Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 1:26–27: “Naʻe Ngaohi ʻa e Tangatá ʻe he ʻOtuá ʻi Hono Tataú”

“Sēnesi 1:26–27: ‘Naʻe Ngaohi ʻa e Tangatá ʻe he ʻOtuá ʻi Hono Tataú,’” Fuakava Motuʻá – Tohi Lēsoni maʻá e Faiako Seminelí (2026)

“Sēnesi 1:26–27: ‘Naʻe Ngaohi ʻa e Tangatá ʻe he ʻOtuá ʻi Hono Tataú,’” Fuakava Motuʻá – Tohi Lēsoni maʻá e Faiako Seminelí

Sēnesi 1–2; Mōsese 2–3; ʻĒpalahame 4–5: Lēsoni 8

Sēnesi 1:26–27

“Naʻe Ngaohi ʻa e Tangatá ʻe he ʻOtuá ʻi Hono Tataú”

Lolotonga e vahaʻataimi hono ono ʻo e fakatupú, naʻe fakatupu ʻe he ʻOtuá ʻa e tangatá mo e fefiné. Ko e taha kotoa pē ʻi he māmaní ko ha foha pe ʻofefine ʻofeina ia ʻo ha mātuʻa fakalangi pea ʻoku nau maʻu ha natula mo e ikuʻanga fakalangi. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e mahuʻinga ʻo honau tuʻunga totonú mo e meʻa te nau malava ʻi heʻenau hoko ko e ngaahi foha mo e ngaahi ʻofefine ʻo ha mātuʻa fakalangi.

Teuteu ʻa e tokotaha akó: Fakaafeʻi ʻa e kau akó ke ako maʻuloto pe fakamanatu ʻa e ngaahi laine kamataʻanga ʻo e kaveinga ʻo e Kau Finemuí mo e Lakanga Taulaʻeiki Faka-ʻĒloné pea ke nau fakakaukau ki he mahuʻinga ʻo e fakamatala takitaha:

Ngaahi ʻEkitivitī Ako ʻOku Ala Fakahokó

Ngaahi tuʻunga totonú mo e ngaahi fakahingoá

Fakakaukau ke tā ha fakahokohoko fakataimi (timeline) ʻi he palakipoé pea fakaafeʻi ʻa e kau akó ke faʻu haʻanau fakahokohoko fakataimi ʻi heʻenau tohinoa akó. ʻOku ʻoatu ʻi lalo ha sīpinga ʻo e fakahokohoko fakataimí.

Tā ha laine hangatonu ʻokú ne fakafofongaʻi hoʻo moʻuí pea fakahingoa ʻaki ia ha ngaahi tuʻunga pe hingoa kehekehe kuó ke maʻu ʻi he kuohilí, pe ʻokú ke lolotonga maʻú, pe ʻamanaki ke maʻu ʻi he kahaʻú. ʻE lava ke kau heni ʻa e, “kaungāmeʻa,” “tokotaha ako,” pe ko ha ngāue pe uiuiʻi kuó ke maʻu. Ko ha sīpinga ʻeni:

Ko e hā ha ngaahi hingoa naʻá ke fili ke fokotuʻu ʻi hoʻo fakahokohoko fakataimí? Ko e hā hono ʻuhingá?
Ko e hā ha ngaahi founga ʻe lava ke tākiekina ai ʻe he ngaahi hingoá ni ʻa e ngaahi fili ʻokú ke faí?

Naʻe fakamatalaʻi ʻe Palesiteni Lāsolo M. Nalesoni ʻa e founga ʻe lava ke uesia ai kitautolu ʻe he founga ʻoku tau fakahingoa ʻaki kitautolú.

31:24

ʻE malava ke fakafiefia ʻa e ngaahi hingoá mo fakahaaʻi hoʻo poupoú ʻi ha faʻahinga meʻa lelei pē. ʻE lahi ha ngaahi hingoa ʻe liliu maʻau ʻi he taʻau ʻo e taimí. Pea ʻoku ʻikai ke mahuʻinga tatau ʻa e ngaahi hingoa kotoa pē. Ka ʻo kapau ʻe fetongi ʻe ha faʻahinga hingoa ʻa e meʻa mahuʻinga taha ʻoku ʻiloʻi ʻaki koé, ʻe malava pē ke ke faingataʻaʻia fakalaumālie. (“Ngaahi Fili ki he Taʻengatá” [fakataha lotu fakamāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)

ʻOkú ke pehē ko e hā ha ngaahi fakahingoa ʻe niʻihi ʻe lava ke fakaholomui fakalaumālie?

