Bililhong mga Gasa

Karong gabhiona, mamulong ko inubanan sa kalipay ug usab sa katingala sa sagradong kamahinungdanon sa Pasko. Walay panghitabo sa kasaysayan sa kalibotan nga adunay mas dakong epekto kaysa pagkatawo ug misyon ni Jesus sa Nazaret sobra sa duha ka libo ka tuig ang milabay. Sa tibuok moderno nga kalibotan, ang panahon gibase mismo niining milagrosong panghitabo.

Ang pagkatawo sa atong Ginoo gisaulog sa daghang lain-laing paagi sa tibuok kalibotan, apan adunay usa ka tradisyon sa Pasko nga daw nahimong alang sa tanan.

Kini nga tradisyon lagmit nagsugod sa asoy ni Mateo bahin sa mga tawo nga may kaalam gikan sa Sidlakan nga miadto aron sa pagsimba ni Jesus. Sa ilang pag-adto, nagdala sila og bililhon nga mga gasa. Karon, ang tradisyon sa paghatag og mga gasa nahimong mas dakong bahin sa mga kasaulogan sa Pasko.

Ang akong unang panumdoman bahin sa gasa sa Pasko mao ang nindot nga dulaan nga pusil-pusil nga motira og bala nga hinigtan og lambo, ug usa ka dulaan nga itik nga liso-lisoon ang kilid aron modagan. Nindot na kaayo kini alang sa kwatro anyos. Ang dulaan nga itik modagan nga magtuyok-tuyok sa salog ug dili kini magpabiling magbarog samtang mahinamon ko nga mopusil niini gikan sa unom ka pulgada (15.24 cm) ang gilay-on. Apan ang dulaan naguba dayon, ug sama sa tanang materyal nga mga butang, ang kalipay nga nahatag niini temporaryo lang ug daling hikalimtan.

Karong gabhiona, mosugyot ko og tulo ka gasa nga mahatag sa matag usa nato niining panahon sa Pasko, ug sa tibuok natong kinabuhi, nga dili maghatag og temporaryo nga kalipay, apan maghatag og tinuod ug malungtarong kalipay.

Ang una mao ang gasa sa pagpamatuod. Kini personal gayod nga gasa ug kon gawasnong ihatag, walay pagpanglimbong, mopadayag kini sa labing lawom nga mga pagpahayag sa atong kalag. Mas bililhon kaysa bulawan, insenso, o mira, ang putli nga pagpamatuod diha ni Jesukristo isip atong personal nga Manluluwas ug Manunubos mao ang labing sentro sa tanan nianang atong gisaulog sa Pasko.

Sa dihang ang among unom ka anak mga batan-on pa, si Jacqui ug ako nakadesisyon usa ka gabii nga alang sa family home evening, imbes magleksiyon, mopakigbahin lang kami og mga pagpamatuod sa usag usa. Human ako mipakigbahin sa akong pagpamatuod, ang among buotan nga anak nga si Chelsea, tingali 16 anyos nianang higayona, misulti nga ang iyang mga mata misiga, “Pa, wala pa ko kadungog sa imong pagpamatuod kaniadto!” Ingon og nakalitan ko, ug nahingangha ko sa iyang giingon. Nakita ninyo, nianang higayona presidente ko sa stake ug kahibalo ko nga si Chelsea nakadungog na nga mipamatuod ko sa daghang higayon diha sa simbahan ug sa panimalay. Apan nianang higayona, pareho niyang nadungog ug nabati ang akong pagpamatuod nga ingon og mao ang labing unang higayon. Gitudloan ko niya og leksiyon nga dili gayod nako makalimtan: ang gasa sa pagpamatuod bililhon ug adunay gahom sa pagpakigbahin niini kanunay.

Ikaduha ang gasa sa pagpasaylo. Segurado gayod nga kitang tanan sa pipila ka higayon napasakitan sa dili mabination nga mga pulong o mga binuhatan sa uban. Ug sa tinuoray lang, kita usab nakapasakit sa uban. Si Jesukristo nagtudlo nga “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo.” Dayon mihimo Siya gani og mas lig-on nga pamahayag ug nag-ingon nga kon mapakyas kita sa pagpasaylo sa uban sa ilang mga sala batok nato, ang mas dakong sala anaa kanato.

Kon kita gawasnon ug tinuoray nga mopasaylo sa uban, makalingkawas kita sa hilo sa kaligutgot, paghukom, o pagpanimalos.

Ako adunay minahal nga higala sa South Africa nga ginganlan og Sandile Makasi. Uban sa pagtugot, akong ipakigbahin ang iyang personal kaayo nga istorya sa pagpasaylo. Sa dihang si Sandile wala pa magduha ka tuig, ang iyang amahan, 28 anyos pa lang, gitortyur ug gipatay sa pulis atol sa brutal nga rehimen sa paglahi sa itom ug puti nga mga kaliwat. Kadugayan, nahibaloan ni Sandile ang dili maayong piho nga mga detalye sa makalilisang nga pagpatay sa iyang amahan. Karon akong kutloon ang iyang kaugalingong mga pulong:

“Atol sa akong sayong katuigan isip usa ka bata mibati ko og kaligutgot ug kasilag tungod sa ilang gihimo sa akong amahan. Nganong nahimo man nila nga kuhaon siya gikan kanamo? Gikawatan ko og usa ka amahan ug magtutudlo, ug ang akong inahan gikawatan og mahigugmaon ug mapinanggaon nga kapikas.

“Sa dihang akong nahibaloan ang bayolente nga paagi sa ilang pagtortyur niya, nakadugang kini sa akong kasingkasing ug hunahuna og grabe nga kasuko, kasilag, ug kalagot ngadto sa mga opisyales sa kapolisan ug ngadto sa puti nga mga tawo.

