Kaveinga ʻo e Māhina Ní: Ko Hono Ngāueʻi ʻo e Ngaahi Vā Fetuʻutaki Fakafāmilí ʻi he Tokoni ʻa e Fakamoʻuí

Mālō e Lelei, ngaahi kaungāmeʻa.

ʻOkú ke ongoʻi fēfē ʻi he taimi ʻokú ke fakakaukau ai ki ho fāmilí? ʻOku ou ongoʻi ʻi he taimi pē ko iá ha ongo fakafiefia—ʻOku ou fakakaukau ki he fanga kiʻi fakakata fakaekimautolu peé, ngaahi fāʻofua fakamāfaná, nongá, mo e ʻofá.

Ka neongo ia, ʻoku faʻa ʻohake ʻe he ngaahi manatu melie ki hoku fāmilí ha ngaahi ongo ʻoku ʻikai fakafiefia, hangē ko e tēngihiá, mamahí, pe loto-ʻitá.

ʻOku ou haʻu mei ha fāmili kuo nau aʻusia ha ngaahi ʻaho fonu ʻi he kakata mo e fiefiá, mo ha ngaahi pō lōloa fonu ʻi he ngaahi palopalema makatuʻunga ʻi ha ngaahi taʻefemahinoʻaki ʻo aʻu ki he nunuʻa ʻo e maʻunimaá.

Ka neongo ia, kuo akoʻi lahi au ʻe ha ngaahi meʻa ʻi he māmani ko ʻení fekauʻaki mo e Fakamoʻuí mo ʻEne tākiekiná ʻo mahulu hake ʻi hoku ngaahi vā fakafāmilí. ʻI he kotoa ʻo e ngaahi taimi fakamamahi mo fakafiefia ʻo hoku fāmilí, kuó u ako ha meʻa lahi mei he kau mēmipa ʻi hoku fāmilí, tautefito ki he taimi naʻá ku fakafalala ai ki he Fakamoʻuí ke tokoni ke u fakamolemole, ke u kaungā ongoʻi, mo ʻofa ʻo hangē ko Iá.

Naʻe akoʻi kimuí ni ʻe Sisitā Tamala W. Lūnia ko e Tokoni ʻUluaki ʻi he Kau Palesitenisī Lahi ʻo e Kau Finemuí, “Neongo ʻoku ʻikai ke tau kau ki ha ngaahi fāmili haohaoa, ka te tau lava ʻo fakahaohaoaʻi ʻetau ʻofa ki he niʻihi kehé kae ʻoua leva ke hoko ia ko ha ʻofa taʻetūkua, taʻefeliliuaki, ʻo tatau ai pē ʻa e tūkungá—ʻa e faʻahinga ʻofa ʻokú ne poupouʻi ʻa e liliú pea fakaʻatā ke tau tupulaki pea toe foki [ki heʻetau Tamai Hēvaní].”

Kuó u mātā ʻa hono liliu ʻe he faʻahinga ʻofa ko ʻení—ʻa e ʻofa ʻa e Fakamoʻuí—ʻeku moʻuí pea mo e moʻui ʻa kinautolu ʻoku ou ʻofa taha aí.

Ko ha ngaahi fakamatala ʻeni ʻe niʻihi mei ha kakai lalahi kei talavou mo ha kau taki ʻi he māhiná ni, ʻa ia ʻoku nau ngāueʻi ʻenau ngaahi vā fakafāmilí, ʻo hangē ko koé:

• Faleʻi ki he teití mo e malí meia ʻEletā Giménez ʻo e Kau Fitungofulú

• Ko e ʻuhinga naʻe ueʻi ai ha faifekau mei ʻAositelēlia ke ne ʻaukai maʻa hono fāmilí—pea mo ʻenau ngoue hiná

• Ko e meʻa naʻe ako ʻe ha tokotaha lahi kei talavou mei Falanisē hili ʻene fakamolemoleʻi ha taha ʻi hono fāmili fakauōtí

• Ko e meʻa ʻe fā ke manatuʻi kapau ʻokú ke aʻusia ʻa e loto-hohaʻa ʻi he vā fetuʻutakí

ʻOku ʻi ai foki mo haʻatau ngaahi talanoa, ko ha konga ʻo ʻetau ngaahi talanoa hokohokó.

• ʻOku Ou Tui: Ko e vahevahe ʻe ha fefine ʻa e founga naʻe pau ai ke ne toe ngāueʻi ʻene tuí hili ʻa e holofa ʻa e tuʻunga moʻui naʻá ne fakaʻamuá.

• Maʻá e Ngaahi Faʻē ʻo ha Fānau Iiki: Ko e vahevahe ʻe ha faʻē feitama ʻa ʻene ngaahi fakakaukau ki he founga ʻe lava ke tokoniʻi ai kitautolu ʻe he Fakamoʻuí ke tau ikunaʻi ʻa e ngaahi tauhele ʻo hono fakafehoanaki ʻetau ngaahi faingataʻá ki he niʻihi kehé.

• Mei he Malaʻe ʻo e Ngāue Fakafaifekaú: Founga naʻe tafoki ai ha faifekau mei Mongokōlia ki he ngāue fakatemipalé mo e hisitōlia fakafāmilí ʻi he taimi naʻá ne puke ai ʻi he misioná

• Ko Hono Fakaʻaongaʻi ʻo e Tokāteline mo e Ngaahi Fuakavá ki Hoʻo Moʻuí: Tokoni ki hoʻo laukonga Haʻu, ʻo Muimui ʻIate Au fekauʻaki mo e meʻa ke fai kapau te ke maʻu ha fehuʻi kau ki he ongoongoleleí

ʻOku ʻafioʻi moʻoni ʻe he Fakamoʻuí ho tūkungá. Te Ne lava mo e Tamai Hēvaní ʻo tataki koe ʻi hoʻo ngāueʻi hoʻo ngaahi vā fetuʻutaki mahuʻinga tahá.

ʻOfa ke ke maʻu ha laukonga fiefia!

Chakell Wardleigh Herbert, YA Fakauiké Tokotaha Taki ʻi he Kau Tohí