Faaaogaina o le Mataupu Faavae ma Feagaiga i Lou Olaga
Paia: Auala e Mafai ona Tatou Puipuia ai i Tatou Lava mai Afā o le Lalolagi Lenei
O le faateleina o le paia e mafai ona fesoasoani ia i tatou e tumau ai le fesootai atu ia Iesu Keriso i lenei lalolagi lē paia.
Sa ma maua le avanoa e auauna atu ai o ni taitai misiona i Chile i le 10 tausaga ua mavae. Talu ai nei, sa asiasi mai ai se tasi o a matou faifeautalai ia i matou a o malaga atu i Iuta ma lona aiga. Sa ma fiafia lava e toe vaai ia te ia ma feiloai i lona aiga. Ina ua matou nonofo faatasi i lalo, sa amata ona matou toe faamatalaina o matou manatuaga o lesona na aoaoina ma faamanuiaga na tuuina mai i le lua tausaga na matou auauna faatasi ai.
A o latalata i le faaiuga o le asiasiga, sa matou talanoa e uiga i se tasi o lesona silisili na matou aoaoina: o le manaomia ona “tutu i nofoaga paia” (Mataupu Faavae ma Feagaiga 45:32)—o le manaomia ona puipuia o tatou olaga mai matagi o faaosoosoga ma afā o le leaga o loo siomia ai i tatou uma i itu uma ma ia fausia ni malutaga patino ma sulufaiga mo o matou olaga.
O le autu lenei na fesiligia ai e le matou faifeautalai pele se fesili taua. Fai mai o ia:
“O se mea manaia tele i le avea ai ma se faifeautalai faamisiona le taulai atu i le na o le aoaoina atu o le aoaoga faavae a Keriso ma le auauna atu i isi. Ae o le taimi nei, o le ola ai i se lalolagi ua faateleina le leaga ua tumu i feteenaiga, ita, ma faaosoosoga, ua sili atu ona faigata ona maua se nofoaga paia, aemaise lava ma le tausia o se aiga. E foliga mai e leai se auala e sao ai mai le leaga o loo siomia ai i tatou. Ou te lagona le pa’ulia, ma e leai se auala e aluese ai mai le gaogaosā o loo i ai le lalolagi i le taimi nei.
“E faapefea ona ou puipuia lo’u aiga mai le leaga i le lalolagi ae o nofoaga paia e matua faigata ona maua? E faapefea ona ou aoaoina i latou ia avea ma soo o Keriso—ia mulimuli i le Agaga ma tutu i nofoaga paia?”
O le taimi lea i le talanoaga, na taia i matou i musumusuga.
O Le Malutaga o se Fale ma se Aiga
Sa ma talosagaina le na avea muamua ma se ma faifeautalai ma lona aiga e faatasi ma i ma’ua mo se savaliga puupuu faataamilo i lo ma fanua. Sa ma faaali atu ia i latou se laau laitiiti, toeitiiti tolu futu le umī, ma faamatala atu o le laau laitiiti sa aafia i matagi uma o le taumalulu ma le kiona na tauai mai e mauga. Mo lena māfuaaga, na faaletonu ai lona tuputupu a’e, ma na gauia ma faaleagaina ai ona foliga vaaia.
Ona matou savavali atu lea i se nofoaga i lo matou fanua lea sa puipuia mai afā e puipui malolosi o lo matou fale. Sa avea lo matou fale ma puipuiga mai afā ma asiosio i le aluga o tausaga, ma mafai ai e laau ma fugalaau ona olaola ma lauusisui. O le laau fuga tele i lenei vaega o le fanua, faatasi ai ma ona lala matagofie ma fugalaau, sa tutusa lava ma le laau ua faaleagaina, ae na matou totoina i le aso lava lea e tasi i le silia ma le lua sefulu tausaga ua mavae.
O le malutaga o se fale ma se aiga e mafai ona avea ma se “nofoaga paia” tatou te manaomia uma lava. Sa ma molimau atu o le fale, faatuatua, ma le aiga e maua ai avanoa mo le tuputupu ae ma le atinaega na oo i ai le laau matagofie o loo i o matou luma. E mautinoa lava o le a oo mai aso matagia, ae afai e i ai ia i tatou ma o tatou aiga se malutaga ma se sulufaiga o le faatuatua ia Iesu Keriso ma Lana talalelei toefuataiina, o le a tatou olaola ma lauusiusi “o le a le mafaagaeetiaina i tatou” (Mataupu Faavae ma Feagaiga 45:32).
Sulufaiga mai Feeseeseaiga ma Faaosoosoga
Na faasoa mai e Elder Gerrit W. Gong o le Korama a Aposetolo e Toasefululua ni manatu musuia e uiga i le taua o le aumaia o le paia i o tatou olaga. Na ia saunoa mai: “O la tatou talalelei o se talalelei o le olioli ma le pa’ia i le olaga i aso faisoo. O le pa’ia e vaetofia ai mea mo faamoemoega paia. Ae o le pa’ia foi e valaaulia ai i tatou e faatumulia le olaga i aso taitasi i le pa’ia—e fiafia ai i meaai i aso taitasi, i le lotolotoi o vaotuitui ma vaotalatala o lenei lalolagi.”
Afai e te manao ia olaola, ia mautinoa ua e olioli i le puipuiga ua saunia e le ala o le feagaiga a le Alii. O le a Ia taitaiina pea oe e tu i nofoaga paia, e ala i gaoioiga faalelotu, auaunaga anoa, ma le malumalu. O le a faaauau pea ona taavilivili faataamilo ia te oe le tau matagia o feteenaiga faaupufai ma mafatiaga o faaosoosoga, ae e mafai ona e maua le sulufaiga i le taitaiga a perofeta, tagatavaai, ma talifaaaliga ma le Agaga Paia.
E moni o le “faapotopotoina faatasi i luga o le laueleele o Siona, ma i luga o ona siteki, mo se puipuiga, ma mo se sulufaiga mai le afā, ma mai le toasa pe a sasaa mai e aunoa ma le suia i luga o le lalolagi atoa” (Mataupu Faavae ma Feagaiga 115:6).
Pe a e valaaulia le Alii ma Lona paia i lou olaga, o le a leai se mea e te fefe ai.