Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 1:28–31; 2:1–25: “Ko e Fāmilí Ko e Uho Ia ʻo e Palani ʻa e Fakamoʻuí”

“Sēnesi 1:28–31; 2:1–25: ‘Ko e Fāmilí ko e Uho Ia ʻo e Palani ʻa e Fakamoʻuí,’” Fuakava Motuʻá – Tohi Lēsoni maʻá e Faiako Seminelí (2026)

“Sēnesi 1:28–31; 2:1–25: ‘Ko e Fāmilí ko e Uho Ia ʻo e Palani ʻa e Fakamoʻuí,’” Fuakava Motuʻá – Tohi Lēsoni maʻá e Faiako Seminelí

Sēnesi 1–2; Mōsese 2–3; ʻĒpalahame 4–5: Lēsoni 9

Sēnesi 1:28–31; 2:1–25

“Ko e Fāmilí ko e Uho Ia ʻo e Palani ʻa e Fakamoʻuí”

Hili hono fakatupu ʻo ʻĀtama mo ʻIví, naʻe fakatahaʻi kinaua ʻe he Tamai Hēvaní ʻi he malí. Naʻá Ne fekauʻi kinaua ke na fanafanau mo fakatokolahi ʻa e māmaní pea fepīkitaiʻaki. ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e nofo-malí mo e fāmilí ʻi he palani ʻa e Tamai Hēvaní.

Teuteu ʻa e tokotaha akó: Fakaafeʻi ʻa e kau akó ke ako ʻa e “Ko e Fāmilí: Ko ha Fanongonongo ki Māmani,” ʻo kumi ʻa e ngaahi akonaki ʻokú ne fakamatalaʻi ʻa e ʻuhinga ʻoku mahuʻinga ai ʻa e fāmilí ki he palani ʻo e fakamoʻui ʻa e Tamai Hēvaní.

Ngaahi ʻEkitivitī Ako ʻOku Ala Fakahokó

ʻI hono aleaʻi e mahuʻinga ʻo e nofo-malí mo e fāmilí ʻi he palani ʻo e fakamoʻui ʻa e Tamai Hēvaní, fakatokangaʻi ange ʻoku ʻikai aʻusia ʻe ha kau ako tokolahi he taimí ni ha ngaahi tūkunga fakafāmili lelei. Tokanga ki he ngaahi fiemaʻu mo e ngaahi fehuʻi ʻa e kau akó.

Ngaahi meʻa ʻoku mahuʻingá

Fakakaukau ke hiki ʻi he palakipoé ha sētesi taʻekakato ʻe taha pe lahi ange ʻokú ne fakatātaaʻi e founga ʻe lava ke hoko ai ha meʻa, ʻekitivitī, tokotaha, mo ha ngaahi meʻa pehē ko e makatuʻunga ʻo hono lavaʻi ha meʻá. ʻE lava ke ʻaonga e ngaahi sīpinga ko ʻení. Fakaafeʻi ʻa e kau akó ke fakakaukau ki he founga te nau fakafonu ai ʻa e ngaahi konga ʻoku ʻataá, pea kole ki ha kau ako kehekehe ke vahevahe ʻenau ngaahi talí mo e kalasí. Mahalo ʻe tokoni ke fakamatalaʻi ange ʻe lava foki ke ʻuhinga ʻa e foʻi lea uhó ki he mahuʻinga pe mahuʻinga tahá.

ʻOku mahuʻinga ʻa e … ki he lavameʻa ʻi he akó koeʻuhí .

Ko e … ko ha konga mahuʻinga ia ʻo ha moʻui fiefia koeʻuhí .

ʻOku hoko ʻa e … ko ha meʻa mahuʻinga ʻi heʻeku moʻuí koeʻuhí .

Hili hono vahevahe ʻe he kau akó ʻenau ngaahi talí, fakaʻaliʻali ʻa e fakamatala ko ʻeni mei he “Ko e Fāmilí: Ko ha Fanongonongo ki Māmani,” pea fakaafeʻi ha tokotaha ako ke ne lau leʻolahi ia. Kole ki he kalasí ke nau kumi ha tafaʻaki mahuʻinga ʻo e palani ʻo e fakamoʻui ʻa ʻetau Tamai Hēvaní.

