Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hotau Tuʻunga mo e Taumuʻa Fakalangí: Ko e Fānau Kitautolu ʻa e ʻOtuá

“Ko Hotau Tuʻunga mo e Taumuʻa Fakalangí: Ko e Fānau Kitautolu ʻa e ʻOtuá,” Fuakava Motuʻá – Tohi Lēsoni ʻa e Faiako Seminelí (2026)

“Ko Hotau Tuʻunga mo e Taumuʻa Fakalangí: Ko e Fānau Kitautolu ʻa e ʻOtuá,” Fuakava Motuʻá – Tohi Lēsoni ʻa e Faiako Seminelí

Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí: Lēsoni 173

Ko Hotau Tuʻunga mo e Taumuʻa Fakalangí

Ko e Fānau Kitautolu ʻa e ʻOtua

ʻOku fakahā ʻe he kau finemui ʻo e Siasí ʻi he funga ʻo e māmaní, “Ko ha ʻofefine ʻofeina au ʻo ha ongomātuʻa fakalangi, mo ha natula faka-ʻOtua mo e ikuʻanga taʻengata” (“Kaveinga ʻo e Kau Finemuí”). ʻOku pehē ʻe he kau talavoú, “Ko ha foha ʻofeina au ʻo e ʻOtuá, pea ʻoku ʻi ai Haʻane ngāue ke u fakahoko” (“Kaveinga ʻo e Kōlomu ʻo e Lakanga Taulaʻeiki Faka-ʻĒloné”). ʻE maʻu ʻe he kau akó ʻi he lēsoni ko ʻení ha faingamālie ke nau fakakaukau ki honau tuʻunga mo e taumuʻa fakalangí.

Teuteu ʻa e tokotaha akó: Fakaafeʻi e kau akó ke nau fakakaukau ki he laine ʻuluaki ʻo e “Kaveinga ʻo e Kau Finemuí” pe “Kaveinga ʻo e Kōlomu ʻo e Lakanga Taulaʻeiki Faka-ʻĒloné.” Te nau lava ʻo ʻahiʻahi ako maʻuloto ia pe lau maʻuloto tuʻo lahi ia ʻi he lolotonga e ʻahó. ʻE lava ke vahevahe ʻe he kau akó ʻa e founga naʻe tākiekina ai ʻe heʻenau fai ʻení ʻenau ngaahi tōʻongá pe ngaahi ngāué.

Ngaahi ʻEkitivitī Ako ʻOku Ala Fakahokó

Ko e fānau au ʻa e ʻOtuá!

ʻOku ʻi he kamataʻanga ʻo e kalasi semineli ko ʻení ha ngaahi lēsoni lahi ʻi he Fuakava Motuʻá ʻoku fakamatala ki hotau tuʻunga mo e taumuʻa fakalangí. Hangē ko ʻení, Lēsoni 3: “ʻĒpalahame 3,” Lēsoni 4: “Mōsese 1:1–11,” Lēsoni 5: “Mōsese 1:12–26,” mo e Lēsoni 8: “Sēnesi 1:26–27.” ʻE toe fakamanatu ʻe he lēsoni ko ʻení ʻa e ngaahi moʻoni fekauʻaki mo e tuʻunga fakalangí mei he ngaahi lēsoni kehe ʻo e Fuakava Motuʻá. ʻE lava ke hoko ia ko ha fakamanatu kapau kuo ako ʻe he kau akó ʻa e ngaahi lēsoni ko ʻení pe ko ha tomuʻa vakaiʻi ʻo e ngaahi lēsoni te nau ako ʻamui ange ʻi he seminelí.

Fakakaukau ke kamata e kalasí ʻaki hano fakaʻaliʻali ki he kau akó ha sioʻata. Fakaafeʻi kinautolu ke aleaʻi ʻa e ongo fehuʻi ko ʻení mo hanau hoa:

Ko e hā hono tuʻo lahi hoʻo sio ki ha sioʻata ʻi ha ʻaho?
Ko e hā ʻokú ke faʻa fakakaukau ki ai ʻi hoʻo sio ki ho ʻatá?

