Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Tohi Fakahinohino Ki Hono Fakamālohia ʻo e Toʻu Tupú: Ko Hono Fakafehokotaki ʻEtau Ngaahi Filí kia Kalaisí

“Ki Hono Fakamālohia ʻo e Toʻu Tupú: Ko Hono Fakafehokotaki ʻEtau Ngaahi Filí kia Kalaisí,” Fuakava Motuʻá – Tohi Lēsoni ʻa e Faiako Seminelí (2026)

“Ki Hono Fakamālohia ʻo e Toʻu Tupú: Ko Hono Fakafehokotaki ʻEtau Ngaahi Filí kia Kalaisí,” Fuakava Motuʻá – Tohi Lēsoni ʻa e Faiako Seminelí

Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí: Lēsoni 171

Tohi Fakahinohino Ki Hono Fakamālohia ʻo e Toʻu Tupú

Ko Hono Fakafehokotaki ʻEtau Ngaahi Filí kia Kalaisí

ʻOku tau fai maʻu pē ha ngaahi fili ʻi he kotoa ʻo ʻetau moʻuí. ʻI he taimi ʻoku tau ongoʻi lōmekina ai ʻi hono fai ha ngaahi fili ʻoku totonú, ʻe lava ke ʻomi ʻe Sīsū Kalaisi mo ʻEne tokāteliné ha mālohi mo ha fakahinohino kiate kitautolu. Ko e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ko ha feituʻu ia ʻe taha te tau lava ʻo ʻalu ki ai ke maʻu ʻa e ngaahi moʻoni fekauʻaki mo Sīsū Kalaisi mo ʻEne tokāteliné. ʻE lava ke tokoni ʻa e lēsoni ko ʻení ki he kau akó ke nau akoako fakaʻaongaʻi ʻa e tohi fakahinohino Ki Hono Fakamālohia ʻo e Toʻu Tupú ke fakahoko ha ngaahi fili ʻoku ueʻi fakalaumālié ʻo makatuʻunga ʻia Sīsū Kalaisi mo ʻEne tokāteliné.

Teuteu ʻa e tokotaha akó: Fakaafeʻi e kau akó ke toe vakaiʻi ha konga ʻe taha ʻo e meʻa ne nau fili ʻi he Ki Hono Fakamālohia ʻo e Toʻu Tupú. ʻE lava ke fakakaukau ʻa e kau akó ki he founga ʻe lava ke tokoniʻi ai kinautolu ʻe he ngaahi akonaki ʻa Sīsū Kalaisi ʻi he konga ko iá ke nau fai ha ngaahi fili ʻoku ueʻi fakalaumālié.

Ngaahi ʻEkitivitī Ako ʻOku Ala Fakahokó

Ko Sīsū Kalaisi ʻa hoku maká

Kimuʻa pea kamata e lēsoní, ʻoange ki he kau akó ha tatau ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí pe tokoni ke nau kumi ʻa e tatau fakaʻilekitulōniká ʻi he Gospel Library.

Fakakaukau ke kamata e kalasí ʻaki hano fakaʻaliʻali ha fakatātā ʻo ha fale maama-kamo lolotonga ha matangi.

Ko e hā ha ngaahi tefitoʻi moʻoni ʻo e ongoongoleleí te ke lava ʻo akoʻi ki ha taha ʻaki hano fakaʻaongaʻi ʻa e fakatātā ko ʻení?

Kapau ʻoku fiemaʻu tokoni ʻa e kau akó, te ke lava ʻo ʻeke ange pe ko e hā ʻe lava ke fakafofongaʻi ʻe he matangí pe foʻi maká kapau ʻoku fakafofongaʻi ʻe he fale maama-kamó ʻetau moʻuí. ʻE lava ke vahevahe ʻe he kau akó ha ngaahi tefitoʻi moʻoni kehekehe. Fakamālō ange ʻi heʻenau tokoni ki he fealeaʻakí.

Lau ʻa e Saame 62:5–7, ʻo kumi ʻa e founga ʻoku fekauʻaki ai ʻa e ngaahi lea ʻi he saame ko ʻení mo e fakatātā ʻo e fale maama-kamó.

Ko e hā ʻoku hoko ai ʻa e maká ko ha fakamatala lelei kia Sīsū Kalaisí?

Lau ʻa e fakamatala ko ʻeni meia ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi e founga te tau lava ai ʻo ʻai ʻa Sīsū Kalaisi ke hoko ko hotau maká.

