ʻI he Taimi Naʻe ʻIkai Hoko ai ʻEku Palani Haohaoá, naʻe Tokoniʻi Au ʻe Kalaisi ke u Toe Kamata Foʻou

Ko e konga ʻo e moʻui haohaoa naʻá ku fakakaukau ki aí ko ha mali temipale fakafiefia. ʻI heʻeku fetaulaki mo hoku husepāniti naʻá ma iku ʻo malí, naʻá ma fakatou mālohi ʻi he Siasí, ko ia naʻá ma fakakaukau ʻe lelei ʻa e meʻa kotoa pē. Naʻe vave ʻema malí, ʻo ʻikai fai ha ngaahi fepōtalanoaʻaki mahuʻinga.

Hili ʻema malí, naʻá ne hoko ko ha tokotaha kehe ʻaupito mei he meʻa naʻá ku fakakaukau ki aí. Naʻá ne kei maʻulotu pē ka naʻá ne ngaohikovia fakaeloto au mo taʻefaitotonu ʻi ʻapi.

ʻI he taimi ko ʻení, naʻá ku maʻu ha fakamatala naʻe fakafepaki ki he Siasí pea naʻe maʻu au ʻe he loto-veiveiua mo e loto-ʻita ki he ongoongoleleí.

Naʻá ku fakapapau he ʻikai ke u toe ʻalu ki he lotú, lau ʻa e Tohi ʻa Molomoná, ʻalu ki he temipalé, pe toe talanoa mo ha taki lakanga fakataulaʻeiki. Kuó u fai ʻa e ngaahi meʻá ni kotoa ʻi he kotoa ʻo ʻeku moʻuí, pea vakai ange ā ki hono olá!

ʻOku ou ʻiloʻi ʻi he taimí ni naʻe faingofua ʻeku holomuí koeʻuhí naʻe fakatefito ʻeku fakamoʻoní ʻi heʻeku ngaahi fakaʻānaua ki heʻeku moʻuí, kae ʻikai ʻia Sīsū Kalaisi.

Naʻe ʻi ai ha meʻa faingataʻa ʻe ua ʻi heʻeku moʻuí naʻá ne ʻai ke u ʻiloʻi naʻe fiemaʻu ke u liliu.

ʻUluakí, ko e mālōlō haku kāinga ʻofeina. ʻI hono meʻafakaʻeikí, naʻá ku ongoʻi hono talamai ʻe he Laumālié kuo taimi ke u foki ki he lotú. Naʻe ʻikai ke u fie fai ia! Ka naʻá ku maʻu ha ongo mālohi naʻe talamai foki ʻe hoku kāingá ʻoku fiemaʻu ke u foki ki heʻeku tuí.

Uá, ʻi he hokohoko atu ʻo e ngaohikovia fakaelotó, naʻá ku takitaha maʻana leva mo hoku husepānití. Naʻá ku ongoʻi naʻe maluʻi au ʻe he kau ʻāngeló ʻi heʻema vete malí. Naʻá ku ʻohovale ʻi heʻeku mātā tonu ha ngaahi mana ʻi he taimi naʻá ku aʻusia ai ʻa e ngaahi meʻa kovi taha kuo hoko kiate aú.

Ko e fuofua taimi ia ʻi ha taimi lōloa, naʻá ku lotu ai ʻo fehuʻi ki he Tamai Hēvaní pe ko e hā ʻa e meʻa ʻokú Ne finangalo ke u faí, ʻo kole kiate Ia ke Ne fakahaofi au mei hoku loto-mafesifesí mo e ngaahi fili koví.

Pea ko e taimi ia naʻe faifai peá u fakatokangaʻi ai naʻe fiemaʻu ke u ʻiloʻi ʻa Sīsū Kalaisí.

Naʻe ʻikai faingofua ʻa e foki ki he lotú. ʻI he kamataʻangá, naʻá ku ongoʻi ʻoku ʻikai taau ke u ʻi ai.

Naʻá ku ongoʻi ʻa e founga hono fakamatalaʻi ʻe Sisitā Kilisitina M. Ī ko e Tokoni Ua ʻi he Kau Palesitenisī ʻo e Kau Fineʻofá ʻa ʻene feinga ke tā valivali ha fakatātā ʻo e Fakamoʻuí. ʻI heʻene fakakaukau kuo mōmoa ʻa e valí, naʻá ne vali ʻa e vānisí ʻi ʻolunga. Ka nae kei viviku pē ʻa e valí, pea naʻe palai ʻene fakatātaá ʻo tamatemate.

