O La’u Fautuaga i Talavou Matutua e uiga i Tafaoga Faamasani ma Faaipoipoga

Afai e fesiligia oe pe faapefea ona e tafafao faamasani, ou te faamoemoe o le “loto i ai” o se tasi lea o au tali muamua. Sei ou taumafai e faataitai lenei mea i se faataitaiga.

E silia ma le afa o le taimi o le ma tafaoga faamasani ma lo’u toalua sa mamao lava. Sa ou feiloai ia Catherine a o ma aooga i Santiago, Chile. Sa amata ona ma tafafao faamasani, ae sa toe siitia atu o ia i le fale i Antofagasta ae e lei mae’a lo’u faailoga. Ona sa ma mananao ia atiina ae le ma mafutaga, e faatasi pe faalua i le masina, sa ou alu ai i le pasi e 20 itula e toe foi atu ai i Antofagasta i aoauli o Aso Tofi, faaalu faaiuga o vaiaso ma Catherine (e aofia ai sauniga faalelotu), ma ou alu ai i le pasi mo le isi 20 itula e toe foi atu ai i Santiago ia i ai i la’u vasega i le 8:00 i le taeao o le Aso Gafua.

I aso e le mafai ona ma faatasitasi ai, sa ma talanoa i le telefoni. Talu ai e leai ni a ma telefoni feaveai i lena taimi, sa ou faatauina ai se fuafuaga faaletelefoni lea na mafai ai ona ou faia ni valaau e le faatapulaaina i telefoni faitele. Sa ou faaaluina le tele o itula i totonu o se tamai potu telefoni, ma afai e manaomia e se isi tagata ona faaaogaina, e tatau ona ou tuuina i lalo le telefoni ona toe valaau lea ia Catherine i le taimi lava e uma ai.

I lenei aafiaga atoa, ona o le tele o faafitauli i le ma mafutaga, sa tatau ai ona ou aoao e faamoemoe i le auala na ou fesootai ai ma Catherine.

Ou te valaaulia outou ia faia ni tafaoga faamasani ma le loto i ai ma le faamoemoe i ai. Ua talosagaina i tatou e Peresitene Russell M. Nelson ina ia faamoemoe i lo tatou avea ai ma soo. E mafai foi ona tatou saili ia faamoemoe i le ala tatou te tafafao faamasani ai.

E tatau ona tatou faia ni fesili taua:

• O le a sou manatu e uiga i le olaga, aiga, ma le mea e sili ona taua, o le Faaola?

• Ou te iloa ituaiga mea e te faia ma mea e te le fiafia e fai, ae o a ou lagona e uiga i le talalelei?

• O a ou tulaga faatonuina ma amioga?

O fesili faamoemoeina e tatau ona o faatasi ma le faia o gaoioiga eseese ma le loto i ai. Ia fiafia, ae ia mautinoa e te faia faatasi foi ma mea faaleagaga. Fai ni gaoioiga o le a fesoasoani ia te oe e malamalama ai ma faamasani moni ai le tasi i le isi.

O Le Faatuatua i luga o le Mata’u

A uma ona outou tafafao faamasani mo sina taimi, e foliga mai o se faaiuga faigata le filifili e faaipoipo. Sa ou popole lava seia oo lava i le taimi na ma faaipoipo ai ma Catherine!

O le filifili e faaipoipo atonu o se faaiuga faigata, ae e le o se faaiuga e te faia i le na o le tasi le taimi. O le filifili e faaipoipo o lona uiga o le filifili e toe tautino atu i lau soa e faavavau i lou olaga atoa ma faamalosia faatasi lena tautinoga.

A i ai ni au fesili e uiga i le faaipoipoga po o le talalelei, e tatau ona e “suesue i ai i lou mafaufau; ona tatau lea ona e fesili atu [i le Alii] pe sa’o” (Mataupu Faavae ma Feagaiga 9:8) E tatau foi ona e fesili ifo ia te oe lava, “Pe ou te naunau ea e filifili e avea ma se vaega o lenei mea mo lo’u olaga atoa?”

Ina ua ou faaipoipo, sa fesili mai nisi tagata ia te au pe ou te popole ona o le a iu ina tatala la’u faaipoipoga e pei o o’u matua. O la’u tali lava e leai. Ina ua ou faaipoipo, sa ou filifili o le a ou faia soo se mea e manaomia ina ia faagaoioia lelei ai la’u faaipoipoga. O lona uiga o le filifili i aso uma e mulimuli i le Faaola ma faaipoipo fiafia i lo’u toalua. Sa ou filifili e aua nei faatagaina le fefe i le tatalaina o faaipoipoga e tuliesea ai au mai se faaiuga lelei ma le amiotonu.

Na saunoa Peresitene Jeffrey R. Holland, Sui Peresitene o le Korama a Aposetolo e Toasefululua: “O le taimi lava e i ai se malamalama moni, ia faaeteete i le faaosoosoga e solomuli mai se mea lelei. Afai na sa’o ina ua e tatalo ai, ma talitonuina ma ola ai, e sa’o foi i le taimi nei. Faafetaia’i ou masalosaloga. Pulea ou atuatuvalega. ‘Aua le laofai ai o outou faamalosi.’”

O le mea moni lava, e toatele outou o loo i ai ni manaoga lelei ma faamaoni e saili se soa. Ua e iloa o se manaoga lelei ma le amiotonu lenei, ae a e tauivi e sue se tasi e te fetaui i ai, e te lagona le mau i lou alualu i luma i le ala o le feagaiga.

E tusa ai ma lenei mea, na saunoa ai Sister Kristen M. Oaks: “Afai e te faailogaina lou taimi e faatalitali ai mo se faamoemoega faaipoipo, ia taofi le faatalitali ae amata ona sauniuni. Tapena oe lava ia mo le olaga—e ala i le aoga, poto masani, ma le fuafuaina. Aua le faatali mo le fiafia e na ona togi mai ia te oe. Saili avanoa mo le auauna atu ma le aoao mai. Ma o le mea e sili ona taua, faalagolago i le Alii, “ole atu i le suafa o le Alii i aso taitasi, ma tu mausali i le faatuatua i le mea o le a oo mai’ [Mosaea 4:11]. Ma ou te folafola atu a outou faia lena mea, o le a oo mai le fiafia ia te outou.”

E lei taofia lau malaga i le ala o le feagaiga ona e te lei faaipoipo lava. O loo i ai pea lau sootaga faalefeagaiga ma le Faaola. Afai o loo e tauivi ma le teenaina, tuuatoatasi, po o le fefe, aumai o Ia i ou tauiviga. O le a Ia lagolagoina oe. O le a Ia fesoasoani ia te oe.

Mo nisi, o le tafao faamasani ma le faamoemoe e saili se soa e faavavau o le a le vave fua mai. Mo isi o le a i ai. E tusa lava po o le a, ou te iloa o le a faataunuuina e le Atua folafolaga taitasi uma na Ia faia ia i tatou pe afai tatou te faamoemoe ma faalagolago ia te Ia.

E tusa lava po o fea o e i ai i le lalolagi po o le a foi le mea o loo tupu pe leai foi i lou olaga, ona o Iesu Keriso, e mafai ona e maua le olioli i tulaga uma. O Ia ma Ana aoaoga o le tali lea i taimi uma.