Fakakaukau ke ʻoange ha tatau ʻo e fakamatalá ni ki he tokotaha ako takitaha:

Naʻe fakahoko ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakaafe ko ʻení ki he toʻu tupú:

14:11

Ko e tokolahi ʻo kimoutolu ʻoku kamata homou ʻahó ʻaki hoʻomou sio ki he sioʻatá. Ko ʻapongipongí, uiké ni, taʻú ni, kiʻi tuʻu maʻu pē ʻo fakakaukau ʻi hoʻo sio kiate koe ʻi he sioʻatá. Fakakaukau pē kiate koe, pea kapau te ke loto ki ai peá ke lea leʻolahi, “Mani ē, sio kiate au! ʻOku ou fakaofo! Ko e fānau au ʻa e ʻOtuá! ʻOkú Ne ʻafioʻi au! ʻOkú Ne ʻofa ʻiate au!” (“Ngaahi Ueʻi ʻa e Laumālié,” Liahona, Nōvema 2023, 45)

Ke tokoni ke fakamamafaʻi e fakaafe ʻa ʻEletā Sitīvenisoní, te ke lava ʻo fakaafeʻi e kau akó ke nau tuʻu hake pea toe lau fakataha ʻene leá ʻo kamata ʻaki e “Mani ē, sio kiate au!”

ʻOange ha taimi ke fakalaulauloto ai e kau akó ki he ongo fehuʻi koʻení:

ʻOkú ke ongoʻi nai ʻoku moʻoni e lea ʻa ʻEletā Sitīvenisoni fekauʻaki mo koé? Ko e hā hono ʻuhingá?

ʻI hoʻo ako ʻa e ngaahi potufolofola ʻi he lēsoni ko ʻení, fakakaukau ki he founga ʻoku nau fekauʻaki ai mo koé. ʻI hoʻo fai iá, ʻe lava ke tokoni ʻa e Laumālie Māʻoniʻoní ke toe fakapapauʻi pe fakatupulaki hoʻo falala ki ho tuʻunga mo e taumuʻa fakalangí.

Ko ha sīpinga mei he folofolá

Fakakaukau ke tā ʻa e saati ko ʻení ʻi he palakipoé pea fakaafeʻi ʻa e kau akó ke hiki ia ʻi heʻenau tohinoa akó. Te ke lava ʻo fakasiʻisiʻi ʻa e lahi ʻo e ngaahi potufolofola ʻe ako ʻe he kau akó ʻo fakatatau mo e ngaahi fiemaʻu hoʻo kau akó pe taimi kalasí.

ʻOku tau ako lahi fekauʻaki mo hotau tuʻunga mo e taumuʻa fakalangí mei he ngaahi aʻusia mo e ngaahi akonaki ʻa e kakai ʻi he Fuakava Motuʻá. Neongo ko e konga lahi ʻo e ngaahi potufolofola ko ʻení ʻoku fekauʻaki ia mo e kakai ʻi he Fuakava Motuʻá, ka ʻe lava foki ke fakaʻaongaʻi ʻa e ngaahi moʻoní kiate kitautolu.

Kimuʻa pea kamata ako ʻe he kau akó e ngaahi potufolofola ko ʻení, mahalo ʻe tokoni ke ako fakataha ha taha ʻo e ngaahi potufolofolá. Ko ha founga ʻeni ʻe taha te ke lava ʻo fakahoko ai ʻeni.

Lau ʻa e Mōsese 1:3, 6, 12–13 pea kumi ʻa e faikehekehe naʻe hoko kia Mōsese ʻi heʻene ʻiloʻi ko ha fānau ia ʻa e ʻOtuá.

Ko e hā naʻá ke maʻú?

