“Ko Hono Puleʻi ʻo e Tekinolosiá: ‘Ke Tau Tokanga Muʻa Kae ʻIkai Fakavaʻivaʻinga ʻI Heʻetau Ngāue ʻAki ʻa e Tekinolosiá,’” Fuakava Motuʻá – Tohi Lēsoni ʻa e Faiako Seminelí (2026)
“Ko Hono Puleʻi ʻo e Tekinolosiá: ‘Ke Tau Tokanga Muʻa Kae ʻIkai Fakavaʻivaʻinga ʻI Heʻetau Ngāue ʻAki ʻa e Tekinolosiá,’” Fuakava Motuʻá – Tohi Lēsoni ʻa e Faiako Seminelí
Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí: Lēsoni 174
Ko Hono Puleʻi ʻo e Tekinolosiá
“Ke Tau Tokanga Muʻa Kae ʻIkai Fakavaʻivaʻinga ʻI Heʻetau Ngāue ʻAki ʻa e Tekinolosiá”
ʻOku faingofua he taimi ʻe niʻihi ke fakavaʻivaʻinga kae ʻikai fakakaukau lelei mo fakataumuʻa ʻi hono fakaʻaongaʻi ʻo e tekinolosiá. Kapau ʻoku tau tokanga mo taumuʻa lelei ʻi hono fakaʻaongaʻi ʻo e tekinolosiá, ʻe lava ke ʻai ia ʻe he ʻEikí ke hoko ko ha tāpuaki kiate kitautolu mo e niʻihi kehé. ʻE lava ke tokoni ʻa e lēsoni ko ʻení ke fakaʻaongaʻi ʻe he kau akó ʻa e ngaahi akonaki ʻa Sīsū Kalaisí ke sivisiviʻi ʻaki ʻenau fakaʻaongaʻi ʻo e tekinolosiá.
Teuteu ʻa e tokotaha akó: Fakaafeʻi e kau akó ke fakakaukau ki heʻenau fakaʻaongaʻi e tekinolosiá pea mo hono ngaahi nunuʻa kiate kinautolu mo e niʻihi kehé. Ke tokoni ʻi he meʻá ni, ʻe lava ke vakaiʻi ʻe ha kau ako ʻe niʻihi ʻenau ʻū meʻangāue fakaʻilekitulōniká ki ha setting pe polokalama ʻoku ʻasi ai ʻa e lahi ʻo ʻenau fakaʻaongaʻi ʻo e meʻangāué pe ko e ngaahi polokalama ʻoku lolotonga fakaʻaongaʻí.
Ngaahi ʻEkitivitī Ako ʻOku Ala Fakahokó
Ngaahi fili fekauʻaki mo hono fakaʻaongaʻi ʻo e tekinolosiá
Fakakaukau ke tā ha fakatātā ʻo ha taha ʻoku tuʻu ʻi he fetaulakiʻanga ʻo ha ngaahi hala kehekehe.
-
Ko e hā ha ngaahi founga kehekehe ʻoku fakaʻaongaʻi ai ʻe he toʻu tupú ʻa e tekinolosiá he ʻahó ni?
ʻE lava ke vahevahe ʻe he kau akó ha ngaahi ʻaonga hangē ko e talanoa mo e niʻihi kehé, ako e folofolá, fiefia ʻi he fakafiefiá, kau ʻi he mītia fakasōsialé, mo hono fai ʻo e ngāue fakaako mei ʻapí. ʻI hono tali ʻe he kau akó ʻa e fehuʻí, te ke lava ʻo faʻu ha lisi pe fakahingoa ʻa e ngaahi hala ʻi he palakipoé ʻaki e ngaahi tali ʻa e kau akó. ʻE ʻaonga ʻa e lisi ko ʻení ki he kau akó ʻamui ange ʻi he lēsoní.
-
Te tau lava fēfē ʻo ʻiloʻi ʻa e founga totonu mo ʻikai totonu ʻo hono fakaʻaongaʻi ʻo e tekinolosiá?
Hangē ko e tokotaha ko ʻeni ʻoku lahi e ngaahi hala ke fili mei aí, te tau lava ʻo fehangahangai mo ha ngaahi faingataʻa ʻi hono fai ha ngaahi fili lelei fekauʻaki mo e founga ʻoku tau fakaʻaongaʻi ai ʻa e tekinolosiá.