ʻOku pehē ʻi he “Ko e Fāmilí: Ko ha Fanongonongo ki Māmani”:

Ko kimautolu, ko e Kau Palesitenisī ʻUluaki pea mo e Fakataha Alēlea ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku mau fakahā heni ʻi he loto māluʻia, ko e mali ʻi ha vā ʻo ha tangata mo ha fefine naʻe tuʻutuʻuni ia ʻe he ʻOtuá pea ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú. (“Ko e Fāmilí: Ko ha Fanongonongo ki Māmani,” Gospel Library)

ʻOkú ke pehē ko e hā ʻoku mātuʻaki mahuʻinga pehē ai ʻa e nofo-malí mo e fāmilí ʻi he palani ʻo e fakamoʻui ʻa e Tamai Hēvaní?
Ko e hā ha ngaahi founga te ke lava ai ʻo vakai ki he ngāue ʻa Sētane ke ʻohofi ʻa e nofo-malí mo e ngaahi fāmilí ʻi hotau kuongá ni?

Fakaafeʻi ʻa e kau akó ke fakakaukau ki ha niʻihi ʻo e ngaahi fehuʻi ʻoku nau maʻu pe ko ha niʻihi kehe, fekauʻaki mo e nofo-malí mo e fāmilí. ʻE lava ke nau tohi ʻenau ngaahi fehuʻí ʻi heʻenau tohinoa akó. Poupouʻi kinautolu ʻi heʻenau ako ʻi he ʻaho ní ke kumi ha ngaahi moʻoni pea tokanga ki he ngaahi ongo fakalaumālie ʻe lava ʻo tokoni ke tataki kinautolu ʻi hono kumi ʻa e tali ki he ngaahi fehuʻi ko ʻení.

Ngaahi akonaki mei he folofolá

Fakamatalaʻi ange ʻe lava ke tokoniʻi kitautolu ʻe he meʻa naʻe fai ʻe he Tamai Hēvaní hili hono Fakatupu ʻo e māmaní ke mahino ʻa e mahuʻinga ʻo e nofo-malí mo e fāmilí ʻi Heʻene palaní. Fakaʻaliʻali ʻa e ngaahi fakahinohino mo e ngaahi maʻuʻanga tokoni ko ʻení, pea ʻoange ha taimi ki he kau akó ke nau ako ia. Te mou lava ʻo ako fakataha ʻeni ko ha kalasi, pe ko hano vahevahe ʻa e kau akó ki ha ngaahi kulupu ke nau ako mo aleaʻi fakataha ʻa e ngaahi maʻuʻanga tokoni ko ʻení.

ʻI he lau ʻa e kau akó ʻa e ngaahi veesi mei he Sēnesi 2, mahalo te ke fie fakamatalaʻi ange ʻoku ʻuhinga ʻa e kupuʻi lea tokoni ʻoku taau ʻi he veesi 18 ki ha “tokotaha tokoni ʻoku feʻunga, taau pe hōhoa lelei mo” ʻĀtamá. Te ke lava foki ʻo fakamatalaʻi ange ko e fakamatala ki hono fakatupu ʻo ʻIvi mei he hui ʻo ʻĀtamá ko ha fakataipe ia pea te ne lava ʻo fakafofongaʻi ʻa e hoa ngāue tuʻunga tatau ʻi he vahaʻa ʻo e husepānití mo e uaifí (vakai, Russell M. Nelson, “Lessons from Eve,” Ensign, Nov. 1987, 87).

Ako ʻa e fakamatala mo e ngaahi potufolofola ko ʻení, ʻo kumi ha fakamoʻoni ki hono mahuʻinga ʻo e nofo-malí mo e fāmilí ki he ʻOtuá.

Naʻe akonaki ʻa Palesiteni Sipenisā W. Kimipolo (1895-1985) ʻo pehē:

Kuo [ʻomi] ʻe he ʻEikí … fakataha ʻa ʻĀtama mo ʻIvi, ʻa e fuofua tangata mo e fuofua fefine naʻá Ne tuku ki he māmaní, peá Ne fakahoko ha ouau mali māʻoniʻoni ke na hoko ai ko e husepāniti mo e uaifi. (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 237–38)

Ngaahi folofola ke akó:

Sēnesi 1:27–28 (fekau ʻa e ʻOtuá kia ʻĀtama mo ʻIví)

Sēnesi 2:18, 21–24 (Fakatupu ʻo ʻIví)

Ko e Sēnesi 2:24 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

Tokāteline mo e Ngaahi Fuakava 49:15–17 (Ko e akonaki ʻa e ʻEikí ʻo fakafou ʻi he Palōfita ko Siosefa Sāmitá)

Ko e hā ha ngaahi moʻoni naʻá ke maʻu ʻokú ne fakahaaʻi ʻa e mahuʻinga ʻo e nofo-malí mo e fāmilí ki he ʻOtuá?