Mahalo kuo vahevahe ʻe he kau akó ha ngaahi moʻoni hangē ko e ko ha fānau au ʻa e ʻOtuá pea ʻoku ʻi ai Haʻane ngāue ke u fai pe ʻe lava ʻe he ʻiloʻi ko ha fānau au ʻa e ʻOtuá ʻo tokoniʻi au ke u ikunaʻi ʻa e ʻahiʻahí. Tā ʻi he palakipoé ha ngaahi foʻi tao mei he Mōsese 1:3, 6, 12–13 ki ha ngaahi foʻi siakale foʻou. Hiki ʻa e ngaahi moʻoni ko ʻení, pe ngaahi moʻoni kehe naʻe ʻilo ʻe he kau akó, ʻi he ngaahi siakale foʻou ko ʻení. ʻE lava ke fakaafeʻi e kau akó ke nau fai ʻa e meʻa tatau ʻi heʻenau tohinoa akó.

Kapau ʻe ʻaonga ki he kau akó ha fealeaʻaki lahi ange fekauʻaki mo e ngaahi moʻoni ko ʻení, fakakaukau ke fakaʻaongaʻi ʻa e naunau mei he Lēsoni 4: “Mōsese 1:1–11” mo e Lēsoni 5: “Mōsese 1:12–26.”

Kuo fakahoko fēfē ʻi hono ʻiloʻi ʻo e ngaahi moʻoni ko ʻení ha liliu ʻi hoʻo moʻuí (pe te ne fakahoko fēfē ha liliu)?
Ko e hā nai ha niʻihi ʻo e ngaahi ngāue ʻa e ʻOtuá ke ke fakahokó?

Ako mo fealeaʻaki ʻa e tokotaha akó

Fakakaukau ke vahevahe ʻa e kau akó ki ha ngaahi hoa pe ngaahi kulupu iiki pea ʻoange ʻa e fakahinohino ʻi laló. Te ke lava ʻo liliu ʻa e ngaahi fakahinohinó ʻo fakatatau mo e taimi kalasí.

Ngaahi Fakamatalá: Te ke lava ʻo fakaafeʻi e kau ako ʻoku nau lau ʻa e Sēnesi 1:26–27 ke vakai foki ki he palakalafi hono ua ʻo e “Ko e Fāmilí: Ko ha Fanongonongo ki Māmani” ke maʻu ha fakakaukau lahi ange. Kapau ʻoku ʻikai maheni e kau akó mo e talanoa ʻo Kuini ʻĒsetá, fakakaukau ke fakamatalaʻi ange ko ha fefine Siu ia ʻi Peasia naʻá ne fokotuʻu ʻene moʻuí ʻi ha tuʻunga fakatuʻutāmaki ke fakahaofi e kakai ʻa e ʻEikí mei he fakaʻauhá.

Lau ha potufolofola ʻe tolu pe lahi ange ʻi he toenga ʻo e ngaahi potufolofola ʻi he sātí.
Tā ʻi he saati ʻi hoʻo tohinoa akó ha ngaahi foʻi tao mei he ngaahi potufolofola takitaha ʻokú ke laú. Tā ha ngaahi siakale foʻou ʻi he ngataʻanga ʻo e ngaahi tao ko ʻení.
Hiki ʻi loto ʻi he ngaahi siakale foʻou ko ʻení ʻa e meʻa ʻoku akoʻi ʻe he potufolofola ko iá fekauʻaki mo ho tuʻunga pe taumuʻa fakalangí.
Aleaʻi mo hoʻo kulupú ʻa e founga kuo tokoniʻi ai ʻe he ngaahi akonaki ko ʻení hoʻo moʻuí pe ko e founga te nau lava ai ʻo fai ha liliú.

ʻI he ʻosi e ako ʻa e kau akó, te ke lava ʻo fakaafeʻi kinautolu ke tānaki atu ha ngaahi moʻoni naʻa nau ako ki he saati ʻi he palakipoé.

