Mai le AM Faalevaiaso
O Lo’u Malamalamaaga Faafuase’i e uiga i le Avea ma So’o i se Aiga E Lē Toa’aga i le Lotu
O le avea ma se so’o o Iesu Keriso e sili atu ona faatatau i le alofa atu i isi nai lo le taumafai e suia i latou.
A o tuputupu a’e, sa faigata le tulaga o le va nonofo ai i totonu o lo’u aiga. E oo ane i le taimi na ou alu ese atu ai mo la’u misiona, sa na o i ma’ua ma lo’u tina tagata sa toa’aga i le Ekalesia.
Ina ua maea la’u misiona, sa ou lagonaina e pei o lo’u tiutetauave le fesoasoani i lo’u tama ma o’u uso e toalua ia toe maua lo latou faatuatua. Sa ou manatu o le a pei lava o le a’oa’oina o tagata ese lea na o’u fetaui ma feiloa’i i ai a o avea a’u ma se faifeautalai.
E sili atu nai lo se isi lava taimi, sa ou faamoemoe ai e fesoasoani i lo’u aiga ia lagona le olioli sa ou lagonaina mai le ola ai i le talalelei. Ma o le mea sa sili ona taua, sa ou faamoemoe ia mafai ona faamauina i matou o se aiga i le malumalu, o se mea sa ou mo’omo’o i ai talu mai lo’u laitiiti.
Nai lo lena, sa matua faigata sootaga i totonu o lo’u aiga. Sa faatumulia lo’u aiga i finauga a o tumau pea le lē ausia o o’u faamoemoega ma o faatusatusaga sa ou faia agai i isi aiga na faatupuina ai lagona o le tausalaina. Sa ou fetaiai ma lagona lofituina o le lē agavaa, ma sa vave ona faailoa mai e uo ma tagata o lo’u aiga a’u mea sese aemaise i lo’u tulaga o se faifeautalai ua mae’a le misiona.
Sa le mafai ona ou iloa pe na faapefea ona fesoasoani la’u auaunaga faamaoni i lo’u aiga. Pe sa ou faia ea se mea sese?
Alofa Fa’aKeriso
Ina ua mavae sina taimi o tauivi ma lenei mataupu, sa ou maua se malamalamaaga faafuase’i e uiga i le avea ma so’o. Sa ou iloaina o le talalelei e sili atu nai lo le na o le aumaia o tagata e auai i le lotu; ae e faatatau i le faamalolosia o sootaga ma le faaalia o le alofa fa’aKeriso. O lenei suiga i le vaaiga e le faapea ai ua ou fiu—nai lo lena, sa ou filifili e taula’i atu i le alofa.
Na saunoa mai Sister Tamara W. Runia, Fesoasoani Muamua i le Au Peresitene Aoao o Tamaitai Talavou, “E ui e le atoatoa o tatou aiga, ae e mafai ona tatou faaatoatoaina lo tatou alofa mo isi seia oo ina avea ma se alofa tumau, e le masuia, e tusa lava po o le a le ituaiga o alofa—o le ituaiga alofa lea e lagolagoina le suiga ma faatagaina ai le tuputupu a’e ma le toe foi mai.”
Sa ou iloa e i ai se mea e tatau ona suia. Nai lo le taumafai atu i lo’u aiga ia ola i le talalelei, sa ou taulai atu i le alofa ma le faamalosia o la’u sootaga ma i latou. Sa ou filifili e alofa ia i latou e le ona o mea sa latou faia pe na le faia, ae ona sa na ona ou manao lava e faaali atu le alofa mama mo i latou e sili ona ou alofa i ai i lenei lalolagi.
Fesili e Le’i Taliina
E ui lava i lenei suiga i le mafaufau, e tele lava a’u fesili e le’i taliina e uiga i le auala o le a foliga mai ai le faavavau mo lo’u aiga. O a’u o se tagata e fuafua lelei mea uma, ma sa lagona le fefe i le le iloa pe o le a faapefea le lumana’i.
O se tasi o mea na aumaia ia te a’u le mafanafana o la’u molimau i le fuafuaga o le faaolataga. E ui lava e le mafai ona ou vaai i le lumanai, ae o le Atua—o le e atamai atoatoa, alofa, ma alofa mutimutivale—e mafaia. E ui lava o lo’o i ai pea a’u fesili e uiga i le auala tonu e galulue ma sologa lelei ai mea, ae ou te iloa o le a sologa lelei mea uma.
Na fautua mai Elder Dale G. Renlund o le Korama a Aposetolo e Toasefululua, “E mafai ona tatou taumafai e taofiofi a tatou fesili e uiga i le pe faapefea ma le pe o afea mo se taimi mulimuli ane ae taulai atu i le atina’eina o le faatuatua ia Iesu Keriso, o Ia o i ai le mana e faasa’o ai mea uma ma matuai naunau e faia. E le mafai ona ou faamatalaina le fiafia ma le mama o le loto, lea e oo mai i le tuuina atu o o’u le mautonu ma faanoanoaga uma i le Faaola.
Ua ou iloa “o mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.” Ou te talitonu o le fuafuaga a le Atua e atoatoa, ma talu ai o i tatou o Ana fanau, e finagalo o Ia ia tatou fiafia. E leai se mea na aumaia ia te a’u le olioli ma le saogalemu sili atu nai lo le ola ai i le talalelei a Iesu Keriso.
Ma e leai se mea sa sili atu na faatagaina ai a’u e faatumulia lo’u loto i le alofa moni mo lo’u aiga ma uo nai lo le mulimuli ia te Ia.