Mahalo ʻe ʻiloʻi ʻe he kau akó ha ngaahi moʻoni hangē ko ʻení:

Kuo fekauʻi ʻe he ʻOtuá ʻa e ngaahi husepānití mo e uaifí ke fanafanau (Sēnesi 1:28).

Kuo pau ke taha ʻa e husepānití mo e uaifí pea ngāue ko ha ongo hoa tuʻunga tatau (Sēnesi 2:18, 24).

Ko e mali ʻi he vahaʻa ʻo ha tangata mo ha fefine ko e tuʻutuʻuni ia ʻa e ʻOtuá (Tokāteline mo e Ngaahi Fuakava 49:15).

Naʻe fakatupu ʻa e māmaní ke ʻi ai ha feituʻu ʻe lava ke fāʻeleʻi ai ʻa e fānau ʻa e ʻOtuá ki ha ngaahi fāmili pea nau fakalakalaka fakataha ai (Tokāteline mo e Ngaahi Fuakava 49:16–17).

ʻE ala tokoni ke aleaʻi ʻa e lea ko ʻeni ʻa Palesiteni Tōmasi S. Monisoní ko ha konga ʻo hoʻomou aleaʻi ʻa e ngaahi moʻoni ko ʻení.

Naʻe fakamamafaʻi ʻe Palesiteni Lāsolo M. Nalesoni ʻa e fatongia mahuʻinga ʻe fakahoko ʻe he ngaahi fāmilí hili hono fakatupu ʻe he ʻOtuá ʻa e māmaní:

Neongo ʻa e fungani ʻa e palanite ko Māmaní, ka ko ha konga ia ʻo ha meʻa fungani ange—ʻa e palani maʻongoʻonga ko ia ʻa e ʻOtuá. ʻI hono fakamatalaʻi fakanounou mahinongofuá, naʻe fakatupu ʻa e māmaní koeʻuhí ke ʻi ai ʻa e ngaahi fāmilí. ʻOku fakamatalaʻi ʻe he folofolá ko ha husepāniti mo e uaifi te na “hoko ʻa kinaua ko e kakano pē taha, pea ke fai ʻeni kotoa pē koeʻuhí ke fakahoko ʻe he māmaní ʻa e taumuʻa ʻo hono fakatupú” [Tokāteline mo e Ngaahi Fuakava 49:16]. (“The Creation,” Ensign, May 2000, 85)

ʻE tokoni fēfē hono manatuʻi ʻa e tefitoʻi fatongia ʻo e nofo-malí mo e fāmilí ʻi he palani ʻa e ʻOtuá ki he ngaahi fili ʻokú ke fai ʻi hoʻo moʻuí?
ʻE lava fēfē ke tokoniʻi kitautolu ʻe he ngaahi moʻoni mo e ngaahi akonaki ko ʻení ke tau fakahoko ha tali ʻi he taimi ʻoku tau vakai ai ki hono fakaangaʻi pe fakasiʻia ʻa e tokāteline ʻo e nofo-malí pe fāmilí?
ʻOkú ke pehē ʻe tokoni fēfē hoʻo muimui ki he ngaahi tuʻunga moʻui ʻa e Tamai Hēvaní fekauʻaki mo e nofo-malí mo e fāmilí ke ke hoko ʻo hangē ange ko Iá?

Faʻu ha tali

Ke tokoni ke fakamatalaʻi ʻe he kau akó ʻa e meʻa kuo nau ako fekauʻaki mo e mahuʻinga ʻo e nofo-malí mo e fāmilí ʻi he palani ʻa e ʻOtuá, fakakaukau ke vahevahe ha tūkunga hangē ko ʻení. Te ke lava ai ʻo liliu ʻa e tūkunga ko ʻení ʻo ka fiemaʻu ke fenāpasi ange mo homou anga fakafonuá mo e moʻui hoʻo kau akó. Hili hono vahevahe ʻa e tūkungá, fakaʻaliʻali ʻa e ngaahi fakahinohinó ki he kau akó ke faʻu ha tali.

