Mateuteu ki he Uí: Faleʻi mei he Kau Faifekaú ʻi he Teuteu ke Ngāué

Pehē ange mai ne u feinga ke ʻiloʻi moʻoni ʻa Kalaisi kimuʻa peá u toki ngāue fakafaifekaú. Ko hono moʻoní naʻá ku ʻosi ʻilo fekauʻaki mo Ia—naʻá ku tupu hake ʻo lau ʻiate au pē pea mo hoku fāmilí ʻa e ngaahi folofola ʻe fā ʻoku fakaʻaongaʻi ʻe he Siasí. Naʻá ku ʻiloʻi ʻa e ngaahi talanoa ʻo Sīsuú mo e ngaahi potufolofola fakataukei fakatokāteliné. ʻOku ou houngaʻia ʻi he ʻilo fakalaumālie ko ia naʻá ku fāifeinga ke maʻu ʻi he kotoa ʻo ʻeku moʻuí. Ka ʻo kapau te u lava ʻo liliu ha meʻa ʻe taha naʻá ku fai ʻi he ngaahi māhina kimuʻa peá u ngāue fakafaifekaú, te u foki ʻo feinga ke ʻiloʻi ʻa e Fakamoʻuí.

Naʻá Ne talaʻofa tonu mai, “Kumi, pea te mou ʻilo” (Mātiu 7:7). ʻI heʻetau fekumi kia Sīsū Kalaisí, te tau lava ʻo maʻu Ia ʻi he Tohi ʻa Molomoná, ʻi he temipalé, ʻi he sākalamēnití, pea ʻi he fanga kiʻi founga iiki mo faingofua lahi fau. Kuó u mamata ki ha ngaahi mana lahi ange ʻi heʻeku ngāue fakafaifekaú ʻo laka ange ʻi ha toe taimi kimuʻa ʻi heʻeku moʻuí, pea ʻoku ou tui ko hono ʻuhingá he ʻoku ou mamata mo fakafetaʻi lahi ange ki he ʻOtuá ʻo lahi ange ʻi ha toe taimi kimuʻa.

Sisitā Julia Collings, Misiona Hamburg Germany

Naʻá ku kau ʻi ha kalasi teuteu ngāue fakafaifekau ʻi hoku uōtí, ke teuteu ki heʻeku ngāue fakafaifekaú. Naʻa mau lau ʻa e Malanga ʻAki ʻEku Ongoongoleleí mo talanoa ki he founga ʻe fakaʻaongaʻi ai hono ngaahi tefitoʻi moʻoní.

ʻIkai ngata aí, naʻá ku fakapapauʻi ke lau ʻa e Tohi ʻa Molomoná ʻi he ʻaho kotoa! Naʻá ku toe tuku foki ha taimi ʻi he uike takitaha ke ako ai ʻa e Tohi Tapú, ʻo tautautefito kia Mātiu, Maʻake, Luke, mo Sione. Naʻá ku loto ke fakapapauʻi naʻe ʻi ai haʻaku fakamoʻoni ki he ngaahi moʻoni ʻo e ongoongoleleí ʻa ia te u akoʻí pea mo maʻu ha fakavaʻe fakafolofola ke akoʻi kinautolu.

ʻEletā Rickard DeMille, Misiona Orem Utah

Ko e ongo founga mahuʻinga taha ʻo ʻeku teuteu ki heʻeku ngāue fakafaifekaú ko e akó mo e ngāue tokoní. Naʻá ku lau ʻa e Tohi ʻa Molomoná ʻi he ʻaho kotoa pē, ʻo faivelenga ange ʻi he tuʻunga naʻá ku ʻi aí, pea mo feinga ke ʻilo ʻa e ngaahi meʻa ʻoku fekauʻaki mo ʻeku moʻuí. Naʻe hangē naʻe fakapatonu mai kiate au ʻa e ngaahi pōpoaki ʻi he ngaahi potufolofola ko iá, pea ko e feituʻu ia naʻá ku ʻilo ai e lahi ʻo ʻeku fiemaʻu e Fakalelei ʻa Sīsū Kalaisí mo e lahi ʻo ʻEne finangalo ke foaki mai Hono mālohí. Ko hono fakaʻaongaʻi ʻo e folofolá ʻoku fiemaʻu ke ako fakahoko mo ngāue mālohi, ka kuo hoko ia ko ha tāpuaki taʻengata kiate au.

