Mo Tinā o Fanau Laiti
Sa Ou Manatu E lē Mafai Ona Ou Talanoa e uiga i O’u Luitau Ona o Se Isi Tagata “Sa Sili Atu Le Leaga o Tulaga Sa O’o I Ai”
Pe na avea ea lo’u faaalia atu o faafitauli i lo’u maitaga ma vaega na iloa ai lo’u lē lotofaafetai?
O le faafaufau i le taeao na ou maua ai pe tusa o le vaiaso lona lima o lo’u maitaga. Ae e le na o le taeao.
Sa o se tulaga faifaipea. Na pau lava le toomaga na ou maua o le moe.
Ae i se tulaga tali tutusa lava le leaga, na pei lava le mauga sa ou a’ea i le tulaga faaletino, o le taua faalemafaufau sa pupusa a’e i lo’u ulu.
Pe na avea ea le lagonaina o le faanoanoa ma le le fiafia ma vaega na foliga mai ai ua ou le lotofaafetai mo le pepe o lo’o tuputupua’e i totonu ia te a’u? Pe na faatagaina a’u e manao e faamuta o’u mafatiaga, ae o nisi fafine na ou iloa sa le mafai ona maua ni fanau pe sa mafatia foi i le to’esea ai o fanau?
Sa ou lagonaina le tausalaina mo le faailoa atu o so’o se lagona o le tiga, tauiviga, po o le atuatuvale—faaletino pe faalelagona—pe a ou faatusatusa o’u luitau i isi.
Ae e lei umi ae ou iloaina sa sese lo’u malamalamaaga i mea uma.
O Lagona o le Tu’ua Toatasi i le Faatusatusa
O se tasi o mea sili ona faigata e uiga i le avea ma se tinā i nei aso o le uunaiga faifai pea o le atoatoa, lea e taitai atu ai i tatou e faatusatusa i tatou lava i le tasi ma le isi. O leo faatauva mai ala o faasalalauga, tuaoi, po o aiga e mafai ona taitai atu ai i tatou e fesiligia lo tatou tāua po o le gafatia o ni tinā, vaai ia i tatou lava e maualalo ona tatou te le ogatusa ma tulaga faatonuina o isi, ma iu ai ina le faatāuaina le alofa ma taumafaiga tatou te tuuina atu i le tulaga faatinā.
Ae e tatau ona ou talitonu e le o le mea lea e finagalo ai lo tatou Foafoa paia mo i tatou.
Na faamanatu mai e Peresitene Jeffrey R. Holland, Sui Peresitene o le Korama a Aposetolo e Toasefululua, ia i tatou, “Tatou te le o i ai i se tausinioga o le tasi ma le isi e vaai po o ai e sili ona mauoa pe sili ona talenia pe sili ona matagofie pe sili foi ona faamanuiaina.”
Tatou te le o i ai foi i se tauvaga e va’ai po’o ai e sili ona leaga tulaga e o’o i ai! I le taimi o itula o le lagona tuua toatasi i lo’u maitaga, sa ou lagonaina e mafai ona ou faailoa atu na o le fiafia ma le lelei ia i latou lea o o latou tauiviga sa ou faamasinoina e sili atu le leaga nai lo a’u. O le mea moni, sa ou lagona le mafatia ma le leai o se faamoemoe, ma mafaufau ai pe ua lava lo’u malosi e avea ai ma se tinā. O lenei faatusatusaga na atili ai ona ou lagona le tuua toatasi.
Ae e pei ona saunoa mai Elder Claudio D. Zivic o le Fitugafulu: “E ese le olaga mo i tatou taitoatasi. E tofu i tatou uma ma se taimi e tofotofoina ai, se taimi mo le fiafia, se taimi mo le faia o faaiuga, se taimi mo le faatoilaloina o faalavefau, ma se taimi mo le faaaogaina o avanoa.”
O o tatou aafiaga e eseese ma o lea e faigata ai i auala eseese. E mafai ona tatou faailoa le faigata o lo tatou tulaga ma tulaga o isi e aunoa ma le fuaina o le tasi i le isi.
E Mafai Ona E Lagonaina Uma
Sa ou filifili e talanoa i o’u lagona ma se fomai, ma sa ia a’oa’oina a’u i se upumoni e suia ai le olaga, e uiga i lagona:
E mafai ona tatou lagonaina le tele o lagona i le taimi e tasi.
I le mae’a ai o le molimauina o taua ma finauga i le va o sa Nifae ma sa Lamana, sa tusia e le perofeta o Alema, “Ma ua faapea ona tatou vaai ai i le pogai tele o le faanoanoa, ma le olioli foi—o le faanoanoa ona o le oti ma faafanoga i totonu o tagata, ma le olioli ona o le malamalama o Keriso i le ola” (Alema 28:14).
Sa oo sa Nifaē i lagona o le faanoanoa ma le olioli.
Sa ou iloaina e mafai ona ou lagona le lē fiafia e uiga i o’u tofotofoga ao lagogaina foi le lotofaafetai ua ou ma’itaga.
Na aoao mai Elder Dieter F. Uchtdorf o le Korama a Aposetolo e Toasefululua:
“A tatou lotofaafetai i le Atua i o tatou tulaga, e mafai ona tatou lagonaina le filemu toafimalie i le lotolotoi o puapuaga. I taimi o faanoanoaga, e mafai lava ona sii ae o tatou loto i viiga. I o tatou tiga, e mafai lava ona tatou viia le Togiola a Keriso. …
“O le lotofaafetai i taimi o le faanoanoa e lē faapea ua tatou fiafia ai i tulaga ua tatou i ai. O lona uiga e ala i mata o le faatuatua e faapasi ai la tatou vaai i o tatou luitau o loo i ai i lenei taimi.”
E mafai ona tatou faatagaina i tatou lava e lagona o tatou lagona uma a o tatou faailoa atu foi le agaga faafetai i le Atua mo Ana faamanuiaga ma le alofa mutimutivale.
Na Puapuagatia le Faaola mo i Tatou Uma
Ina ua puapuagatia le Faaola i le taimi o Lana Togiola, Na te lei iloiloina taitasi tofotofoga uma ma aafiaga o le a tatou oo uma i ai, ona filifili lea o ni mea sa Ia manatu e sili ona leaga, ma mafatia ai mo na vaega lava na. Na ia tauaveina mea uma lava.
E aofia ai i lenei mea, e pei ona saunoa mai ai Elder Zivic, “a tatou agasala, tiga, faanoanoaga, mafatiaga, vaivaiga, ma atuatuvalega, ma ua Ia silafia ai la le auala e fesoasoani mai ai ia i tatou, le auala e uunaia ai i tatou, le auala e faamafanafana ai i tatou, ma le auala e faamalosia ai i tatou ina ia mafai ona tatou tumau ai ma maua le pale lea ua faapolopolo mo i latou e lē faatoilaloina.”
O le Togiola a Iesu Keriso E Lē Gata. A o tatou savalia faigata o le olaga ma le lugā ma lalō o tulaga faatinā, ia tatou faailoa atu le loto faafetai e le i’u i lo tatou Faaola, pe ma loimata pe ma le olioli, ma siitia e le tasi le isi.