Mai le AM Faalevaiaso
O Auala E 3 E Mafai Ona E Faia Ai Lau Uarota ma Ou Aiga
Afai o loo e sailia se faauoga ma se fesootaiga, vaai atu i tagata o lau uarota.
O le feso’ota’iga ma le faauo e mafai i nisi taimi ona lagona e le mafai ona ausia.
Ae pe o e saili e faia ni faauoga tumau, maua le malosi faaleagaga, pe faasoa atu au taleni, e mafai ona e fausia se nuu o le lagolago i totonu o lou aiga, o lau uarota lea.
Na saunoa mai Elder David L. Buckner o le Fitugafulu: “Ua ou vaai i le tautinoga a le Faaola ‘o a’u uo outou’ o se valaau manino e fausia ni sootaga maualuluga ma sili atu ona paia i fanau uma a le Atua ‘ina ia tasi i tatou’ [3 Nifae 19:23]. Tatou te faia lenei mea pe a tatou o mai faatasi e saili avanoa e soofaatasi ai ma se lagona o le avea ma ni ō mo i tatou uma.’”
Ua ia i tatou le mana e fatuina ai ni aafiaga ma ni sootaga maualuluga atu ma paia i totonu o a tatou aiga uarota.
Faatasi ai ma lena mea i le mafaufau, o auala nei e tolu e mafai ona e fausia ai se nuu e pei o se aiga ma tagata o lau uarota.
1. Aapa atu
Afai o e lagona le tuua toatasi i lau uarota, atonu e le na o oe le tagata o i ai lena tulaga. O le feso’ota’iga o le vaifofo lea mo le tuua to’atasi, o lea ia aapa atu ma fausia ni feso’ota’iga ma i latou o lo’o siomia oe. A o e auai i gaoioiga a le lotu ma le uarota, vaavaai mo isi e foliga mai foi o loo tuua toatasi. Faaaoga le polokalama o Meafaigaluega e a’oa’o ai igoa o tagata o lau uarota ma matau ai po o ai e le auai soo i gaoioiga. Aapa atu ia i latou ma valaaulia i latou tou te auai faatasi. E oo lava i se ataata po o se talo atu e mafai ona faia ai se eseesega i lagona o le faaaofiaina o se tasi.
Na saunoa mai Peresitene Henry B. Eyring, Fesoasoani Lua i le Au Peresitene Sili: “Ua tatou iloa mai aafiaga e o’o mai le olioli pe a faamanuiaina i tatou i le lotogatasi. E le mafai ona tuuina mai e le Tama Faalelagi ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou, e lē ‘au toatasi. E tatau ona tatou sailia ma agavaa i ai faatasi ma isi.”
A o e aapa atu i isi, aua nei galo ona aapa atu i le Tama Faalelagi ma ole atu ia te Ia mo se fesoasoani a o e galue e fesootai ma lau uarota ma saili tagata e mafai ona avea ma aiga e te manaomia. I le aluga o taimi, o au feso’ota’iga e mafai ona avea ma faigauo tumau.
2. Auauna atu
O le auauna atu e fesootai ai i tatou i isi i se auala faapitoa. E fesoasoani ia i tatou ia avea atili e faapei o Keriso, o le sa auauna atu i taimi uma ia i latou sa siomia o Ia. Na a’oa’o mai Sister Bonnie L. Oscarson, o le sa avea muamua ma Peresitene Aoao o Tamaitai Talavou, “Atonu na tuu e le Tama Faalelagi i latou o e manaomia i tatou e latalata atili mai ia i tatou, i le iloaina e sili ona fetaui i tatou e taulimaina o latou manaoga.”
O lou i ai i lau uarota e lē o se mea faafuasei. E silafia e le Tama Faalelagi manaoga ma taleni o Ana fanau uma ma ua Ia tuuina faatasi tagata o lau uarota mo se faamoemoega faapitoa. A o e auauna atu i tagata o lau uarota, atonu e te iloa ai o loo manaomia oe e se tasi ma au meaalofa faapitoa.
O le auauna atu ma le faamaoni i se tasi i lau uarota e tatalaina ai le faitotoa i se sootaga o le alofa, faatuatuaina, ma le lagolago.
3. Saili se Faufautua
O se faufautua e mafai ona oo mai i le tele o ituaiga ma e mafai ona fesoasoani ia te oe e faatautaia ai lūgā ma lālō o le taimi o le talavou matua. Mafaufau i se tasi i lau uarota e te vaai i ai pe faamemelo i ai. O a ni aafiaga po o ni uiga ua ia i latou e te manao e maua i lou olaga? O a ni mea e mafai ona e a’oa’o mai ia i latou?
Na saunoa mai Elder Ronald A. Rasband o le Korama a Aposetolo e Toasefululua, e faapea: “O se tagata e sili atu lona poto masani, ma faatuatuaina, e auauna atu o se taiala mataalia ma se faufautua i se tagata e le lava lona poto masani, e fesoasoani e mamanu le malamalama o lena tagata ma aoao atu mataupu faavae lea o le a fai ai o ia ma se auauna e sili atu le mataalia, malosi, atamai, ma sili atu le taua o se auauna a le Atua.”
A o e mafaufau i nei tagata i lou olaga, tatalo ia iloa po o ai e mafai ona e talosagaina e avea ma ou faiaoga. O le taimi lava e te filifili ai, faatulaga se taimi e feiloai ai ma i latou. Sau saunia ma ni fesili po o ni sini e te manao e galue ai ma fesili atu ia i latou pe latou te naunau e faufautua ia te oe ma fesoasoani ia te oe e ausia au sini.
Ia Tasi ma Keriso
Na aoao mai Elder Quentin L. Cook o le Korama a Aposetolo e Toasefululua, “O le ute o le auai moni o le tasi lea ma Keriso.”
E tusa lava po o a eseesega i le va o oe ma isi tagata o le uarota, i le avea ai ma tagata tausi feagaiga, e mafai ona e galulue ina ia tasi le tasi ma le isi ma Keriso.