Fānau ʻa ha ongomātuʻa fakalangi

Lau ʻa e Sēnesi 1:26–27 pea mo e fakamatala ko ʻeni mei he “Ko e Fāmilí: Ko ha Fanongonongo ki Māmaní,” ʻo kumi ha ngaahi fakakaukau fekauʻaki mo ho tuʻunga taʻengatá.

Ko e Sēnesi 1:26–27 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

Ko e kakai kotoa pē—ʻa e tangata mo e fefine—naʻe fakatupu ia ʻi he tatau ʻo e ʻOtuá. Ko e toko taha fakafoʻituitui kotoa pē ko e foha mo e ʻofefine ia ʻo ha mātuʻa fakalangi, pea ʻi heʻene peheé, ʻoku maʻu ai ʻe he toko taha kotoa pē ha natula fakalangi pea mo ha ikuʻanga pau. Ko e tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié pea mo e taʻengatá. (“Ko e Fāmilí: Ko ha Fanongonongo ki Māmani,” ChurchofJesusChrist.org)

Ko e hā ha ngaahi fakakaukau naʻá ke maʻu fekauʻaki mo ho tuʻunga taʻengatá?

Ko e moʻoni ʻe taha mahalo naʻe ʻilo ʻe he kau akó ko e ngaahi foha mo e ngaahi ʻofefine kitautolu ʻo ha ongomātuʻa fakalangi, naʻe fakatupu ʻi Hona tataú. Fakaafeʻi ʻa e kau akó kapau kuo teʻeki ke ke fakaafeʻi kinautolu ke tohiʻi ʻa e “Fānau ʻa e ʻOtuá” ʻi heʻenau fakahokohoko fakataimí.
ʻOkú ke pehē ʻoku ʻuhinga ki he hā ke fakatupu ʻi he tatau ʻo e ʻOtuá?

Naʻe vahevahe ʻe Palesiteni Tōmasi S. Monisoni (1927–2018) ʻa e fakakaukau ko ʻení fekauʻaki mo e fakatupu ʻi he tatau ʻo e ʻOtuá.

ʻOku maʻu ʻe he ʻOtua ko ʻetau Tamaí, ha telinga ke Ne fakafanongo ʻaki ki heʻetau ngaahi lotú. ʻOkú Ne maʻu ha fofonga ke Ne ʻafio mai ʻaki ki heʻetau ngaahi ngāué. ʻOkú Ne maʻu ha ngutu ke folofola mai ʻaki kiate kitautolu. ʻOkú Ne maʻu ha mafu ke Ne ongoʻi manavaʻofa mo ʻofa mai ai kiate kitautolu. ʻOkú Ne moʻoni. ʻOkú Ne moʻui. Ko ʻEne fānau kitautolu, naʻe fakatupu ʻi Hono tataú. ʻOku tau fōtunga tatau mo Ia pea ʻokú Ne fōtunga tatau mo kitautolu. (“I Know That My Redeemer Lives,” Ensign, Apr. 1990, 6)

ʻOkú ke pehē ko e hā ʻe mahuʻinga ai ke fakamuʻomuʻa ho tuʻunga ko e fānau ʻa e ʻOtuá ʻi ha toe tuʻunga ʻokú ke maʻu?

ʻOange ha taimi ki he kau akó ke nau fakalaulauloto ki he mahuʻinga honau tuʻunga ko e fānau ʻa e ʻOtuá kiate kinautolú. ʻE lava ke fakaafeʻi ʻe hono fai iá ʻa e Laumālie Māʻoniʻoní ke fakamoʻoni ki he moʻoní pe tokoni ke teuteuʻi ʻa e fakakaukau mo e loto ʻo e kau akó ke akoʻi.
Ko e hā ha ngaahi pole te ne lava ʻo ʻai ke faingataʻa hoʻo tui pe manatuʻi ko ha fānau koe ʻa e ʻOtuá, naʻe fakatupu ʻi Hono tataú?

