Mai le AM Faalevaiaso
O Mea e 4 e Tatau Ona E Manatua Pe Afai O E Feagai ma le Popole i le Mafutaga
Na ou iloa e ui lava sa ou fefe, ae na faatuatuaina a’u e le Atua e faia le filifiliga e faaipoipo.
E le o le lagona lenei sa ou manatu e i ai i le tulaga o le faamau e sauni ai mo se faaipoipoga.
O la’u uo sa amiotonu, agavaa, ma agalelei. Sa ma mafaufau ma le agaga tatalo le faaiuga e faaipoipo. Ae tusa lava po o le a le mea na ou faia, sa le mafai ona ou aveesea se lagona popole tele.
“Ae faapefea pe afai o ia o le tagata sese mo a’u?” Sa ou mafaufau ai. “Ae faapefea pe afai ou te faaleagaina le fuafuaga a le Tama Faalelagi mo a’u e ala i le faia o se filifiliga sese?”
O nisi aso o le lagona popole sa pei o se maa tele sa taotaomia ai a’u ma sa le mafai ona ou alu ese mai ai.
Afai o le faaipoipo atu i la’u uo o le mea tonu lea, aisea na ou lagona ai faapea? Pe o tau ta’u mai e le Atua ia te a’u e lē tatau ona ou faaipoipo iā te ia?
Na iu lava ina ou iloa o lo’o ou feagai ma le popole i le mafutaga, lea na faigata ai ona lagona le filemu e uiga i la’u filifiliga. Afai e mafai ona ou toe fo’i i tua ma talanoa i lo’u tagata popole, ma o se sa faamauina i lena taimi, o nisi nei o mea o le a ou fa’asoa atu i ai.
O tala uma o le alofa e eseese, ma e le afaina lena mea.
Ou te manatua lo’u lagona tausalaina i le faitauina o tusitusiga a uo i luga o ala o faasalalauga faaagafesootai e uiga ia latou faamauga mo faaipoipoga. “Fesili sili ona faigofie!” sa latou fai mai ai. “Ou te le’i masalosalo lava o ia o le ua tasi i ai, mo se sekone!”
Sa manaomia ona ou a’oa’oina o le tauivi ma le popole e le faapea o le alofa sa ia i ma’ua e le moni—pe e le o taialaina i ma’ua e le Atua.
I le iuga, e le o le vave ona ma fealofani po o le faigofie foi ona ma faia le faaiuga e faaipoipo, na taua. O le mea na taua o le auala na ma tuputupu a’e ai faatasi i taimi faigata. Ma o le vaai atu i la’u uo o alofa ia te a’u i le taimi sili ona faigata, ma popole o lo’u olaga na faamaonia ai o ia moni lava.
O lagona o le fefe ma le popole e le sau mai le Agaga.
O se mea na fesoasoani ia te a’u e agai ai i luma o le a’oa’o lea ia iloa le taimi na fetalai mai ai le Agaga ia te a’u—ma le taimi na totoina ai e le popole ni manatu i lo’u mafaufau. Ina ua ou lagona le lagona lofituina ma le matua popole lava e uiga i le faaipoipo atu i la’u uo, pe sa mai le Atua ea lena mea? Pe pau lava o lo’u a’u fefe?
I leKalatia 5:22 o loo faapea mai, “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni.” Pe a ou mafaufau i taimi o lo’u olaga na fetalai mai ai le Atua ia te a’u e ala i Lona Agaga, sa o mai faatasi i taimi uma lava ma lagona faamalosiau, filemu, ma le faamalosia. Na te le’i faatupuina lava ia te a’u le fefe poo le popole.
Na ou iloa foi o le lagona atuatuvale faifai pea sa i ai, o se fa’ailoga masani o le ma’i popole. Ma e ui o uunaiga faaleagaga e masani lava ona filemu ma ma’ale’ale, ae sa leotelelava lo’u popole. E ala i le faaaogaina o metotia e taulimaina ai o’u mafaufauga popole, sa sili atu lou gafatia e faatoafilemuina lo’u mafaufau ma iloa uunaiga filemu ma le faamautinoaga a le Agaga Paia.
E ui lava o nai na taimi filemu sa seāseā tupu, ae o le tusitusiina i lalo na fesoasoani. O nisi taimi ou te faapipii ai se fasi pepa i luga o le faata o lo’u faletaele ma se mau e aumaia ai le mafanafana ia te a’u. O isi taimi sa ou tusia ai i la’u api o talaaga e uiga i se lagona toafilemu na ou maua ina ua mae’a se tatalo mai le loto. Sa ma pueina foi ma la’u uo ni vitio ao ma talanoa e uiga i taimi na ma lagona uma ai le toafilemu e uiga i le faaipoipo. Ina ua ou fefe, sa ma matamata faatasi i ai e manatua ai le auala na taialaina ai i ma’ua e le Atua i le mea sa ma i ai.
