Pagkahimong Andam sa Pagsugat sa Manluluwas

Samtang misulod kita sa panahon sa Kapaskohan, ang akong hunahuna napaling ngadto niadtong tingali tua sa layo sa panimalay, lakip sa daghan kaayong misyonaryo nga karon nagserbisyo.

Ang una nakong Pasko nga layo sa panimalay mao ang pagkamisyonaryo sa England, Disyembre sa 1960. Nagserbisyo ko sa Swindon, England.

Among gibuksan ang Swindon para sa misyonaryo nga buhat mga 90 ka adlaw ang milabay. Nag-abang mi og usa ka kwarto alang sa mga miting sa Dominggo. Napanalanginan kami og pipila ka kinabig—ang sinugdanan sa usa ka branch.

Niadtong Gabii sa Pasko ang akong kompanyon, si Elder Noel Luke, ug ako mihukom nga mohimamat og mga tawo sa ilang mga balay sa dapit nga among giserbisyohan ug magbilin og mugbo nga mensahe sa pasko ug panalangin. Matahom kadto nga kagabhion, ug ang puno sa panganod nga langit dunay sanag nga buwan nga nagdan-ag sa pagmugna og langitnong pagbati. Sa kalit among naamgohan nga ang tanang kasilinganan dunay mga telebisyon nga nagsalida sa sikat nga komedyante ug singer, si Harry Secombe. Gikanta niya ang halandomong kanta nga “Bless This House.” Makatandog kaayo ang iyang pagkanta sa sagradong mga pulong, nga nag-ingon:

Panalangini ang mga tawo dinhi.

Himoa silang putli ug layo sa sala.

Panalangini kaming tanan

Haom, O Ginoo, nga Kanimo Makig-uban.

Ang iyang pagkanta mipaluha kanamo. Ang awit, naggikan hapit sa matag panimalay, milanog ngadto sa kapunawpunawan ug mipaubos og balik gikan sa kapanganoran. Si Elder Luke ug ako aduna niining hilabihan nga pagbati nga kami mga sinugo sa atong Ginoo ug Manluluwas, si Jesukristo, naningkamot sa pagserbisyo ug pagpanalangin sa mga anak sa atong Langitnong Amahan.

Isip misyonaryo akong nasabtan nga sa pagpuyo dinhi sa yuta tanan kita layo sa panimalay—sa atong langitnong panimalay. Ang paagi aron mobati sa kahupayan niana nga panimalay mao ang pagserbisyo sa atong Manluluwas.

Sa bag-ong katuigan, ang Simbahan nagdasig kanato sa paghatag og gibug-aton sa kahayag nga gihatag sa Manluluwas sa tibuok kalibotan, labi na atol niining Kapaskohan. Ang Simbahan dunay talagsaong paningkamot nga Dan-agi ang Kalibotan aron ipunting ang tanang hunahuna ngadto sa Manluluwas. Giubanan kini sa usa ka paningkamot sa paghatag ngadto sa nanginahanglan ug paghatag og Kristohanong serbisyo.

Sa milabayng tuig gisugdan sa Simbahan ang paningkamot nga Dan-agi ang Kalibotan gamit ang daghang digital nga display libot sa Times Square sa New York City.

Si Mary ug ako didto dihang ang makatandog nga paghulagway sa pagkatawo sa Manluluwas gihulagway didto sa higanteng digital nga mga billboard. Labihan ka-espirituwal kadto nga kasinatian. Karong tuiga ang kasinatian sa Times Square gihimo sa daghang siyudad latas sa kalibotan.

Samtang sa New York City, atol sa kalihokan nga Dan-agi ang Kalibotan, akong nabantayan ang paningkamot sa pagbutang og makahuloganong mga display sa mga bentana sa department store.

Akong nahinumdom sa edisyon sa New York Times nga adunay tibuok pahina nga artikulong giulohan og: “Holiday Windows Return [Ang Pagbalik sa mga Bentana sa Holiday]. Shoppers Do Too [Mao Usab ang mga Mamalitay].” Giasoy sa artikulo ang usa ka tradisyon diin adunay magarbong mga display nga inadornohang mga bentana sa department store sa Fifth Avenue sa New York City. Kutob sa akong matino gikan sa artikulo ug sa bag-o lang nakong pagbisita, wala nay usa niadtong mga bentana ang nagpakita og mga eksena sa Pasko o sa Bata nga si Jesus.

Dihang gibasa nako ang artikulo, akong nahinumdoman sa bata pa ko ang mga gipangbitay sa bentana sa Pasko sa mga department store sa Salt Lake City nga nagpunting sa bata nga si Kristo. Nakahinumdom sab ko og asoy niana nga panahon bahin sa shopping mall sa Midwest nga naghatag og gibug-aton sa tema sa Pasko sa pagmugna og pagbati sa Pasko ug pagdani sa mga mamalitay. Magbutang silag dagkong banner nga, “Kon si Kristo moabot karong gabii, kinsay Iyang adtoon?” Dunay daghang eksena nga gipakita sa mga bentana sa tindahan ilawom sa banner. Kon eksakto ang akong paghinumdom:

• Ang usa mao nga adunay babayeng tigulang sa higdaanan nga giatiman sa usa ka nurse. Makita nga luya kaayo siya.

