Ou Te Talitonu
Filifilia o le Faatuatua Pe Afai e Le O Faia e Isi Lea Lava Mea e Tasi
E alaala le tusitala i Taiuani.
O le taimi lava na ou maua ai la’u lava molimau i le talalelei a Iesu Keriso, sa faigofie lava ona filifili e nofo i le Ekalesia pe a o ese atu isi na siomia au.
O le Ekalesia a Iesu Keriso o le Au Paia o Aso e Gata Ai sa avea pea ma se vaega o lo’u olaga, ae sa lei i ai moni lava sa’u lava molimau seia oo ina ou talavou.
E masani ona suia galuega a lo’u tama a o ou laitiiti, o lea sa tatau ai ona fesiitaiai lo’u aiga i nai masina taitasi. Sa le’i i ai so’u avanoa e fai ai ni uo mamae, ma sa ou le lagonaina lou fetaui ia i latou. I Taiuani, o le toatele o tagata e taitoatasi pe toalua ni fanau ma e mulimuli i tu ma aga masani a le lotu Tao po o le lotu Puta. E toalima le fanau a lo’u aiga ma sa auai i le Ekalesia a Iesu Keriso.
O le ola faapenei sa faigata a o ou laitiiti, ma o nisi taimi sa ou lagonaina ai le maasiasi i le avea ai ma se tagata o le Ekalesia.
O Le Faavae o La’u Molimau
A o ou talavou, sa ou taumafai e faitau le Tusi a Mamona mo ni nai taimi. O taimi muamua e lua, ou te le’i lagonaina se mea. Sa le’i i ai lo’u loto. Ae e oo atu i le taimi lona tolu, ua ese lo’u aafiaga.
A o ou faitau ma le faamaoni ma mafaufau loloto i le tala ia Amona o loo aoaoina le Tupu o Lamonae—o se tupu sa Lamanā o le sa naunau e lafoai tu ma aga masani uma sa ia ola ai e mulimuli ia Keriso—sa amata ona ou lagonaina loloto e moni le tusi. Sa ou lagona le musuia i le olioli o Lamonae a o ia filifili e ese le ala e ola ai ma mulimuli ia Keriso (tagai i le Alema 19:13).
Ina ua ou faitau i le valaaulia a Moronae e “ole atu i le Atua, le Tama Faavavau, i le suafa o Keriso, pe le moni nei mea” (Moronae 10:4), sa ou lagonaina le moni o le talalelei ma lo’u loto atoa. Na faamautu mai e le Agaga ia te au ma faatumulia ai lo’u olaga i se faamoemoega fou.
O lenei aafiaga na fausia ai a’a o la’u molimau i le talalelei a Iesu Keriso, lea na faaauau pea ona tuputupu a’e a o ou sailia nisi aafiaga faaleagaga. O la’u molimau na ou maua ai le faamoemoe ma le olioli ina ua vaivai isi na siomia a’u.
Faatuatua Mauaa
E lei leva ona amata ona faalolotoina lo’u faatuatua, ae tatala le faaipoipoga a o’u matua. I le avea ai ma se tamaitiiti ulumatua, sa avea a’u ma se tagata e tausia lo’u tina ma nai ou tei ma galue malosi e tausia lo’u aiga ma tuuina atu i ou tei se olaga sili atu ona lelei. Sa ou faia le mea sa ou mafaia e auai ai i le inisitituti, gaoioiga a talavou matutua, ma le lotu e faamalosia ai la’u molimau, ma sa faamauaa ai a’u ma fesoasoani ia ou lagona ai le olioli, e ui lava ina sa ou ositaulagaina le tele o mea mo lo’u aiga.
A o mavae atu tausaga, na tuua e le toatele o o’u tei ma uo le Ekalesia. Sa latou filifili latou te le mananao e ese le mea latou te ola mai tagata na siomia i latou. Sa faigata ona vaai atu ia i latou ou te alofa i ai ua tuua le talalelei ou te fiafia i ai, ae ona o o’u lava aafiaga faaleagaga, sa ou filifili ai e pipiimau i lo’u faatuatua ia Iesu Keriso.
Na faasoa mai e Elder Dieter F. Uchtdorf o le Korama a Aposetolo e Toasefululua ni malamalamaaga i lenei mataupu faavae, ma faapea mai: “E tatau ona tatou fesili ifo ia i tatou lava: Pe o faavae la’u molimau i mea ou te faamoemoe e tupu i lo’u olaga? O faalagolago ea i amioga po o uiga o isi? Pe o faavae ma le mausali i luga o Iesu Keriso, ‘maua’a ma atiina a’e ia te ia’ [Kolose 2:7], e tusa lava po o a tulaga fesuisuia’i o le olaga?”
O le lagonaina o le upumoni o le talalelei ua mauaa i lo’u loto na faigofie ai ona filifili le faatuatua.
O Le Faatuatua Tofotofoina o le Faatuatua Malosi Lea
A o faaauau pea ona ou faafaileleina la’u molimau, ua avea Le Ekalesia a Iesu Keriso o le Au Paia o Aso e Gata Ai ma mea e sili atu nai lo na o la’u tapuaiga—o lo’u olaga atoa lea. O la’u molimau o le mea aupito sili lea ona taua i lo’u olaga ma e tosoina a’e ai a’u pe a tofotofoina lo’u faatuatua.
Sa aoao mai foi Elder Uchtdorf:
“E malosi le faatuatua pe a maua’a i le loloto o aafiaga faaletagata lava ia, tautinoga faaletagata lava ia ia Iesu Keriso, tutoatasi e tusa ma a tatou uputuu po o tu masani po o mea e ono ta’u mai pe fai e isi.
“O le a tofotofoina ma faaosoosoina a tatou molimau. E le o se faatuatua le faatuatua pe afai e le’i tofotofoina lava. E le malosi le faatuatua pe afai e le’i osofa’ia lava. O lea la, aua le faanoanoa pe afai e i ai ni tofotofoga o lou faatuatua po o ni fesili e le’i taliina lava. …
“… E mafai ona tatou faatuatuaina Iesu Keriso a o tatou agai pea i luma ma agai i luga aua o Ia o lo tatou Faaola ma le Togiola.”
Afai e i ai ni au fesili pe tauivi ma le pipiimau i lou faatuatua, saili ia Iesu Keriso ma se manao e talitonu ia te Ia ma Lana talalelei. Ua folafola mai e le Alii e faaali atu ia te oe le upumoni a o e liliu atu ia te Ia. Ma a o e faamalosia lau molimau, o le a fesoasoani i lou faatuatua e tumau ai, e tusa lava po o le a le mea e te feagai ai.