Talateu ki he Fuakava Motuʻá – Tohi Lēsoni ʻa e Faiako Seminelí

Ko e ako fakataha mo e folofola ʻi he Haʻu, ʻo Muimui ʻIate Aú ko ha founga mahuʻinga ia ke teuteu ai ke akoʻi ʻa e kau akó. ʻOku fiemaʻu ʻe he ngaahi lēsoni ʻi he tohi lēsoni ko ʻení ha faiako ʻokú ne ako maʻu pē ʻa e ngaahi folofolá mo fekumi ki he takaua ʻo e Laumālie Māʻoniʻoní. ʻI hoʻo fai ʻení, te ke lava ʻo maʻu ha loto-falala ʻe ueʻi koe ʻe he Tamai Hēvaní ʻo fakafou ʻi Hono Laumālié ki he founga ke fakaʻaongaʻi ai e naunau ko ʻení ke feau e ngaahi fiemaʻu hoʻo kau akó.

ʻOku ʻoatu ha vakai fakalūkufua ʻi he kamataʻanga ʻo e uike takitaha ʻo e ngaahi lēsoni ʻo e Fuakava Motuʻá pea ʻi he kalasi takitaha ʻo e ngaahi lēsoni Teuteu ki he Moʻuí. ʻOku ʻomi ʻe he ngaahi vakai fakalūkufua ko ʻení ha fakamatala ki ha lēsoni pau ke tokoni ke ke teuteu kei taimi ʻa e naunau fakafaiakó, kau ai ʻa e ngaahi meʻá ni:

• Ngaahi taumuʻa ʻo e lēsoní (ʻoku fakakau foki ʻeni ko e sētesi fakaʻosi ʻo e talateu ki he lēsoni takitaha)

• Ngaahi fakakaukau ki he teuteu ʻa e tokotaha akó

• Ko ha lisi ʻo ha ngaahi lēsoni fakataumuʻa, ʻū laʻipepa tufa, ngaahi ʻata, ngaahi vitiō, pe ʻū naunau kehe ʻe ala fiemaʻu ke tomuʻa teuteuʻi kimuʻa

ʻOku ʻi he vakai fakalūkufua takitaha ʻoku ʻi muʻa ʻi he ngaahi lēsoni ʻo e Fuakava Motuʻá ha tokoni fakafaiako ʻokú ne fakamatalaʻi ha ngaahi founga ʻoku fokotuʻu atu pe tefitoʻi moʻoni mei he Ko e Faiako ʻi he Founga ʻa e Fakamoʻuí: Maʻanautolu Kotoa ʻOku Faiako ʻi ʻApi mo e Siasí. ʻOku fakaʻilongaʻi ʻa e ngaahi tokoni ko ʻení ʻaki ʻa e fakaʻilongá ni: . ʻI hoʻo ongoʻi mateuteú, feinga ke fakahoko e ngaahi founga mo e ngaahi tefitoʻi moʻoni ko ʻení lolotonga hoʻo faiakó. Te ke fakatokangaʻi ʻe lava ke tokoni hono fakaʻaongaʻi ʻo e ngaahi fokotuʻu ko ʻení ke fakatupulaki hoʻo ngaahi taukei fakafaiakó.

ʻOku tuhu e lahi taha ʻo e ngaahi tokoni fakafaiakó ki ha lēsoni ʻokú ne fakahoʻata ʻa e founga pe tefitoʻi moʻoni ʻoku fokotuʻu atú. ʻOku fakahaaʻi ʻe he fakaʻilonga ako ʻi he ngaahi meʻa mahuʻinga ʻo e lēsoní ha sīpinga ʻo e founga hono fakaʻaongaʻi ʻo e tokoní. ʻOku fakamamafaʻi ʻe he ngaahi tokoni fakaako ko ʻení ʻa e Fakatupulaki Ngaahi Taukei ʻa e Faiakó ʻa ia ʻe lava ʻo tokoni ke ke ako lahi ange fekauʻaki mo e ngaahi founga ʻoku fokotuʻu atú pe ngaahi tefitoʻi moʻoni ʻoku fakamamafaʻí. ʻE lava ke tokoni hono fakahoko ʻo e ngaahi founga mo e ngaahi tefitoʻi moʻoni ko ʻení ke fakatupulaki hoʻo ngaahi taukei fakafaiakó.

