Ngaahi Meʻa ʻe 4 ke Manatuʻi Kapau ʻOkú ke Aʻusia ʻa e Loto-Hohaʻa ʻi he Vā Fetuʻutakí

ʻOku ou manatuʻi ʻeku ongoʻi halaia ʻi hono lau ha ngaahi fakamatala ʻo haku ngaahi kaungāmeʻa ʻi he mītia fakasōsialé fekauʻaki mo ʻenau fakamaʻu teu malí. Naʻa nau faʻa pehē, “Ko e fehuʻi faingofua tahá pē ia!” “Naʻe ʻikai te u teitei veiveiua ko ia ʻa e tokotaha totonú!”

Naʻe pau ke u ako naʻe ʻikai ʻuhinga ʻa e fefaʻuhi mo e loto-hohaʻá, ʻoku ʻikai moʻoni ʻema feʻofaʻakí—pe naʻe ʻikai tataki kimaua ʻe he ʻOtuá.

Ko hono moʻoní, naʻe ʻikai mahuʻinga ia pe ko e hā ʻa e vave ʻo ʻema feʻofaʻakí pe ko e faingofua ʻo ʻema fai ʻa e fili ke malí. Ko e meʻa naʻe mahuʻingá ko e founga naʻá ma tupulaki fakataha ai ʻi he ngaahi taimi faingataʻá. Pea ʻi heʻeku vakai ki he ʻofa ʻa e tangata naʻá ma teu malí ʻiate au ʻi he taimi faingataʻa taha mo fakamafasia ʻo ʻeku moʻuí, naʻe fakapapauʻi mai ai ko e tokotaha totonú pē ia.

Ko e meʻa naʻá ne tokoniʻi au ke u laka ki muʻá ko e ako ke u ʻiloʻi ʻa e taimi ʻoku folofola mai ai ʻa e Laumālié kiate aú—pea mo e taimi naʻe fakatupu ai ʻe he loto-hohaʻá ha ngaahi fakakaukau ʻi hoku ʻatamaí. ʻI he taimi naʻá ku tailiili ai ʻi he teu mali mo hoku ʻofaʻangá, ko ha meʻa nai ia mei he ʻOtuá? Pe ko ʻeku ilifiá pē ia ʻaʻaku?

ʻOku pehē ʻi he Kalētia 5:22, “Ko e fua ʻo e Laumālié, ko e ʻofa, mo e fiefia, mo e melino, mo e kātaki fuoloa, mo e angavaivai, mo e angalelei, mo e tui.” ʻI heʻeku fakakaukau ki ha ngaahi taimi ʻi heʻeku moʻuí naʻe folofola mai ai ʻa e ʻOtuá kiate au ʻo fakafou ʻi Hono Laumālié, naʻe haʻu fakataha maʻu pē ia mo ha ngaahi ongo fakalotolahi, nonga, mo langaki moʻui. Naʻe ʻikai ke Ne teitei fakatupu haʻaku manavasiʻi pe hohaʻa.

Naʻá ku toe ʻiloʻi foki ko e ongo tailiilí ko ha fakaʻilonga angamaheni ia ʻo e loto-hohaʻá. Pea neongo ʻoku faʻa fakalongolongo mo ʻikai fakatokangaʻi ʻa e ngaahi ueʻi fakalaumālié, ka naʻe ʻilonga ʻaupito ʻeku loto-hohaʻá. ʻI heʻeku fakaʻaongaʻi ha ngaahi founga matuʻuaki ke mapuleʻi ʻaki ʻeku ngaahi fakakaukau hohaʻá, naʻá ku lava lelei ange ai ke fakanonga hoku ʻatamaí mo fakatokangaʻi ʻa e ngaahi ueʻi fakalongolongo mo e fakapapau ʻa e Laumālie Māʻoniʻoní.

Neongo naʻe faʻa hāhāmolofia ʻi he taimi ʻe niʻihi ʻa e ngaahi momeniti ko ia ʻo e nongá, ka naʻe tokoni hono lekooti kinautolú. Ko e taimi ʻe niʻihi naʻá ku fakapipiki ha kiʻi tohi ʻi heʻeku sioʻata ʻi falekaukaú mo ha potufolofola naʻá ne ʻomi ha fakafiemālie kiate au. Naʻá ku tohi ʻi he taimi ʻe niʻihi ʻi heʻeku tohinoá fekauʻaki mo ha ongoʻi nonga makehe naʻá ku maʻu hili ha lotu fakamātoato. Naʻá ma hiki foki mo e tangata naʻá ku teu mali mo iá, ha ngaahi foʻi vitiō ʻo ʻema ngaahi fepōtalanoaʻakí ʻi he taimi naʻá ma fakatou ongoʻi nonga ai ʻi he ʻamanaki ke ma malí. ʻI he taimi naʻá ku manavasiʻi aí, naʻá ma siofi fakataha ʻa e ʻū vitioó ke ma manatuʻi ʻa e founga naʻe tataki ai kimaua ʻe he ʻOtuá ki he tuʻunga naʻá ma ʻi aí.

