Mai le AM Faalevaiaso
O le Uunaiga na Mafua Ai Ona Ou Anapogi mo Maukeni
E alala le tusitala i Ausetalia i Sisifo.
Ina ua ou manao e fesoasoani i lo’u aiga, sa ta’u mai e le Agaga Paia ia te a’u le auala e faia ai.
Mo se taimi umi, sa avea lo’u tamā ma se pule lagolago o le faatoaga. Sa galue malosi o ia ma sa leva ona moemiti o ia i se aso e faatau ai lana lava faatoaga.
O lana aga tausili faalegaluega na musuia ai a’u, ae maise lava ina ua ou alu ese e auauna atu i se misiona i Iapani. Sa ou maua le malosi ma le uunaiga pe a ou mafaufau i lana faataitaiga.
O lea la i se tasi aso o sauniuniga, ina ua ta’u mai e lo’u tamā ia te a’u ua iu lava ina ia faatauina lona lava fanua mo se faatoaga, sa ou matua’i fiafia lava mo ia. Na ia teu faafaigalueina le tele o tupe i le totōina o maukeni ma ta’u mai ia te a’u o le a latou tuputupu a’e tele i totonu o le ono vaiaso. Sa ia maua le fiafia tele i le ausiaina o lana sini.
Ae sa le’i tutupu mea uma e tusa ma le fuafuaga.
O Le Anapogi mo Maukeni
I ni nai vaiaso talu ona ou faalogo e uiga i le faatoaga fou a lo’u tama, ae amata ai loa le faama’i o le KOVITI-19 ma sa faafuasei ona faamalolo a’u mai la’u misiona. Ae peitai, sa le mafai ona ou alu i le fale ona o le sa tapunia mea uma i Ausetalia. Sa manaomia ona ou nofoese mo le lua vaiaso ae ou te le’i alu i le fale, ma o le taimi sili lea ona tuua toatasi o lo’u olaga.
I le taimi o le faanofoesea, sa valaau mai ai lo’u tamā ia te a’u. Sa ou matauina i le taimi lava lena sa faanoanoa o ia. Ua fa vaiaso talu ona ia totōina ana maukeni, ae sa vaivai ma laiti—e laiti ifo nai lo ona lima. Sa popole o ia i le gau o le tupe na ia teu faafaigaluega i lana faatoaga fou.
O lo’u tamā o se tagata lelei, faamaoni, ma lotomaualalo. O le vaai atu ia te ia ua matuā lē fiafia na ou tagi ai mulimuli ane i lena po. Sa nutimomoia lo’u loto ona sa le mafai ona ou i ai i le fale faatasi ma lo’u aiga e ofo atu la’u lagolago. Sa matuai lē talafeagai lava le galue malosi o si o’u tama ma le lē manuia lea ua i ai nei mea.
Sa ou tatalo i le Tama Faalelagi ina ia iloa le mea e mafai ona ou faia. Ma o le taimi lena na ou maua ai se lagona manino:
“E mafai ona e anapogi mo maukeni.”
I le taimi muamua, na foliga mai na faavalevalea na manatu. Anapogi mo maukeni? Sa ou le talitonuina e mafai ona faia e lena mea se eseesega! Ae sa ou mafaufau i le tele o taimi sa ou anapogi ai i la’u misiona atoa ma le auala na aumaia ai le tele o vavega. O nisi taimi sa itiiti lava e pei o le iloaina po o a upu e fai atu a o ou a’oa’o atu po o le na o le faateleina o lo’u alofa mo i latou sa ou auauna atu i ai, ae o le anapogi sa faia ai lava se eseesega.
O lea la, i se Aso Lulu i le taimi o lo’u faanofoesea ai, sa ou anapogi—mo maukeni.
Ae sa ou anapogi foi mo a’u ma lo’u aiga ina ia matou lagonaina le alofa o le Faaola i se taimi faigata.
O ni nai vaiaso mulimuli ane, sa ou taunuu ai loa i le fale. Ina ua ave au e lo’u tama i lana faatoaga maukeni, sa ou vaaia ai le faitau selau o maukeni tetele. Sa matua tetele lava! Sa o se vavega moni lava lena mea. Sa lē mafai ona ou talitonu i ai.
Sa ou lagonaina le silafia e le Tama Faalelagi o lo’u aiga i lena taimi.
Valaaulia le Alofa Mama o Keriso i totonu o Lou Aiga
O lenei aafiaga e le na o le vavega o maukeni tetele (ma ioe, o lo’o lagona pea le tiga o o’u lima pe a ou mafaufau e selesele i latou). Ia te a’u, o le vavega o le iloaina lea o le tele o le alofa e mafai ona aumaia e Iesu Keriso i totonu o o tatou aiga ma a tatou sootaga faaleaiga pe a tatou galulue i le faatuatua.
Ou te iloa e silasila mai le Tama Faalelagi i mea uma tatou te ono feagai ai i totonu o o tatou lava aiga. E silafia e Ia o tatou popolega ma o tatou tauiviga, ma e fesoasoani mai o Ia ia i tatou e faailoa atu le alofa pe a tatou ole atu mo Lana fesoasoani. Sa ia vaaia foi o se mea e foliga mai e lē tāua e pei o se faatoaga maukeni, sa taua i lo’u aiga ma sa fesoasoani ia te a’u e saili se auala e auina atu ai lo’u alofa mo i latou i se auala anoa ma faavavega.
Na faasoa mai talu ai nei e Sister Tamara Runia, Fesoasoani Muamua i le Au Peresitene Aoao o Tamaitai Talavou, upu poto nei:
“Sei o tatou vaai mamao atu e tagai ai i sootaga faaleaiga e fai ma auala mamana e aoao ai i tatou i lesona na tatou o mai iinei e aoao ai ao tatou liliu atu i le Faaola.
“Ia tatou ioeina, i se lalolagi pa’u, e leai se auala e avea ai ma se toalua, matua, atalii po o se afafine, fanau a se fanau, faufautua, po o se uo atoatoa—ae e faitau miliona auala e avea ai ma se tagata lelei. … E ala i le si’i ae o tagata o siomia i tatou, tatou te o ae faatasi ai.”
E Leai se aiga e atoatoa. Ae a tatou valaaulia le Tama Faalelagi ma Iesu Keriso i totonu o o tatou aiga ma a tatou sootaga faaleaiga, e mafai ona La faaali mai ia i tatou le auala e alolofa atoatoa ai i o tatou aiga ma fesoasoani ia i tatou e valaaulia vavega i o tatou olaga.