ʻOku hiki atu ʻi lalo ha ngaahi moʻoni naʻe malava ke ʻilo ʻe he kau akó, fakataha mo e ngaahi lēsoni ʻoku fekauʻaki mo iá.

ʻEpalahame 3:22–23. Naʻá ku nofo mo e Tamai Hēvaní, ko ha taha ʻo ʻEne fānau fakalaumālié kimuʻa pea fanauʻi aú. Vakai, Lēsoni 3: “ʻĒpalahame 3.”

ʻĒpalahame 3:24–26. Kuo ʻomi au ki māmani ke vakai pe te u tauhi e ngaahi fekau ʻa e ʻOtuá.

Sēnesi 1:26–27. Ko ha fānau au ʻa ha ongomātuʻa fakalangi, naʻe faʻu ʻi hona tataú. Vakai, Lēsoni 8: “Sēnesi 1:26–27.” Vakai foki ki he palakalafi ua ʻo e “Ko e Fāmilí: Ko ha Fanongonongo ki Māmani.”

ʻĒseta 4:14. ʻOku tuku au ʻe he Tamai Hēvaní ʻi ha ngaahi tūkunga te u lava ai ʻo tokoni ke fakahoko ʻEne ngāué. Vakai, Lēsoni 94: “ʻĒseta Konga 1.”

Saame 82:6. Ko e fānau au ʻa e ʻOtuá pea ʻoku ou malava ke hoko ʻo hangē ko Iá.

Selemaia 1:5. Kimuʻa pea fanauʻi aú, naʻe ʻafioʻi au ʻe he ʻEikí ʻo ʻomi ha ngaahi fatongia pau ke u fakahoko ʻi he moʻui fakamatelié. Vakai, Lēsoni 130: “Selemaia 1.”

Malakai 2:10. Ko e fānau kotoa kitautolu ʻa e ʻOtuá pea ʻoku totonu ke tau feangaleleiʻaki.

Te ke lava ʻo fili ha niʻihi ʻo e ngaahi fakamatala kuo hiki ʻe he kau akó ʻi he palakipoé pea aleaʻi kinautolu ʻo fakaʻaongaʻi ʻa e naunau mei he lēsoni ʻoku fekauʻaki mo iá. Vakai ki he fakaʻosinga ʻo e lēsoni ko ʻení ki ha tatau kakato ʻo e fakatātaá. Pe ko hoʻo fai ha fehuʻi ʻe taha pe lahi ange hangē ko ʻení:

ʻOkú ke pehē ko e hā ʻoku mahuʻinga ai ke ʻiloʻi ʻa e moʻoni ko ʻení?
Ko e hā ha ngaahi aʻusia kuó ne tokoniʻi koe ke ke tui ʻoku moʻoni ʻení?
ʻE tākiekina fēfē ʻe heʻetau ʻiloʻi ʻa e tuʻunga mo e taumuʻa fakalangi ʻa e niʻihi kehé ʻa e founga ʻoku tau feohi ai mo kinautolú?

Te ke lava ʻo fakaʻaliʻali ʻa e fakamatala ko ʻení ko ha konga ʻo e fealēleaʻaki fekauʻaki mo e fehuʻi kimuʻá:

Naʻe kōlenga mai ʻa Palesiteni Lāsolo M. Nalesoni ke tau fakaʻapaʻapaʻi e fānau kotoa ʻa e ʻOtuá ʻi heʻene pehē:

18:51

ʻOku tau takitaha moʻona ha tuʻunga malava fakalangi koeʻuhí ko e fānau kitautolu takitaha ʻa e ʻOtuá. ʻOku tau tuʻunga tatau kotoa ʻi Hono ʻaó. ʻOku mahuʻinga ʻa e ngaahi fakamatala ʻo e moʻoni ko ʻení. ʻE kāinga, kātaki ʻo fakafanongo lelei ki he meʻa ʻoku ʻai ke u lea ʻakí. ʻOku ʻikai ʻofa ʻa e ʻOtuá ʻi ha matakali ʻe taha ʻo laka ange ʻi ha matakali ʻe taha. ʻOku mahino ʻEne tokāteliné ʻi he meʻa ko ʻení. ʻOkú Ne fakaafeʻi ʻa e taha kotoa ke haʻu kiate Ia, “ʻa e ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine’” [2 Nīfai 26:33].