Ko e taimi kotoa pē ʻokú ke fai ai ha fili māʻoniʻoni ʻo makatuʻunga ʻi he ngaahi moʻoni taʻengata ʻa e Fakamoʻuí, ʻokú ke fakahaaʻi ai ʻokú ke fiemaʻu Ia ʻi hoʻo moʻuí. ʻOku fakaava ʻe he ngaahi fili ko iá ʻa e ngaahi matapā ʻo e langí, pea ʻoku lilingi hifo Hono mālohí ki hoʻo moʻuí. …

… ʻI heʻetau langa ʻetau moʻuí, ʻoku mahuʻinga ke tau fai ha ngaahi fili ʻoku leleí. Pea ʻoku mahuʻinga ke mahino ʻa e moʻoni taʻengata ʻa e Fakamoʻuí. Ka ko e mālohi te tau fiemaʻu ke matuʻuaki ʻaki ʻa e ngaahi matangi ʻo e moʻuí ʻoku hoko mai ia ʻi he taimi ʻoku tau fakafehokotaki ai ʻetau ngaahi filí mo Sīsū Kalaisi mo ʻEne tokāteliné. Ko e meʻa ia ʻoku tokoni mai ai ʻa e Ki Hono Fakamālohia ʻo e Toʻu Tupú ke tau faí. (“Ki Hono Fakamālohia ʻo e Toʻu Tupú: Ko e Pōpoaki ʻa e Fakamoʻuí Kiate Koé,” Ki Hono Fakamālohia ʻo e Toʻu Tupú, Māʻasi 2024, 38)

Ko e hā te tau lava ʻo ako meia ʻEletā ʻUkitofá?

Lolotonga e vahevahe ʻa e kau akó, tokoni ke nau ʻiloʻi ha foʻi moʻoni hangē ko ʻení: ʻoku tau maʻu ha mālohi meia Sīsū Kalaisi ʻi he taimi ʻoku tau fakafehokotaki ai ʻetau ngaahi filí mo Ia mo ʻEne tokāteliné. ʻE lava ke ke hiki ʻa e foʻi moʻoni ko ʻení ʻi he palakipoé.
ʻOkú ke pehē ʻoku ʻuhinga ki he hā ke fakafehokotaki ʻetau ngaahi filí kia Sīsū Kalaisi mo ʻEne tokāteliné?

ʻE lava ke vahevahe ʻe he kau akó ha ngaahi meʻa hangē ko e muimui ki he sīpinga ʻa Sīsū Kalaisí, fai ha ngaahi fili ʻo fakatefito ʻi Heʻene ngaahi akonakí, pe lotua ha fakahinohino mei he Tamai Hēvaní lolotonga hono fai ha ngaahi filí.

Fakapapauʻi ʻoku mahino ki he kau akó ko e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ko ha meʻangāue ia ʻe lava ʻo tokoni ke fakafehokotaki ʻetau ngaahi filí kia Sīsū Kalaisi.

Te ke lava foki ‘o vahevahe ʻa e sīpinga ko ʻeni meia ʻEletā ʻUkitofá.

Naʻe fakamatalaʻi ʻe ʻEletā ʻUkitofa ʻa e anga ʻo hono fakafehokotaki ʻetau ngaahi filí kia Sīsū Kalaisi mo ʻEne tokāteliné.

Mahalo ʻe ʻiloʻi ʻe hoʻo ngaahi kaungāmeʻá he ʻikai te ke kākā pe loi pea ʻokú ke fakamātoato ʻi he akó. Ka ʻoku nau ʻiloʻi nai ʻoku tuʻunga ʻeni ʻi he akonaki ʻa Sīsū Kalaisi “ʻe fakatauʻatāinaʻi ʻa kimoutolu ʻe he moʻoní”? [Sione 8:32; “ʻE fakatauʻatāinaʻi koe ʻe he moʻoní,” Ki Hono Fakamālohia ʻo e Toʻu Tupú, Māʻasi 2024, 30]. (“Ki Hono Fakamālohia ʻo e Toʻu Tupú: Ko e Pōpoaki ʻa e Fakamoʻuí Kiate Koé,” Ki Hono Fakamālohia ʻo e Toʻu Tupú, Māʻasi 2024, 38)

ʻE fakamālohia fēfē nai kitautolu ʻi hono fakafehokotaki ʻetau ngaahi filí kia Sīsū Kalaisí ke tau matuʻuaki e ngaahi matangi ʻo e moʻuí?

Fakakaukau ki ha tūkunga ʻokú ke lolotonga fehangahangai mo ia, pe ʻamanaki te ke fehangahangai mo ia ʻi he kahaʻú, ʻe ala fiemaʻu ai ke ke fai ha ngaahi fili faingataʻa. Fakakaukau ki he founga ʻe lava ke tokoniʻi ai koe ʻe Sīsū Kalaisi mo ʻEne tokāteliné.

