Ou Te Talitonu
Ina Ua Malepe La’u Fuafuaga Atoatoa, Sa Fesoasoani Mai Keriso ia te A’u e Toe Faufau
Sa ou manatu ua ou nutimomoia i se tulaga e le mafai ona toe faaleleia, ae sa i ai Keriso iina e toe tuufaatasia a’u.
Sa avea a’u ma se tagata o Le Ekalesia a Iesu Keriso o le Au Paia o Aso e Gata Ai i lo’u olaga atoa, ae ou te lei iloaina moni po o ai Keriso seia oo i ni nai tausaga ua mavae.
Mo le tele o lo’u talavou i le Ekalesia, sa ou manatu e tatau ona ou atoatoa. Sa ou taula’i atu i faatinoga o le ola ai i le talalelei, ae sa le’i i ai lo’u loto.
O lea ina ua vave aumai a’u i le fale mai la’u misiona, sa ou lagona le maasiasi. A o faasolo ina ou matua, sa amata ona ou uuna’ia a’u lava ina ia foliga mai e leai se pona i lo’u olaga.
Ae a o faaauau pea lo’u olaga, sa amata ona malepe la’u fuafuaga atoatoa, seia oo ina toe pau lava le mea na totoe o a’u ma lo’u Faaola.
Ma sa ou iloaina o Ia o le mea e tasi sa ou manaomia i lena taimi atoa.
Taitaiina Ese Mai le Upu Moni
O se vaega o le olaga atoatoa sa ou mafaufauina o se faaipoipoga matagofie i le malumalu. Ina ua ou feiloai atu i lo’u toalua i le lumanai, sa ma toaaga uma i le Lotu, o lea sa ma manatu ai o le a sologa lelei mea uma. Na vave ona ma faaipoipo, e aunoa ma le faia o talanoaga tāua se tele.
Ina ua mae’a le ma faaipoipoga, na avea o ia ma se tagata sa matuā ese lava nai lo le mea na ou mafaufauina. Sa auai pea o ia i le lotu ae sa i ai sauaga faalelagona ma sa lē faamaoni i le fale.
O le taimi lea, sa ou tau atu ai i mea e tete’e ai i le Ekalesia ma sa lofituina a’u i le masalosalo ma le ita e uiga i le talalelei.
Sa ou tauto o le a ou le toe alu lava i le lotu, faitau le Tusi a Mamona, alu i le malumalu, pe talanoa i se taitai perisitua. Sa ou faia nei mea uma i lo’u olaga atoa, ma vaai la i le tulaga lenei ua o’o i ai!
Ua ou iloa nei sa faigofie lava ona ou mimilo ona o la’u molimau sa faalagolago i o’u faamoemoega mo lo’u olaga, ae le o Iesu Keriso.
Iloaina Sa Manaomia ona Ou Sui
E lua ni mea faigata na tutupu i lo’u olaga na ou iloa ai e tatau ona ou sui.
Muamua, o le maliu ai o se tausoga pele. I lona falelauasiga, sa ou lagonaina le ta’u mai e le Agaga ia te a’u ua o’o i le taimi ou te toe foi ai i le lotu. Ou te le’i manao ai! Ae sa ou maua se lagona malosi o loo ta’u mai foi e lo’u tausoga ia te a’u e tatau ona ou toe foi i lo’u faatuatuaga.
Lona lua, a o faaauau pea le sauaina faalelagona, sa ma valavala ma lo’u toalua. Sa ou lagonaina le puipuiga o agelu i le taimi atoa o le ma tete’a. Sa faateia a’u i lo’u molimauina lea o vavega a o ou o’o i mea sili ona leaga na tutupu ia te a’u.
Mo le taimi muamua i se taimi umi, sa ou tatalo ai ma ole atu i le Tama Faalelagi po o le a se mea e finagalo o Ia ou te faia, ma aioi atu ia te Ia e laveai a’u mai lo’u loto nutimomoia ma filifiliga lē lelei.
Ma o le taimi lena na ou iloaina ai loa e tatau ona ou iloa Iesu Keriso.
Filifilia o Keriso
E lei faigofie le toe alu atu i le lotu. I le taimi muamua, sa ou lagona e lo’u le auai moni ai iina.
Sa ou lagonaina le ala na faamatalaina e Sister Kristin M. Yee, Fesoasoani Lua i le Au Peresitene Aoao o le Aualofa, ina ua ia taumafai e vali se ata o le Faaola. I lona manatu ua mago le vali, sa ia faapipii ai se vali vanisi i luga. Ae o le vali sa susu pea, ma o le tele o lana galuega na pisia ma soloiesea.
Sa ou lagonaina le faanoanoa lava lea e tasi ma le leai o se faamoemoe i lo’u tulaga e pei ona ia lagonaina e uiga i lana atavali—e pei e le mafai ona toe toefuataia mai a’u.
Ae peitai sa tau atu e le tinā o Sister Yee ia te ia, “‘E te le toe maua le mea sa i ai muamua, ae fai le mea aupito sili e te mafaia i le mea lena ua i ai ia te oe.’”
O le mea lena ua faia e Iesu Keriso ia i tatou taitoatasi. E mafai ona Ia faafetauia i tatou i le mea ua tatou i ai ma fesoasoani ia i tatou ia avea ma se mea matagofie.
Faatasi ai ma le taitaiga mai lo’u epikopo, sa amata ai ona ou suesue moni ma a’oa’o e uiga ia Iesu Keriso mo le taimi muamua. Sa ou lagonaina le a’oa’oina o a’u e le Faaola i la’asaga uma o le ala.
Sa ou a’oa’oina o tagata uma e malepelepe i nisi auala. Ae e mafai e Iesu Keriso ona faamaloloina i tatou uma—e aofia ai ma a’u ma lo’u toalua muamua.
O le a’oa’o e uiga i le faamagaloga ma le alofa o lo’u Faaola na mafua ai ona ou manao i ai mo a’u lava, ma a’o faamaloloina a’u, sa amata foi ona ou manao i lena mea mo lo’u toalua muamua. I le aluga o taimi, sa ou faamagalo atu ia te ia.
Na te Si’i A’e E Ua Nutimomoia
Ina ua ou toe foi atu i le malumalu, sa ou maofa i le alofa sa ou lagonaina. Sa ou maua se aafiaga e matuai ese lava, i le alu i le malumalu mo a’u lava ia ma taulai atu i lo’u Togiola, nai lo le alu ina ia tausisia ai foliga vaaia.
Afai e i ai se mea na a’oa’oina ai a’u e lenei aafiaga, o le mea lea, o lo’o soifua Iesu Keriso. Na te sii a’e i luga ē ua nutimomoia. E faafofoga mai o Ia ma lo tatou Tama Faalelagi i a tatou tagi faanoanoa i le po pe a leai se isi e iloa le tiga e le mafai ona tatou sosola ese ai. O loo faatalitali mai pea o Ia mo i tatou e toe foi atu ia te Ia.
Sa faimai foi Sister Yee, “O le mana togiola o Iesu Keriso o se tasi o faamanuiaga folafolaina silisili o a tatou feagaiga.”
Po o le a lava le mea e te ono o’o i ai, talitonu mai ia te a’u pe a ou fai atu o le togiolaina e le na o se iuga matagofie o se tala faafagogo. O se mea moni lava. E mafai ona faaolaina oe. E mafai ona e toe fuata’i lou faatuatua.
O le mea lenei e tupu pe a e faatagaina ma le atoatoa, faamaoni ma le loto i ai Keriso i lou olaga.
O le mea lena na Ia faia mo a’u.