ʻOku fakakau ʻi he lahi taha ʻo e ngaahi vakai fakalūkufua ki he faʻahinga ʻo e ngaahi lēsoni Teuteu ki he Moʻuí ha ngaahi fokotuʻu ki he vave hono akoʻí. ʻOku ʻomi ʻe he ngaahi fokotuʻu ko ʻení ha ngaahi fakakaukau ki he taimi ke fakakau ai ʻa e ngaahi lēsoni ko ʻení ʻi ha fakahinohino ki he vave hono akoʻí. ʻE lava ke fakaʻaongaʻi ʻe he kau kouʻōtineitá mo e kau pule ʻo e polokalamá ʻa e ngaahi fokotuʻu ko ʻení ʻi heʻenau faʻu ʻenau fakahinohino ki he vave hono akoʻí.

Hangē ko ʻení, vakai ki he fokotuʻu ki he vave hono akoʻí ʻi he Vakai Fakalūkufua ki hono Langa Hake ʻo e Moʻui Fakafalala pē Kiate Kitá.

ʻOku fakakau foki ʻi he vakai fakalūkufua takitaha ha ngaahi fokotuʻu ki hono fakaafeʻi ʻo e kau akó ke teuteuʻi honau ʻatamaí mo e lotó ki he lēsoni takitaha. Te ke lava ʻo toe vakaiʻi e ngaahi fakakaukau ko ʻení ʻi he kamataʻanga ʻo e uiké peá ke fili ʻi he faʻa lotu ʻa e ngaahi fakakaukau ʻokú ke ongoʻi te ne tokoniʻi lelei taha hoʻo kau akó. ʻOku ʻikai fiemaʻu ke ke fakaʻaongaʻi ʻa e fokotuʻu kotoa pē ki he teuteu ʻa e tokotaha akó. Te ke lava ʻo fakafenāpasi kinautolu pe faʻu haʻo ngaahi fakakaukau pē ʻaʻau. ʻOku fakataumuʻa ʻa e ngaahi fakaafe ko ʻeni ʻoku fokotuʻu atú ke ʻoange ki he kau akó ʻi ha ʻaho ʻe taha pe lahi ange kimuʻa ʻi he aʻusia fakaakó.

ʻOku ʻi he lēsoni takitaha ha ngaahi fakakaukau ki ha ngaahi founga te ke lava ai ʻo fakahoko ʻa e aʻusia fakaakó. Ke maʻu ʻe hoʻo kau akó ʻa e aʻusia lelei taha ʻe ala lavá, fakaʻaongaʻi ʻa e fakamatala ʻi he konga ko ʻení ko ha fakahinohino kae ʻikai ko ha fakamatala ke muimui pau ki ai. Kapau ko hoʻo toki kamata ʻeni ke hoko ko ha faiako seminelí, ʻe lelei taha ke kamata ʻaki haʻo muimui ofi ki he ngaahi ʻekitivitī ako kuo fokotuʻu atú. ʻI he lahi ange hoʻo aʻusiá, ʻe tupulaki hoʻo malava ko ia ke fulifulihi ʻa e kakano ʻo e tohi lēsoni ko ʻení ke feau lelei taha ʻa e ngaahi fiemaʻu hoʻo kau akó.

ʻE lahi ha ngaahi ʻekitivitī ako ʻoku fokotuʻu atu te nau fakaafeʻi ʻa e kau akó ke nau fakaʻaongaʻi ha tohinoa ako. ʻOku ʻi ai ha PDF tohinoa ako ʻoku maʻu ʻi he ChurchofJesusChrist.org/si/seminary/manuals. ʻI he feituʻu ʻoku maʻu aí, ʻe lava foki ke fakaʻaongaʻi ʻe he kau akó ʻa e polokalama notebook ʻi he Gospel Library app ke tali ʻaki e ngaahi fiemaʻu tohinoa ʻi he ngaahi lēsoní.