Fakafanongo ki he ngaahi ueʻi ʻa e Laumālié ʻi hoʻo akoako fakafehokotaki hoʻo ngaahi filí kia Sīsū Kalaisi ʻi he tokoni ʻa e tohi fakahinohino Ki Hono Fakamālohia ʻo e Toʻu Tupú.

Ko e faʻunga ʻo e tohi fakahinohinó

Ko e taumuʻa ʻo e konga ko ʻení ke tokoniʻi e kau akó ke nau maheni mo e founga ʻoku fokotuʻutuʻu ai e tohi fakahinohino Ki Hono Fakamālohia ʻo e Toʻu Tupú. Kapau kuo ʻosi maheni hoʻo kau akó mo e tohi fakahinohinó, te ke lava ʻo hiki fakalaka mei he konga ko ʻení pea ʻalu ki he fakatātaaʻí.

ʻAi ke vakai e kau akó ki he fakatātā ʻi lalo ʻi he “Fakahoko ha ngaahi fili ʻoku ueʻi fakalangí” ʻi he tohi fakahinohinó, pe fakaʻaliʻali ʻa e fakamatala ko ʻení mei he fakatātaá.

“Te ke maʻu ʻi he Ki Hono Fakamālohia ʻo e Toʻu Tupú, ʻa e ngaahi akonaki ʻa Sīsū Kalaisi mo ʻEne kau palōfitá. ʻI hoʻo maʻu e ngaahi moʻoni ko ʻení ke hoko ko ho faifakahinohinó, te ke lava ai ʻo fakahoko ha ngaahi fili fakalangi te nau tāpuekina koe ʻi he taimí ni pea ʻi he kotoa ʻo e taʻengatá” (“Fakahoko ha ngaahi fili ʻoku ueʻi fakalangí,” Ki Hono Fakamālohia ʻo e Toʻu Tupú: Ko ha Fakahinohino ki Hono Fai ha Ngaahi Filí [2022], 4). ʻOku vahevahe ʻa e tohi fakahinohinó ki ha ngaahi tefito kehekehe, pea ʻoku konga ʻe tolu ʻa e tefito takitaha:

Ngaahi moʻoni taʻengatá, pe tokāteline ʻo e ongoongolelei ʻo Sīsū Kalaisi kuo fakafoki maí
Ngaahi fakaafe ke ngāueʻi e ngaahi moʻoni ko iá
Ngaahi tāpuaki kuo talaʻofa maí ʻa ia ʻoku foaki ʻe he ʻEikí kiate kinautolu ʻoku moʻui ʻaki ʻEne ngaahi akonakí

Ko hono fakatātaaʻi ʻo e foungá

Lau ʻa e Sēnesi 39:9–12, ʻo kumi e founga naʻe fakafehokotaki ai ʻe Siosefa ʻene ngaahi filí mo Sīsū Kalaisi mo ʻEne tokāteliné.

Ko e hā ʻa e meʻa naʻá ke maʻú?

Fakakaukau ke faʻu ha ngaahi kulupu ke tautau toko tolu e kau akó. Fakaafeʻi ʻa e mēmipa takitaha ʻo e kulupú ke fili ha mataʻifika mei he taha ki he tolu ʻa ia ʻe fekauʻaki mo ha taha ʻo e ngaahi fehuʻi ko ʻení.

Ako ʻa e konga “ʻOku toputapu ho sinó” ʻi he Ki Hono Fakamālohia ʻo e Toʻu Tupú mo ha taha ʻo e ngaahi tefito ko ʻení:

ʻOkú ke pehē ko e hā ha “Ngaahi moʻoni taʻengata” naʻe tokoni kia Siosefa ke ne fai ʻa e fili naʻá ne faí?
Ko e hā ʻa e “Ngaahi Fakaafe” naʻe muimui ki ai ʻa Siosefá?
ʻOkú ke pehē ko e fē ʻi he “ngaahi tāpuaki kuo talaʻofa maí” naʻe aʻusia ʻe Siosefá?

Fakaafeʻi e kau akó ke vahevahe mo ʻenau kulupú ʻa e meʻa ne nau maʻú. Te ke lava ʻo fakamahinoʻi ange neongo naʻe lī ʻa Siosefa ki he fale fakapōpulá koeʻuhí ko ʻene fili ke hola mei he uaifi ʻo Potifaá, ka naʻe kei ʻiate ia pē ʻa e ʻEikí (vakai, Sēnesi 39:20–21; 41:38–43).