“Padayon nakong gihambin kini nga mga pagbati hangtod nga akong nakaplagan ang gipahiuli nga ebanghelyo ni Jesukristo. Ang ebanghelyo nakatabang nako nga makasabot nga kinahanglan ko nga mopasaylo sa mga opisyales sa kapolisan sa ilang mga krimen, ug nga ang akong kalipay ug espirituwal nga kalamboan magdepende niini.

“Sayon ra kining isulti kaysa buhaton, apan nagpadayon ko uban sa daghang pag-ampo, ug paglabay sa panahon ang Ginoo mitabang nako sa pagpasaylo sa akong mga kaaway …. Imbes kasakit, mibati ko og kahupayan; imbes kalagot ug kasilag, aduna koy gugma; imbes kangitngit sa akong kasingkasing ug hunahuna, aduna koy kahayag ug kalinaw.”

Salamat Sandile sa imong ehemplo sa paghatag og gasa sa pagpasaylo.

Ikatulo, ang gasa sa gugma nga sama ni Kristo. Sa tanang espirituwal nga mga gasa, walay` mas molabaw pa sa gugma nga putli. Si Jesus bukas nga mipahayag sa Iyang gugma alang sa uban ug Siya mitudlo nato sa paghigugma sa usag usa.

Kon sundon nato ang ehemplo sa Manluluwas pinaagi sa pagpahayag sa atong gugma alang sa uban pinaagi sa pulong ug sa buhat, niana sila makasinati sa gugma sa Dios pinaagi nato.

Pipila ka tuig ang milabay, nahimamat nako ang 23 anyos nga batan-ong lalaki nga nagpuyo sa Washington nga nindot nga ehemplo niini. Ang mga misyonaryo mitudlo niya sulod sa tulo ka bulan, ug nakasinati siya og talagsaong kausaban sa iyang panagway ug pamaagi sa iyang kinabuhi. Usa ka gabii nakig-istorya siya sa mga misyonaryo diha sa telepono, ug sa ilang pagtapos, sila miingon “Gihigugma ka namo, Michael.” Iyang gibutang ang telepono ug naghunahuna sa iyang kaugalingon, “Wow. Wala ko maanad niana. Pwede man diay ko mosulti niana ngadto sa uban.” Nakadesisyon siya nga magtinguha og kaisog sa pagsulti sa iyang inahan nga siya nahigugma kaniya. Nagpuyo siya mga pipila ka oras ang gilay-on sa laing bahin sa estado. Sa dihang mitawag siya sa iyang inahan ug miingon niya “Gihigugma ko ikaw, Ma,” mitubag siya dayon og “Unsay nahitabo nimo? Miadto ka ba sa doktor ug adunay dili maayong balita? Mobalik ka ba sa bilanggoan?” Mao nga, gisultihan niya ang iyang inahan nga nakaplagan niya ang ebanghelyo ug sa unsang paagi kini nakausab kaniya, ug nga karon mibiya na siya sa pagpanigarilyo ug sa paggamit og droga ug nga siya nagplano nga magpabunyag.

Sa akong hunahuna usa kini ka nindot nga paghulagway sa unsay mahitabo kon bation sa mga tawo ang gugma sa Dios pinaagi sa uban. Makalukmay kini sa mga kasingkasing ug dayon makamugna kini og tinguha nga ipakigbahin kana nga gasa sa gugma ngadto sa uban.

Karon, niining gabhiona, nagsugod kita sa pag-istorya mahitungod sa bililhong mga gasa pinaagi sa paghisgot og bulawan, insenso, ug mira. Akong gisusi; mapalit gani ninyo kana nga mga gasa sa Amazon. Apan dili ninyo makaplagan ang ubang mga gasa nga atong gihisgotan sa bisan asa nga tindahan. Mao kini ang mga gasa nga walay kantidad, apan maghatag kini og malungtaron ug tinuod nga kalipay ngadto sa tigdawat ug tighatag.

Mao nga, samtang maghunahuna kamo kon unsay ihatag karong Pasko, ako modapit ninyo nga:

1. Mopakigbahin sa inyong pagpamatuod ngadto sa pamilya ug niadtong inyong gihigugma. Samtang inyong ipakigbahin kining bililhon nga gasa, ang inyong kaugalingong pagpamatuod molig-on.

2. Mopasaylo sa usa ka tawo nga sa inyong pamati nakasala o nakapasakit ninyo. Sa paghatag niini nga gasa, kamo usab mobati og kalinaw ug pagkaayo.

3. Motabang sa uban nga bation ang gugma sa Dios pinaagi ninyo. Kon tukma, sultihi sila nga kamo nahigugma nila. Kon kamo motan-aw sa uban sama sa pagtan-aw sa Dios kanila, ang inyong gugma alang nila molambo, ug bation usab ninyo ang gugma sa Dios sa inyong kinabuhi.

Sa pagtapos, ako nanghinaot nga ang matag usa ninyo adunay usa ka panahon sa Pasko nga puno sa dakong kalipay. Ako mohatag sa akong pagsaksi bahin ni Jesus ang Kristo. Siya buhi. Siya ang atong Manluluwas, ang atong Manunubos. Siya ang atong Manlalaban ug Higala. Siya akong gisimba. Gihigugma nako Siya. Tungod sa Iyang gasa sa matag usa nato, gibayran og dili matugkad nga kantidad, kita mahimong takos sa pagdawat sa labing mahinungdanong gasa sa tanan—gani ang kinabuhing dayon diha sa presensya sa atong mahigugmaong Amahan sa Langit.

Sa ngalan ni Jesukristo, amen.