Te ke fakatokangaʻi ʻi he ngaahi lēsoní ha fanga kiʻi puha ʻoku ʻi ai ha ngaahi fakahinohino fakafaiako maʻá e kau faiakó. ʻOku fokotuʻutuʻu ʻa e ngaahi fakahinohino ko ʻení ke tokoni atu ke ke teuteu mo fakaʻaongaʻi e ngaahi ʻekitivitī ako ʻoku fokotuʻu atu ʻi he lēsoní. ʻE lava ke nau fakamatalaʻi ʻa e taumuʻa ʻo e ngaahi ʻekitivitī ʻo e lēsoní pe ʻomi ha ngaahi fokotuʻu ki he founga hono liliu ʻa e lēsoní ke feau lelei ange ai ʻa e ngaahi fiemaʻu ʻa e kau akó. ʻE lava ke kau ʻi he ngaahi fokotuʻu ko ʻení ha ngaahi founga, fehuʻi, pe ʻekitivitī ʻe tokoni atu ke ke liliu ʻa e kanotohí mo e ngaahi ʻekitivitií ʻo ka fiemaʻu.

Ko e lahi taha ʻo e ngaahi lēsoní ʻoku ʻi ai ha konga “Ngaahi Maʻuʻanga Tokoni Kehe” ʻi he fakaʻosinga ʻo e lēsoní. ʻOku kau ʻi he konga ko ʻení ha fakamatala ʻe lava ʻo tokoni ke fakaloloto ʻa e akó. Te ke lava ʻo maʻu ai ha ngaahi fehuʻi ʻe ala maʻu ʻe he kau akó mo ha ngaahi fakamatala ʻa e kau taki ʻo e Siasí ʻe ala tokoni ke tali e ngaahi fehuʻi ko ʻení. ʻE lava ke fakakau ʻa e ngaahi fakamatala ko ʻeni mei he kau taki ʻo e Siasí ʻi he lēsoní. ʻOku maʻu pē ʻa e konga ko ʻení ʻi he polokalama Gospel Library pe Gospel Library ʻi he ʻinitanetí ʻi he ChurchofJesusChrist.org. ʻOku ʻikai fakakau ʻa e konga “Ngaahi Maʻuʻanga Tokoni Kehé” ʻi he tatau PDF ʻo e tohi lēsoni ʻa e faiakó.

ʻOku ʻi he konga ko ʻení, ʻa ia ʻoku fakakau foki ʻi he fakaʻosinga ʻo e lēsoní, ha ngaahi fakakaukau lahi ange ki hono fakahoko ‘a e aʻusia fakaakó. ʻOku kau ʻi he ngaahi ʻekitivitī ako ko ʻení ha ngaahi founga ke fulifulihi ai ʻa e ngaahi ʻekitivitī lolotonga ʻi he lēsoní, pe ngaahi founga ke akoʻi ʻaki ʻa e naunau ʻoku ʻikai fakakau ʻi he lēsoní. ʻOku toki fakakau pē ʻa e ngaahi ʻekitivitī ako ʻoku tānaki atú ʻi he tohi lēsoni ʻa e faiakó kapau ʻokú ke maʻu ia ʻi he polokalama Gospel Library pe ko e Gospel Library ʻi he ʻinitanetí ʻi he ChurchofJesusChrist.org. ʻOku ʻikai fakakau ʻa e konga ko ʻení ʻi he tatau PDF ʻo e tohi lēsoni ʻa e faiakó.

ʻOku totonu ke fakatou akoʻi ki he kau akó ʻa e ngaahi lēsoni ʻo e Fuakava Motuʻá mo e ngaahi lēsoni Teuteu ki he Moʻuí ʻi he taʻú kakato. ʻE lava ke tokoni atu ʻa e fakamatala ko ʻení ke mahino kiate koe ʻa e taumuʻa ʻo e ngaahi lēsoni kehekehe ʻi he tohi lēsoni ʻa e faiakó.

ʻOku fekauʻaki ʻa e ngaahi lēsoni ʻo e Fuakava Motuʻá mo e ngaahi konga folofola ʻoku fakamamafaʻi ʻi he uike takitaha ʻi he Haʻu, ʻo Muimui ʻIate Aú. ʻOku ʻoange ʻe he ngaahi lēsoni ko ʻení ha ngaahi faingamālie ki he kau akó ke nau maʻu ha ngaahi aʻusia loloto ange ʻi hono ako e folofola ʻa e ʻOtuá ʻi he Fuakava Motuʻá. ʻOku fakakau ʻa e ngaahi lēsoni Akoako Fakataukei Fakatokāteliné mo e Siviʻi Hoʻo Akó ʻi he konga lēsoni ʻo e Fuakava Motuʻá ʻi he tohi lēsoní.

