Mga Kahanas sa Kinabuhi
Tabang! Ang Akong Phone Mao nay Nagbuot sa Akong Kinabuhi!
Ang paggahin og panahon layo sa imong device makatabang nimo sa pagpalambo og relasyon sa mga tawo nga labing importante kanimo.
Ilabay ang phone!
OK, tingali dili gyod ilabay kini. (Mahal ang mga phone, ug ang imong pitaka magpasalamat nimo sa dili paglabay niini.)
Apan kon ikaw ang tawo nga gusto nga putlon ang mga makalinga, ang sobra nga pag-scroll-scroll, ang pag-usik-usik sa oras … para imoha ni.
Pagpangita og Kadasig sa Pagbutang sa Imong Phone
Mas dali ang pagbuhat sa usa ka butang kon nakahinumdom ka kon nganong gibuhat nimo kini. Sa dili pa kita moadto sa mga estratehiya sa paghipos sa imong phone, mangita ta og ubang makadasig.
1. Buhata Kini para sa Imong Kaugalingon
Samtang dunay daghang butang nga anaa sa imong phone nga nahimutang sa taas og kalidad nga mga kalihokan nga kinahanglan dili pasobraan (sama sa pagbasa sa YA Matag Semana, klaro kaayo), ang pagbuhat sa bisan unsa niini sa sobrang gidaghanon sa oras tingali dili makahatag nimo og balanse nga diyeta sa espirituwal. emosyonal, ug pisikal nga pag-alima nga imong gikinahanglan.
Siloti og gamay ang imong kaugalingon, duna pay mas maayong paagi sa paggamit sa imong phone. Ug ang mas maayo tingali magpasabot nga mas gamayng oras sa pagtan-aw sa screen.
2. Buhata Kini para sa Imong mga Tawo
Kinsa ang naghigugma kanimo? Pasiuna nga pasidaan: dili ang imong phone. Bisan og ang mga phone motugot nato sa pagkontak niadtong atong gihigugma, usahay ang paagi nato sa paggamit sa atong mga phone (nagbalda sa atong kaugalingon, naghulip sa face-to-face nga pagkontak, nagpaantos sa atong kaugalingon sa dili maayo nga pagkompara, ubp.) mas makapasakit imbes makatabang sa atong mga relasyon. Dili nato tugotan ang gidaghanon sa koneksiyon nga makabalda sa kalidad.
Ang mas daghan nga pagbiya sa imong phone moabli sa pultahan sa mas lawom, mas makatagbaw nga mga koneksiyon sa mga tawo nga anaa sa imong palibot.
3. Buhata Kini para sa Langit
Sa pagpadayon nianang pangutana nga "Kinsay naghigugma kanimo?": Ang Langitnong Amahan ug si Jesukristo segurado gyod! Apan ang Ilang mga mensahe para nimo dili motunga sa screen sa imong phone.
Hinuon, ang ilang mga mensahe—ang mas personal, mas gamhanan, ang makausab sa kinabuhi—motunga diha sa imong kasingkasing ug hunahuna ug kinabuhi pinaagi sa tabang sa Espiritu Santo. Mas dali kang makapaminaw nianang mga mensahe kon walay kanunay nga makalinga nga pagbalda gikan sa imong phone.
Si Presidente Russell M. Nelson miingon: “Mohangyo ko kaninyo nga ipatigbabaw ang Dios sa inyong kinabuhi. Hatagi Siya og patas nga bahin sa inyong panahon." Sa samang paagi, si Elder Ronald A. Rasband sa Korum sa Napulog Duha ka Apostoles mitambag, “Bisan unsa man ang anaa sa listahan sa inyong buluhaton, paghatag og patas nga oras, dili salin nga oras, ngadto sa Ginoo.”
Ang pagbaylo sa nanobrang oras sa phone alang sa parehas, patas nga bahin sa oras alang sa langit (sama sa pagtuon sa mga kasulatan, pagpaminaw sa nakasentro sa ebanghelyo nga musika, pag-ampo, pagpamalandong, ug pagtambong sa templo) makatabang sa pagpalawom sa imong relasyon ngadto sa Langitnong Amahan ug ni Jesukristo.
Unsaon gayod Nako Kini sa Pagbuhat?
