ງານປັດສະຄາ

ການປົກປ້ອງໂດຍພຣະຜູ້ເປັນເຈົ້າ

ຟາໂຣບໍ່ຍອມປ່ອຍຊາວອິດສະຣາເອນໄປ, ສະນັ້ນພຣະຜູ້ເປັນເຈົ້າຈຶ່ງໄດ້ບອກໂມເຊວ່າ ພຣະອົງຈະສົ່ງໂຣກລະບາດຢ່າງສຸດທ້າຍມາ. ລູກຊາຍກົກຂອງທຸກຄອບຄົວໃນແຜ່ນດິນເອຢິບຈະຕາຍ, ແມ່ນແຕ່ລູກຫົວປີຂອງສັດລ້ຽງ.

ອົບພະຍົບ 11:1, 4–10

ພຣະຜູ້ເປັນເຈົ້າໄດ້ສັນຍາວ່າ ຖ້າຫາກຊາວອິດສະຣາເອນເຮັດຕາມຄຳແນະນຳຂອງພຣະອົງ, ໂຣກລະບາດຈະຜ່ານພວກເຂົາໄປ ແລະ ບໍ່ທຳຮ້າຍພວກເຂົາ.

ອົບພະຍົບ 12:3, 13, 23

ຜູ້ຊາຍກຳລັງທາເລືອດໃສ່ຂອບປະຕູ, ພວກເດັກນ້ອຍແນມເບິ່ງ

ພຣະຜູ້ເປັນເຈົ້າໄດ້ບອກຊາວອິດສະຣາເອນແຕ່ລະຄອບຄົວໃຫ້ຂ້າແກະເຖິກທີ່ບໍ່ມີບ່ອນຕຳນິໂຕໜຶ່ງ ແລະ ທາເລືອດໃສ່ຂອບປະຕູເຮືອນຂອງພວກເຂົາ.

ອົບພະຍົບ 12:4–7

ພຣະຜູ້ເປັນເຈົ້າໄດ້ບອກຊາວອິດສະຣາເອນໃຫ້ເຮັດອາຫານ ແລະ ກິນຊີ້ນແກະຢ່າງຮີບດ່ວນ. ຂະນະທີ່ພວກເຂົາກຳລັງກິນ, ພວກເຂົາຄວນນຸ່ງຖື ແລະ ກຽມພ້ອມທີ່ຈະໜີໄປ. ພຣະຜູ້ເປັນເຈົ້າໄດ້ກ່າວວ່າ ຖ້າຫາກຊາວອິດສະຣາເອນບໍ່ເຮັດສິ່ງເຫລົ່ານີ້, ລູກຊາຍກົກຂອງພວກເຂົາຈະບໍ່ລອດຈາກໂຣກລະບາດ.

ອົບພະຍົບ 12:8–11

ເປັນດັ່ງທີ່ພຣະຜູ້ເປັນເຈົ້າໄດ້ເຕືອນ, ໂຣກລະບາດໄດ້ເກີດຂຶ້ນ. ລູກຊາຍກົກຢູ່ໃນປະເທດເອຢິບໄດ້ຕາຍໄປ, ລວມທັງລູກຊາຍກົກຂອງຟາໂຣ. ແຕ່ໂຣກລະບາດໄດ້ຜ່ານກາຍແຕ່ລະເຮືອນທີ່ມີເລືອດແກະຕິດຢູ່ຂອບປະຕູ. ລູກຊາຍກົກຂອງຊາວອິດສະຣາເອນໄດ້ລອດຊີວິດ ຍ້ອນວ່າພວກເຂົາເຊື່ອຟັງພຣະຜູ້ເປັນເຈົ້າ.