ʻOku fakataumuʻa ʻa e ngaahi lēsoni Akoako Fakataukei Fakatokāteliné ke tokoniʻi ʻa e kau akó ke nau ngāue ke maʻu ʻa e ngaahi ola ʻo e fakataukei fakatokāteliné. ʻOku kau ʻi he ngaahi ola ko ʻení ʻa hono tokoniʻi ʻo e kau akó ke fakahoko ʻa e ngaahi meʻá ni:

Ako mo fakaʻaongaʻi ʻa e ngaahi tefitoʻi moʻoni fakalangí ki hono maʻu ʻo e ʻilo fakalaumālié.

Taukei ʻi he ngaahi potufolofola fakataukei fakatokāteliné mo e tokāteline ʻo e ongoongolelei ʻo Sīsū Kalaisí ʻoku nau akoʻí.

ʻOku ʻuhinga hono ako maʻuloto ʻo e ngaahi potufolofola kuo filí pea mo e tokāteline ʻo e ongoongolelei ʻo Sīsū Kalaisí ʻoku akoʻi ʻe he ngaahi potufolofola ko ʻení, ʻe lava ke fakahoko ʻe he kau akó ʻa e ngaahi meʻá ni:

ʻIloʻi mo maʻu ha mahino ki he tokāteline naʻe akoʻi ʻi he ngaahi potufolofola fakataukei fakatokāteliné.

Fakamatalaʻi mahino ʻa e tokāteliné ʻo fakaʻaongaʻi e ngaahi potufolofola fakataukei fakatokāteline ʻoku fekauʻaki mo iá.

Fakaʻaongaʻi ʻa e tokāteline ʻo e ongoongolelei ʻo Sīsū Kalaisí pea mo e ngaahi tefitoʻi moʻoni ki hono maʻu ʻo e ʻilo fakalaumālié ʻi heʻenau ngaahi fili fakaʻahó pea ʻi heʻenau ngaahi tali ki he ngaahi palopalema mo e ngaahi fehuʻi fakatokāteline, fakataautaha, fakasōsiale, mo fakahisitōliá.

Manatuʻi mo ʻiloʻi ʻa e ngaahi potufolofola fakataukei fakatokāteliné pea ako maʻuloto ʻa e ngaahi kupuʻi lea folofola mahuʻingá.

ʻE lava ke tokoni ʻa e Polokalama Fakataukei Fakatokāteliné ke aʻusia ʻe he kau akó ha niʻihi ʻo e ngaahi ola ʻo e fakataukei fakatokāteliné. ʻOku fakataumuʻa ia ke tokoni ki he kau akó ke nau ako maʻuloto e fakamoʻoni fakafolofolá mo e kupuʻi lea mahuʻinga ʻo e folofolá ki he ngaahi potufolofola fakataukei fakatokāteline takitaha. Mahalo te ke fie fakaʻaongaʻi ʻa e polokalamá ʻi he kalasí pea poupouʻi e kau akó ke nau download ia ʻi heʻenau meʻangāue fakaʻilekitulōniká, kapau ʻe lava. ʻOku maʻu atu ia ʻi he ngaahi meʻangāue iOS mo e Android.

Ke maʻu ha fakamatala lahi ange fekauʻaki mo e ngaahi taumuʻa ʻo e fakataukei fakatokāteliné, mamataʻi e “What Is Doctrinal Mastery?” (3:56), ʻoku maʻu ʻi he ChurchofJesusChrist.org.

3:56

Ko e siví ko ha konga mahuʻinga ia ʻo e akó. ʻE lava ke hoko ʻa e ngaahi faingamālie ke kiʻi taʻofi ai mo fakakaukau ki he akó ko ha aʻusia lelei maʻá e kau akó. ʻE lava ke fakaʻaiʻai ʻa e kau akó ʻe he ngaahi sivi ʻoku faʻa faí ʻi he hokohoko atu ʻenau tupulakí mo e fakalakalaka ke hoko ʻo hangē ange ko e Tamai Hēvaní mo Sīsū Kalaisí. ʻI hono siviʻi e ako ʻa e kau akó, ʻe lava ke nau kau longomoʻui mai leva ʻi he akó pea nau haʻisia lahi ange ai ki heʻenau akó.

