ʻOku Ou Tui
ʻI heʻeku hoko ko ha Tokotaha Tulí, ne u Ongoʻi Hangē ha Taha Mei Tuʻá. Ne u Toki Ongoʻi ʻOku Ou Kau ʻi he Siasí
Kuo akoʻi au ʻe heʻeku hoko ko ha mēmipa ʻo e Siasi ʻo e ʻEikí neongo pe ko e hā e ngaahi faingataʻa ʻoku tau fehangahangai mo iá, ʻe lava ke taki kitautolu ʻe he tui mo e falala kiate Iá ki he nongá, taumuʻá, mo e ongoʻi kau atú.
ʻI heʻeku tupu hake ko e tulí, naʻá ku faʻa ongoʻi taʻe-fakatokangaʻi mo ʻikai fetuʻutaki mo e māmani ʻokú ne ʻātakaiʻi aú, ʻo ʻikai fakapapauʻi pe ʻe faifaiange peá u maʻu ha feituʻu te u feʻunga moʻoni ai.
Neongo e ngaahi faingataʻá ni, ka naʻe ʻikai ke u fie foʻi. Naʻá ku tui naʻe lahi ange ʻa e ngaahi meʻa ʻi he moʻuí ʻi he ngaahi faingataʻa ne u fehangahangai mo iá, pea naʻá ku fakapapauʻi ke u kumi ia.
Ko hono Maʻu ʻo e Siasí
ʻI he ngaahi taʻu siʻi kuo hilí, naʻá ku fekumi ai ki ha taumuʻa ʻi he moʻuí peá u ʻiloʻi ai ha peesi Facebook naʻe ui ko e “ASL Followers of Jesus Christ in Washington, D.C.”
Kuo teʻeki ai ke u fanongo ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ka naʻá ku ʻosi ʻilo ʻa e Talanoa Fakaʻilonga Nima Faka-ʻAmeliká (ASL), pea naʻe ongo kiate au ha meʻa fekauʻaki mo e pēsí. Naʻá ku tohi ʻi he pēsí, pea naʻá ku ʻohoale, ʻi heʻeku maʻu ha talí. Naʻe fai mai ʻe he ongo faifekau fefine naʻá na fakalele ʻa e pēsí ha fehuʻi ʻe ua:
“Naʻe founga fēfē hoʻo maʻu kimauá?”
“Ko e hā ʻokú ke ʻilo fekauʻaki mo Sīsū Kalaisí?”
Naʻá ku tali moʻoni ange: ʻOku ʻikai haʻaku tui, ʻamanaki, pe ongoʻi haku mahuʻinga. Naʻe liliu ʻe he tali mei he ongo faifekau fefiné ʻa e meʻa kotoa pē. Naʻá na fakalotolahiʻi au ke u tokanga taha ke falala ki he Tamai Hēvaní mo Sīsū Kalaisi, mo palōmesi te Na tokoni mai ʻi hoku ngaahi faingataʻaʻiá. Neongo naʻá ku ʻuluaki fakataʻetaʻetui, ka naʻá ku ongoʻi ʻene malave ʻena ngaahi leá ʻiate aú.
ʻI heʻeku vakavakaiʻi ʻa e ongoongoleleí, naʻá ku fakatokangaʻi ai ko e moʻuí ko ha fononga foki ia ki he Tamai Hēvaní, ʻoku fonu ʻi he ngaahi fetōʻakí mo e ngaahi fehulunakí pea mo e afeafé. Ka ʻi he tui mo e ʻamanaki lelei ʻia Sīsū Kalaisí, te u lava ai ʻo fonongaʻia ʻa e halá ni mo maʻu e nongá mo e fiefiá (vakai, 1 Nīfai 17:13).