Ako Fakahoko

Hili hono fakakakato ʻe he kau akó ʻa e laʻipepa tufá, te ke lava ʻo fakaafeʻi ke nau vahevahe ʻa e founga kuo fakamālohia ai kinautolu ʻe Sīsū Kalaisi ʻi heʻenau fakafehokotaki ʻenau ngaahi filí mo Ia mo ʻEne tokāteliné.

Te ke lava ʻo toe vakai ki he Saame 62:5–7. Hili iá pea fakakaukau ke ʻeke ki he kau akó ʻa e fehuʻi ko ʻení.

Ko e hā naʻá ke ako he ʻahó ni fekauʻaki mo e fehokotaki mo Sīsū Kalaisi mo ʻEne tokāteliné ʻi hoʻo ngaahi filí?

Fakakaukau ke vahevahe hoʻo fakamoʻoni kia Sīsū Kalaisí. Te ke lava ʻo fakaʻosi e kalasí ʻaki ha fakamatala mei he konga “ʻE tokoniʻi koe ʻe Sīsū Kalaisi,” ʻi he Ki Hono Fakamālohia ʻo e Toʻu Tupú. Poupouʻi e kau akó ke fakafehokotaki ʻenau ngaahi filí kiate Ia mo ʻEne tokāteliné.

Ngaahi Maʻuʻanga Tokoni Kehé

Ko e hā ʻa e taumuʻa ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí?

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:11

ʻOku fakahingoa ʻa e tatau foʻou ko ʻeni ʻo e Ki Hono Fakamālohia ʻo e Toʻu Tupú ko e Ko ha Fakahinohino ki Hono Fai ha Ngaahi Filí.

Ke mahino ʻaupitó, ko e fakahinohino lelei taha te ke lava ʻo maʻu ki hono fai ha ngaahi filí ko Sīsū Kalaisi. Ko Sīsū Kalaisi ʻa e mālohinga ʻo e toʻu tupú.

Ko ia ai ko e taumuʻa ʻo e Ki Hono Fakamālohia ʻo e Toʻu Tupú ke tataki koe kiate Ia. ʻOkú ne akoʻi kiate koe ʻa e ngaahi moʻoni taʻengata ʻo ʻEne ongoongolelei kuo fakafoki maí—ngaahi moʻoni fekauʻaki mo koe, mo Ia, mo e meʻa te ke malava ke fakahoko ʻaki Hono mālohí. ʻOkú ne akoʻi kiate koe ʻa e founga ke fai ʻaki ha ngaahi fili māʻoniʻoni ʻo fakatefito ʻi he ngaahi moʻoni taʻengata ko iá.

ʻOku toe mahuʻinga foki ke ke ʻilo e meʻa ʻoku ʻikai fakahoko ʻe he Ki Hono Fakamālohia ʻo e Toʻu Tupú. ʻOku ʻikai ke ne fai ʻe ia hoʻo ngaahi filí maʻau. ʻOku ʻikai ke ne talaatu ʻe ia kiate koe pe ʻoku “totonu” pe “ʻikai totonu” ʻa e fili kotoa pē te ke fehangahangai mo iá. ʻOku nofo taha ʻa eKi Hono Fakamālohia ʻo e Toʻu Tupú ʻi he makatuʻunga hoʻo ngaahi filí. ʻOku nofo taha ia ʻi he ngaahi tuʻunga ʻulungaanga mahuʻingá, tefitoʻi moʻoní, mo e tokāteliné kae ʻikai ko e tefitoʻi ʻulungaanga pau kotoa pē. (“Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 10–11)

ʻE tokoniʻi fēfē au ʻe he tokanga taha ki he ʻOtuá mo ʻEne moʻoní ke u fai ha ngaahi filí?

Naʻe akoʻi ʻe Palesiteni Lāsolo M. Nalesoni ‘o pehē:

18:51

Ko e taimi te ke fehangahangai ai mo e fakatauelé—tatau ai pē kapau ʻe hoko mai ʻi he taimi ʻokú ke ongosia mo ongoʻi liʻekina aí pe ʻave-halaʻí—fakakaukau ki he loto-toʻa te ke lava ʻo maʻú kapau te ke fili ke tuku ke lāngilangiʻia ʻa e ʻOtuá ʻi hoʻo moʻuí pea mo e taimi te ke kole ai kiate Ia ke ne fakamālohia koé.