ʻOku ʻoange ʻe he ngaahi lēsoni Siviʻi Hoʻo Akó ha ngaahi faingamālie ki he kau akó ke nau fakamatalaʻi ʻa e tokāteline mahuʻinga mei he Fuakava Motuá; fakakaukau ki heʻenau ngaahi ongó, tōʻongá, mo e ngaahi holi fekauʻaki mo e palani ʻa e Tamai Hēvaní pea mo e ongoongolelei ʻo Sīsū Kalaisí; pea toe vakaiʻi e ngaahi palani pe ngaahi taumuʻa ʻoku nau ngāue ki aí ke fakaʻaongaʻi ʻa e meʻa ʻoku nau akó pea fakaloloto ʻenau ului kia Sīsū Kalaisí. ʻE lava ke tokoni ʻa e ngaahi lēsoni ko ʻení ke fakatokangaʻi ʻe he kau akó ʻenau tupulakí mo ʻiloʻi ʻa e ngaahi tafaʻaki ke fakalakalaka lahi ange ai ʻi he kahaʻú. ʻE maʻu ʻe he kau akó ha maaka ki he kalasí ʻaki ʻenau kau ʻi ha lēsoni Siviʻi Hoʻo Akó ʻe taha pe lahi ange ʻi he konga takitaha ʻo e kalasí.

Ki ha fakamatala lahi ange fekauʻaki mo e founga ke fakahoko ai ʻa e ngaahi lēsoni Siviʻi Hoʻo Akó, vakai, “Ako ki he Siviʻí” ʻi he Ako ki he Naunau Fakalēsoni ʻa e Seminelí.

ʻOku ʻoange ʻe he ngaahi lēsoni Teuteu ki he Moʻuí ha ngaahi faingamālie ki he kau akó ke fakaʻaongaʻi e ngaahi akonaki ʻa e Fakamoʻuí ki he ngaahi meʻá ni:

• Matuʻuaki e ngaahi fehuʻi faingataʻá mo e ngaahi tūkunga faingataʻa ʻo e moʻuí

• Fai ha ngaahi fili ʻoku tataki fakalangi ʻo fakaʻaongaʻi ʻa e ngaahi akonaki ʻa Sīsū Kalaisí mo ʻEne kau palōfitá.

• Fakatupulaki ʻa e moʻui fakafalala pē kiate kitá maʻanautolu mo honau fāmilí.

• Hoko ʻo moʻui lelei ange fakatuʻasino mo fakaeloto.

• Faʻu ha ngaahi palani ke teuteu ki he ako mo e ngāue maʻuʻanga moʻui ʻi he kahaʻú.

• Fakatupulaki ʻa e ngaahi taukei ke lavameʻa ʻi he akó.

• Teuteu ki he ngāue fakafaifekaú mo e ngāue ʻi he siasí.

• Teuteu ke fakahoko mo tauhi ‘a e ngaahi fuakava ʻi he temipalé.

Feinga ke akoʻi ha lēsoni ʻe ua ʻo e Teuteu ki he Moʻuí ʻi he uike takitaha. ʻE ʻi ai ha ngaahi uike te ke akoʻi lahi ange ai ʻi he meʻá ni pea ʻe ʻi ai ha ngaahi uike te ke akoʻi ʻo siʻisiʻi ange, ka ʻi he fakaʻavalisí ʻoku totonu ke ke feinga ke akoʻi ha lēsoni ʻe ua ʻi he uike ʻi he lahi taha ʻe lavá. ʻE ʻoange heni ha faingamālie ke akoʻi ki he kau akó ʻa e ngaahi lēsoní kotoa lolotonga e taʻu fakaakó.

Fakapapauʻi ke ke maʻu ha tatau ʻo ha fakahinohino ki he vave hono akoʻí mei hoʻo kouʻotineitá pe pule ʻo e polokalamá.

Ki ha fakamatala lahi ange fekauʻaki mo e ngaahi lēsoni Teuteu ki he Moʻuí, vakai, “Ako ki he Ngaahi Lēsoni Teuteu ki he Moʻuí” ʻi he Ako ki he Naunau Fakalēsoni ʻa e Seminelí.