Faaaogaina o le Mataupu Faavae ma Feagaiga i Lou Olaga
O Le A Se Mea e Tatau Ona Ou Faia Pe Afai Ua Ou “Lē Mautonu” i se Fesili o le Talalelei?
E ala i le filifili ia onosai i mea tatou te le’i malamalama i ai, ua tatou faatagaina ai le Agaga e suia o tatou loto.
E tusa lava po o le a lou atamai, o le a mautinoa lava lou o’o atu i mea e te le malamalama i ai.
O se faafitauli faigata o le matematika. O se fuaitau tusitusia mafiafia. O le mafua’aga o loo pa’o ese mai ai lau taavale. E faifaipea lea lisi.
O nisi taimi, faatasi ai ma sina galuega, e mafai ona e iloa ai. Ae o nisi taimi, e lagonaina ai e pei o le tele o lou eliina ma tui le fesili, o le itiiti foi lena o lou malamalama. O le taimi lena e te lagona ai le lē mautonu moni lava.
Pe na tupu ea lena mea ia te oe i le talalelei? Atonu o se aoaoga faavae o loo e tauivi ai, po o se faiga faavaē lea e le talafeagai ia te oe, po o se mea moni foi o lou lava olaga lena e foliga mai e le fetaui ma mea e te iloa e uiga i le Atua ma Lana fuafuaga. O nisi taimi o se manatu e foliga mai e faigata tele ona mafaufau i ai pe taliaina. E pei o se meaai lapo’a tele lea ua le mafai ona folo.
O le mea tonu lava lea na feagai ma nisi o tagata o le Ekalesia ina ua latou mauaina le faaaliga na tuuina mai i le Mataupu Faavae ma Feagaiga 76 e uiga i tikeri o le mamalu. O le toatele o i latou na ola a’e ma se manatu uliuli-ma-pa’epa’e o le lagi ma seoli. Ia i latou, o le manatu e toetoe lava o tagata uma o le a toetutu mai i se malo o le mamalu sa foliga mai e lē talafeagai. E le’i fetaui ma lo latou manatu e uiga i le natura o le Atua. E oo lava ia Polika Iaga sa tauivi ma le faaaliga ona “sa fete’enai tonu lava ma o gatusa ma [ana] aoaoga muamua” ma “sa fesootai ma [ona] lava lagona.”
O le Fetaulaiga Ala o se Fesili
Pe a tatou “lē mautonu” i se fesili o le talalelei, ua tatou o’o atu i se fetaulaiga ala i lo tatou faatuatua.
Mo nisi o na uluai Au Paia, o le faaaliga sa avea o se tulaga na tumu ai le fua. E pei o soo o le Faaola o e sa le mafai ona onosaia le faalogo atu i “se upu faigata,” sa latou “toe foi i tua, ae e le’i toe feoai i latou ma ia” (Ioane 6:60, 66).
Ae peita’i o e na mua’i lē mautonu, na oo ina talia ma le olioli lenei malamalamaaga fou. O le a la se mea na faia ai le eseesega? Aisea na faamalepeina ai e lenei faaaliga le faatuatua o nisi tagata ae faamalolosia ai le faatuatua o isi?
E mafua uma mai lava i le auala na filifili ai na tagata e tali atu ai pe a luitauina lo latou malamalama faaleagaga. Ina ua ia faatoa faalogo e uiga i le faaaliga, sa fai mai Polika Iaga, “Faatali teisi. Ou te lei teenaina; ae sa le mafai ona ou malamalama i ai.” E ala i le tatalo, suesue, ma filifili ia onosai i mea na te le’i malamalama i ai, sa ia faatagaina ai le Agaga e suia lona loto ma molimau atu i le upumoni.
I le Tusi a Mamona, na faatusatusa ai e Alema le afioga a le Atua i se fatu. Pe a tatou mauaina lenei fatu i o tatou loto, e mafai ona tatou filifili a le o le “tia’ia i fafo i lo [tatou] le talitonu” po o le faatali teisi, e pei o Polika Iaga, ma vaai “pe o se fatu moni, po o se fatu lelei” (Alema 32:28). Ua folafola mai e Alema afai tatou te faatinoina lo tatou faatuatua ma faatalitali, ona ola lea o le fatu i totonu ia i tatou ma “faalauteleina ai [o tatou] agaga,” “faamalamalamaina ai [lo tatou] malamalamaaga,” ma “suamalie” ia i tatou.
O le aafiaga lenei o le toatele o le Au Paia faamaoni o e na filifili e saili le taitaiga a le Alii. Na faamatalaina e Polika Iaga le ala ina ua mavae le tele o le mafaufau loloto ma tatalo, na iu lava na ia “iloaina ma malamalama atoatoa i ai mo ia lava.” I se faataitaiga atoatoa o a’oa’oga a Moronae i le Eteru 12:6, sa ia mauaina ai se molimau ina ua mavae le tofotofoina o lona faatuatua.
“Ia Outou Ole Atu, ona Foaiina Mai Ai Lea ia te Outou.”
Na tautino mai e le Faaola, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou” (Mataio 7:7). E le tau lava o se fautuaga atamai lenei mea; o se poloaiga a le Alii, ma e o mai faatasi ma se folafolaga mautinoa o le a Ia tali mai.
O lenei poloaiga ma poloaiga talitutusa faapea o loo tā’ua soo i tusitusiga paia. O loo valaaulia pea lava pea i tatou e le Alii e aumai a tatou fesili sili ona faigata ia te Ia. Na te le poloaiina i tatou e talia tauaso mea e le mafai ona tatou malamalama i ai. A o tatou faia ma le onosai ma le faatuatua ma faaauau pea ona auauna atu i le Alii, ua Ia folafola mai e “faaali atu i ai mealilo uma, … e oo i mea ofoofogia o le faavavau” (Mataupu Faavae ma Feagaiga 76:7–8).
Ia te a’u lava ia, e i ai ni a’u fesili tetele ou te le’i maua lava ni tali, e tusa lava pe ua mavae le tele o tausaga o tatalo ma sailiga faamaoni. Ae e leai so’u manatu o le uiga o lena mea ua lē amanaiaina e le Atua lo’u tu’itu’i atu. Ua mafai ona ou vaai atu i Lona malamalama e ala i le va itiiti o le faitotoa. Ua mafai ona ou lagonaina o Ia faatasi ma a’u, o faasoaina atu le avega pe a mamafa tele e tauave na o a’u.
A o faaauau pea ona ou ole atu, saili, ma tu’itu’i atu, e mafai ona ou lagonaina lena fatu laitiiti ua amata totogo a’e i lo’u loto. O a’u fesili e fāloina ai a’u, o nisi taimi e tiga, ae o lena mea e aumaia ai ia te a’u le tele o avanoa e tuputupu ae ai—i le malamalama, i le poto, i le faatuatua, i le latalata atu i lo’u Tama oi le Lagi. Ou te lē o maua uma tali, ae ou te le o lagonaina le lē mautonu. Ou te lagonaina le faamoemoe i le “fiafia lelei o le loto [o le Alii],” ma ou te faamoemoe pe a ou saunia, o le a Ia tuuina mai ia te a’u “lenei avanoa o le vaai ma le iloaina mo [au lava ia]” (Mataupu Faavae ma Feagaiga 76:7, 117).