Gikan sa YA Matag Semana
Pagpalambo og Espirituwal nga Kahilom Panahon sa Kapaskohan
Ang tagsulat nagpuyo sa Vienna, Austria.
Kon atong tutokan ang mahilom, balaan nga gabii sa pagkatawo sa Manluluwas, atong madugangan ang atong pagbati sa pagkabalaan diha sa atong kaugalingong mga pagsaulog.
Gihatag Kanato ang usa ka Anak nga Lalaki, ni Eva Koleva Timothy
Nakahunahuna ba ikaw sa kamahinungdanon sa himno sa Pasko nga "Mahilom nga Gabii"?
Bisan tuod ang Kapaskohan puno sa makalingaw nga mga kalihokan, mga tradisyon ug madasigon nga mga tuno, kini nga awit kanunay nga makahuloganon kaayo para nako. Usa kini ka matinahoron, matahom nga tuno nga naghulagway sa mahilom nga kalinaw sa kalibotan sa gabii nga natawo ang Manluluwas ug nagpahinumdom kini kanako kinahanglang kong maggahin og oras alang sa kahilom ug kabalaan taliwala sa akong mga kalingawan sa kapistahan.
Ang kabalaan nga atong gibati dihang atong gipamalandongan ang pagkatawo sa Manluluwas ug kon unsay kahulogan sa Iyang kinabuhi ngari kanato mahimong makusganon atol niini nga panahon, kon hatagan nato kini og saktong pagtagad. Apan kay ang Disyembre kanunayng puno sa mga final exam, panagpundok sa pamilya ug mga higala, pagbiyahe, pag-shopping, ug uban pang mga obligasyon, ang paghinayhinay maingon og dili mabungahon ug dili posible.
Hinuon, nakakat-on ko og pipila ka butang mahitungod sa gahom sa kahilom atol sa kapanahonan sa Pasko—ug kon unsaon niini pagpalawom sa atong diwa sa Pasko ug sa atong relasyon ngadto sa Manluluwas.
Pagserbisyo Atol sa Kapistahan sa Pasko
Bisan tuod ang Kapanahonan sa Pasko makapabisi, ang usa sa labing magantihon nga bahin sa kapanahonan para nako mao ang oportunidad sa pagserbisyo sa uban. Ang pipila sa akong labing maayo nga mga kapistahan sa pasko gigahin sa pagtrabaho sa lain-laing mga proyekto sa pagserbisyo uban sa akong ward ug pamilya. Bisan kon bisi ko ug ganahan nga morelaks atol sa akong libre nga mga oras, ang pagserbisyo nagtugot nako sa paglantaw sa uban ug sa pagdapit sa Espiritu sa akong kinabuhi.
Kon magserbisyo ko og usa ka tawo, maghunahuna ko sa Manluluwas. Dihang nagserbisyo sa uban ang Manluluwas, Siya mitan-aw kanila og maayo, naminaw ug nakakita sa ilang mga panginahanglan. Maghinay-hinay Siya aron lamang sa pagserbisyo kanila sa tagsa-tagsa, sama sa babaye nga nag-antos tungod sa pagsigeg dugo o sa tawo didto sa may linaw sa Betsata (tan-awa sa Marcos 5:24–34; Juan 5:5–9). Kadto nga mga milagro mga gamhanan, apan nakita nako kini isip mahilom, mga panahon sa kasuod sa Manluluwas ug sa mga anak sa Dios.
Bisan tuod ang proyekto sa pagserbisyo alang sa Pasko saba o puno sa masadya nga mga kalihokan ug nakapabisi nako, kon mohunong ko ug motutok kang Kristo, mobati ko og balaanong pagtahod ug pasalamat alang Kaniya. Ang pagserbisyo nagdala og pagbati sa kahilom sa akong kalag ug nagtabang nako nga mobati nga mas duol Kaniya.
Kahilom sa Kapanahonan sa Pasko
Dinhi sa Austria, ang pagkanta og "Mahilom nga Gabii" sobra ka espesyal tungod kay gisulat kini sa duha ka Austrian nga mga kompositor. Dili namo kini kantahon hangtod moabot ang Bisperas sa Pasko. Sa among pamilya, human mi mobasa sa Lucas 2 mahitungod sa pagkatawo sa Manluluwas, kantahon namo kini og dungan duol sa kahayag sa kandila sa among Christmas tree.
Ang mga pulong nagtabang nako sa pagpamalandong sa Manluluwas ug sa hinungdan sa kapanahonan. Mobati ko og kabalaan ug balaang pagtahod samtang maghunahuna ko Niya nga naghigda sa Iyang pasongan atol sa labing hilom ug malinawon nga gabii nga nasinati sukad sa kalibotan. Usa usab kini ka maanindot nga paagi sa pagsinati sa usa ka mahilom nga gabii samtang maghinapos na ang mga masadya nga pagsaulog.
Bisan kon kamo walay tradisyon nga sama niini, awhagon ko kamo sa pagpalayo sa mga makabalda ug mangita og panahon sa kahilom atol niini nga kapanahonan sa pagtuon sa kinabuhi sa Manluluwas diha sa mga kasulatan ug mamalandong kon unsa ang kahulogan sa Iyang pagkatawo para kanimo.
Paghangop sa Kalipay sa Manluluwas
Si Sister Tamara W. Runia, Unang Magtatambang sa Kinatibuk-ang Kapangulohan sa Young Women, mitudlo sa matahom nga paagi: “Nianang balaan nga gabii sa Pasko, usa ka anghel ang mipakigbahin sa maayo nga balita, ang maayong balita sa dakong kalipay. … Nagtuo ko nga ang anghel nag-ingon, ‘Ang imong higala, imong labing suod nga higala bag-o lang gyod nga miabot. Ug kon ikaw nakahibalo kon giunsa ka Niya pagbantay og maayo, unsa ka dako ang pagtan-aw nimo Kaniya sa dihang ikaw nagpuyo uban Kaniya kaniadto, kon ikaw nakasabot kon unsa ang Iyang isakripisyo alang kanimo ug unsa kadako ang Iyang andam nga buhaton aron matabangan ka nga makabalik sa panimalay, ikaw magdali sa pagtimbaya Kaniya didto sa pasongan.’”
Kadtong mga takna sa kahilom—pinaagi sa pag-ampo, sa sulod sa templo, atol sa pagtuon sa kasulatan, ug samtang nagserbisyo ko sa uban—mao ang mga takna nga akong gibati ang labing kasuod ngadto sa Manluluwas. Nahibalo ko nga kita makakaplag Kaniya ug mobati sa Iyang kalinaw pinaagi niini nga kapanahonan ug sa matag kapanahonan samtang kita moserbisyo Kaniya ug mamalandong sa kalipay sa Iyang pagkatawo.