E Faapefea E Le Lagonaina o le Alofa o le Atua Ona Suia Lau Auala e Tafao Faamasani Ai

I le taimi aupito maualalo o lo’u olaga, sa ou faia ai se tatalo faatauanau i le Tama Faalelagi. Sa ou maua se tali sa faate’ia ai: “Ou te manao ia e talia Lo’u alofa.”

Sa faafuasei lava ma loloto lo’u iloa o Lona alofa. Sa siomia uma ai a’u!

Mulimuli ane, a o ou faitau i tusitusiga paia e uiga i le alofa mama ma le alofa mama o Keriso, sa ou oo mai i se malamalamaaga fou: “Afai e le ia te outou le alofa mama, o ni mea noa outou” (Moronae 7:46). I lena taimi, na ou iloa ai e tatau ona ou maua ma faasoa atu le alofa o le Atua.

Afai e te iloa moni lava ua alofagia oe e le Atua, atonu e mafai ona e alu atu i se tafaoga faamasani e aunoa ma le popole. Atonu ua i ai lou saogalemu sili atu i le iloaina ua uma ona alofagia oe. Nai lo o le tafafao faamasani ona o le fefe po o le le mautonu, atonu e te lagona le avanoa faalelagona e faamasani atu i se tasi.

O le lagonaina o le alofagia e mafai ona fesoasoani ia te oe e suia ai le auala e te tafafao faamasani ai. O lenei mea e mafai ona fesoasoani ia te oe e suia mai se uiga manatu faapito o le “Ou te popole pe faapefea o’u lagona ona o oe” i se uiga alofa, ma taumafai ia iloa le isi, lea e faapea atu ai “Ou te popole i ou lagona.”

Pe o e iloa le eseesega i le va o nei uiga e lua?

O le alofa o le Atua o le a aumaia ai le mautinoa, filemu, ma le manino i le lalolagi e masani ona faigata ma le fenumiai o tafaoga faamasani. O se tagata e faatumulia i le alofa o le Atua o le a sili atu ona mafai ona faamasani ia i latou o loo latou tafafao faamasani.

O le faasoaina atu o le alofa fa’aKeriso atonu o se mea uiga ese i le taimi muamua—o le toatele o talavou matutua e faamoemoe e iloiloina i latou i tafaoga faamasani, ae le vave ona alofagia ma taliaina. O nisi e talitonu e tatau ona latou maua le alofa ma le tulaga taliaina, lea e faia ai lena alofa ma le taliaina o ni tuutuuga ma fefaatauaiga.

Ae na foafoaina oe e avea ma se tagata e taliaina ma foai atu le alofa.

Na a’oa’o mai Elder Patrick Kearon o le Korama a Aposetolo e Toasefululua: “Sa faamalumalu lo tatou Tama agaalofa i le Foafoaga o lenei lava lalolagi mo le faamoemoega faapitoa, o le tuuina mai o se avanoa mo oe ma mo a’u … ia faaaoga ai lo tatou faitalia mai le Atua e filifili ai o Ia, e aoao, e tuputupu a’e, e fai ai ni mea sese, e salamo, e alofa i le Atua ma o tatou tuaoi, ma toe foi atu ai i se aso i le aiga, ia te Ia.”

Tatou te “filifilia o Ia” pe a tatou faasoa atu Lona alofa.

O lea la ua e iloa nei le mana o le faia o tafaoga faamasani faatasi ma le alofa faaKeriso. Afai o lo’o e tau mafaufau pe faafefea ona faia lenei mea, o nisi nei o auala aoga e amata ai:

• Faaalia le fiafia moni ma faalogo i mea e fai mai ai le o lua tafafao faamasani.

• Faailoa atu le agaga faafetai mo le naunautaiga o le o lua tafafao faamasani e feiloai ma faaalu se taimi faatasi.

• Ia agalelei ma faaaloalo i le taimi atoa o le lua tafaoga faamasani.

• Ia i ai se manao e atiina ae le alofa mama mo isi ma tatalo mo se fesoasoani ina ia “faatumulia outou i lenei alofa” (Moronae 7:48).

• Ia faamaoni i tulaga e uiga ia te oe. E itiiti ni mea e fesoasoani i le alofa e tuputupu ae ma atiina ae, e sili atu nai lo le tulaga moni. E le faapea la o le a masua uma atu tala’aga o lou olaga atoa i so’o se tasi o le a faalogo, ae ta’u atu le mea moni e uiga ia te oe lava pe a maua le avanoa. Aua le pepelo e uiga i le fiafia i le sushi pe afai e te inoino i ai, pe faafoliga o loo to’afilemu ae o lo’o e popole, pe fa’aalia oe o se tasi lea e le o oe lena. O le faamaoni e tosina mai ai le faamaoni. O le alofa faalelagi o le a tuuina atu ia te oe le lototele ia e avea oe lava ma ou lou lava tagata moni.

Na a’oa’o mai Elder Ulisses Soares o le Korama a Aposetolo e Toasefululua: “O se tasi o faailoga iloga faapea ua tatou latalata atili i le Faaola ma avea atili e faapei o Ia o le ala alofa, onosai, ma le agalelei tatou te taulima ai o tatou uso a tagata, po o a lava tulaga o i ai.”

A o e faateleina lou tomai e lagona ai le alofa ma le alofa mama ia te oe lava ia ma isi, o le a avea oe ma se soo sili atu ona lelei o Iesu Keriso. O le a taumasuasua lou alofa, ma o le a faailogaina au fegalegaleaiga i le alofa faaKeriso.