ʻI ha taha ʻo e ngaahi kalasi fakaako ʻa ʻElisapetí, ne fakahoko ai ha fealēleaʻaki fekauʻaki mo e nofo-malí mo e fāmilí. Naʻe vahevahe ʻe ʻElisapeti ha niʻihi ʻo ʻene ngaahi fakakaukau fekauʻaki mo e mali ʻi he vahaʻa ʻo ha tangata mo ha fefiné pea mo e mahuʻinga ʻo e maʻu fānau ʻa ha ongomeʻa malí. Naʻe vahevahe ʻe ha tokolahi ʻo e kaungāako ʻo ʻElisapetí ha ngaahi fakakaukau naʻe kehe ʻaupito ia meiate ia. Hili ʻa e kalasí, naʻe fehuʻi ange ʻe ha talavou ko ʻAisake, ʻa ia ʻoku kau foki ʻi he kalasi semineli ʻa ʻElisapetí, kia ʻElisapeti pe ko e hā ʻokú ne maʻu ai ha ngaahi fakakaukau fakaʻolokuonga pehē fekauʻaki mo e nofo-malí mo e fāmilí.

ʻI hono fakaʻaongaʻi ʻa e meʻa kuó ke ako ʻi he ʻaho ní, faʻu ha tali ʻe lava ke vahevahe ʻe ʻElisapeti kia ʻAisake. Fakakau ʻeni ʻi hoʻo talí:

Ko ha fakamatala fekauʻaki mo e ʻuhinga ʻoku mahuʻinga ai ʻa e nofo-malí mo e fāmilí ki he Tamai Hēvaní mo ʻEne palani ʻo e fakamoʻuí
Ko ha akonaki ʻe taha pe lahi ange mei he folofolá pe kau taki ʻo e Siasí
Ko ha fakaafe ʻe lava ke vahevahe ʻe ʻElisapeti kia ʻAisake ʻe lava ʻo tokoni kiate ia

Hili hono maʻu ʻe he kau akó ha taimi ke teuteu aí, ʻoange hanau faingamālie ke vahevahe ‘enau ngaahi talí. ʻE lava ke nau vahevahe ʻa e ngaahi talí mo hanau hoa pe ʻi ha fanga kiʻi kulupu iiki. ʻE lava foki ke fakaafeʻi ha niʻihi tokosiʻi ʻo e kau akó ʻe loto-fiemālie ke vahevahe ʻenau ngaahi talí mo e kalasí pe ke fakafaivaʻi ʻa e tūkungá.

ʻOange ha taimi ki he kau akó ke fakakaukauloto ki he meʻa ne nau ako mo ongoʻi ʻi he ʻaho ní. Te nau lava ʻo fakakaukau ki he ngaahi moʻoni ne nau ako naʻá ne tali ha niʻihi ʻo ʻenau ngaahi fehuʻí. Fakaafeʻi kinautolu ke lekooti ha faʻahinga ongo fakalaumālie kuo nau maʻu ʻi heʻenau tohinoa akó. Fakamoʻoni ki he ngaahi moʻoni kuo mou aleaʻi ʻi he ʻaho ní.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea folofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea folofola mahuʻinga ki he Sēnesi 2:24 ko e “[ʻE] pīkitai [ha tangata] ki hono ʻunohó … pea te na kakano taha pē.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Sēnesi 2:21–22. Naʻe fakatupu moʻoni nai ʻa ʻIvi mei he hui vakavaka ʻo ʻĀtamá?

Naʻe akonaki ʻa Palesiteni Sipenisā W. Kimipolo (1895–1985) ʻo pehē “ko hono moʻoní, ko e talanoa ʻo e hui vakavaká, ko ha heliaki ia” (“The Blessings and Responsibilities of Womanhood,” Ensign, Mar. 1976, 71).