ʻI he taimi naʻe kovi taha ai ʻeku loto-hohaʻá, ʻoku ou manatuʻi ʻeku ongoʻi hangē kuo liʻaki au ʻe he Tamai Hēvaní. Naʻá ku lau ʻa e folofolá, ʻalu ki he temipalé, ʻaukai, mo lotu, ka naʻá ku kei ongoʻi manavasiʻi pē. Ko e hā naʻe ʻikai lahi ange ai ʻEne tokoniʻi aú?

ʻI heʻeku manatu ki aí, ʻoku ou sio naʻá Ne tokoniʻi moʻoni au—ka naʻe faʻa fakafou ʻi he niʻihi kehé. Naʻá Ne tokoniʻi au ʻo fakafou ʻi ha pīsope poto ʻa ia naʻá ne fanongo mo fokotuʻu mai ke u talanoa ki ha tokotaha faifaleʻi ki he moʻui lelei fakaeʻatamaí. Naʻe tokoniʻi au ʻe he ʻOtuá ʻo fakafou ʻi heʻeku faifaleʻí, ʻa ia naʻá ne ʻomi ha fakakaukau fakapalofesinale mo akoʻi au ʻi ha ngaahi founga ke matuʻuaki. Naʻá ku maʻu kimui ange ha tokoni ʻo fakafou ʻi ha toketā naʻá ne faleʻi mai ke u ʻahiʻahiʻi ha faitoʻo ki heʻeku loto-hohaʻá.

Naʻe tokoniʻi foki au ʻe he ʻOtuá ʻo fakafou ʻi he kau mēmipa hoku fāmilí naʻa nau ʻiloʻi mo ʻofaʻi aú. ʻI heʻeku fetuʻutaki mo e tangata naʻá ma teu malí fekauʻaki mo ʻeku ongó, naʻá ku maʻu ha fiemālie ʻi heʻene loto-mahinó mo e poupoú foki. Pea naʻá ku maʻu ha fakafiemālie ʻi heʻeku ʻiloʻi naʻe ʻafioʻi lelei au ʻe hoku Fakamoʻuí pea naʻá Ne ʻi ai maʻaku ʻi hoku ngaahi momeniti faingataʻa tahá.

Neongo ʻa e ngaahi ueʻi fakalongolongo ʻo e fakapapaú, naʻe faʻa iku maʻu pē ʻeku loto-hohaʻá ke u fakaʻamua naʻá ku maʻu ha tali pau ange. Naʻá ku kei lotua pē ʻe ava hake ʻa e ngaahi langí pea ʻe ʻomi ʻe he ʻOtuá ha fakaʻilonga mahino ko e tangata ʻokú ma teu malí ʻa e tokotaha totonu ke mali mo iá.

Ka naʻe ʻikai ke hoko ia.

Naʻá ku ʻiloʻi naʻe falala mai ʻa e ʻOtuá ke u fakahoko ʻa e filí. Neongo ʻeku fiemaʻu ke Ne talamai pē ʻa e meʻa ke faí, ka naʻe makatuʻunga pē ʻiate au ʻa e filí.

Naʻe vahevahe ʻe Palesiteni Tōmasi S. Monisoni ʻa e faleʻi ko ʻení: “Fili e taha ke ke ʻofa aí; peá ke ʻofa he taha kuó ke filí.”

Ko e ikuʻangá, naʻá ku fili ke mali mo e tangata naʻá ma teu malí. Naʻe silaʻi kimaua ʻi he temipalé ʻi ha ʻaho fakaʻofoʻofa ʻi he faʻahitaʻu māfaná.

Kiʻi fakatokangá: Naʻe ʻikai mole leva ʻeku loto-hohaʻá.

Naʻe hokohoko atu ʻeku talanoa mo ʻeku faifaleʻí, folo ʻeku foʻiʻakaú, fekumi ki ha fakahinohino fakalaumālie, mo talanoa mo hoku husepānití fekauʻaki mo ʻeku ngaahi polé. Pea hili ha ngaahi taimi, naʻá ku ongoʻi sai ange.

ʻOku ou manako ki he ngaahi lea ko ʻeni meia ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻI he taimi ʻokú mo nofomaʻu faivelenga ai mo ho malí ʻi he hala ʻo e fuakavá, te mo maʻu ha tokoni fakalangi ke faʻu ʻa e nofo-mali ʻokú mo ʻamanaki atu ki aí.”

Kuó u mali mo hoku husepānití ʻi he taʻu ʻeni ʻe nima. ʻOku ʻikai haohaoa ʻa e moʻuí, ka ʻokú ma fiefia ʻaupito. ʻOku ou houngaʻia ʻaupito ʻi heʻeku fili ke u ngāue ʻi he tui neongo ʻeku loto-hohaʻá.

Kapau ʻokú ke aʻusia ʻa e loto-hohaʻa ʻi he vā fetuʻutakí, tafoki ki he ʻEikí, fakahinohino fakaepalōfitá, ko hoʻo kau taki ʻi he Siasí, pea kapau ʻe fiemaʻu, ko ha ngaahi maʻuʻanga tokoni fakapalōfesinale ke maʻu ha tokoni. He ʻikai liʻaki koe ʻe he Tamai Hēvaní. Te Ne tataki koe. ʻI hoʻo feinga ke muimui kiate Iá, te Ne ʻoatu ʻa e loto-lahi ke ke falala ki ho tuʻunga malava ke fakahoko ha ngaahi fili ʻoku leleí.