Mai le Misiona
O A ni Mea na Saunoa mai ai Perofeta e uiga i le Auauna Atu i Misiona?
Ua faamamafa mai e perofeta fou ma perofeta tuai le taua o le faasoaina atu o le talalelei. E mafai ona fesoasoani a latou fautuaga ma aoaoga ia te oe i lau galuega faafaifeautalai.
E faamamafa mai lava e perofeta i taimi uma le taua o le talaiina o le talalelei, ma toe taua ai le valaau a le Faaola: “Ia outou o atu i le lalolagi uma, ma talai atu le talalelei i tagata uma lava” (Mareko 16:15). Mai perofeta anamua e oo mai ia Peresitene Russell M. Nelson, tatou te aoao ai e uiga i faamanuiaga o le aoao atu ma le faasoaina atu o le talalelei a Keriso.
Pe o e auauna atu i le taimi nei, mafaufau i se misiona, pe o faatalitali mo se valaauga, o upu a perofeta e mafai ona avea ma tapasa mo oe a o e galue i le tovine a le Alii. O nisi nei o mea na saunoa mai ai perofeta e uiga i le faasoaina atu o le talalelei o se faifeautalai:
Isaia—Faalauiloa le Filemu
“E matua matagofie lava i luga o mauga o vae o lē ua fai mai le tala lelei, o lē logologo mai le manuia; ua tala mai le tala lelei, ua faailoa mai le olataga; ua fai mai ia Siona, UO loo pule lou Atua!” (Isaia 52:7).
Paulo—Talai atu ia Iesu Keriso
“Aua matou te lē talaiina i matou, ae o Keriso Iesu le Alii; o i outou nei foi o a outou auauna ona o Iesu” (2 Korinito 4:5).
Alema le Itiiti—O Le a Faatumulia Lou Agaga i le Olioli
“Ua ou iloa le mea ua poloaiina ai a’u e le Alii, ma ua ou mitamita ai. Ou te le mitamita ona o a’u lava ia, ae ou te mitamita i le mea ua poloaiina ai a’u e le Alii; ioe, ma o lo’u mitamitaga lenei, atonu ia mafai ona avea a’u o se auupega i aao o le Atua e aumai ai se agaga i le salamo; ma o lo’u olioli lea.
“Ma faauta, a ou vaai atu i le toatele o o’u uso ua salamo faamaoni, ma ua o mai i le Alii lo latou Atua, ona faatumulia ai lea o lo’u agaga i le olioli” (Alema 29:9–10).
Polika Iaga—O Le A Fesoasoani le Atua ia te Oe i Lou Ala
“O le a ou fiafia tele pe a mafai ona ou iloa … o tagata i motu ma konetineta uma, o e maualuluga ma e maualalalo, o e valea ma e atamamai, ua latou mauaina upu o le ola e faavavau, ma ua tuuina mai i o latou luga le mana o le Perisitua e faavavau a le Alo o le Atua. …
“Alu atu ma talai atu le Talalelei, maua se aafiaga, aoao le poto, ma savavali ma lotomaualalalo i luma o lou Atua, ina ia mafai ona e maua le Agaga Paia e taiala ma taitai oe, ma aoao oe i mea uma ua tuanai, o le taimi nei, ma le a oo mai.
“O atu ma le faalagolago i le Atua, ma faaauau pea ona faalagolago ia te ia, ma o le a ia tatalaina lo outou ala ma faateleina faamanuiaga i o outou luga, ma o le a faamalieina o outou agaga i lona agalelei.”
Ezra Taft Benson—O Le Galue Malosi e Aumaia ai le Agaga
“E leai se isi mea e sili atu ona fiafia po o le faamalieina nai lo le iloa, ina ua mavae se aso faigata o le galuega, ua tatou faia le mea sili tatou te mafaia.
“E masani ona ou fai atu o se tasi o mealilo silisili o le galuega faafaifeautalai, o le galue! Afai e galue se faifeautalai, o le a ia maua le Agaga; afai o le a ia maua le Agaga, o le a ia aoao atu e ala i le Agaga; ma afai o le a ia aoao atu e ala i le Agaga, o le a ia pa’i atu i loto o tagata ma o le a fiafia o ia.”
Thomas S. Monson—E Le Afaina le Lofituina
“O le galuega faafaifeautalai o se galuega faigata. O le auaunaga faafaifeautalai e faigata ma e manaomia ai le tele o itula o suesuega ma sauniuniga, ina ia mafai e le faifeautalai lava ia ona ogatusa ma le savali paia na te folafola atu. O se galuega o le alofa ae o le ositaulaga foi ma le tuuto i tiute. …
“O le ulufale atu i le misiona e mafai i nisi taimi ona avea ma se aafiaga lofituina ma le taufaafefe. Sa saunoa mai Peresitene Harold B. Lee ia te a’u i se tasi aso e uiga ia i latou o e lagonaina le le agavaa ma popole pe a latou maua se tofiga i le Ekalesia. Na ia fautua mai, ‘Ia manatua o lē ua valaauina e le Alii, e faaagavaaina e le Alii.’”
Russell M. Nelson—Ua Manaomia Neile Malamalama o Iesu Keriso
“E taua outou taitoatasi i le Alii. Sa Ia faapolopoloina outou seia oo i le taimi nei e fesoasoani ai e faapotopoto ia Isaraelu. O lau faaiuga e auauna atu i se misiona, pe o se misiona tala’i po o se misiona o auaunaga, o le a faamanuiaina ai oe ma le toatele o isi. …
“… O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le faamoemoe ma le filemu lea e ‘silisili lava i mea uma e manatu i ai’ [Filipi 4:7].”
O le faia o le filifiliga e auauna atu i se galuega faamisiona o le va lea o oe ma le Tama Faalelagi. A o e mafaufau loloto i upu a perofeta, mafaufau pe faapefea ona avea oe ma se sulu o le malamalama o Keriso. O au meaalofa tulaga ese ma le naunautai e faasoa atu le talalelei e mafai ona fesoasoani e aumai ai isi i le talalelei. I se taimi ua toatele naua tagata o loo saili mo se faamoemoega, o au taumafaiga e faasoa atu le alofa ma aoaoga a le Faaola e mafai ona faia ai se eseesega loloto—ma faavavau—i le olaga o se tasi.