O Ni Motugaafa se 3 e Fesoasoani ai iā te Oe e Faatulaga ni Sini e Mafai Ona Ausia
Afai e te tauivi i le faia ma le tausia o sini, e mo oe lenei mea!
O le faatuina o se sini e pei o le totoina o se fatu. E manaomia e se fatu le vai ma le susulu o le la ina ia ola ai i le aluga o taimi. I le Mataupu Faavae ma Feagaiga, ua tatou aoao ai o Keriso “sa lei maua muamua le atoatoaga, ae sa faaauau pea mai lea alofa tunoa i lea alofa tunoa, seia oo ina maua e ia le atoatoaga” (Mataupu Faavae ma Feagaiga 93:13). E mafai ona tatou mulimuli i le faataitaiga a Keriso o le tuputupu ae i le atoatoa. E mafai ona tatou tuputupu ae ma atiina ae e ala i le totoina o “fatu” po o le faatuina o sini e mafai ona fesoasoani ia i tatou e tuputupu ae ai pea i aso taitasi, nai lo le faamoemoe e tupu uma i le taimi e tasi.
1. Iloa le Aisea e Faatulaga ai Lau Sini
O le faatulagaina o sini e foliga mai e lofituina i nisi taimi. E mafai ona tatou maua le uunaiga e ala i le manatuaina o le mafuaaga tatou te faatuina ai ni sini.
Na aoao mai Peresitene Dallin H. Oaks, Fesoasoani Muamua i le Au Peresitene Sili, “E ese mai i faalapotopotoga a le lalolagi, lea e aoaoina i tatou ia iloa se mea, ua luiina i tatou e le talalelei a Iesu Keriso ia avea ma se mea.
O se vaega tele o le faatuina o sini o le aveina lea o mea ua tatou iloa ma aoao pe faapefea ona avea ma tagata sili atu ona lelei—ia avea atili e faapei o Iesu Keriso.
2. Fai se Fuafuaga
O se tasi o laasaga i le fatuina o se sini aogā o le malamalama lea i le eseesega i le va o sini ma fuafuaga. Sa saunoa mai Peresitene M. Russell Ballard (1928–2023): “O le faatuina o sini e amata lava i le mafaufau i le iuga. Ma o le fuafuaga o le fatuina lea o se auala e taunuu ai i lena taunuuga.”
Mo se faataitaiga, o le auai e le aunoa i le malumalu o se sini. Ae o le fuafuaga e te fatuina ina ia oo atu ai iina o le a aofia ai mea e pei o le mafuaaga, o afea, o fea, ma le auala o le a e auai ai i le malumalu. O le vaevaeina o lau sini i ni vaega laiti e sili atu ai ona mafai ona puleaina.
3. Ia Faalemu—i le Poto ma le Faatulagaga Lelei
Atonu e foliga faigofie au sini i le taimi muamua e te faia ai. Ae e taua le manatua a e totoina se fatu, e le tatau ona e faamoemoe e ola i le po.
A e faia lau fuafuaga, e tatau ona e faia “i le poto ma le faatulagaga lelei; ona e le tatau i se tagata ona momo’e televave atu nai lo le malosi ua ia te ia” (Mosaea 4:27).
O le i ai o le poto ma le faatulagaga lelei a o e fuafuaina le auala e ausia ai au sini o se auala e sili atu ona faatumauina. O le a fesoasoani ia te oe e ausia e tusa lava pe ua uma lou faaosofia muamua.
Ina ua talanoa e uiga i le faatuatua, sa faamalamalama mai e Alema e faapea “afai e ola se fatu e lelei, ae afai e le ola, faauta e le lelei, o lea e lafo ese ai” (Alema 32:32).
E mafai ona tatou faaaogaina lena mea i le faatulagaina o sini. E pei lava o fatu, afai e tuputupu ae au sini ma e maua ai le manuia, o le a e iloa ai o loo i ai sau fuafuaga lelei e aoga. Afai e leai, e mafai ona e toe laa i tua, toe iloilo, ma faaleleia mea e le o aoga. Ma e le afaina lea!
O Laasaga Laiti e Fausia ai le Tumau
Pe o tatou totoina se fatu po o le faia o se sini, e tatau ona tatou manatua le fautuaga a Elder Michael A. Dunn o le Fitugafulu: “E tatau ona i ai se taumafaiga faifai pea, i lea aso ma lea aso. Ma e ui atonu tatou te ono lē atoatoa, ae e tatau ona tatou pulunaunau ia tutusa lo tatou vilivilita’i ma le onosai.”
E umi se taimi e ola ai fatu, ma e leai se eseesega i lo tatou tuputupu ae patino. O le tumau o le a fesoasoani ia i tatou e mulimuli ai i a tatou sini.
Afai tatou te “faaatagia lo tatou vilivilita’i ma le onosai,” o le a tatou maua le olioli ia Keriso lea o loo tatou sailia, a o tatou mulimuli ia te Ia i laasaga laiti taitasi.