ອົບພະຍົບ 12:12–13, 29–30

ຟາໂຣທີ່ໂສກເສົ້າໄດ້ບອກໂມເຊ ແລະ ອາໂຣນໃຫ້ໜີໄປ

ເມື່ອຟາໂຣໄດ້ເຫັນລູກຊາຍຂອງຕົນຕາຍຍ້ອນໂຣກລະບາດ, ເພິ່ນຈຶ່ງບອກໂມເຊ ແລະ ອາໂຣນໃຫ້ພາຊາວອິດສະຣາເອນໜີໄປຈາກປະເທດເອຢິບ.

ອົບພະຍົບ 12:31–33

ຊາວອິດສະຣາເອນໄດ້ໜີໄປ, ແຕ່ຟາໂຣຍັງໃຈຮ້າຍຢູ່. ເພິ່ນໄດ້ເຕົ້າໂຮມກອງທັບ ແລະ ລົດຮົບຂອງເພິ່ນ ແລະ ໄລ່ຕາມຊາວອິດສະຣາເອນໄປ.

ອົບພະຍົບ 12:37–41; 14:5–8

ຊາວອິດສະຣາເອນຕັ້ງຄ້າຍພັກຢູ່ທີ່ທະເລແດງ. ບໍ່ດົນຟາໂຣ ແລະ ກອງທັບຂອງເພິ່ນກໍໄດ້ມາເຖິງພວກເຂົາ. ເມື່ອຊາວອິດສະຣາເອນໄດ້ເຫັນຊາວເອຢິບກຳລັງມາ, ພວກເຂົາກໍເກີດຄວາມຢ້ານກົວ. ແຕ່ໂມເຊໄດ້ບອກຊາວອິດສະຣາເອນວ່າ ພຣະຜູ້ເປັນເຈົ້າຈະປົກປ້ອງພວກເຂົາ.

ອົບພະຍົບ 14:9–14

ໂມເຊໄດ້ຍົກໄມ້ຄ້ອນເທົ້າຂຶ້ນ, ທະເລແດງກໍແຍກອອກ

ຂະນະທີ່ຊາວເອຢິບໃກ້ຈະມາເຖິງ, ພຣະຜູ້ເປັນເຈົ້າໄດ້ບອກໂມເຊໃຫ້ຍົກໄມ້ຄ້ອນເທົ້າຂຶ້ນ. ໂມເຊກໍໄດ້ເຮັດຕາມ, ແລະ ພຣະຜູ້ເປັນເຈົ້າໄດ້ແຍກນ້ຳທະເລ. ຊາວອິດສະຣາເອນໄດ້ຂ້າມນ້ຳທະເລໄປເທິງດິນແຫ້ງ. ພວກເຂົາໄດ້ແລ່ນໜີຈາກຟາໂຣ ແລະ ກອງທັບຂອງເພິ່ນ.

ອົບພະຍົບ 14:15–16, 21–22

ກອງທັບເອຢິບໄດ້ໄລ່ຕາມຊາວອິດສະຣາເອນ. ເມື່ອຊາວອິດສະຣາເອນໄດ້ຂ້າມໄປຫາຟາກນ້ຳປອດໄພທຸກຄົນແລ້ວ, ພຣະຜູ້ເປັນເຈົ້າໄດ້ປ່ອຍນ້ຳລົງມາ. ກອງທັບເອຢິບໄດ້ຈົມນ້ຳຕາຍ.

ອົບພະຍົບ 14:23–30

ຊາວອິດສະຣາເອນໄດ້ເປັນອິດສະລະໃນທີ່ສຸດ. ພວກເຂົາໄດ້ຮ້ອງເພງ, ຟ້ອນລຳ, ແລະ ຂອບພຣະໄທພຣະຜູ້ເປັນເຈົ້າ. ພວກເຂົາໄດ້ຈື່ຈຳງານປັດສະຄາສະເໝີ ວ່າເປັນເວລາທີ່ພຣະຜູ້ເປັນເຈົ້າໄດ້ໂຜດຊີວິດຂອງພວກເຂົາ ແລະ ພາພວກເຂົາໜີຈາກປະເທດເອຢິບ.

ອົບພະຍົບ 14:31; 15:1–22