Naʻá ku ongoʻi ʻa e loto-mamahi tatau mo e siva ʻa e ʻamanakí ʻo hangē ko ʻene ongo ki heʻene tā valivalí—ʻo hangē he ʻikai lava ke toe fakaleleiʻí.

Ka naʻe talaange ʻe he faʻē ʻa Sisitā Ií, “‘He ʻikai te ke toe maʻu ʻa e meʻa naʻá ke maʻú, ka ke fai pē ʻa e lelei taha te ke lavá ʻaki ʻa e meʻa ʻokú ke maʻú.’”

Ko e meʻa ia ʻoku fai ʻe Sīsū Kalaisi mo kitautolu takitahá. Te Ne lava ʻo tokoniʻi kitautolu neongo pe ko e hā ʻa e tūkunga ʻoku tau ʻi aí mo tokoniʻi ke tau aʻusia ha meʻa fakaʻofoʻofa.

ʻI he fakahinohino mei heʻeku pīsopé, naʻe kamata ke u ako moʻoni fekauʻaki mo Sīsū Kalaisi. Naʻá ku ongoʻi hono akoʻi au ʻe he Fakamoʻuí ʻi he foʻi laka kotoa pē.

Naʻá ku ʻiloʻi ʻoku mamahi ʻa e tokotaha kotoa pē ʻi ha ngaahi founga kehekehe. Ka ʻe lava ke fakamoʻui kitautolu kotoa ʻe Sīsū Kalaisi—kau ai au mo hoku husepāniti kimuʻá.

ʻI heʻeku ako fekauʻaki mo e fakamolemole mo e ʻofa ʻoku maʻu ʻe hoku Fakamoʻuí maʻakú, naʻá ku loto ke u maʻu ia maʻaku, pea ʻi hono fakamoʻui aú, naʻe kamata foki ke u fakaʻamua ia maʻa hoku husepāniti kimuʻá. Hili ha ngaahi taimi, naʻá ku fakamolemoleʻi ia.

ʻI heʻeku foki ki he temipalé, naʻá ku ofo ʻi he ʻofa naʻá ku ongoʻí. Naʻá ku maʻu ha aʻusia kehe ʻaupito ʻi heʻeku ʻalu ki he temipalé maʻaku pea ke tokanga taha ki hoku Huhuʻí, kae ʻikai ko ha ʻalu fakamamata pē.

Kuo akoʻi mai ʻe he aʻusia ko ʻení kiate au, ʻoku moʻui ʻa Sīsū Kalaisi. ʻOkú ne hiki hake ʻa e loto-mafesifesí. ʻOkú Ne ʻafio mo e Tamai Hēvaní ki heʻetau ngaahi tangi ʻi he poʻulí ʻi he taimi ʻoku ʻikai ʻiloʻi ai ʻe ha taha ʻa e mamahi he ʻikai ke tau lava ʻo hao mei aí. ʻOkú Ne tatali maʻu pē kiate kitautolu ke tau foki kiate Ia.

Naʻe pehē foki ʻe Sisitā Ī, “Ko e mālohi huhuʻi ʻo Sīsū Kalaisí ko e taha ia ʻo e ngaahi tāpuaki maʻongoʻonga taha kuo talaʻofa mai ʻo ʻetau ngaahi fuakavá.”

Ko e hā pē ha meʻa te ke foua, tui mai ʻi heʻeku pehē ko e huhuʻi kitautolú ʻoku ʻikai ko ha ngataʻanga fakaʻofoʻofa ʻi ha talanoa fananga pē. ʻOku moʻoni ia. ʻE lava ke huhuʻi koe. Te ke lava ʻo toe fakafoki mai hoʻo tuí.

Ko e meʻa ʻeni ʻoku hoko ʻi he taimi ʻokú ke fakaʻatā kakato, moʻoni, mo loto-fiemālie ai ʻa Kalaisi ki hoʻo moʻuí.

Ko e meʻa ia kuó Ne fai maʻakú.