ʻOku ou fakapapauʻi atu ʻoku ʻikai ke makatuʻunga hoʻo tuʻu ʻi he ʻao ʻo e ʻOtuá ʻi he lanu ho kilí. ʻOku makatuʻunga ʻa e hōifua mo e ʻikai ke hōifua mai ʻa e ʻOtuá mei hoʻo tauhi mateaki ki he ʻOtuá mo ʻEne ngaahi fekaú kae ʻikai ko e lanu ho kilí.

ʻOku ou loto-mamahi ʻi he foua ʻe hotau kāinga lanu ʻUliʻulí ʻi he funga ʻo e māmaní ʻa e mamahi ʻo e laulanú mo e loto-fakamāú. ʻI he ʻahó ni ʻoku ou kole ki hotau kāingalotu ʻi he feituʻu kotoa pē ke nau taaimuʻa ʻi hono siʻaki ʻa e ngaahi ʻulungaanga mo e tōʻonga ʻo e faifakamāú. ʻOku ou kole atu ke tau poupouʻi ʻa e fakaʻapaʻapá ki he kotoa ʻo e fānau ʻa e ʻOtuá.

Ko e fehuʻi kiate kitautolú kotoa, ʻe tatau ai pē pe ko e hā ʻa e matakalí, ʻoku tau kei tatau pē. ʻOkú ke loto-fiemālie ke tuku ke lāngilangiʻia ʻa e ʻOtuá ʻi hoʻo moʻuí? (“Tuku ke Lāngilangiʻia ʻa e ʻOtuá,” Liahona, Nōvema 2020, 94)

Fakaʻosí

Fakakaukauloto ʻi hoʻo mavahe mei he seminelí, naʻe pehē atu ʻe ha tokotaha ako ʻe taha: “ʻOku ʻikai ke u fuʻu fakapapauʻi e ngaahi meʻa ne tau ako he ʻaho ní. ʻOkú ke tui moʻoni nai ki he ngaahi meʻa kotoa ko ē fekauʻaki mo hotau tuʻunga mo e taumuʻa fakalangí?”

Fakakaukau ki he ngaahi meʻa naʻá ke ako mo ongoʻí. Hiki ʻi hoʻo tohinoa akó ha tali nounou te ke lava ʻo vahevahe mo hoʻo kaungāmeʻá.

Fakaafeʻi ha niʻihi ʻo e kau akó ke nau vahevahe e meʻa kuo nau tohí. Poupouʻi e kau akó ke fokotuʻu e lea ʻa ʻEletā Sitīvenisoní ʻi ha sioʻata ʻoku nau faʻa fakaʻaongaʻi, koeʻuhí ke nau lava ʻo muimui ki heʻene fakaafé. ʻOku ʻomi ʻe he fakatātā ko ʻení ha ngaahi fakakaukau ki he founga ʻe lava ke ʻasi ai ʻa e saati kuo fakakakató hili hono fakaʻosi ʻe he kau akó ʻa e ʻekitivitī akó.

Ngaahi Maʻuʻanga Tokoni Kehé

ʻE hoko fēfē ha meʻa makehe ʻi heʻeku moʻuí ʻi hono ʻiloʻi hoku tuʻunga fakalangí?

