Sa E Saunia mo le Konafesi, ae Sa Le’i Taliina Lava Au Fesili. O Le A La le Isi Mea?
O le a lau mea e fai pe afai e te saunia ma le mafaufau i ai ni fesili mo le konafesi aoao ae sa le’i taliina?
E masani ona uunaia i tatou e saunia mo le konafesi aoao e ala i le mafaufau i ni fesili ma le loto i ai tatou te mananao e taliina. O le toatele o i tatou e suesue ma le filiga e iloa ai fesili a o tatou agaga e ofo atu mo se taitaiga. O le konafesi aoao e mafai ona avea ma se aafiaga faafaaaliga, ma ua aoaoina i tatou ia faamoemoe mo ni tali ma vavega.
Ae o le a le mea e tupu pe a le taliina a tatou fesili?
Ou te manatua le taimi muamua na ou sau ai i le konafesi ua saunia moni ma faalogologo mo le tali lea sa ou manatu sa faamautinoa mai ia te a’u ou te mauaina—ae na o le oo i le faaiuga o le vaiaso ma le tele o nisi fesili!
Pe sa le’i finagalo ea le Atua e tali mai ia te a’u? Pe sa lē lava ea lo’u faatuatua? Pe le aoga ea faaaliga mo a’u?
Muamua, ia manatua e alofa le Atua ia te oe.
Afai na e tuua le konafesi ma ni fesili e le’i taliina, toe laa i tua ma manatua se tasi o upumoni faavae o le talalelei: E alofa le Atua ia te oe.
Na saunoa Elder Karl D. Hirst o le Fitugafulu:
“E sese lou manatu ua e tuuina atu oe lava ia i tua atu o le alofa o le Atua. …
“Pe a tatou le lagonaina le mafanafana o le alofa faaleatua, e le’i alu ese lava.”
Po o le a lava sou lagona i lenei taimi, ia iloa e alofagia oe. A o e agai i luma ma fesili i lou loto, ia manatua e alofa le Atua ia te oe ma e faataunuu i taimi uma Ana folafolaga. Ia maua le faamoemoe i lena malamalama a o e faatalitali mo tali ma le malamalama atili o le a oo mai.
O le isi, ia faaauau pea ona galue.
Ae e faapefea na e agai i luma?
Aua nei aluese le lagona maualuga na e maua mai le sauniuni ma faalogologo i le konafesi aoao. Faaauau ona galue.
Na aoao mai Elder Dieter F. Uchtdorf o le Korama a Aposetolo e Toasefululua:
“Aua le faanoanoa pe afai e i ai ni tofotofoga o lou faatuatua po o ni fesili e le’i taliina lava.
“E le tatau ona tatou faamoemoe ia malamalama i mea uma ae tatou te le’i faatinoa. … Afai tatou te faatalitali seiloga e tali uma a tatou fesili ona faato’a faatino lea, ua tatou faatapulaaina ma le lamatia le lelei e mafai ona tatou faia, ma tatou faatapulaaina le mana o lo tatou faatuatua.”
O nisi nei o fautuaga mo le faaauau pea ona galue i le faatuatua e saili ai tali i au fesili:
-
Toe faamanatu lauga o le konafesi. Atonu sa i ai ni tali e te lei faalogo i ai pe iloaina foi i le taimi muamua.
-
Suesue ma le agaga tatalo i tusitusiga paia.
-
Auai i le malumalu.
-
Fai ni sini e mafai ona ausia e faaaoga ai aoaoga mai le konafesi i lou olaga.
-
Talosaga atu mo se faamanuiaga faaleperisitua o fautuaga ma le faamafanafanaga.
-
Saili ni taimi e filemu ai ma tuu atu i le Agaga e fetalai atu ia te oe.
Manatua le mana o lou faatuatua.
Atonu e faaosoosoina oe e te manatu e le lava le malosi o lou faatuatua e maua ai faaaliga mai le Atua. O le mea e faafetai ai, na faamutaina e Peresitene Russell M. Nelson lenei fefe:
“Atonu tatou te ono tuufesili ai pe mata e mafai ona tatou aofa’ia ia lava le faatuatua e maua ai faamanuiaga ia tatou te matuā manaomia lava. …
“… Afai e tusa lo tatou ‘faatuatua ma le fua o le sinapi,’ e mafai ona tatou ‘fai atu i lenei mauga, Alu atu ia oe i le la mea; ona alu atu ai lea; e leai foi se mea [tatou] te le mafaia’ [Mataio 17:20].”
E mafai e i tatou uma ona faaauau pea ona faateleina lo tatou faatuatua, ae o le tele o lo tatou faatuatua o i ai e le o taimi uma e fuafua ai po o afea pe faapefea ona tali mai le Atua ia i tatou. Afai o loo e faia mea uma e te mafaia e valaaulia ai faaaliga i lou olaga, ia manatua e faatuatuaina o Ia ma Lana taimi. O le taimi nei, o le faatuatuaina o Ia atonu o lona uiga o le faatalitali ia te Ia.
Atonu e faigata i nisi taimi, ae a o e faia lena mea, o le a e iloa ai le ogatasi o lou loto ma Lona finagalo. O le a e atiina ae le onosai e maua ai tali a le Atua mo oe.
Ma le mea mulimuli, aua le “solomuli.”
I tusitusiga paia, ua faamatalaina ai e le Faaola puapuaga na Ia oo i ai i Ketesemane, i le fetalai mai, “O le mafatia lea na oo ai ia te a’u lava, o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou lē inuina le ipu oona, ma ma’e’e’e” (Mataupu Faavae ma Feagaiga 19:18).
Na a’oa’o mai Elder David A. Bednar o le Korama a le Au Aposetolo e To’asefululua e fa’apea:
“Ou te iloa o le tasi o faamanuiaga silisili o le olaga nei o le, ia le solomuli ma faataga o tatou loto taitoatasi ina ia ‘tofatumoanaina i le finagalo o le Tama’ (Mosaea 15:7).
“… Ma a o outou fetaomi atu i luma i o outou olaga ma se faatuatua tumau ia Keriso, o le a outou maua le gafatia ia le solomuli ai.”
A o e agai i luma ma le faatuatua ia Keriso, aua le solomuli! O le a taialaina oe a o e faatagaina le finagalo o le Atua e faamuamua nai lo oe lava. O le a Ia faamanuia oe i tali e te manaomia.