Fakakaukau ke hiki ʻa e ngaahi tali ʻa e kau akó ki he fehuʻi kimuʻá ʻi he palakipoé. ʻE lava ke kau ʻi he ngaahi tali ʻe ʻoatú ʻa e ʻikai mahino ki ha kakai ʻe niʻihi ʻa e ʻuhinga ʻoku mahuʻinga ai ʻa e hoko ko ha fānau ʻa e ʻOtuá, ʻoku nau fāinga ke ongoʻi ʻa e ʻofa ʻa e ʻOtuá, pe ʻoku tohoakiʻi kinautolu ʻe he ngaahi meʻa ʻoku ʻikai fuʻu mahuʻingá. Kapau ʻoku ʻi ai ha ngaahi fehuʻi ʻa e kau akó fekauʻaki mo e tuʻunga tangata pe fefiné, muimui ki he sīpinga ʻa e Fakamoʻuí ʻi hoʻo akoʻi ʻEne tokāteliné ʻi ha founga ʻokú ne ʻomi ʻa e mahinó, ʻamanaki leleí, mo e fakamoʻuí. Fakamoʻoni ʻoku ʻofa ʻa e ʻOtuá ʻi Heʻene fānaú kotoa pea te Ne tokoniʻi ʻa e kau akó ke fakamahinoʻi ʻenau ngaahi fehuʻí ʻi heʻenau fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.

Ki ha fakakaukau ki he founga ke tokoniʻi ai ʻa e kau akó ʻi he ngaahi fehuʻi fekauʻaki mo e tuʻunga tangata pe fefiné, vakai ki he Ngaahi ʻEkitivitī Fakalahi ki he Akó.

Ngaahi lea ʻo e folofolá mo e kau palōfitá

ʻOange ki he kau akó ʻa e laʻipepa tufa ko e “Fānau Au ʻa e ʻOtuá.” Fakaafeʻi ʻa e kau akó ke nau fekumi ki ha tataki fakalaumālie mei he ʻOtuá ʻi heʻenau akó ke tokoni ke nau ʻiloʻi hono mahuʻinga ʻo honau tuʻunga fakalangí. Makehe mei he laʻipepa tufá, te ke lava ʻo fakaafeʻi ʻa e kau akó ke nau fakamanatu ʻa e ngaahi akonaki ʻoku maʻu ʻi he ngaahi kaveinga ʻo e Kau Finemuí mo e Lakanga Taulaʻeiki Faka-ʻĒloné. ʻE lava ke fakahoko fakafoʻituitui pe fakakulupu iiki ʻeni ʻe he kau akó.

ʻI he ʻosi ʻa e ako ʻa e kau akó, te ke lava ʻo fakaafeʻi kinautolu ke vahevahe ʻa e meʻa ne nau akó mo e kalasí pe ʻi ha fanga kiʻi kulupu iiki. Te ke lava foki ʻo fai ha ngaahi fehuʻi hangē ko ʻení:

Ko e hā naʻá ke maʻu mei he ngaahi maʻuʻanga tokoni naʻá ke akó naʻe mahuʻingamālie kiate koe?
ʻE liliu fēfē nai ʻe hoʻo ʻiloʻi ko ha fānau koe ʻa e ʻOtuá ʻa e anga hoʻo vakai kiate koe mo e niʻihi kehé?
Kuo tokoniʻi fēfē hoʻo moʻuí ʻe he ʻilo ki ho tuʻunga fakalangí mo e meʻa te ke malavá?

Fakakaukauloto ki ho tuʻunga totonú

ʻOange ha taimi ki he kau akó ke nau fakakaukau ki he meʻa kuo nau ako fekauʻaki mo honau tuʻunga totonú mo e meʻa te nau malava ʻi heʻenau hoko ko e ngaahi ʻofefine mo e ngaahi foha ʻo ha mātuʻa fakalangí. Fakaafeʻi kinautolu ke lekooti ʻi heʻenau tohinoa akó ha faʻahinga ongo pe ʻilo ne nau maʻu ʻa ia ʻoku nau fie manatuʻi. Fakakaukau ke fakaʻosi ʻaki hano hivaʻi fakakalasi ʻa e “Fānau Au ʻa e ʻOtuá” pea vahevahe hoʻo fakamoʻoni fekauʻaki mo e hoko ko ha fānau ʻa e ʻOtuá.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea folofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea folofola mahuʻinga ki he Sēnesi 1:26–27 ko e “Naʻe ngaohi ʻa e tangatá ʻe he ʻOtuá ʻi hono tataú.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e hā hotau tuʻunga malava fakalangí ʻi heʻetau hoko ko e fānau ʻa e ʻOtuá?

