O Aafiaga e 3 o le Tatalo na Suia ai Lo’u Sootaga ma le Atua
E alala le tusitala i Angers, Farani.
O o’u aafiaga i le tatalo ua aoaoina ai au o loo i ai pea le Atua iina.
A o tuputupu ae, sa aoaoina au e faataitaiga a o’u matua i le taua o le tatalo. Sa matou tatalo faatasi i taimi uma o se aiga, ma sa ou faalagolago ia i latou e fesoasoani ia te au i lo’u faatuatua.
Sa matou molimauina vavega, ma sa tuputupu ae lo’u talitonuga i le Tama Faalelagi. Ae ina ua ou tuua le aiga, sa tatau ona ou atiina ae lo’u lava manao e saili le fesoasoani a le Tama Faalelagi ma faatupulaia lo’u lava faatuatua.
E tolu ni aafiaga patino i le tatalo e faapitoa lava le manatuaina aua na faatuina ai lo’u faavae o le faatuatuaina o le Atua ma tuuina mai ai ia te au le lototele e fai ai se laa mamao o le faatuatua. Afai o loo e sailia se fesoasoani pe taumafai e atiina ae se faatuatuaina atili o le Atua, ou te faamoemoe e mafai ona fesoasoani o’u aafiaga ia te oe e maua ai le lototele e fai ai lau lava laa mamao o le faatuatua ma iloa ai le mana o le tatalo.
1. Iloaina e Taua A’u ia te Ia
A o ou sauniuni e papatiso i le valu o o’u tausaga, sa leai se isi mea na sili atu ona ou manao i ai nai lo le auai o o’u matua matutua i lo’u papatisoga. Ae sa la nonofo mamao i Tahiti, ma sa faigata ia i la’ua ona malaga atu i Farani i lo la matutua. I le taimi lea o o la’ua olaga, sa la talitonu o le taimi mulimuli o le a la malaga ai pe afai o le a faaipoipo le uso o lo’u tina—o lē sa nofofua. Sa foliga mai e le tupu lenei mea ae ou te lei papatiso, ae sa ou iloaina afai ou te tatalo, o le a tali mai le Tama Faalelagi.
I se tasi aso i le lotu, sa ma vaaia ai ma lo’u tina se tamaloa o nofo na o ia. Sa ma fetilotiloa’i i le tasi ma le isi ma faafuasei lava ona ma mafaufau e mafai ona fetaui lelei o ia mo le uso o lo’u tina! Sa faapea foi ona ia sailia se soa e faavavau, o lea na ma faatulaga ai mo ia e feiloai ia te ia.
Sa faamemelo le tasi i le isi ma filifili ai e faaipoipo, ma na o mai o’u matua matutua i Farani mo le faaipoipoga ma lo’u papatisoga!
Na tali mai le Tama Faalelagi i la’u tatalo patino i se auala e na o Ia lava e mafai ai. Ou te iloa e le o taimi uma na te tali mai ai i a tatou tatalo i le ala tatou te faamoemoe i ai, ae e masani ona Ia tali mai i auala e faaali mai ai ia i tatou lo tatou taua ia te Ia.
Na saunoa Elder Taylor G. Godoy o le Fitugafulu:
“E faafofoga mai le Atua i a tatou tatalo ma tali mai i se auala patino. …
“A o tatou tatalo e mafai ona tatou lagonaina le opo a lo tatou Tama Faalelagi.”
E faafofoga mai le Tama Faalelagi ia i tatou aua e popole o Ia ia i tatou ma mea tatou te popole i ai. Atonu e oo mai Ana tali i ni auala e lei faamoemoeina, ae e oo mai.
2. Aoao e Faatuatuaina Lana Taimi
I ni nai tausaga ua mavae, na faatau ese ai e o’u matua lo matou fale. Sa la auina atu se talosaga i le faletupe e tuu mai ia i matou le tupe sa matou manaomia e saini ai pepa mo se fale fou i se isi aai.
Sa faia mea uma e pei ona fuafuaina seia oo ina teena e le faletupe la matou talosaga. Talu ai ua uma ona faatau atu lo matou fale lea sa i ai, sa na o le tasi le masina matou te sailia se tupe e faatau ai se fale fou, a leai ua leai so matou fale e nonofo ai.
Sa matou anapopogi ma tatalo faatasi. Sa ta’u mai e o’u matua ia te au afai matou te tuu atu lo matou faalagolago i le Atua, o le a Ia saunia.
Na aoao mai le perofeta o Moronae, “tou te le maua se molimau seia uma ona tofotofoina o lo outou faatuatua” (Eteru 12:6).
E ala mai i lenei tofotofoga, na matou maua ai le avanoa e faatuatuaina ai le Tama Faalelagi i luga a’e o soo se mea ma se isi lava tagata. I le aso mulimuli o le masina, na faamaonia ai e le faletupe le talosaga a o’u matua, ma sa mafai ona matou sainia pepa.
Pe a tatou oo i luitau, ua ia i tatou le faitalia e faatino le faatuatua i le Tama Faalelagi seia Ona auina mai ia i tatou se tali i Lana taimi. Afai tatou te faaauau pea ona faaaoga lo tatou faatuatuaina o Ia e ala i le tatalo, o le a tatou valaaulia Lona aao i o tatou olaga.
3. Talitonu ua Ia Silafia A’u
O le tausaga lenei, sa tatau ai ona ou sailia se galuega faataitai mo togi i le iunivesite. Ua lata mai le aso mulimuli, ae ou te le’i maua se mea. Afai ou te le maua le avanoa sa’o, e tatau ona ou toe faia le tausaga aoga atoa. Sa ou nofo ese mai o’u matua, ae sa la aoaoina au i le mea e fai i tulaga faapenei.
Sa ou sailia le fesoasoani a le Tama Faalelagi e ala i le tatalo. Sa ou tuuina atu lo’u lumanai i Ona aao.
Ae e te iloa? I le taimi, sa Ia tuuina se tasi i lo’u ala o lē na ofoina mai ia te au se galuega faataitai o le mea tonu lava lena sa ou manaomia.
Atonu e foliga mai e faigofie ia te oe o’u aafiaga, ma atonu e foliga mai sa ou mauaina i taimi uma le mea sa ou manao ai pe a ou tatalo. Ae sa tele ni a’u tatalo na ese le taliina nai lo le mea sa ou faamoemoe i ai. Ma o loo o’u faatalitali pea i isi.
Ae o nisi taimi e auina mai ai e le Atua ia te au vavega e fesoasoani ia te au e taofimau ai ma faatuatua o le a lelei mea uma. O lea ia aua nei fiu. Ia faatuatuaina le Alii i taimi uma. E silafia e Ia mea e taua ia i tatou, ma e taua i tatou ia te Ia.
Na aoao mai Peresitene Jeffrey R. Holland, Sui Peresitene o le Korama a Aposetolo e Toasefululua, “Afai tatou te ole atu ma le faaletatau,’ [2 Nifae 4:35], e leai ni tapulaa o le taimi, po o fea, po o le a foi le mea e tatau ona tatou tatalo ai.”
E fia faafofoga mai le Alii ia i tatou. O loo faatalitali mai o Ia mo i tatou e aapa atu ia te Ia ina ia mafai ona Ia fesoasoani mai ia i tatou. Saili Lana fesoasoani i le tatalo, ma o le a i ai pea o Ia iina.