ʻI he ngaahi māhina siʻi hono hokó, naʻá ku ngāue ai mo e ongo faifekau sisitā ASL ʻi Uāsingatoni D.C., ʻo ako fekauʻaki mo e ongoongoleleí mo tupulaki ʻi heʻeku tuí. Naʻá ku maʻu lotu, kau ʻi he ngaahi ʻekitivitií, pea aʻu ʻo ʻeva ki he Temipale Uāsingatoni D.C. ʻi he lolotonga e ʻoupeni hausí. Ko e taimi naʻá ku fuofua hū ai ki he loki silesitialé, naʻá ku ongoʻi ha nonga mo ha tokamālie naʻe teʻeki ai ke u aʻusia kimuʻa.
ʻI he hoko atu ʻo ʻeku fonongá, ne u fehangahangai mo ha ngaahi faingataʻa mo ha ngaahi faingamālie foʻou. Naʻá ku hiki ki ha kolisi foʻou ʻi Niu ʻIoke, ʻa ia naʻe ʻikai ngata pē ʻi heʻeku fetaulaki ai mo ha ngaahi kaungāmeʻa foʻoú ka naʻe toe fakaloloto ange ai ʻeku tuí. ʻI he lolotonga ʻo e taimi ko ʻení, naʻá ku fili ai ke u papitaiso—ko ha fili naʻá ne liliu ʻeku moʻuí ke lelei ange.
Ko Hono Maʻu ʻa e Nongá mo e Ongoʻi Kau Atú
Ko e taimi naʻá ku kau ai ki he Siasí, naʻá ku ongoʻi ʻo hangē kuo fāifai peá u maʻu ʻa e feituʻu ke u ʻi aí.
Kuo hoko e ngaahi lea ʻa ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha fakamanatu maʻu pē ki he ʻamanaki ʻoku ou maʻu ʻi he taimi ní: “ʻOku fakapapauʻi ʻetau ʻamanaki lelei ki he moʻui taʻengatá ʻi he ʻaloʻofa ʻa Kalaisí mo ʻetau ngaahi filí.” ʻOku tokoni ʻa e ngaahi leá ni ke u ongoʻi fiemālie ʻoku ʻikai ke u tuēnoa pea ʻoku ʻomi ʻe he feilaulau ʻa Sīsū Kalaisí ha faingamālie ke u fakatomala ai pea foki ki heʻeku Tamai Hēvaní.
Neongo naʻá ku ongoʻi hangē ha taha ʻoku ʻikai kaú ʻi he konga lahi ʻo ʻeku moʻuí, ka naʻe ʻomi ʻe he Siasí ha ongoʻi ʻoku ou kau pea mo ha taumuʻa. Naʻá ku ʻilo ʻi heʻeku tui kia Sīsū Kalaisí, ko e fānau au ʻa e ʻOtuá, ʻoku taau ke u maʻu ʻa e ʻofá mo e fiefia taʻengatá. Ko e feituʻu naʻá ku ongoʻi fakamavaheʻi ai mo tuēnoá, kuó u ongoʻi ʻeni ai ha ongo moʻoni ʻoku ou kau, ʻi heʻeku ʻiloʻi ʻoku ʻikai ke u teitei tuēnoa, tatau ai pē pe ko e hā ʻa e ngaahi faingataʻa ʻoku ou fehangahangai mo iá.
Kapau te ke kei kumi pē ki he nongá, ke kau, pea mo e taumuʻa ki hoʻo moʻuí, ʻoku ou tapou atu ke ke fakahoko ʻa e ʻuluaki sitepu ʻi hoʻo fonongá ʻaki haʻo vakavakaiʻi ʻa e ongoongolelei ʻo Sīsū Kalaisí mo fakaloloto hoʻo tui kiate Iá.
ʻAi ke ke ʻilo ʻa e ʻamanaki lelei ʻoku maʻu mei hono pukepuke ho tuʻunga fakalangí. ʻIloʻi ʻoku ʻikai ke ke teitei tuēnoa—pea ʻe tokoni atu ʻa e Tamai Hēvaní mo Sīsū Kalaisi ʻi ho ngaahi faingataʻaʻiá.