Bisan kon naningkamot ka sa pagpahinay sa impluwensiya sa phone para sa imong kaugalingon, sa imong katawhan, sa imong Langitnong Amahan ug sa Manluluwas, o sa tanan nga anaa sa ibabaw, ang pag-undang sa sobra nga paggamit sa phone mahimong malisodgihapon! Sama sa ubang mga kinaiya, kinahanglan mobuhat ka og usa ka butang sa pag-undang sa naandan. Ania ang pipila ka ideya:
-
Hatagi og puluy-anan ang imong phone gawas sa imong bulsa. Kon dili nimo maabot ang imong phone sa mga panahon nga wala gayod nimo kini kinahanglana, dili ka maka-scroll niini nga walay tumong.
-
Pagmugna og mga dapit diin walay phone. Asa nimo masobrahan og gamit ang imong phone? Sa imong higdaanan? Sa kan-anan? Sa kaligoanan? Sulayi ang paghimo niining mga dapita ug mga oras nga walay phone. Ibilin ang imong phone sa lahi nga kwarto aron dili ka matintal sa paggamit niini atol niining mga panahona.
-
Pag-andam og makawala sa kalaay nga mga buluhaton. Kon magsulay ka sa paghunong sa naandan nga mga bati nga hunahuna, makatabang ang pagpuno sa imong pangisip sa maayong mga hunahuna. Parehas ra kini sa imong naandan nga mga kinaiya sa phone. Kon bation nimo nga ganahan ka nga mag-scroll og dugay, ikonsiderar kon duna bay laing makalingaw, mamugnaon, makaparelaks, o mabungahon nga mga kalihokan nga mopuno sa imong oras. Ablihi ang journal. Paghimo og origami nga tikling nga langgam. Paglakawlakaw. Bisan ang pagpili og taas og kalidad nga kalihokan sa imong phone, sama sa pagtawag og usa ka higala imbes nga magtan-aw og walay hunong nga mga reels, maoy usa ka maayong paagi sa pagsugod.
-
Pangayo sa Langitnong Amahan og piho nga mga ideya. Naghunahuna ka ba nga ang Dios walay pagpakabana sa usa ka tumong nga ingon niini ka gamay? Hunahunaa pag-usab. Nagpakabana siya sa imong matarong nga mga tumong. Ilabi na nga ang pagpamenos sa imong oras sa screen makatabang nimo a pagdugang sa imong espirituwal nga pagpaminaw. Mag-ampo kada adlaw alang sa mga ideya aron malimitahan ang imong oras para sa phone ug aron mahimong lig-on sa pagsunod sa imong mga plano. Ang Espiritu Santo makadasig nimo og mga ideya nga haom para nimo nga pihong makatabang kanimo.
-
Pagpakita og tulubagon ngadto sa laing tawo. Bisan unsa nga stratehiya ang imong pilion, ang regular nga pagreport sa imong kalamboan ngadto sa usa ka kapikas, roommate, o higala makatabang nimo sa pagpadayon sa imong plano. Mahimo gani nimo silang dapiton nga mosulay sa pagpalambo sa ilang kaugalingong mga kinaiya sa paggamit sa phone dungan nimo.
Ayaw og Hunong
Kon sulayan nimo ang bisan unsa niining mga butanga ug nakasulbad kini sa imong mga problema sa phone sa unang pagsulay, congratulations! Usab, ganahan kong makabaton og gamay nga bahin sa imong labaw pa sa tawo nga gahom, palihog. Apan kon mosulay ka, mapakyas, moduol sa Dios, ug maghimo og laing pasalig, angkona ang kahupay sa pagkahibalo nga ikaw nakadawat sa usa sa labing dako nga mga gasa sa Dios: ang paghinulsol.
Ang sobra nga paggamit sa imong phone dili sala, apan makamugna kini og mga sala sa pagkapakyas sa pagbuhat sa imong buluhaton sa kinabuhi kon imong mataligam-an ang mga butang nga maoy labing mahinungdanon. Si Presidente Nelson mitudlo:
“Ang paghinulsol mao ang yawe sa kalamboan. Ang lunsay nga hugot nga pagtuo maghimo nga makapadayon kita sa dalan sa pakigsaad.
“Palihog ayaw kahadlok o ilangay ang paghinulsol. Si Satanas mahimuot sa inyong kaalaotan. Putla kini. Isalikway ang iyang impluwensya sa inyong kinabuhi! Sugdi karon ang pagsinati sa kalipay sa pagsalikway sa kinaiyanhon nga pagkatawo."
Busa, paghinulsol! Sulayi pag-usab! Sugdi karong adlawa ang pag-usab sa imong mga kinaiya sa paggamit sa phone. Mopanalangin kini sa imong kinabuhi ug mohatag nimo og dugang oras aron mopanalangin niadtong anaa sa imong palibot.