Mai le Misiona
Ina ua ou Ma’i Tele ma Lē Mafai Ona Faia Le Galuega Faafaifeautalai, Sa Ou Faia Ai Loa Galuega o Talafa’asolopito o Aiga
A o ou galue i talafaasolopito o aiga mo o’u tua’a ua maliliu, sa ou vaaia foi faamanuiaga mo lo’u aiga o loo soifua.
Ou te manatua le aso na omai ai ni alii se toalua i ofutino papa’e ma fusiua i lo’u fale. Sa filifili lo’u tina e faataga i la’ua i totonu, ma sa la a’oa’oina i matou i le talalelei a Iesu Keriso. Na liliu mai lo’u aiga atoa i le Ekalesia.
Ae o le avea ma se tagata o le ekalesia i Monokolia sa faigata ona o le faa-Kerisiano sa fai lava si fou i lo’u nuu. Sa ou feagai ma le tele o luitau ma faaosoosoga. O le mea e faafetai ai, sa i ai pea iina lo’u aiga, ma uunaia a’u e ola i le talalelei.
I lena taimi, ou te le’i iloaina faigata o le a ou feagai ai i se aso—po o le auala o le a fesoasoani ai lo’u aiga i itu uma e lua o le veli ia te a’u i se aso e onosaia ai taimi faigata.
O Le Vavega o le Galuega o Talafaasolopito o Aiga
A o ou auauna atu i se misiona, sa amata ona ou maua ni faafitauli ogaoga o le soifua maloloina, e aofia ai le tiga faaumiumi o ponaivi. Sa faamautinoa mai e lo’u peresitene o le misiona ia te a’u o a’u o se faifeautalai lelei ma tuuina mai ia te a’u le filifiliga e toe foi atu ai i le fale e toe saili malosi, ae ou te lei manao e alu. Sa ou teena se sikolasipi maoa’e i taaloga ina ia mafai ai ona ou auauna atu, ma sa tele naua mea sa ositaulagaina e lo’u aiga e fesoasoani ai ia te a’u e totogi la’u misiona. Sa ou lē iloa po o le a le mea a fai
A o tauivi ma lenei filifiliga, sa matuai ogaoga lava o’u tiga. Sa ou taoto i le moega mo aso e tolu ona sa le mafai ona ou tu. Sa ou manao e faaauau pea ona ou auauna atu, o lea sa ou faaaluina ai na itula i le moega e fai ai galuega o talafaasolopito o aiga. Sa amata ona ou auina atu igoa fou o aiga i lo’u tamā ma le tagata tomai faapitoa o talafaasolopito o aiga i le fale.
I se tasi aso, sa ou maua ai se valaau mai le tagata tomai faapitoa o talafaasolopito o aiga i la’u uarota, ma sa ia ta’u mai ia te a’u ua faamaonia ma faatinoina sauniga o matua o o’u matua matutua i le malumalu! Sa leai ni malumalu i Monokolia, o lea o se vavega le vave ona tupu o lenei mea. Sa o’o mai le Agaga i o’u luga, ma sa ou filifili ai i lena lava taimi o le a ou nofo pea i la’u misiona.
Sa ou oso ese mai le moega, tapa atu i la’u soa, ma fai atu, “Ta o e a’oa’o!” Sa faateia o ia ina ua vaai mai ia te a’u ua ou tu i luga. E na o le lima minute na muamua atu, sa pei ai a’u o se tagata oti—sa tau le mafai ona ou tu i luga e ‘ai pe inu. Ae faafuasei lava, sa matua’i itiiti lava o’u tiga pe a faatusatusa i lo’u manao e fesoasoani i isi ia maua lo latou faatuatua ia Keriso. Sa ou iloaina e tatau ona ma o e faasoa atu le talalelei ina ia mafai ai e isi ona a’oa’o pe faapefea foi ona fesoasoani i o latou aiga.
Na saunoa mai Elder Gerrit W. Gong o le Korama a Aposetolo e Toasefululua: “O le fesootai atu i o tatou tua’a e mafai ona suia ai o tatou olaga i ni auala e ofo ai. Mai faigata ma mea na latou ausia, tatou te maua ai le faatuatua ma le malosi.”
Na suia lo’u olaga a o ou maua le malosi mai ia Iesu Keriso e ala i le faia ia maua e isi sauniga faaola o Lana talalelei mo isi e auala atu i le galuega o talafaasolopito o aiga. O Lona mana na mafai ai ona ou faamaeaina la’u misiona.
Malosi I Itu Uma e Lua o le Veli
I ni nai tausaga mulimuli ane, na maliu ai lo’u tamā. Sa le toaga o ia i le Ekalesia i le taimi o lona soifuaga, o lea na amata ai ona ou galue i le faamae’aina o ona sauniga o le malumalu. O la’u molimau i le fuafuaga o le faaolataga ma le galuega o talafaasolopito o aiga ua aumaia ai ia te a’u le mafanafana auā ou te iloa o le a ou toe feiloai i lo’u tamā i se aso. Pe a ou oo atu i ai, ou te manao e ta’u atu ia te ia sa ou faia mea uma ou te mafaia ina ia mafai ai ona faatasia lo matou aiga.
O le taimi nei ua i ai la’u lava avā ma la’u fanau. Tatou te faamalolosia o tatou aiga i le lalolagi e ala i le faamalolosia o o tatou aiga i le isi itu o le veli.
Na ta’u mai e Peresitene Russel M. Nelson: “A o i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. O loo i ai se uunaiga faamamaina i luga o i latou o loo faia lea galuega. O loo latou fesoasoani moni lava e faaeaina o latou aiga.”
O le faia faatasi o galuega o talafaasolopito o aiga ua faatumauina ai le totonugalemu o lo’u aiga ia Keriso. E fiafia tele la’u fanau e valaau atu i tau’aiga e a’oa’o atili e uiga i o latou olaga, ona fiafia ai foi lea o aiga! Ua matou lagona le lotogatasi ma feso’ota’i ma o matou aiga lautele uma, o loo soifua ma e ua maliliu.
I tusitusiga paia, o loo i ai se tala e uiga i se fafine mativa ua oti lana tane e na o le lua tupe iti sa mafai ona tuuina atu i le faleteuoloa, ae o tagata mauoa o loo siomia ai o ia e foai atu ituaiga uma o oa. Ua a’oa’o e le Alii Ona so’o e faapea, o le foai a le fafine ua oti lana tane e sili atu lona tāua: “auā o i latou uma, ua latou lafo nisi mea mai a latou mea ua tele; ao ia ua mativa ua ia lafo ana mea uma sa ia te ia.” (Mareko 12:44).
O le galuega o talafaasolopito o aiga e faia e lo’u aiga e laitiiti pe a e mafaufau i tagata uma e le’i mae’a a latou galuega. Ae ou te iloa o le a faitauina e le Tama Faalelagi a tatou taumafaiga o se mea e tāua tele pe a tatou faia mea uma tatou te mafaia e faamalolosia ai lo tatou aiga i itu uma e lua o le veli.