Hokó, ko e ngāue tokoní. ʻI he taʻu kotoa pē, ʻoku tō ai ha ngaahi afā ʻi he ngaahi kolo matāfanga ʻi Folōlitá, USA. ʻOku fakatupu ʻe he matangí mo e tāfeá ha maumau lahi ʻi he ngaahi ʻapí, pea ʻoku faʻa fuʻu faingataʻa mo fakamole lahi ki he kakai ʻi he ngaahi feituʻu ko iá ke maʻu ʻa e ngaahi tokoni fakavavevave ʻoku nau fiemaʻú. ʻI hoku taʻu 12, naʻe ʻikai mahino kiate au e ʻuhinga ne mau fakaʻaongaʻi ai ha fakaʻosinga uike ke fetuku holo ʻa e ngaahi vaʻa ʻo e ʻakaú. Ko e meʻa ne u ʻilo ʻi heʻeku fakahoko ʻeni ʻi he taʻú takitaha, ko e lahi ʻo e fiefia ʻe lava ke maʻu ʻi he ngāue mālohi ʻi he fetokoniʻakí. ʻOku ou kei fienga pē ke angaʻofa lahi ange, ka ʻoku ou ʻilo kapau ʻoku fiemaʻu ke u ʻofa lahi ange ki ha taha, ko e meʻa pē ʻoku fiemaʻu ke u faí ko e tokoni kiate kinautolu!

ʻEletā Joseph Lowry, Misiona Orem Utah

ʻOku ʻi ai ha fanga kiʻi founga faingofua siʻi ke teuteu ai ki he ngāue fakafaifekaú. ʻUluakí, ʻoku ou fokotuʻu atu ke ke lau mo ako kakato ʻa e vahe 3 ʻi he Malanga ʻAki ʻEku Ongoongoleleí. Kapau kuó ke ʻosi ʻiloʻi ʻa e meʻa te ke akoʻí kimuʻa peá ke toki ʻalu ki he malaʻe ngāue fakafaifekaú, te ke lava ʻo tokanga lahi ange ki he founga ke akoʻi ʻaki ai ia ʻi he Laumālié.

Te u toe fokotuʻu atu foki ke maʻu ho ʻenitaumení mo toutou ʻalu maʻu pē ki he temipalé ʻi he lahi taha te ke lavá. ʻOku tokoniʻi kitautolu ʻe he temipalé ke tau pukepuke ha fakakaukau ʻoku taʻengatá pea mo lava ʻo tokoni ke ke tokanga taha kia Sīsū Kalaisi.

Ko e founga fakaʻosi te u fie fokotuʻu atu ʻi he teuteu ki he ngāue fakafaifekaú ko hano lau mo ʻiloʻi e Tohi ʻa Molomoná. ʻE hoko ia ko e meʻa ngāue maʻongoʻonga taha ke fakafehokotaki ai koe mo e niʻihi kehé kia Sīsū Kalaisi ʻi hoʻo ngāue fakafaifekaú pea mo e toenga hoʻo moʻuí!

ʻEletā Rugby Taylor, Misiona Everett Washington

ʻOku mahuʻinga ke fakalahi hoʻo ʻilo e ongoongoleleí, ka ʻe toe fiemaʻu foki ke ke teuteu hoʻo taukei feohi mo e kakaí, ke ke mateuteu ki he ngāue fakafaifekaú. ʻOku ou fie fokotuʻu atu ke ke kamata mavahe mei he feituʻu ʻokú ke fiemālie aí ʻaki haʻo feohi mo e kakaí. Feinga ke talanoa mo e kakai ʻoku ʻikai ke ke faʻa angamaheni ke talanoa ki aí.

Naʻá ku ako ta ko hono akoʻi ʻo e ongoongoleleí ʻoku fiemaʻu ai ʻa e ngaahi taukei feohi mo e kakaí. Ko e ngaahi taukei fakasōsiale te ke fakatupulaki mo fakamālohia ʻi hoʻo ngāue fakafaifekaú ko e ngaahi taukei ia te ne tokoniʻi koe ʻi haʻo ngāue maʻuʻanga moʻui ʻi he kahaʻú, ʻi he teití, ʻi he akó, pea ʻi hoʻo feohi mo e niʻihi kehé!

ʻEletā Emerson Taylor, Misiona Manchester New Hampshire