhi.
Kadaghanan sa Iyang gihimo mahimo ra kaayo nato nga sundon samtang mosunod kita Kaniya. Ania ang ubang pasiuna nga mga baroganan nga angay hinumdoman samtang mangita kamo og mga paagi sa pagpangalagad niining panahon sa kapaskohan.
Maminaw.
Nahibalo si Jesus nga ang Samaryanhon nga babaye didto sa atabay wala magsunod sa balaod sa kaputli (tan-awa sa Juan 4:6–29). Nahibalo Siya nga ang babaye nga gipasanginlan sa pagpanapaw sad-an niini (tan-awa sa Juan 8:3–11).
Apan ang Manluluwas wala motutok niining mga butanga. Uban sa kaluoy, Iyang gitabangan sila nga makasabot nga mahimo nilang usbon ang ilang mga kinabuhi. Iya silang gihatagan og paglaom alang sa mas hayag nga kaugmaon. Ang resulta? Ang duha ka babaye parehong nakaangkon og pagpamatuod sa Manluluwas (tan-awa sa Juan 4:29 ).
Sama sa Manluluwas, makapaminaw kita nga dili mohimaraot sa uban. Makadalit kita og paglaom ug makadasig sa uban sa pagkaplag og kalipay diha sa pagsunod Kaniya.
Magpakita og kaluoy. Hilak kon gikinahanglan.
Sa dihang nakita ni Jesus ang mga higala ug pamilya ni Lazarus nga naghilak tungod sa iyang kamatayon, nahibalo Siya nga hapit na Niya buhion ang tawo gikan sa patay. Mahimo ra unta Niyang sultihan ang mga tawo nga, “Wala nay angayng hilakan. Mamaayo ra ang tanan!”
Apan wala Niya buhata. Unsay Iyang gihimo? Mibakho Siya uban kanila (tan-awa sa Juan 11:35).
Tingali ang atong mga minahal dunay mga problema nga dili makaapekto nato sa personal. Tingali may mga kahadlok sila nga wala nato mabati o mga kabalaka nga ato nang nasulbad. Tingali nanglimbasog sila sa mga baroganan sa ebanghelyo nga sayon ra para nato. Mopakita kita og kaluoy (ang Latin nga tinubdan niana nangahulogan nga “moduyog sa pag-antos”) pinaagi sa pagpakig-uban diha sa ilang mga pagbati—dili magpasulabi sa negatibo nga mga hunahuna uban kanila apan seryoso nga mobati sa ilang mga hagit ug motabang nila sa pagbuntog niini.
Paapilon ang tanan.
Si Jesus kasagaran nga gisaway kay wala siyay pili, sa pagpakig-abi-abi sa mga tawo nga dili Niya "angay" nga abi-abihon (tan-awa sa Mateo 9:10–12). Apan ang dili pag-apil og mga tawo? Kana ang butang nga wala Niya buhata. Naghunahuna Siya sa tanan, lakip na niadtong hapit nga gisalikway sa katilingban.
Sama sa Manluluwas, mahimo kamong maningkamot aron makamatikod niadtong nanginahanglan nga mas mobati pa sa gugma sa Dios.
Hinumdomi kana kon magplano kamo sa inyong mga party sa kapaskohan ug mga kalihokan. KDNJ: Kinsa ang Dapiton ni Jesus?
Gamita ang inyong mga kapanguhaan. Palapdi ang inyong hunahuna.
Dihang ang lima ka libo ka katawhan gigutom ug walay pagkaon sa duol, ang Ginoo wala moingon, "Pasayloa ko, wala usab akoy pagkaon. Wala koy ikatabang ninyo.” Hinuon, gihangyo Niya ang Iyang mga sumosunod sa pagpundok kon unsay anaa, nag-ampo Siya, ug mihatag Siya og milagro.
Ang mga milagro nga moresulta gikan sa inyong mga pag-ampo tingali dili sama niana ka milagroso. Apan tingali masorpresa mo sa mga ideya nga ihunghong kaninyo sa Espiritu kon mosulti kamo sa Langitnong Amahan: "Gusto ko nga motabang niini nga sitwasyon, apan wala koy mga kapanguhaan. May sayop ba ako niana? Unsay akong mahimo?”
Pagmaisogon ug pagbaton og positibo nga hunahuna.
Kapila magsulti si Jesus og mga butang sama sa “Ayaw kahadlok” (Mateo 17:7; Marcos 5:36), “Ayaw kahadlok” (Mateo 10:28; Lucas 8:50; 12:7), ug “Salig kamo” (Mateo 14:27; Juan 16:33)?
Nakamatikod ba kamo nga ang atong mga propeta sa ulahing mga adlaw ingon ana usab? (Dali, hunahunaa si Presidente Nelson. Inyo siyang mahunahunaan nga nagpahiyom, diba?) Ang pagkanegatibo dali ra kaayo nga masinati sa tawo nga ganahan niini. Dili kinahanglan nga kamo ang tinubdan niini.
Pagserbisyo kamo bisan kon (ilabi na kon) nanglimbasog usab kamo.
Morag sama kini sa balibato, apan ang maayong paagi sa pagsugakod kon ikaw naluya mao ang pagserbisyo sa uban. Ayaw tugoti ang inyong kaugalingong mga problema nga maoy inyong irason aron ang inyo lamang kaugalingon ang inyong hunahunaon. Ang tibuok kinabuhi ug misyon sa Manluluwas maoy mga panig-ingnan niini. Bisan pa kon Siya “Gitamay ug gisalikway; nakasinati Siyag mga kagul-anan ug mga pag-antos” (Isaias 53:3), si Jesus sa gihapon “miadto … sa tanang dapit ug naghimog mga maayong butang” (Mga Buhat 10:38).
Samtang hapit na Siya mamatay sa krus—sa panahon nga ang paghunahuna sa kaugalingon masabtan ra—mihangyo Siya sa Iyang Amahan nga pasayloon ang mga tawo nga maoy responsable (tan-awa sa Lucas 23:34) ug miseguro nga maatiman ang Iyang inahan (tan-awa sa Juan 19:26-27).
Duna pay usa ka butang nga gihimo sa Manluluwas. Kadaghan Siya nag-ampo. Kon sinsero kamo nga mangayo og direksyon sa Langitnong Amahan sa pagpangalagad sa uban—unsay isulti, unsay buhaton, unsaon pagtabang—ang Espiritu Santo mogiya kaninyo. Kana mao ang kinauyokan sa tanang kahulogan sa "pagserbisyo sama sa Manluluwas:" ang pagbaton sa Espiritu. Magsabwag kita og mga kalipay karong Pasko!