• Ang ikaduha mao ang usa ka inahan nga may bag-ong natawo nga anak. Ang kalipay misanag sa iyang nawong.

• Ang ikatulong eksena nagpakita sa usa ka pamilya nga may mga batang naghilak. Klaro nga wala silay igong pagkaon, ug dunay diyotay ra kon duna may mga regalo sa Pasko.

• Ang ikaupat nga eksena nagpakita og pamilya nga klarong adunahan nga nag-abli og daghan kaayong mga gasa.

• Ang ikalimang eksena mao ang maanindot, apan kabos nga pamilya nga may daghang mga anak nga mahimayaong nanganta.

Samtang namalandong ko sa lima ka display ug sa banner nga, “Kon si Kristo moabot karong gabii, kinsay Iyang adtoon?”, duha ka hunahuna ang miabot kanako.

Una, nasayod kita nga kon moabot ang Manluluwas sa ikaduhang higayon, dili kita mahibalo unsang adlawa o unsang orasa.

Ikaduha, kon moabot si Jesukristo, sigon sa gitudlo ni Presidente Russell M. Nelson sa kinatibuk-ang komperensya, “[Siya] mobalik sa yuta isip ang Mesiyas sa Milenyum.” Aron maandam, mihangyo si Presidente Nelson nato, “Nga ipahinungod pag-usab ang [atong] kinabuhi ngadto ni Jesukristo.” Subay niini, mas tukma unta sa banner nga mag-ingon nga, “Kon si Kristo moabot karong gabii, kinsa ang andam nga mosugat Kaniya?”

Dihang akong girebyo ang mga eksena sa bentana, akong naamgohan nga ang tanang gisulti niini kanato mao ang mahitungod sa pisikal ug pinansiyal nga kondisyon sa katawhan, apan walay mahitungod sa espirituwal nga kondisyon. Ang mga display sa bentana nagpakita sa mga tawo nga tigulang na ug masakiton ingon man sa himsog ug sa bag-ong natawo. Aduna sab mga adunahan ug mga kabos. Apan ang edad, kahimsog, ug pinansiyal nga kahimtang wala maghisgot nato unsa gayoy importante, nga mao ang kahimtang sa ilang mga espiritu.

Sa Doktrina ug mga Pakigsaad atong mabasa ang mahitungod sa mga kwalipikasyon sa pagpabunyag sa Simbahan ni Kristo. Ang kriterya una magbase sa pagpaubos sa atong kaugalingon, pagkaadunay “masulob-ong kasingkasing ug mahinulsolong espiritu,” paghinulsol, ug “pagserbisyo ni [Jesukristo] hangtod sa kataposan.” Ang tumong mao ang pagkahimo nga “matinguhaong disipulo ni Jesukristo” ug paglambo sa dalan sa pakigsaad nga mag-andam kanato alang sa mga panalangin sa Iyang Pag-ula.

Si Kristo ang ehemplo sa tanang butang. Siya mipahayag, “Tan-awa ako ang kahayag; nagpakita ako og panig-ingnan alang kaninyo.” Kon atong tan-awon ang kahimtang sa atong mga espiritu, makaayo kanato ang pagtan-aw sa Iyang hingpit nga ehemplo. Ang Manluluwas mipakita kanato sa dalan sa pagkaplag og kalipay, kahulogan, ug kamaya niining kinabuhia ug sa kahangtoran. Ang Kalipay ug kamaya maoy kahulogan sa diwa sa Pasko.

Sa Juan 19:5 atong mabasa nga si Pilato midala ni Jesus sa atobangan niadtong gustong molansang Kaniya sa krus. “Gisul-oban Siya sa purongpurong nga mga sampinit ug sa kupo nga mapula. Ug si Pilato miingon kanila, Tan-awa, ania ra ang Tawo!”

Niini nga Kapaskohan tan-awon nato sa makadiyot ang Tawo, nga mao ang Kristo, ug ang mga gasa nga Iyang gihatag.

Una, atong ikonsiderar ang Iyang milagrosong pagkatawo.

Sayod kita nga kining bililhong bata nga atong gisaulog niini nga Kapaskohan mao ang bugtong Anak sa Amahan. Napanunod Niya ang gahom sa kinabuhing dayon gikan sa Iyang Amahan—ang gahom aron mabuhi. Ug napanunod Niya gikan sa Iyang mortal nga inahan ang gahom nga mamatay. Siya ang gipili sukad sa sinugdanan alang sa Iyang sagrado nga misyon.

