O Se Tusi ia i Latou o loo Tauivi e Faamagalo Atu

Uo Pelē,

O le lagonaina o le tiga po o le ita e foliga mai o se aafiaga lautele. E masani ona fai mai pe faia e tagata o loo siomia i tatou ni mea tatou te lagona ai le ita, le amanaiaina, le fiafia, ta’u faatauvaaina, pe le talisapaia.

I le tele o tausaga ua mavae, sa ou tiga ai i se tasi i le lotu. Sa ou ita ma lē fiafia, ma sa ou manao i lena tagata e faatoese mai, ae latou te lei faia lava. Sa ou taumafai e faagalo le mea na tupu, ma le manatu o le a mou ese atu le tiga ma le ita sa ou lagonaina.

Ae sa ou tauaveina na lagona o le ita mo le tele o tausaga. O le ita na ou lagonaina i lenei tagata sa musu e alu ese.

I se tasi aso sa ou talanoa ai i se uo e uiga i lenei tulaga. Na oo mai se manatu i lo’u loto:

Faamagalo atu.

Sa uunaia au e le Agaga e faamagalo lenei tagata sa ou matua ita ai lava. Sa ou maofa!

E faapefea ona ou faamagaloina lenei tagata? O au lea na manu’a, o lea sa tatau ai ona talosagaina a’u mo se faamagaloga, a ea?

Sa ou tauivi ma lenei taamilosaga mo ni nai tausaga. Ae peitai, sa ou mafaufau loloto i le faataitaiga a lo’u Faaola ma Ana aoaoga e uiga i le faamagalo atu:

“Aua afai tou te faamagaloina atu tagata i a latou agasala, e faamagaloina foi outou e lo outou Tama o i le lagi:

“Ae afai tou te le faamagalo atu i tagata i a latou agasala o le a le faamagaloina foi e lo outou Tamā a outou agasala” (Mataio 6:14–15).

E oo lava i luga o le satauro, sa augani atu le Faaola i Lona Tama e faamagalo fitafita na faasatauroina o Ia (tagai Luka 23:34).

Na uunaia i tatou e Peresitene Russell M. Nelson ia “faaaoga le lotomaualalo, lototele, ma le malosi e manaomia uma e faamagalo atu ai ma saili ai le faamagaloga.”

“… Afai e foliga mai e le mafai ona faamagalo atu, aioi atu mo le mana e ala i le toto togiola o Iesu Keriso e fesoasoani ia te oe.”

Faatasi ai ma nei mea uma i lo’u mafaufau, sa ou tatalo soo ai. Sa ou tatalo i lo’u Tama Faalelagi, ma fai atu, “Afai o Lou finagalo ou te faamagalo atu i lenei tagata, tatala faitotoa ma fesoasoani ia te au ia tupu, aua e le o ia te au le malosi e faia ai e au lava ia.”

O le aso na sosoo ai i le lotu, sa ou faafesagai ai ma le tagata na faatiga ia te au. I le taialaina ai e le Agaga, sa ou lagona ai e tatau ona ou ole atu ia i latou mo se faamagaloga. Sa ou faatoese atu ona sa le’i avea au ma se uo lelei i nisi taimi ma fesili atu pe mafai ona la faamagaloina au. Sa latou faia, ma o le taui sa latou ole mai ai ia te au mo se faamagaloga mo mea sa latou faia. Sa ou faamagaloina i latou.

Sa ou tuua lena aafiaga ma le mapusaga. E lei mou ese uma o’u lagona tiga i le taimi e tasi, ae sa ou maua se lagona lelei. Sa ou saoloto mai le tiga ma le faanoanoa lea sa mafatia ai au mo se taimi umi lava. E mafai ona ou agai i luma ma le filemu.

O nisi taimi e foliga mai e le mafai ona faamagalo atu. Ae o le pipiimau i le ita e na o le tiga atili ai lava o i tatou. E le finagalo le Tama Faalelagi ia tatou mafatia pea i tiga, faanoanoaga, ma le ita lea na totogiina faapelepele e Iesu ina ia tatou saoloto mai ai. Ona e alofa o Ia ia i tatou, e finagalo o Ia ia tatou lagona le olioli.

La’u uo e, faamolemole ia e naunau e lafoai avega o loo e pipiimau i ai. Tuu atu i le Faaola ma tuu atu Lona alofa i lou olaga. Aua le filifili e faaauau pea ona tiga. Filifili o Ia.

Na molimau mai Sister Kristin M. Yee, Fesoasoani Lua i le Au Peresitene Aoao o le Aualofa: “E manaomia e le Alii i tatou ia faamagalo atu mo lo tatou lava lelei. Ae e le o poloai mai o Ia e faia e aunoa ma Lana fesoasoani, Lona alofa, ma Lona silafia. O a tatou feagaiga ma le Alii, e mafai ai ona tofu maua e i tatou le mana faamalosi, taitaiga, ma le fesoasoani tatou te manaomia e faamagalo atu ai ma faamagaloina ai.”

Lau uo pele, e alofagia tele oe. Atonu o le a le foliga mai lou ala i le faamagaloga e pei ona sa ou faia. Ae ona o i tatou uma o fanau a le Atua ma e alofagia tele, o le a Ia tausia i tatou taitoatasi, e tusa ai ma o tatou manaoga taitoatasi. O le a Ia faaali mai ia i tatou le ala o le faamalologa, e tusa lava pe umi se taimi e alu ai.

Ou te faamoemoe o loo e sailia le faamagaloga e matua manaomia lava e lou agaga. Ou te faamoemoe ua fesoasoani a’u upu ia te outou, ae o le mea e sili ona taua, ou te faamoemoe ua molimau mai le Agaga ia te outou i le upumoni e faapea, e mafai e le Faaola ona aumaia ia i tatou le filemu, toomaga, ma le atoatoa.

Alofa atu,

O lau uo,