Lau ʻa e ngaahi veesi ko ʻení, ʻo kumi ʻa e founga ʻe lava ke tataki ai ʻe he ʻEikí ʻetau ngaahi filí.
-
Te ke lava ʻo fakaafeʻi ʻa e kau akó ke vahevahe ʻa e meʻa te nau tānaki atu ki he fakatātaá pea mo hono ʻuhingá. Te nau lava ʻo tānaki atu ha maama, pou ʻao pe afi, pe folofola ki he fakatātā ʻi he kamataʻanga ʻo e ngaahi halá.
-
Te ke fakamatalaʻi fakanounou fēfē ʻa e ngaahi akonaki ko ʻení ʻi ha sētesi ʻe taha?
Tokoni ke ʻiloʻi ʻe he kau akó ha moʻoni hangē ko e ʻEikí ʻokú Ne ʻomi ha tokoni ke tataki kitautolu ʻi heʻetau moʻuí.
-
Ko e hā ha ngaahi founga ʻe lava ke tataki ai kitautolu ʻe he ʻEikí mo ʻEne ngaahi akonakí ke tau fai ha ngaahi fili fekauʻaki mo e founga ʻoku tau fakaʻaongaʻi ai e tekinolosiá?
Fakaʻaongaʻi ha kiʻi taimi ke ke fakakaukau ki he founga ʻokú ke fakaʻaongaʻi ai ʻa e tekinolosiá pea mo e meʻa ʻokú ne lolotonga tataki ʻa e founga ʻokú ke fili ke fakaʻaongaʻi ai iá. ʻI hoʻo ako ʻi he ʻaho ní, tokanga ki he ngaahi ueʻi ʻa e Laumālié.
Ko hono puleʻi ʻo e tekinolosiá
Kuo faʻu ʻe he Siasí ha maʻuʻanga tokoni maʻá e toʻu tupú ʻoku ui ko e Ko Hono Puleʻi ʻo e Tekinolosiá. ʻE lava ke tokoni hono ngaahi tefitoʻi moʻoni mahuʻinga ʻe tolú ke tau fai ha ngaahi fili lelei ange fekauʻaki mo ʻetau fakaʻaongaʻi e tekinolosiá.
-
Taumuʻá. Te u lava ʻo fakaʻaongaʻi ʻa e tekinolosiá ki ha taumuʻa. ʻOku ʻikai ke ne puleʻi au.
-
Palani. ʻI he taimi ʻoku ou palani kei taimi aí, ʻoku ou ongoʻi lelei ange mo fai ha ngaahi fili lelei ange.
-
Taʻofi Fakataimi. ʻOku sai pē ke u kiʻi taʻofi fakataimi ʻo mālōlō.
Kapau ʻe tokoni, te ke lava ʻo tataki e kau akó ki he fakatātā ʻi he palakipoé pea fehuʻi ange pe ʻe tokoniʻi fēfē ʻe he ngaahi tefitoʻi moʻoni ʻe tolu ko ʻení ʻa e tokotaha fakafoʻituitui ʻi he fakatātaá ke ne fai ha ngaahi fili lelei ange fekauʻaki mo ʻene fakaʻaongaʻi e tekinolosiá.
Neongo ʻoku mahuʻinga kotoa e ngaahi tefitoʻi moʻoni ʻe tolu ko ʻení, ka ʻe nofotaha e toenga ʻo e lēsoní ʻi hono taumuʻá. Ke tokoni ki he kau akó ke nau fakakaukau ki heʻenau taumuʻa ʻi heʻenau fakaʻaongaʻi e tekinolosiá, fakakaukau ke fai ha fehuʻi hangē ko ʻení.
-
Ko e hā ʻa e founga ʻokú ke fakakaukau ʻoku finangalo ʻa e ʻEikí ke ke fakaʻaongaʻi ai ʻa e tekinolosiá?
Fakaʻaongaʻi ʻa e tekinolosiá ki ha taumuʻa
Ke tokoni ke tau fakaʻaongaʻi ʻa e tekinolosiá ki ha taumuʻá, te tau lava ʻo tafoki ki he ʻEikí mo ʻEne faleʻi ʻoku maʻu ʻi he folofolá mo e ngaahi lea ʻa ʻEne kau palōfitá. Makatuʻunga ʻi he ngaahi akonaki ʻa e ʻEikí, te tau lava ʻo faʻu ha ngaahi fehuʻi ke vakaiʻi ʻaki ʻetau fakaʻaongaʻi ʻo e tekinolosiá mo tokoni ke tau fakamātoato ange.