Ko e taimi ʻe hoko ai hoʻo fakaʻamu lahi tahá ke tuku ke lāngilangiʻia ʻa e ʻOtuá, ke hoko ko ha konga ʻo ʻIsilelí, ʻe faingofua ange ha konga lahi ʻo hoʻo ngaahi filí. Ko ha ngaahi palopalema lahi ʻe ʻikai toe hoko ia ko ha palopalema! Ko koe ʻokú ke ʻiloʻi lelei taha ʻa e founga ke ke teuteu aí. ʻOkú ke ʻilo ʻa e meʻa ke ke mamata mo laukonga aí, feituʻu ke fakaʻaongaʻi ai ho taimí, pea mo e kakai ke ke feohi mo iá. ʻOkú ke ʻilo ʻa e meʻa ʻokú ke fie fakahokó. ʻOkú ke ʻilo ʻa e faʻahinga tokotaha ʻokú ke fie hokosi moʻoní. (“Tuku ke Lāngilangiʻia ʻa e ʻOtuá,” Liahona, Nōvema 2020, 94)

Ngaahi ʻEkitivitī Fakalahi ki he Akó

Ko e sīpinga ʻa ʻEletā ʻUkitofa ki hono fakafehokotaki e ngaahi filí kia Sīsū Kalaisí

ʻI he fakamatala ʻa ʻEletā ʻUkitofa ʻi he makasini Ki Hono Fakamālohia ʻo e Toʻu Tupú, naʻá ne lisi ai ha ngaahi sīpinga kehekehe ʻo e tuʻunga ʻo hono fakafehokotaki ʻetau ngaahi filí kia Sīsū Kalaisi mo ʻEne tokāteliné. Kapau ʻe ʻaonga ki hoʻo kau akó ha sīpinga kehe, vakai ki heʻene ngaahi sīpinga kehe ʻi he “Ki Hono Fakamālohia ʻo e Toʻu Tupú: Ko e Pōpoaki ʻa e Fakamoʻuí Kiate Koé.”

Ko e mahino ʻo e fakatomalá

Makehe mei hono fakatātaaʻi ʻaki e konga “ʻOku toputapu ho sinó” pea mo Siosefa ʻi ʻIsipité, te mou lava ʻo fakatātaaʻi ʻa e founga ke fakaʻaongaʻi ai ʻa e tohi fakahinohino Ki Hono Fakamālohia ʻo e Toʻu Tupú ʻaki e konga “ʻE tokoniʻi koe ʻe Sīsū Kalaisi.” Te ke lava ʻo kole ki he kau akó ke nau lisi ʻa e meʻa ʻe ala faingataʻa ki ha taha taʻu hongofulu tupu fekauʻaki mo e fakatomalá. Mahalo ʻe vahevahe ʻe he kau akó ha ngaahi meʻa hangē ko e ongoʻi maá pe taʻe-mahuʻingá, loto-foʻi hili haʻanau toutou feinga ke liliu, pe veiveiua pe kuo fakamolemoleʻi nai kinautolú.

Fakaafeʻi e kau akó ke ako ʻa e konga “ʻE tokoniʻi koe ʻe Sīsū Kalaisi” mei he tohi fakahinohinó, ʻo kumi ʻa e meʻa ʻoku nau ako fekauʻaki mo e ʻEikí mo ʻEne ongoongoleleí ʻa ia ʻe ala tokoni ki ha taha taʻu hongofulu tupu ke ne aʻusia ʻa e ngaahi meʻa naʻa nau lisí.

Ko Sīsū Kalaisi ʻa e mālohinga ʻo e toʻu tupú

Ke fakafeʻiloaki ʻa e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, te ke lava ʻo fakaafeʻi e kau akó ke fili ha taha ʻo e ngaahi veesi ko ʻení, ʻo kumi e meʻa ʻoku nau ako fekauʻaki mo Sīsū Kalaisí. ʻE lava ke hiki ʻe he kau akó ʻi he palakipoé ʻa e meʻa ʻoku nau maʻú.

Hili hono ako e ngaahi vēsí, ʻe lava ke aleaʻi ʻe he kau akó ʻa e founga ʻe lava ke hoko ai ʻa Sīsū Kalaisi ko hotau mālohingá pe vahevahe ʻa e ngaahi aʻusia ʻo e founga kuo hoko ai ʻa Sīsū Kalaisi ko honau mālohingá.

Fakaafeʻi leva e kau akó ke kumi ʻi he tohi fakahinohinó ʻa e meʻa ʻoku nau ako fekauʻaki mo Sīsū Kalaisi mo ʻEne tokāteliné te ne lava ʻo fakamālohia e toʻu tupú he ʻaho ní.