Naʻe fakamatala ʻa Palesiteni Lāsolo M. Nalesoni ki he founga ʻoku heliaki pe fakataipe ai ʻa e hui vakavaká ʻi he fakamatala ki hono fakatupu ʻo ʻIví:

Ko hono toʻo ʻa e hui vakavaká mei he tafaʻakí hangē ʻokú ne fakataipe ha hoa ngāué. ʻOku ʻikai pehē ke hanga ʻe he hui vakavaká ʻo fakafofongaʻi hono puleʻi pe fakamoʻulaloaʻi, ka ko ha vā fetuʻutaki ʻoku potupotutatau ko e hoa ngāue, ke ngāue mo nofo fakataha. (“Lessons from Eve,” Ensign, Nov. 1987, 87)

Fēfē leva ʻa e kakai ʻoku ʻikai ke nau maʻu ha nofo-mali taʻengata pe fāmili ʻi he moʻui ko ʻení?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:51

ʻOku ou fakahaaʻi ʻeku ʻofa mo e manavaʻofa ki he ngaahi hoa mali ʻoku mali pea ʻoku ʻikai lava ke nau maʻu ʻa e fānau ʻoku nau fakatuʻamelie loto-vēkeveke ki aí, pea ki he houʻeiki fafine mo tangata kuo teʻeki ke nau maʻu ha faingamālie ke mali ʻo fakatatau mo e fono ʻa e ʻOtuá. Ko e ngaahi fakaʻānaua ʻo e moʻuí kuo teʻeki ke hoko ʻo moʻoní, ʻoku faingataʻa ke mahino ia ʻo kapau ʻoku mamataʻi pē ia mei he fakakaukau fakamatelié. ʻI heʻeku hoko ko e tamaioʻeiki ʻa e ʻEikí, ʻoku ou palōmesi atu ʻi hoʻo tauhi faivelenga kia Sīsū Kalaisi mo hoʻo ngaahi fuakavá, te ke maʻu ai ha ngaahi tāpuaki ʻi he moʻuí ni ko hano totongi huhuʻi pea te ke maʻu hoʻo ngaahi holi māʻoniʻoní ʻi he ʻitānití ʻo fakatatau ki he finangalo ʻo e ʻEikí. (“Ko e Fononga Fakataautaha ʻa ha Fānau ʻa e ʻOtuá,” Liahona, Mē 2021, 47)

ʻOku fefakahīkihikiʻiʻaki fēfē nai ʻe he houʻeiki tangatá mo e fafiné kinautolu ko ha kaungā ngāue tuʻunga tatau?

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻUhinga 1: Ko e natula ʻo e laumālie ʻo e tangatá mo e fefiné ke na fefakakakatoʻaki mo fefakahaohaoaʻiʻaki, ko ia naʻe fakataumuʻa ai ʻa e tangatá mo e fefiné ke na fakalakalaka fakataha atu ki he hakeakiʻí. …

… Naʻe fiemaʻu ʻa hono fakatahaʻi makehe ko ia ʻo e ngaahi tuʻunga fakalaumālie, fakatuʻasino, fakaʻatamai, mo fakaeloto ʻo e tangatá mo e fefiné, kae lava ke fakahoko ʻa e palani ʻo e fiefiá. He ʻikai lava ʻe he tangatá pe fefiné ʻo fakahoko ʻiate ia pē ʻa e taumuʻa ʻo hona fakatupú. …

ʻUhinga 2: ʻI he palani fakalangí, ʻoku fakatou fiemaʻu ʻa e tangatá mo e fefiné ke na ʻomai ha fānau ki he māmaní pea ke na ʻoange ʻa e ʻātakai lelei tahá ki hono ohi mo e tauhi ʻo e fānaú.

… Ko e mali ko ia ʻi he vā ʻo e tangatá mo e fefiné ko e founga pē ia kuo fakamafaiʻi ke ʻomi ai ki he māmaní ʻa e ngaahi laumālie mei he maama fakalaumālié. (“Marriage Is Essential to His Eternal Plan,” Ensign, June 2006, 83, 84)

Ngaahi ʻEkitivitī Fakalahi ki he Akó

Sēnesi 2:1–3. Naʻe mālōlō ʻa e ʻOtuá ʻi he ʻaho Sāpaté

Kapau ʻe ʻaonga ki hoʻo kau akó hano faʻu ha palani fakalelei ke tauhi ʻa e ʻaho Sāpaté ke māʻoniʻoní, te ke lava ʻo fakaʻaongaʻi ha taimi ke ako ai ʻa e Sēnesi 2:1–3. Fakamatalaʻi ange ko e Sēnesi 2 ko ha hoko atu ia ʻa e fakamatala ʻo e Fakatupú. Fakaafeʻi ha tokotaha ako ke ne lau leʻolahi ʻa e Sēnesi 2:1–3. Kole ki he kalasí ke muimui ki ai pea kumi ʻa e meʻa naʻe kehe hono fakahoko ʻe he ʻEikí ʻi he ʻaho hono fitú.