Koeʻuhí ko e fānau fakalaumālie kitautolu ʻa e ʻOtuá, kuo tau maʻu ai ʻa e mālohi ke fakatupulaki Hono ngaahi ʻulungaanga fakalangí. Tuʻunga ʻi he Fakalelei ʻa Sīsū Kalaisí, ʻe lava ke tau hoko ʻo hangē ko ʻetau Tamai Hēvaní pea maʻu ha fiefia kakato. (Ngaahi Tefitó mo e Ngaahi Fehuʻí, “Spirit Children of Heavenly Parents,” topics.ChurchofJesusChrist.org)

Ki ha fakamatala lahi ange, vakai ki he, “Becoming Like God” ʻi he Gospel Topics Essays.

Vakai foki, “The Origin of Man,” Ensign, Feb. 2002, 26–30.

Ko e hā ʻoku tau ʻilo fekauʻaki mo ʻetau Faʻē Fakalangí?

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

14:9

ʻOku siʻi ha toe meʻa kuo fakahā mai fekauʻaki mo e Faʻē ʻi he Langí, ka ko e meʻa ʻoku tau ʻiló ʻoku fakamatalaʻi fakanounou ia ʻi ha tefito ʻo e ongoongoleleí ʻa ia ʻoku maʻu ʻi heʻetau polokalama Gospel Library. Ko hoʻo lau pē ʻa e meʻa ʻoku ʻi aí, te ke ʻiloʻi leva ʻa e meʻa kotoa pē ʻoku ou ʻilo fekauʻaki mo e kaveingá. ʻOku ou fakaʻamu ne u ʻilo ha meʻa lahi ange. Mahalo ʻoku mou kei maʻu foki mo ha ngaahi fehuʻi pea mo loto ke maʻu mo ha ngaahi tali lahi ange. Ko e fekumi ki ha mahino lahi angé ko ha konga mahuʻinga ia ʻo ʻetau tupulaki fakalaumālié, ka mou kātaki ʻo mātuʻaki tokanga. He ʻikai lava ke fetongi ʻe he fakaʻuhingá ʻa e fakahaá.

He ʻikai iku ʻa e fakamahamahaló ki ha ʻilo fakalaumālie ʻoku lahi angé, ka ʻe malava ke iku ia ki he kākaá pe ueʻi ʻetau tokangá mei he meʻa kuo ʻosi fakahaá. (“Ko Ho Natula Faka-ʻOtuá mo e Ikuʻanga Taʻengatá,” Liahona, Mē 2022, 70)

Ki ha fakamatala lahi ange, vakai ki he, “Ongomātuʻa Fakalangí” ʻi he Ngaahi Tefitó mo e Ngaahi Fehuʻí ʻi he Gospel Library.

Ngaahi ʻEkitivitī Fakalahi ki he Akó

Ngaahi fakamatala ʻo e fakatupú

ʻOku ʻi he folofolá ha ngaahi fakamatala kehekehe ʻo e Fakatupú. ʻOku fakalahi ʻe he fakamatala takitaha ʻetau mahinó. Fakaafeʻi ʻa e kau akó ke nau ako ʻa e ngaahi potufolofola ko ʻeni fekauʻaki mo hono fakatupu ʻo e tangatá mo e fefiné, ʻo kumi ha ngaahi fakaikiiki ʻoku tānaki ʻe he fakamatala takitaha ki heʻetau mahinó.

ʻAloʻi ke hoko ko ha tuʻi

Naʻe vahevahe ʻe Sisitā ʻIleini S. Tolotoni, ko e Palesiteni Lahi mālōlō ʻo e Kau Finemuí, ʻa e talanoa ʻo e Tuʻi ko Lui XVI ke akoʻi e founga ʻe lava ke tākiekina ai ʻetau ngaahi filí ʻe heʻetau ʻiloʻi ʻa e meʻa te tau malavá. Fakakaukau ke mou sio ʻi he “Remember Who You Are!” mei he taimi 6:03 ki he 6:50.

14:28

ʻE lava fēfē ke fakaʻaongaʻi e talanoá ni ki hotau tuʻunga totonú mo e meʻa te tau malava ʻi heʻetau hoko ko e fānau ʻa e ʻOtuá?