Naʻe akonaki ʻa Palesiteni Lāsolo M. Nalesoni ʻo pehē:

ʻOku liliu ʻe he anga hoʻo fakakaukau ki hoʻo tuʻunga totonú, ʻa e meimei fili kotoa pē te ke fakahokó. (“Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], Gospel Library)

Naʻe fakamatala ʻa Brother Palaieni K. ʻEsitoni, ko e palesiteni ʻo e BYU–Pathway Fakaemāmani Lahí ʻo pehē:

ʻOku liliu ʻe he mahino ʻoku tau maʻu ki hotau tuʻunga totonú ʻa ʻetau fakakaukaú, ngaahi holí, mo ʻetau ngaahi ngāué. ʻOku tokoni ia ke tau tokanga taha ki he ngaahi meʻa te ne ʻai ke tau fiefia moʻoní. (“Our True Identity” [BYU–Pathway Worldwide devotional, Jan. 10, 2023], byupathway.edu)

ʻOku ʻuhinga ki he hā ke hoko ko ha fānau ʻa e ʻOtuá?

Naʻe vahevahe ʻe Palesiteni Tieta F. ʻUkitofa, lolotonga ʻene hoko ko ha tokoni ʻi he Kau Palesitenisī ʻUluakí, ʻo pehē:

25:30

Manatuʻi ʻokú ke kau ki ha fale fakatuʻi ʻo e puleʻanga ʻo e ʻOtuá, ko ha [fānau] kimoutolu ʻo ha Ongomātuʻa Fakalangi, ʻokú Na puleʻi ʻa e ʻunivēsí.

ʻOku mou maʻu e DNA fakalaumālie ʻo e ʻOtuá. ʻOku mou maʻu ha ngaahi meʻafoaki mahuʻinga ko e tukuʻau mai mei homou fakatupu fakalaumālié lolotonga hoʻomou ʻi he maama fakalaumālié. Ko e fānau kimoutolu ʻo ʻetau Tamai Hēvani mohu ʻaloʻofa mo taʻengatá. (“Tautehina ʻe Toko Tolú,” Liahona, Nōvema 2017, 17)

Ko e hā ʻoku finangalo ai ʻa e ʻEikí ke u ʻiloʻi hoku tuʻunga fakalangí?

Naʻe fakamatala ʻe Palesiteni Lāsolo M. Nalesoni ʻo pehē:

ʻE malava ke fakafiefia ʻa e ngaahi hingoá mo fakahaaʻi hoʻo poupoú ʻi ha faʻahinga meʻa lelei pē. Ka ʻo kapau ʻe fetongi ʻe ha faʻahinga hingoa ʻa e meʻa mahuʻinga taha ʻoku ʻiloʻi ʻaki koé, ʻe malava pē ke ke faingataʻaʻia fakalaumālie. ʻOku ou tui kapau naʻe folofola fakahangatonu atu e ʻEikí kiate koe, ko e ʻuluaki meʻa te Ne fakapapauʻi ʻoku mahino kiate koé ʻa ho tuʻunga totonú. Siʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá.

ʻOku ʻikai totonu ke hanga ʻe ha toe meʻa ʻo tekeʻi, fetongi, pe mahuʻinga ange ʻi he ngaahi tuʻunga tuʻuloa ʻe tolu ko ʻení:

Fānau ʻa e ʻOtuá

Fānau ʻo e fuakavá

Ākonga ʻa Sīsū Kalaisi

Ka ʻi ai ha faʻahinga meʻa ʻoku ʻikai fenāpasi mo e ngaahi tefitoʻi meʻa ʻe tolu ko iá, ʻe iku siva ai ho ʻamanakí. ʻOua naʻá ke maʻuhala ai: ʻOku faka-ʻOtua ho ivi malavá. ʻI hoʻo fekumi faivelengá, ʻe fakahoʻata atu ʻe he ʻOtuá ʻa e tuʻunga te ke ala aʻusiá. (Instagram, July 20, 2022, instagram.com/russellmnelson)

Ngaahi ʻEkitivitī Fakalahi ki he Akó

Ko e fanongonongo ki he fāmilí

Fakamatalaʻi ange ʻe lava ke fakalahi ʻi hono ako e tokāteline ʻo e fāmilí ʻetau mahino ki hotau tuʻunga mo e taumuʻa fakalangí.