Ang Mateo 1:23 mabasa nga, “Tan-awa, usa ka ulay magsabak ug manganak og usa ka bata nga lalaki, ug ang iyang ngalan tawgon ug Emmanuel, nga nagkahulogan, ang Dios uban kanato.”

Ikaduha, pamalandonga ang Iyang hingpit ug walay sala nga kinabuhi ug Iyang ehemplo. Bisan og nag-antos Siya sa mga sakit, mga kasakit, ug mga pagtintal sa matag matang, malamposon Niyang gituman ang Iyang misyon. Siya ang atong ehemplo ug mipahimutang sa dalan nga atong subayon. Iyang gigahin ang Iyang kinabuhi ngadto sa mga kabos, sa timawa, sa masakiton, ug sa mga gisakit, ug sa malamposong paghuman sa mahangtoron nga plano diin Siya lamang ang makasarang.

Ikatulo, mamalandong sa Iyang kamatayon, Pagkabanhaw, ug Pag-ula.

Mahitungod sa Pag-ula, ang Isangyaw ang Akong Ebanghelyo matahom ug yano nga mabasa: “Ang Pag-ula sa Manluluwas naglakip sa Iyang pag-antos sa Getsemani, sa Iyang pag-antos ug kamatayon didto sa krus, ug sa Iyang Pagkabanhaw. Nag-antos Siya lapas pa sa panabot—sa hilabihan nga miagas ang dugo sa matag lungag sa panit.”

Sa Doktrina ug mga Pakigsaad 76:41 atong mabasa: Nga siya mianhi sa kalibotan, gani si Jesus, aron ilansang sa krus alang sa kalibotan, ug mag-antos sa mga sala sa kalibotan, ug magbalaan sa kalibotan, ug sa paghugas niini gikan sa tanan nga dili matarong.”

Ang Pag-ula ni Jesukristo mao ang labing mahinungdanong hitabo ug gasa nga sukad nahitabo sa kasaysayan sa tawo. Tanan kita nakasala, ug pinaagi lamang sa Pag-ula ni Jesukristo nga kita makaangkon og kaluoy ug makapuyo uban sa Dios.

Ikaupat, mangandam alang sa Iyang Ikaduhang Pag-anhi.

Sa Daang Tugon, gitudlo ni Job nga “Siya motindog ibabaw sa yuta sa ulahing mga adlaw.” Sigon sa matahom nga pagkatudlo ni Presidente Russell M. Nelson, “Si [Kristo] modumala gikan sa karaang Jerusalem ug sa Bag-ong Jerusalem.” Karon ang panahon sa pag-andam alang niini nga kalihokan. Ang mga kasulatan nag-ingon: “Andama ang inyong kaugalingon alang sa mahinungdanon nga adlaw sa Ginoo.”

Ang akong kataposang tambag mao ang paghigugma ug pagserbsiyo sa Ginoo. Samtang mamalandong kita sa atong espirituhanong kahimtang ug sa atong preparasyon sa pagsugat sa Manluluwas, una kinahanglan kita nga, “Mohigugma sa Ginoo nga [atong] Dios sa tibuok [natong] kasingkasing, sa tibuok [natong] kalag ug sa tibuok [natong] hunahuna.” Ug ang ikaduha “Higugmaa ang imong isigkatawo sama sa imong kaugalingon.”

Ang atong gugma sa Dios ug sa atong isigkatawo, mao ang labing dako nga pagsulay sa kahimtang sa atong espiritu. Kon kita mohigugma sa Dios, kita mohupot sa Iyang mga sugo. Ug kon kita mohigugma sa atong isigkatawo, moserbisyo kita kanila ug labaw pa mamahimong mga kamot sa Manluluwas.

Sa Doktrina ug mga Pakigsaad, ang Manluluwas migamit niining mga pulong: “Oo, akong ablihan ang mga kasingkasing sa katawhan, ug … magtukod ako og simbahan pinaagi sa imong kamot.”

Ang labing una nga paagi nga atong ikapakita ang atong pasalamat sa Manluluwas niining Kapaskohan mao ang pagkahimong Iyang sulugoon—sa, dali nga pagkasulti mahimo nga Iyang mga kamot dinhi sa yuta.

Niining matahom nga panahon, kon magsaulog kita sa pagkatawo sa atong Ginoo, nga si Jesukristo, mopamatuod ko kaninyo nga Siya buhi. Siya ang atong Ehemplo, atong Tiglaban sa Amahan, ug Siya mituman sa tanan nga atong gikinahanglan aron makabalik kita sa Amahan ug sa presensya sa Anak. Magmaalamon kita sa pagsunod ni Jesukristo ug modawat sa mga gasa nga Iyang gihatag.

Hinaot nga makabaton kamo og mahimayaong Pasko nga nagsentro kang Jesukristo.

Sa ngalan ni Jesukristo, amen.