Ngaahi fehuʻi fekauʻaki mo e tuʻunga tangata pe fefiné

Kapau ʻoku ʻi ai ha ngaahi fehuʻi ʻa e kau akó fekauʻaki mo e tuʻunga tangata pe fefiné, mahalo ʻe tokoni ke tuku ha taimi ʻi he kalasí ke fakamatalaʻi ai ha niʻihi ʻo e ngaahi meʻa ʻoku nau hohaʻa ki aí. Fekumi ki ha fakahinohino mei he Laumālie Māʻoniʻoní ke tokoni atu ke ke akoʻi ʻa e moʻoní ʻi he ʻofa mo e mahino.

ʻE lava ke vahevahe ʻa e lea ko ʻeni meia ʻEletā Lōnolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ke teuteuʻi ʻa e kau akó ke nau aleaʻi ʻa e tefito pelepelengesi ko ʻení.

Ko kinautolu ʻoku tuʻu laveangofuá … ko e toʻu tupu mo e kau taautaha kei talavou ʻoku nau fefaʻuhi mo honau tuʻunga ko e tangata pe fefiné. ʻOku fiemaʻu ke takatakaiʻi ʻa kinautolu ʻaki ʻa e toʻukupu ʻo honau Fakamoʻuí pea ongoʻi ʻoku ʻofeina kinautolu. ʻI he taimi lahi, ʻoku ui kitautolu ʻe he ʻEikí; ʻokú Ne finangalo ke tau hoko ko Hono ngaahi nima ʻofa. ʻOku fiemaʻu ke tau fakalotolahiʻi ʻenau ngaahi kaungāmeʻá ke fai ʻa e meʻa tatau. (“Jesus Christ Is the Answer” [evening with a General Authority, Feb. 8, 2019])

Tataki ʻa e kau akó ki he fakamatala mei he “Ko e Fāmilí: Ko ha Fanongonongo ki Māmani” ʻa ia ʻoku fakamatalaʻi ʻi he lēsoní.

Ko e hā ʻokú ke ʻilo fekauʻaki mo e palani ʻa e Tamai Hēvaní maʻa ʻEne fānaú ʻe lava ʻo tokoni ke mahino kiate koe ʻa e ʻuhinga ʻoku hoko ai ʻa e tuʻunga tangata pe fefiné ko ha meʻa mahuʻingá?

ʻOange ki he kau akó ʻa e ngaahi maʻuʻanga fakamatala ko ʻení. Fakaafeʻi kinautolu ke nau fekumi ʻi ha maʻuʻanga fakamatala ʻe taha pe lahi ange ke mahino lelei ange ʻa e fatongia ʻo e tuʻunga tangata pe fefiné ʻi he palani ʻa e Tamai Hēvaní pe ngaahi fakakaukau kehe fekauʻaki mo e tefitó.

ʻOku fakaʻuhingaʻi ʻe he Siasí ʻa e tuʻunga tangata pe fefiné ko e tangata pe fefine ʻi hono fāʻeleʻí (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní [2023], 38.6.23).
“Lēsoni 7 Naunau Teuteu ki he Kalasí: Ko e Natula mo e Taumuʻa Taʻengata ʻo e Tuʻunga Tangata pe Fefiné,” Ko e Fāmili Taʻengatá – Naunau Teuteu ki he Kalasí, institute.ChurchofJesusChrist.org.
Palesiteni Dallin H. Oaks ʻi he “General Conference Leadership Meetings Begin,” Newsroom.ChurchofJesusChrist.org.
“Liliu Tangata pe Fefiné” ʻi he konga Tokoni ʻo e Moʻuí ʻi he Gospel Library.

Ngaahi vitiō ke fili mei aí

Fakakaukau ke huluʻi ha taha ʻo e ngaahi vitiō ko ʻení, ʻoku maʻu ʻi he ChurchofJesusChrist.org, ke tokoni ke mahino ki he kau akó honau tuʻunga malava fakalangí pea mo e ʻofa ʻa e Tamai Hēvaní kiate kinautolu ko ʻEne fānaú.

Learn about God’s Plan for You (0:56)

0:57

Tamai Fakaemāmaní, Tamai Hēvaní (3:59)

3:55

God’s Greatest Creation (2:51)

2:47