Hili iá, pea ʻeke leva ʻa e fehuʻi ko ení:

Ko e hā ha moʻoni ʻoku tau ako fekauʻaki mo e ʻaho Sāpaté mei he sīpinga ʻa e ʻEikí ʻi he ngaahi veesi ko ʻení?

Mahalo ʻe ʻiloʻi ʻe he kau akó ha foʻi moʻoni hangē ko ʻení: Te tau lava ʻo tauhi ʻa e ʻaho Sāpaté ke māʻoniʻoni ʻi heʻetau mālōlō mei heʻetau ngaahi ngāué pea tokanga taha ki he ngaahi meʻa toputapú.

Fakakaukau ke aleaʻi ha ngaahi fehuʻi hangē ko ʻení:

Ko e hā ha ngaahi founga te tau lava ai ʻo tokanga taha ki he ngaahi meʻa toputapú ʻi he ʻaho Sāpaté?
ʻOkú ke ongoʻi fēfē ʻi hono tāpuekina koe ʻi hoʻo mālōlō mei hoʻo ngaahi ngāué ʻi he ʻaho Sāpaté mo tokanga taha ki he ngaahi meʻa toputapú?

Te ke lava ʻo fakaafeʻi ʻa e kau akó ke fakalaulauloto ki ha ngaahi founga te nau lava ai ʻo fakamāʻoniʻoniʻi kakato ange ʻa e ʻaho Sāpaté. Hili iá pea poupouʻi kinautolu ke nau ngāueʻi ha taha ʻo e ngaahi fakakaukau ko ʻení.

Sēnesi 2:18, 24. Ngaahi hoa ngāue tuʻunga tataú

Mahalo ʻe ʻaonga ki he kau akó ha toe fealēleaʻaki fekauʻaki mo e moʻoni ko ia kuo pau ke hoko ʻa e husepānití mo e uaifí ko ha hoa ngāue tuʻunga tatau. Hili hoʻo ʻiloʻi ʻa e foʻi moʻoni ko ʻení, te ke lava ʻo vahevahe ʻa e lea ʻa ʻEletā Tēvita A. Petinā ʻi he “Ngaahi Maʻuʻanga Tokoni Kehé.” Te mou lava foki ʻo aleaʻi ha ngaahi fehuʻi hangē ko ʻení:

ʻOkú ke pehē ʻoku ʻuhinga ki he hā ʻa e hoko ʻa e uaifí mo e husepānití ko ha hoa ngāue tuʻunga tatau ʻi he nofo-malí?
Ko e hā ʻoku mahuʻinga ai ki he husepānití mo e uaifí ke na feohi ko ha hoa tuʻunga tataú?

Ngaahi vitiō fekauʻaki mo e mahuʻinga ʻo e nofo-malí mo e fāmilí

Fakakaukau ke fakaʻaongaʻi ha taha ʻo e ngaahi vitiō ko ʻení ke tokoni ke mahino ange ki he kau akó ʻa e mahuʻinga ʻo e nofo-malí mo e fāmilí:

“Renaissance of Marriage” (2:36). Naʻe fakamatalaʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e founga kuo tokoniʻi ai ia ʻe heʻene mali kia Sisitā ʻAealingí “ke hoko ko e lelei taha ʻo e ngaahi meʻa kotoa pē naʻá ne fie hokosiá.”

2:36
“What Is the Purpose of Family?” (1:17). ʻOku fakamatalaʻi ʻe he vitiō ko ʻení ʻa e fāmilí ko e faʻunga fakalangi ia ʻo e sōsaietí.

1:17
“Ko hono Maʻu ʻo e Fānaú ʻi he Tuí” (2:25). Ko hono fakamatalaʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi akonaki fekauʻaki mo e fekau ʻa e ʻEikí ke fanafanau mo fakatokolahi ʻa e māmaní.

2:15