Aua le fefe e fesili atu mo se fesoasoani.
Ina ua i ai lo’u popole i se tulaga leaga sili atu, ou te manatua lo’u lagona e pei ua tuulafoaiina a’u e le Tama Faalelagi. Sa ou faitauina tusitusiga paia, alu i le malumalu, anapogi, ma tatalo, ae sa ou lagonaina pea le fefe. Aisea na Ia le fesoasoani atili mai ai ia te a’u?
O le toe tepa i tua, ua ou iloa ai sa Ia fesoasoani mai ia te a’u—ae e masani lava e ala mai i isi. Sa ia fesoasoani mai ia te a’u e ala i se epikopo atamai o le na faalogo ma fautua mai ou te feiloai i se faufautua o le soifua maloloina o le mafaufau. Na fesoasoani le Atua ia te a’u e ala mai i la’u foma’i o le mafaufau, o le na saunia se malamalamaaga faapolofesa ma aoaoina a’u i ni metotia faatino e taulimaina ai. Mulimuli ane, na ou maua se fesoasoani e ala i se foma’i o le na fautuaina a’u e faataitai ni vaila’au ma fuala’au mo lo’u popole.
Sa fesoasoani mai foi le Atua ia te a’u e ala i tagata o le aiga o e na iloa ma alolofa ia te a’u. A o o’u talanoa atu i la’u uo e uiga i o’u lagona, sa ou maua foi le mafanafana mai lona malamalama ma le lagolago. Ma sa ou maua le mafanafana i le iloaina sa malamalama atoatoa lo’u Faaola ia te a’u ma sa i ai iina mo a’u i taimi sili ona faigata.
E faatuatuaina oe e le Atua e te filifili.
E ui lava i uunaiga filemu uma o le faamautinoaga, ae o lo’u popole na uunaia ai a’u i taimi uma e moomoo maimau pe ana ou maua se tali e sili atu ona mautinoa. Sa ou tatalo pea ina ia matala mai le lagi ma auina mai e le Atua se faailoga manino e faapea o la’u uo o le tagata sa’o lea e faaipoipo i ai.
Ae sa le’i tupu lena mea.
Nai lo lena, na ou a’oa’oina sa faatuatuaina a’u e le Atua e faia le filifiliga. E ui lava ina ou manao ia te Ia e ta’u mai ia te a’u le mea e fai, ae o le filifiliga sa pule lava a’u.
Na faasoa mai e Peresitene Thomas S. Monson lenei fautuaga i se tasi taimi: “Filifili lou alofa; Alofa i lau filifiliga.”
Mulimuli ane, na ou filifili e faaipoipo i la’u uo. Sa faamauina i ma’ua i le malumalu i se aso matagofie o le taumafanafana.
Lapataiga: O lo’u popole e le’i mou atu i se tulaga vave faamaneta.
Sa faaauau pea ona ma feiloai ma la’u fomai, inuina o a’u fuala’au, sailia o le taitaiga faaleagaga, ma fesootai ma lo’u toalua e uiga i o’u luitau. Ma i le aluga o taimi, sa ou lagona le lelei.
Ou te fiafia i upu nei mai ia Elder David A. Bednar o le Korama a Aposetolo e Toasefululua: “Pe a oulua tumau mausali ma lou toalua i le ala o feagaiga, o le a oulua maua le fesoasoani faalelagi e fatu ai le faaipoipoga e te faamoemoe e maua.”
Ua lima nei tausaga talu ona ma faaipoipo ma lo’u to’alua. O le olaga e lē atoatoa, ae ua matua ma fiafia lava. Ou te matua faafetai lava ona sa ou filifili e galue i le faatuatua e ui lava i lo’u popole.
Afai o loo e feagai ma le popole i mafutaga, liliu atu i le Alii, o taitaiga faaperofeta, o ou taitai o le Ekalesia, ma pe a manaomia, o punaoa faapolofesa mo se fesoasoani. O le a le tuulafoaiina lava oe e le Tama Faalelagi. O le a Ia taialaina oe. Ma a o e taumafai e mulimuli ia te Ia, o le a Ia tuuina atu ia te oe le lototele e faalagolago ai i lou gafatia e faia ai faaiuga lelei.