Kaveinga ʻo e Māhina Ní: Moʻui Lelei Fakaʻatamaí

Hei, ʻe kau laukonga fakaofo.

ʻUluakí, ʻoku mau ʻofa atu, ʻoku ʻofa ʻa e Fakamoʻuí kiate koe, pea ʻoku ou fakatauange ʻokú ke ongoʻi ʻa e ʻofa ko iá ʻi hoʻo lau ʻa e makasini ko ʻení.

Kapau ʻokú ke lau ʻeni, pau pē ko e tangata koe, ʻa ia ʻoku pau kuó ke ʻosi foua ha meʻa faingataʻa ʻi ha taimi pe ʻi ha toe taimi kehe.

ʻI he tuʻunga ko iá, ta ʻoku pau ʻe ʻi ai ha faʻahinga meʻa ʻi he makasini ʻo e māhina ní ʻe fekauʻaki mo koe—he ko e taha kotoa pē ʻi he māmaní ʻokú ne foua ʻa e loto-mamahí, ngaahi ʻahiʻahí, manavasiʻí, pea toe lahi ange. Ko e tuʻunga fakaʻatamai palopalemaʻiá ʻokú ne fakafōtunga mai ha ngaahi ngaahi palopalema ʻoku ʻosi hoko, pea ʻoku ʻafioʻi lelei ʻe he Fakamoʻuí ʻa e ngaahi uesia ʻe lava ke hoko ʻi he kakaí.

Ko e taha au ʻo ha kakai tokolahi ʻoku fefaʻuhi mo e fokoutua fakaʻatamaí, pea neongo ʻoku faingataʻa, ka kuo akoʻi au ʻe he meʻa ʻoku hoko kiate aú ko e tafoki ki he Fakamoʻuí ko e konga mahuʻinga taha ia ʻo ha faʻahinga founga fakaakeake. Te Ne lava ʻo tokoniʻi kitautolu, tautautefito ʻi he taimi ʻoku tau fakaʻaongaʻi ai ʻa e ngaahi meʻangāue fakalaumālie mo fakatuʻasino ʻoku lava ke tau maʻú.

Tatau ai pē pe ko e hā ʻokú ke fefaʻuhi mo iá, ʻe hanga ʻe he tafoki kiate Ia mo fakakaukauʻi moʻoni ʻa e meʻa ʻokú Ne finangalo ke ke faí, ʻo ʻomai ha ʻamanaki lelei mo ha ivi ke ke laka ki muʻa. Kuo taʻefaʻalaua haʻaku mamata tonu ki he mālohi ʻokú Ne foaki kiate kitautolú.

Ko ha ngaahi fakamatala ʻeni ʻe niʻihi ʻoku ʻoatu ʻi he makasini ʻo e māhina ní:

• Ko ha ngaahi fehuʻi mo ha ngaahi tali fekauʻaki mo e tuʻunga moʻui lelei fakaʻatamaí.

• Faleʻi fekauʻaki mo e lōngonoá mo e fakalaulaulotó (meditation)

• Ko ha talanoa mei ha taautaha kei talavou ʻi Kānata ʻoku fefaʻuhi mo e loto-hohaʻa ʻo hangē ʻoku tōmui ʻi he moʻuí

• Ko e founga ʻa ha taha faleʻi ke tokoni ki he kau faifekaú ke nau teuteu pea mo tauhi ʻenau tuʻunga fakaʻatamaí ʻi he lolotonga ʻenau ngāué.

ʻOku ʻi ai foki mo haʻatau ngaahi talanoa, ko ha konga ʻo ʻetau ngaahi talanoa hokohokó.

• ʻOku ou Tui: Founga hono maʻu ʻe ha taautaha kei talavou naʻe fekumi ki ha kakai ʻa e ongoongolelei ʻo Sīsū Kalaisí ʻi ha kulupu he Facebook ki he kakai fakafoʻituitui ʻoku tulí

• Maʻá e Ngaahi Faʻē ʻa e Fānau Īkí: Ngaahi fakakaukau mei ha faʻē ki he founga ʻoku ʻiate kitautolu maʻu ai pē ʻa e ʻEikí, ʻo aʻu pē ki he tuʻuapoó

• Mei he Malaʻe Ngāue Fakafaifekaú: Faleʻi mei he kau faifekau lolotongá ʻi he ngaahi founga ʻe lava ke teuteu ai e kau faifekau he kahaʻú ke ngāué

• Ko Hono Fakaʻaongaʻi ʻo e Tokāteline mo e Ngaahi Fuakavá ki Hoʻo Moʻuí: Tokoni ki hoʻo ako ʻo e Haʻu, ʻo Muimui ʻIate Aú fekauʻaki mo e founga ʻe lava ke hoko ai ʻa e ngaahi faingataʻá ʻo lelei kiate kitautolu ʻi he taimi ʻoku tau fekumi ai ki he maama ʻa e ʻEikí

ʻOku ʻofa ʻa e Tamai Hēvaní mo Sīsū Kalaisi ʻiate koe, pea neongo ʻa e ngaahi faingataʻa te tau ala fehangahangai mo iá, ka ʻoku fakatupu moʻoni kitautolu ke tau maʻu ʻa e fiefiá.

ʻAi ke ke saiʻia ʻi hoʻo laukongá!

Trent Hortin, Taha Ako Ngāue Fakaʻilekitulōnika ʻi he Liahona