Fakaʻaliʻali ʻa e fakahinohino ko ʻení pea fakaafeʻi ʻa e kau akó ke fakakakato fakafoʻituitui pe fakakulupu iiki ʻa e ongo sitepú fakatouʻosi. Kapau ʻe ʻaonga ki he kau akó ha sīpinga ʻo e founga ke fakahoko ai ʻení, fakakaukau ke lau fakakalasi ha taha ʻo e ngaahi potufolofola mei he sitepu ʻuluakí. Te ke lava foki ʻo fakaʻaliʻali e kamataʻanga ʻo ha fehuʻi, hangē ko ʻení, ke tokoni ke ʻiloʻi ʻe he kau akó pe ʻe fōtunga fēfē ʻa e ngaahi fehuʻi ko ʻení.
-
ʻE lava nai ʻi hono fakaʻaongaʻi ʻo e tekinolosiá ʻi he founga ko ʻení ʻo …?
-
ʻOku hanga nai ʻe heʻeku fakaʻaongaʻi e tekinolosiá ʻo tohoakiʻi ʻeku tokangá mei he …?
ʻE lava ke maʻu e ngaahi fehuʻi te nau ala faʻú ʻi he ngataʻanga ʻo e ngaahi fakahinohino ki he ʻekitivitií.
Akoako faʻu ha ngaahi fehuʻi fakalaulauloto ʻo fakatefito ʻi he ngaahi akonaki ʻa e ʻEikí.
-
Lau ha taha ʻo e ngaahi potufolofola ko ʻení. Fakaʻaongaʻi ʻa e meʻa ʻokú ke akó ke faʻu ha fehuʻi ʻe lava ʻo tokoni ke fakataumuʻa mo tau fakakaukauloto ki heʻetau fakaʻaongaʻi ʻo e tekinolosiá.
-
Lau ha taha ʻo e palakalafi ʻe fā ʻi lalo ʻi he ʻuluʻi tohi “Ngaahi Fakaafé” ʻi he konga “ʻAʻeva ʻi he maama ʻa e ʻOtuá” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí. Fakaʻaongaʻi ʻa e meʻa ʻokú ke akó ke faʻu ha fehuʻi ʻe lava ʻo tokoni ke fakataumuʻa mo tau fakakaukauloto ki heʻetau fakaʻaongaʻi ʻo e tekinolosiá.
Fakakaukau ke fakaafeʻi ʻa e kau akó ke hiki ʻa e ngaahi fehuʻi naʻa nau faʻú ʻi he palakipoé pe hiki kinautolu ʻi ha laʻipepa pea fakapipiki takai kinautolu ʻi he holisi ʻi he lokí. Ko ha ngaahi sīpinga ʻeni ʻe niʻihi ʻo e ngaahi fehuʻi ʻe ala faʻu ʻe he kau akó:
-
ʻE hanga nai ʻi hono fakaʻaongaʻi ʻo e tekinolosiá ʻi he founga ko ʻení ʻo ʻomi ha fiemālie kiate au pe te u ongoʻi liʻekina ai? (ʻĪsaia 55:2; 2 Nīfai 9:51)
-
ʻOku hanga nai ʻe heʻeku fakaʻaongaʻi ʻa e tekinolosiá ʻo fakahohaʻasi au mei hono fakahaaʻi ʻeku ʻofa ki he ʻOtuá pe ki he kakai kehé? (Mātiu 22:36–39)
-
ʻE lava nai ʻi hono fakaʻaongaʻi ʻo e tekinolosiá ʻi he founga ko ʻení ʻo tataki au ke u meheka mo fakafehoanaki au ki he niʻihi kehé? (Molonai 7:45)
-
Te u fakaʻaongaʻi fēfē ʻa e tekinolosiá ʻi ha founga te ne ʻomi ai ha maama lahi ange ki heʻeku moʻuí? (Tokāteline mo e Ngaahi Fuakava 50:23–25)
-
ʻOku tanumaki nai ʻa e ngaahi holi koví ʻi he fakaʻaongaʻi ko ʻeni ʻo e tekinolosiá? (Tokāteline mo e Ngaahi Fuakava 63:16)
-
ʻOku hanga nai ʻe heʻeku fakaʻaongaʻi e tekinolosiá ʻo tokoniʻi pe uesia ʻa e ngaahi vā fetuʻutaki ʻoku ou maʻu mo e niʻihi kehé? (“ʻAʻeva ʻi he maama ʻa e ʻOtuá” Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 19)
Fakaafeʻi ha niʻihi ʻo e kau akó pe ngaahi kulupu ke vahevahe ʻa e meʻa ne nau lau naʻe tupu ai ʻenau ngaahi fehuʻí.