Fakaafeʻi ha ngaahi kulupu ʻo e kau akó ke nau ako ha palakalafi kehe mei he “Ko e Fāmilí: Ko ha Fanongonongo ki Māmani.” Fakaafeʻi ke nau kumi ha ngaahi akonaki ʻe lava ʻo tokoni ke mahino lelei ange kiate kitautolu hotau tuʻunga mo e taumuʻa fakalangí.

Te ke lava ʻo fakaafeʻi e kau ako naʻa nau ako ha ngaahi palakalafi kehekehé ke nau fevahevaheʻaki ʻa e meʻa ne nau akó.

Faʻu ha fakamatala fakanounou ʻoku poupouʻi ʻe he folofolá

ʻI he ʻosi hono ako ʻe he kau akó ʻa e sātí, fakaafeʻi ke nau hiki ha fakamatala fakanounou ʻo honau tuʻunga mo e taumuʻa fakalangí. Fakahinohinoʻi kinautolu ke fakaʻaongaʻi e ngaahi kupuʻi lea ne nau hiki takai ʻi he sātí pea ke fakakau ha potufolofola hili ʻa e sētesi takitaha. Te ke lava ʻo fakaʻaliʻali ʻeni ke tokoni ke nau kamata ʻaki:

Ko e fānau au ʻa ha ongomātuʻa fakalangi, naʻe fakatupu ʻi hona tataú (vakai, Sēnesi 1:26–27 mo e “Ko e Fāmilí: Ko ha Fanongonongo ki Māmani”). Kimuʻa peá u haʻu ki māmaní …

Ko hono ʻiloʻi pe ko hai kitautolú

Te ke lava ʻo vahevahe ha sīpinga ʻo e founga ʻe lava ke fakahoko ai ha meʻa makehe ʻi heʻetau moʻuí ʻi hono ʻiloʻi hotau tuʻunga mo e taumuʻa fakalangí ʻaki hono huluʻi e vitiō “Te ke Lava ke Tānaki ʻa ʻIsileli!” mei he taimi 0:35 ki he 3:03. Naʻe vahevahe ʻe ʻEletā ʻAmati S. Kōpiti ʻo e Kau Fitungofulú ʻa e founga naʻá ne maʻu ai ha loto-toʻa ke ʻalu ʻo ngāue fakafaifekau ʻi heʻene ʻiloʻi hono tuʻunga fakalangí.

10:53

Pe ko hoʻo huluʻi ʻa e “Ko e Fānau Koā Au ʻa e ʻOtuá?“ mei he taimi 3:24 ki he 5:23. Naʻe vahevahe ʻe ʻEletā Palaieni K. Teila ʻo e Kau Fitungofulú ha talanoa ʻo ha finemui naʻá ne ikunaʻi ha tūkunga faingataʻa ʻi heʻene ako ʻiate ia pē ko ha fānau ia ʻa e ʻOtuá.

10:24

Ko e mahino ki he tuʻunga tangata pe fefiné

Mahalo ʻe ʻi ai ha ngaahi fehuʻi ʻa e kau akó fekauʻaki mo e tuʻunga tangata pe fefiné ʻi heʻenau laukonga fekauʻaki mo hono fakatupu ʻo e kakai tangatá mo e kakai fefiné ʻi he Sēnesi 1:26–27. Te ke lava ʻo maʻu ha fakamatala lahi ange mo ha ngaahi ʻekitivitī ʻe ala fakahoko ʻi he konga “Ngaahi ʻEkitivitī Fakalahi ki he Akó” ʻi he Lēsoni 8: “Sēnesi 1:26–27.”