-
ʻE tokoni fēfē hono fakaʻaongaʻi e ngaahi akonaki ʻa e ʻEikí ʻi he founga ko ʻení ke fakataumuʻa lelei ange ʻetau fakaʻaongaʻi ʻa e tekinolosiá?
Ako Fakahoko
ʻE lava ke tokoni ʻa e ʻekitivitī ko ʻení ki he kau akó ke nau fakaʻaongaʻi e ngaahi fehuʻi kuo nau faʻú ke sivisiviʻi ʻaki ʻenau fakaʻaongaʻi e tekinolosiá.
Kapau naʻe fakapipiki takai ʻe he kau akó ʻenau ngaahi fehuʻí ʻi he lokí, poupouʻi e kau akó ke nau tuʻu ki ʻolunga pea vilo takai ʻi he ngaahi fehuʻí ke fakakakato ʻa e ʻekitivitií.
Lisi ʻi hoʻo tohinoa akó ha niʻihi ʻo e ngaahi founga ʻokú ke fakaʻaongaʻi ai ʻa e tekinolosiá. Sivisiviʻi hoʻo fakaʻaongaʻi ʻo e tekinolosiá ʻo fakaʻaongaʻi e ngaahi fehuʻi naʻá ke faʻu mo hoʻo kaungāakó. Fakakaukau ki he ngaahi meʻa ʻokú ke fakahoko leleí pe ko e tafaʻaki te ke lava ʻo fakalakalaka aí. Hiki ha faʻahinga ongo pē te ke ala maʻu mei he Laumālie Māʻoniʻoní.
ʻE lava ʻe he kau ako ʻe loto-fiemālié ke vahevahe ʻa e meʻa naʻa nau akó. Kapau ʻe ʻaonga, te ke lava ʻo vahevahe ʻa e fakamatala ko ʻení.
Naʻe akoʻi ʻe ʻEletā Pita M. Sionisoni ʻo e Kau Fitungofulú ʻa e meʻá ni fekauʻaki mo e founga ʻe lava ke fakafehokotaki ai kitautolu ʻe heʻetau fakaʻaongaʻi ʻo e tekinolosiá ki he ʻEikí mo Hono mālohí.
ʻOku fakaofo ʻa e ngaahi fakalakalaka fakatekinolosiá, ka ʻo kapau he ʻikai ke tau tokanga, te nau fakahohaʻasi ʻetau tokangá mei hotau ivi malava fakalangí. ʻE lava ke hoko ʻa hono fakaʻaongaʻi totonu kinautolú ke ʻomi ai e mālohi ʻo e langí. …
Ke tau tokanga muʻa kae ʻikai fakavaʻivaʻinga ʻi heʻetau ngāue ʻaki ʻa e tekinolosiá. Hokohoko atu ke fekumi ki he ngaahi founga ʻe lava ai ʻe he tekinolosiá ʻo tākiekina kitautolu ke tau ofi ange ki he Fakamoʻuí mo fakaʻatā kitautolu ke tau fakahoko ʻEne ngāué ʻi heʻetau teuteu ki Heʻene Hāʻele ʻAnga Ua Maí. (“Mālohi ke Ikunaʻi ʻa e Filí,” Liahona, Nōvema 2019, 110, 111)
Fakamanatu ki he kau akó ʻe tāpuekina mo fakamālohia kinautolu ʻe he Fakamoʻuí ʻi heʻenau ngāueʻi ha faʻahinga ongo pē ne nau maʻu he ʻahó ni (vakai, Saame 29:11).